¹ Ucutu TÖ̧Ä̧NÄ̧HUA̧ DIOS i̧tti̧mö̧jä̧. 'Cuicuähuätucuä, cui'änättö̧mä̧ quiräu cuicuätucuä hua'inä̧tö̧rö̧ amöcuädömä, ² Ja̧'hua̧nö̧ ja̧'a̧ ucutu ttö̧ja̧mä̧ TÖ̧Ä̧NÄ̧HUA̧ i̧tti̧mö̧ jö̧nä̧tä̧ 'cä̧'ȩpö̧ ku̧nä̧huo̧tö̧jä̧ ja̧'hua̧ta̧'a̧nö̧ TÖ̧Ä̧NÄ̧HUA̧MÄ̧ pojopö ȩmi̧nä̧u̧jä̧ i̧tti̧mö̧ päcui'ätucunätä̧, korotö pi̧jä̧ rȩjȩnä̧ ka̧cuä̧tö̧ttö̧'i̧nä̧ yabonänö. ³ Ji̧yȩtȩ'inä surojömä cucuätucuä, ⁴ Pitö ja̧'a̧ isotö cucuätucua pä'ö huotömä: päcäyä'inä, oveja'inä, cabra'inä. ⁵ tȩ'u̧rä̧'inä, gacela'inä, corzo'inä, de'a i̧sa̧ cabra'inä, 'ibice pättäcuru'inä, antilope pättäcuru'inä ja̧'hua̧ta̧'a̧nö̧ de'a ovejarö'inä. ⁶ O´catoi'önä isotö ttö̧nä̧ji̧yä̧ 'cä̧rä̧cä̧ huotö cucuätucua pä'ö huotömä, pitö ja̧'a̧, ttö̧no̧ji̧yä̧ ku̧nä̧rä̧tö̧ ja̧'hua̧ta̧'a̧nö̧ 'cä̧rä̧cä̧ huotötta'anä ppa̧'a̧dä̧rö̧ yä'cupö cuätömä. ⁷ Ja̧'hua̧nö̧ ja̧'a̧nä̧ ttö̧no̧ji̧yä̧'i̧nä̧ 'cä̧rä̧cä̧ huotö tta'anä ppa̧'a̧dä̧rö̧ yä'cupö cuättö tta'anä cucuätucua pä'ö huocotömä pitö ja̧'a̧: Camello'inä, conejo'inä ja̧'hua̧ta̧'a̧nö̧ damán'inä; yä'cupö cuätötta'anä ttö̧no̧ji̧yä̧'inä 'cä̧rä̧cä̧ huocotö cucuätucuatö pä'ö huocotömä, ucuturumä suropätö jö̧nä̧tä̧ ttäcuotö. ⁸ Cuchimä su̧ro̧pa̧ jö̧nä̧tä̧ jä̧cua̧ ucuturumä, ja̧u̧mä̧ ö̧no̧ji̧yä̧ ku̧nä̧rö̧ja̧'a̧nä̧ ppa̧'a̧dä̧rö̧mä̧ yä'cupocö; ja̧u̧rö̧mä̧ su̧ro̧pa̧ jö̧nä̧tä̧ to'cuätucuaröjä. Cuchi idepämä cucuätucuä ja̧'hua̧ta̧'a̧nö̧ 'corujuoächäjittö'inä mecuä̧tu̧cuä̧rö̧. ⁹ O'cajuiyönä aje rö̧jä̧tö̧rö̧mä̧ cucuätucua pä'ö ja̧'a̧: o'catoi'önä ttihuiribiyu'inä, tti̧jȩsa'inä ku̧nä̧rä̧tö̧rö̧mä̧; ¹⁰ ja̧'hua̧nö̧ ja̧'a̧nä̧ ttihuiribiyu'inä, tti̧jȩsa'inä jui'ätörömä cucuätucuä; jahuätömä suropätö jö̧nä̧tä̧ to'cuätucuatöjá. ¹¹ Ju'tojunä̧ co̧'ä̧rä̧tö̧ surojö jui'ätörömä̧ o'catoi'önä̧rö̧tä̧ cucuätucuajá, ¹² ja̧'hua̧nö̧ ja̧'a̧nä̧ pitö ja̧'a̧ cucuiyätucua pä'ö ttäcuotömä̧: pare, möca, aje pare, ppi̧yu̧ pare, ¹³ Tu̧'a̧ pare ja̧'hua̧ta̧'a̧nö̧ i̧di̧cua̧ paré, korotö paretö̧ jä̧'i̧nö̧'a̧nö̧ huotörö'i̧nä̧, ¹⁴ Ucumä pitö co'ätöttömä cucuä, ¹⁵ avestruz'inä, yodo pare'inä, kä̧cuä̧'i̧nä̧, korotö parȩtö̧ttö̧'i̧nä̧, ¹⁶ jua̧ra̧ra̧tö̧tö̧ a̧'u̧cua̧'i̧nä̧, buo'inä, tȩa̧'i̧nä̧mä̧, ¹⁷ pelicano pättäcuttu'inä, ejo ttu'inä, cormorán pättäcuttu'inä. ¹⁸ Ucumä cucujuiyö'anö ja̧'a̧ pitörömä cigueña'inä rasa'inä, abubilla'inä ja̧'hua̧ta̧'a̧nö̧ cuo̧ju̧'i̧nä̧. ¹⁹ O'cato'inä ji̧nä̧ yo̧mȩtȩ ko̧ä̧rä̧tö̧mä̧ ucurumä surojö cuotö ja̧'a̧; ja̧'hua̧nö̧ ja̧'a̧ttö̧ cuäcuähuocotö. ²⁰ Ucumä o'cajuiyönä coätöttömä adihuätörötä cucua pä'ö ja̧'a̧. ²¹ Ucutumä amonä pa̧ja̧tö̧ 'corujuo'ächörömä cucuätucuä; cuidepiyu jacua ko̧ i̧chä̧cuä̧ha̧rö̧ cuiyö'anö ja̧'a̧, ja̧u̧ta̧ ucui'ä cua'anö; ja̧'hua̧nö̧ jö̧ juiyöttömä i̧chä̧cuä̧hua̧rö̧tä̧ mi̧cuä̧nä̧ cuiyö'änö ja̧'a̧. Ucu isitö recuätö ja̧'a̧ CU̧Ä̧NÄ̧HUA̧ DIOS kä̧'ȩpö̧ u̧ju̧ni̧nä̧u̧mä̧. Cabra mu̧ä̧ya̧rö̧mä̧ ja̧ju̧ katatejanemä dacujuiyö'anö ja̧'a̧. ²² Jeruhuoca'a ucumä cui̧yä̧cuä̧jä̧ cuaditähuättö ju'to kä'cö jo̧mȩ, cuähuämä 'cuä'opönätä̧ a̧'ȩ jö̧ta̧'a̧nö̧ rä'opö ka̧'a̧. ²³ CU̧Ä̧NÄ̧HUA̧ ä'cajämettö̧ cucu'anö ja̧'a̧, ttöttö surojömettö̧ pä'ö pätetö hueomettö̧, u̧huä̧ju̧ ote ju'tö kä'co jo̧mȩ kä̧'ȩpö̧, jareönä cua̧huä̧ vinottö̧'inä, a̧dȩjattö'inä, ja̧'hua̧ta̧'a̧nö̧ cuä̧ji̧ pä̧ca̧yö̧ttö̧'i̧nä̧ ovejatö̧ttö̧'i̧nä̧ ä̧cuo̧mȩnä̧ tti̧tti̧mu̧ttö̧; ja̧'hua̧nö̧ jȩpö̧tä̧ cu̧huo̧huä̧chä̧cuo̧tö̧jä̧ CU̧Ä̧NÄ̧HUA̧TU̧CU̧ DIOSRÖMÄ. ²⁴ Cu̧jo̧mȩ otó ja̧a̧ttö̧ cuȩpi̧yö̧nä̧ jö̧ttö̧mä̧, DIOS surojö juiyönä ö̧jo̧mecu̧, TÖ̧Ä̧NÄHUA̧ iyö, ²⁵ Ucú cuiya pe'ö pärotö cui̧cua̧cu̧jä̧ pärätätä, pärätä juäocua'atä cuȩpä̧cua̧jä̧, ja̧'hua̧nö̧ ja̧'a̧ttö̧ juȩne tä'i ucú CUI̧Ä̧NÄHUA̧ DIOS ȩmi̧yä̧cua̧jä̧. ²⁶ Ja̧'hua̧nö̧ ja̧'a̧ttö̧ juorö ucurutä pä̧huä̧rö̧jö̧ cuȩmä̧cua̧jä̧ pärätänä: päcäyä jö̧ttö̧'i̧nä̧ oveja jö̧ttö̧'i̧nä̧ vino jö̧ttö̧'i̧nä̧ ri̧ȩnä̧ ä̧'ti̧poya jö̧ttö̧'i̧nä, ja̧'hua̧ta̧'a̧nö̧ koro ucutä cuju'cujuei, juorö CUI̧Ä̧NÄHUA̧ DIOS ö̧jo̧mȩttö̧ cu̧cuä̧cua̧jä̧ ja̧'hua̧nö̧ ja̧'a̧ttö̧ ȩsȩhuä̧cua̧jä̧ ucurö'inä cuahuaruhuärö'inä. ²⁷ Levi ttö̧ja̧'i̧sa̧ ucutucu ö̧jö̧ttö̧mä̧, cu̧nöchiätucuärö, ja̧'hua̧nö̧ ja̧'a̧nä̧ jo̧u̧mä̧ ji̧'qui̧cha̧nö̧'i̧nä̧ ucú cujö̧nä̧rö̧ ȩma̧ peömä jui̧a̧. ²⁸ Huäbodäcuä a̧'ȩ päia'a beipächomenä, cu̧cuä̧ huähuä ji̧yȩtä̧ a̧'ȩnä̧ huȩjä̧ji̧ttö̧ tömöre jähuä jo̧mȩ cuiyaja ja̧'hua̧nö̧ jȩpö̧ cuidepiyu jacuä ca̧ca̧tö̧ cu̧ju̧na̧jä̧; ²⁹ ja̧'hua̧ta̧'a̧nö̧ Leví ahuaruhuä 'cotömä ttu̧cuä̧cuȩ'inä ja̧'hua̧ta̧'a̧nö̧ tti̧rȩjä̧ ttiya pä'ö jä̧jä̧'inä iyähuocotö pinä̧tö̧ ja̧'hua̧ta̧'a̧nö̧ ko̧ro̧jä̧ttö̧ ichäcuähuotömä, juhua'atäcu reyotömä, recuamö cuidepiyu jacuä ka̧cuä̧tö̧mä̧ ichö ttucuäcuotö, cui'ipömä suttädi'äcuotö. Pi̧yȩ jȩpi̧ TÖ̧Ä̧NÄ̧HUA̧ DIOS adiu jönä ppädacu pä'ömä cuaditömä o'cajuiyönä̧tä̧.