¹ Ucututtö ya̧tȩ 'cuäopö̧cuȩ huȩnȩ jiäcuähuä ttö̧ja̧sa̧cö̧ 'cua̧ti̧cu̧cuä̧huä̧ ttö̧ja̧cö̧ räopö, 'cuäopä̧cuȩcö̧, jȩtto̧cö̧ juäicö̧ jȩpö̧ jiähuöttömä ² ja̧'hua̧ta̧'a̧nö̧ 'cuä̧o̧pä̧cuȩcö̧ jȩtto̧kö̧ jä̧i̧'jö̧ juä̧i̧cö̧ jȩpö̧ i̧jȩpö̧ttö̧mä̧, ja̧'hua̧ta̧'a̧nö̧ ja̧u̧ jȩttö̧cö̧ jä̧'i̧juäi 'cuäopöttömä, ja̧u̧ ucuturu ji'huäji pa̧'a̧nö̧ pä'öttömä: Korotö ttö̧ä̧nä̧huo̧tö̧ tto'ca'anä ti̧'cha̧'a̧nä̧ ja̧'a̧tä̧ topitö, yorö'iso ucu cuieruhuinäcu̧rö̧, ja̧'hua̧ta̧'a̧nö̧ ucuo te'äu chucuocua'anä ja̧'a̧tä̧ topitö". ³ Ja̧u̧ 'cuäopä̧cuȩ huȩnȩ jiäcuähuä ttö̧ja̧sa̧cö̧, 'cuo̧ti̧ jiäcuähuä ttö̧ja̧sa̧cö̧ jiäumä cuesetä; TÖ̧Ä̧NÄ̧HUA̧ CU̧Ä̧NÄ̧HUA̧TÖ̧CU̧ DIOSMÄ ka̧cuä̧mö̧ toäcujä̧ isopäi'önä ese repecuaja pä'ö TÖ̧Ä̧NÄ̧HUA̧ CU̧Ä̧NÄ̧HUA̧TÖ̧CU̧ DIOSRÖMÄ cuamiso'qui o'cajuiyönä, ja̧'hua̧ta̧'a̧nö̧ cua̧'cua̧rö̧'i̧nä̧ o'cajuiyönä. ⁴ Ucumä TÖ̧Ä̧NÄ̧HUA̧ CU̧Ä̧NÄ̧HUA̧TÖ̧CU̧ DIOS o'ca'anä̧tä̧, ucuotirö, hueinö huȩnȩmä̧ jȩpi̧ ja̧'hua̧nö̧ jȩpö̧ i̧huȩnȩ ucuocumä ucuoti, juhua'atäcu ja̧u̧rö̧tä̧ ucuomä tecuäjá ja̧'hua̧nä̧ jo̧mȩnä̧ ja̧u̧cu̧ todeunä cu̧jä̧cua̧jä̧. ⁵ Ja̧u̧ 'cuäopö̧cuȩ jiäcuähuä ttö̧ja̧sa̧cö̧, 'cua̧ti̧ jiäcuähuä ttö̧ja̧sa̧cö̧, ja̧u̧mä̧ cuä'ö tticuarö pä'ötä jä̧cua̧, juhua'amä TÖ̧Ä̧NÄ̧HUA̧ CU̧Ä̧NÄ̧HUA̧TÖ̧CU̧ DIOSRÖ cu̧ra̧huä̧rö̧nä̧ jȩä̧'i̧ja̧'a̧ttö̧, Egipto rȩjȩttö̧ ucuru rä'epö icuinörö̧, a̧mä̧cö̧ cuaditönä huettomettö̧ ȩmö̧ rä'epö icuinö̧rö̧. Ja̧u̧ 'cuä̧o̧pä̧cuȩ jiäcuähuä ttö̧ja̧sa̧mä̧ TÖ̧Ä̧NÄ̧HUA̧ CU̧Ä̧NÄ̧HUA̧TÖ̧CU̧ DIOS päinö'a̧cuä̧ cui̧'cha̧ pä'ö hueinöttö̧ 'cä̧'ȩpö̧ icua päcujä̧. Ja̧'hua̧nö̧ ja̧'a̧ttö̧ ja̧u̧ suronä jȩpö̧rö̧mä̧ rä'epö icuätucuirö. ⁶ Cui̧jä̧hua̧ jö̧ttö̧'i̧nä̧, cua̧ju̧ ki̧tti̧, ucutä cui̧tti̧ jö̧ttö̧'i̧nä̧, cuittiju jö̧ttö̧'i̧nä̧, cuirecua repecuacua jö̧ttö̧'i̧nä̧ cua̧hua̧ru̧cua̧ cua̧cua̧nä̧ juiyo repecuäcu ja̧'a̧nä̧, yä̧huä̧i̧nä̧mä̧ ȩpu̧ päcujä,"Ti̧'cha̧ korotö ttö̧ä̧nä̧huo̧tö̧rö̧ ⁷ ucuo tetähua, ucu'inä cuä̧do̧tö̧ minä'inä tti̧ä̧ru̧huä̧u̧ru̧, ucutä cuippeyänä yapare ttö̧ä̧nä̧huo̧tö̧ttö̧mä̧'cö̧, ucuttö tö'cömä'cö ucuttömä otó, porö pi̧jä̧ o'cajuiyönä̧tä̧". ⁸ Cuesehuärö ja̧u̧mä̧ ä̧ju̧cu̧'i̧nä̧ cuä̧ju̧cuä̧rö̧. Ji̧'qui̧cha̧nö̧'i̧nä̧ re tocu'ärö, rȩrö̧jö̧nä'i̧nä̧ tocu'ärö jȩi̧nö̧mä̧. ⁹ Ja̧'hua̧nö̧ jȩi̧nö̧mä̧, ucumä jueönä̧tä̧ cuä'ö cuicuapä'ö hua̧; ja̧'hua̧nö̧ ja̧'a̧ttö̧ ucutä ja̧'a̧tó ä̧cuo̧mȩnä̧ ido'qui icu cuä̧cuä̧cua̧mä̧ ja̧u̧ru̧, ja̧u̧nu̧ o'ca'atä ttö̧ja̧ o'catoinä cuä̧ttä̧cua̧. ¹⁰ Ja̧u̧ru̧mä̧ i̧nä̧dunä icuäutä cuä'ö tti̧cuä̧cua̧, jua'amä CU̧Ä̧NÄ̧HUA̧ DIOSRÖ ttöarodönä jȩa̧ pä'ö amucuäda'attö̧, ucuturu Egito rȩjȩra̧'a̧ttö̧ rä'epö icuinörö̧, amäcö huȩttö̧rä̧u̧ aditä cu̧jä̧tu̧cuo̧mȩttö̧ rä'epinörö. ¹¹ O'catoi'önä Israél ttö̧ja̧mä̧ ä̧ju̧cu̧ yettecui'äcuotö, jua'a yabocumä jȩpo̧co̧tö̧ ttäcuotö ucututtumä. ¹² Ya̧tȩ cutahuiyättö päa'a cuä̧ju̧cu̧ttu̧mä̧, CU̧Ä̧NÄ̧HUA̧ DIOS iyäcu cu̧ja̧ pä'ömä̧: ¹³ "Ucutu cuahuaruhuättötä rä'opätö suronä amucuädätömä ja̧'hua̧nö̧ ja̧'a̧ttö̧ tötahuyiyättö oto o'ipö pä'ätö: Ti̧'chä̧tu̧cua̧ ichätucui ucuo tetähua korotö yapare ttö̧ä̧nä̧huo̧tö̧rö̧ ucutu'inä ji̧nä̧ cui̧ȩru̧huä̧tu̧cuä̧u̧ru̧." ¹⁴ Ja̧'hua̧nö̧ ja̧'a̧ttö̧ 'cuäopäjí to̧'ä̧cua̧, u̧sä̧cua̧, 'cuäopajita'anö u̧hu̧jua̧ pä'ö ttu̧huȩcuä̧nä̧ u̧sä̧cua̧. Iso päi'önä ja̧jí̧ ö̧'o̧cui̧'ö̧ttö̧mä̧ ja̧'hua̧ta̧'a̧nö̧ ucututtä ötahuiyänä ko̧cuä̧tö̧ tta̧'a̧nö̧ rö̧ä̧nä̧ jo̧mȩ suronä jȩtta̧'a̧ pä'ö, juorö toputä jȩä̧cua̧. ¹⁵ Jo̧u̧ ötahuiyänä kä̧tu̧rö̧ curä'chu so̧o̧dänä curohuähuäcuajä, tti̧ji̧pi̧yö̧nä̧ siepu cui̧cuä̧cua̧jä̧ ja̧'hua̧ta̧'a̧nö̧ juȩnȩ o'catoinä ka̧cuä̧tu̧rö̧'i̧nä̧, ttä̧ji̧mu̧rö̧'i̧nä̧. ¹⁶ Ucú cu̧ca̧ca̧ta̧ta̧cua̧jä̧ o'cajuiyönä ttö̧ju̧nä̧rö̧ mänä kä'co rutu ötahuiyä köhuö cui̧cuä̧cua̧jä̧, ja̧'hua̧ta̧'a̧nö̧ ttö̧ju̧nä̧rö̧mä̧ cui̧ya̧cua̧jä̧ CUI̧Ä̧NÄHUA̧ DIORÖ. Jo̧u̧ ötahuiyämä 'cuapunä juiyacuome; päajita'anömä amöcuädö ttäditiyäcuome. ¹⁷ Ji̧yȩtȩ'i̧nä̧ 'chö̧cuä̧ri̧ya̧'a̧nö̧ ja̧'a̧ DIOS hueinömä siepu cuicua pe'ö ucú cu̧mu̧nä̧. Pi̧yȩmä̧ 'cuaopiya'anö ja̧'a̧, TÖ̧Ä̧NÄHUA̧ suronä amucuadäji 'cuäopächä̧cua̧, i̧jȩpä̧cua̧ rȩrö̧jö̧ toäcuähuä, ucuru tta̧huä̧rä̧cua̧ ja̧'hua̧ta̧'a̧nö̧ rö̧ȩnä̧ yo̧cuä̧huä̧cua̧jä̧, ja̧'hua̧nö̧ ja̧'a̧ttö̧ cuäätucu minärö esecu u̧ju̧ni̧nö̧ta̧'a̧nö̧. ¹⁸ Jo̧u̧ jȩä̧cua̧ pi̧yȩ I̧Ä̧NÄHUA̧ DIOS i̧huȩnȩ a̧ju̧cua̧'a̧ttö̧, to̧ä̧rä̧cua̧ o'cajuiyönä hueähuä huȩnȩ́ ttö̧tä̧ jitä moró̧ huedömä, adiunätä̧ jȩ'cua̧ pe'ö ucú CUIÄ̧NÄHUA̧ DIOS ö̧jo̧mȩttö̧.