¹ Pi̧yȩtó̧ TÖ̧Ä̧NÄHUA̧, cuäotucu DIOS ucuturu huȩyu̧tu̧ iyinö ja̧'hua̧ta̧'a̧nö̧ jȩä̧cuä̧huä̧ pä'ö ku̧nä̧huä̧ pi̧jä̧nä̧ kä̧nö̧ jȩ'cuä̧tu̧cuȩcuȩi̧mä̧, cu̧ju̧nä̧rä̧tu̧cua pe'ö i̧yi̧nä̧u̧jä̧, o'cajuiyönä moró̧ cui̧jo̧mȩbu pi̧jä̧nä̧. ² Ucumä siepu cui̧cuä̧cua̧jä̧ ttö̧ja̧cuo̧mȩ o̧du̧nä̧ yapare tti̧ä̧nä̧huo̧tu̧rö̧ ttöcuotomemä ju'toju mö̧ä̧'qui̧yu jo̧mȩ'i̧nä̧ mö̧ä̧'qui̧yu pämäro ppäinä ja̧'hua̧ta̧'a̧nö̧ daú de'inä. ³ Ucumä pparopu cui̧cuä̧cua̧jä̧ köicu ttiyome'i̧nä̧ ja̧'hua̧ta̧'a̧nö̧ pparopu cui̧cuä̧cua̧jä̧ inäjuä̧ttö̧ 'ca̧tö̧ ttaditönö'i̧nä̧ ja̧'hua̧ta̧'a̧nö̧ köhuö cui̧cuä̧cua̧jä̧ yapare ttiä̧nä̧hua̧tu̧ tta̧'cua̧juȩ'i̧nä̧ ja̧'hua̧ta̧'a̧nö̧ juȩnȩmä̧ tti̧mi̧'i̧nä̧ siepu cui̧cuä̧cua̧jä̧. ⁴ Ja̧'hua̧nö̧ jȩpu̧mä̧ ucuo tecuähuätucu juiya'anö ja̧'a̧ CUI̧Ä̧NÄHUA̧TU̧CU̧ DIORÖMÄ. ⁵ Ja̧'hua̧nö̧ ja̧'a̧nä̧ u̧huȩnȩ TÖ̧Ä̧NÄ̧HUA̧ DIOS ya̧tȩtä̧ i̧tti̧mö̧ttö̧mä̧ o'catoi'önä̧rö̧ ö'ojo'äcua̧ i̧mi̧ ka̧ pä'ö jo̧mȩmä̧, ju̧huȩnȩtä̧ jä̧cua̧'a̧ Ja̧u̧ ö̧jä̧cuo̧mȩmä̧ ja̧'hua̧ta̧'a̧nö̧ ju̧huȩtȩ ja̧'a̧ ucu cui̧chä̧cuo̧mȩ'i̧nä̧. ⁶ Ju̧huȩnȩtä̧ ja̧'a̧ ku icu iyähuä cuiyäcyomemä, ucutu i̧sa̧rö̧ cuä'ö cuicuäcucuäcuomemä, tomöre jähuättö 'cä̧'ȩpö̧ ku̧nu̧ ja̧'hua̧ta̧'a̧nö̧ cuaditähuättö cuiya pä'ö 'cä̧'ȩpö̧ cu̧ju̧nä̧ji̧'inä, chi̧yä̧cua̧sä̧ pä'ö, pä'ö cu̧ju̧ni̧nö̧'inä, ucuru pä̧huä̧rö̧jo̧mȩnä̧ cuiya päcuinö'inä ja̧'hua̧ta̧'a̧nö̧ päcäyä ä̧cuo̧mȩnä̧ i̧tti̧rö̧'i̧nä̧ juhua'atäcu cuä̧ji̧mö̧ ji̧nä̧ yo̧mȩtȩ ka̧cuä̧tö̧ttö̧'i̧nä̧. ⁷ Juhuorötä TÖ̧Ä̧NÄ̧HUA̧ ä'ca jo̧mȩtö̧ ja̧'a̧ cu̧cuä̧ cucuäcua'amä ja̧'hua̧ta̧'a̧nö̧ o'cajuiyönä cuaditä'ijömä esehui, ucurutä'inä ja̧'hua̧ta̧'a̧nö̧ cui̧tti̧mö̧rö'inä TÖ̧Ä̧NÄ̧HUA̧ adiunä jö̧nä̧tä̧ ppädä'ijömä. ⁸ Ucumä jitä mo̧ro̧ jȩtö̧ o'cajuiyönämä jȩpo̧cö̧ cuä̧cua̧jä̧, jitä o'catoi'önä tta̧mö̧nä̧ tottomenä adiutä jȩpä̧tö̧, ⁹ ucumä ji̧nä̧ 'cuä'ächi'ö cu̧'ä̧mä̧da̧ pä'ömä rȩbȩhui̧po̧cö̧jä̧, TÖ̧Ä̧NÄ̧HUA̧ CU̧Ä̧NÄ̧HUA̧TÖ̧CU̧ DIOS cui̧rȩjä̧ päi'önä cu̧ja̧ pä'ö i̧yä̧jä̧nä̧mä̧. ¹⁰ Ja̧'hua̧nö̧ ja̧'a̧nä̧ Jordán aje päcuädotora̧'a̧ cuijähuächätucuomenämä TÖ̧Ä̧NÄ̧HUA̧ CU̧Ä̧NÄ̧HUA̧TÖ̧CU̧ DIOS cui̧rȩjä̧ päi'önä cu̧ja̧ pä'ö i̧yä̧jä̧nä̧ cu̧jä̧tu̧cuo̧mȩnä̧mä̧, ja̧'hua̧ta̧'a̧nö̧ cuabo iyotö cuippeyänä ka̧cuä̧tö̧cu̧ huȩnȩ huiyönä 'quiya'a abotä cu̧jä̧tu̧cuo̧mȩnä̧mä̧, ¹¹ ja̧u̧nö̧ jä̧cua̧'a̧ TÖ̧Ä̧NÄ̧HUA̧ CU̧Ä̧NÄ̧HUA̧TÖ̧CU̧ DIOS i̧mi̧ ka̧ pojopö ȩma̧cua̧'a̧mä̧, ju̧huȩtä̧ cui'cächätucuäcuotöjä o'cajuiyönä ttö huedömä: Ku icu iyähuä'inä, i̧sa̧ cuä'ö cui̧cuä̧tu̧cuä̧cua̧rö̧'inä, cuaditähuätucuttö 'cä̧'ȩpö̧ ku̧nä̧huä̧'inä, cuiyätucua pä'ö amöcuädö cu̧ju̧nä̧tö̧cu̧'inä, o'cajuiyönä ucutu tiyäcuotöjä̧ päcuinä̧tu̧cu̧ cu̧ca̧ca̧tä̧tu̧cu̧mä̧. ¹² Ucutumä TÖ̧Ä̧NÄ̧HUA̧ CU̧Ä̧NÄ̧HUA̧TÖ̧CU̧ DIOS to̧ä̧ro̧mȩttö̧ cueseäcuähuäcuotöjä̧: Ucu'inä cui̧tti̧mö̧'inä, cumöhuäyotötö u̧mä̧tö̧'inä, nätö'inä̧ ja̧'hua̧ta̧'a̧nö̧ Leví ahuaruhuä 'cotö ucutucu ka̧cuä̧tö̧rö̧mä̧, juhua'amä jahuötörömä ucuturu iyö'anömä tti̧rȩjä̧mä̧ i̧yo̧co̧u̧ pinätö̧. ¹³ Ucutumä adiu ä̧ju̧cuä̧tu̧cui̧ ku icu iyähuämä o'catoi'önä tto̧ttä̧ro̧mȩttö̧mä̧ cuiyätucuä; ¹⁴ ja̧'hua̧nö̧ ja̧'a̧nä̧ TÖ̧Ä̧NÄ̧HUA̧TÄ̧ jä̧cua̧'a̧ ucutu yotuterö ku icu iyähuomettö ttiyäcuotörö ö'ojo'äcua̧mä̧, ja̧'hua̧nö̧ ja̧'a̧ttö̧ ju̧huȩnȩtä̧ jä̧cua̧'a̧ o'cajuiyönä ttö huedö jȩ'cuä̧tu̧cuä̧cuo̧mȩmä̧. ¹⁵ Ja̧'hua̧nö̧ ja̧'a̧nä̧, ucutu o'catoi'önä isodenä ka̧cuä̧tö̧mä̧ i̧sa̧rö̧ cuä'öicu cucuätucua pä'ö ja̧'a̧, pä̧huä̧rö̧jö'a̧nö̧, CUÄ̧NÄ̧HUA̧ DIOS adiunä ppädö juä'i ȩmu̧ o'cajuiyönä JA̧U̧TÄ̧ i̧yä̧u̧jä̧; ttö̧ja̧ surojö 'cu̧nä̧rä̧tö̧'i̧nä̧ surojö juiätä'inä, yoräteunä̧tä̧ ttucu'anö̧ ja̧'a̧, de'a isotorömä gacela isotörö'inä ja̧'hua̧ta̧'a̧nö̧ yä̧mä̧rö̧'i̧nä̧. ¹⁶ Ja̧'hua̧nö̧ ja̧'a̧nä̧ ucutumä ucuojamä cuahuiyäcuotöjä; ucutumä rȩjȩtä̧ riri'cuäcuotöjä ajiya 'cua̧rö̧nä̧tä̧. ¹⁷ Cucuiyätucua'anö ja̧'a̧ isode apate jacuättömä cui̧'äre diezmos o̧du̧mä̧, cua̧huä̧ vino jareö'inä, cuiäre a̧dȩ'i̧nä̧, a̧cuo̧mȩnä̧ cuä̧ji̧mö̧ pä̧cä̧yä̧ oveja̧tö̧ tti̧tti̧mu̧ttö̧'i̧nä̧; cucujuiyö'anö ja̧'a̧ pähuäröjö'anö idepä cuiäre iyähuä päi'önä kȩ'ȩpö̧ cu̧ju̧nä̧ruö̧ttö̧mä̧, cuiäre iyähuättö huȩnȩ jui̧yö̧nä̧ ttiyö'inä, cuiäre iyähuä cua̧mo̧nä̧ cuaditto'i̧nä̧. ¹⁸ Ja̧'hua̧nö̧ jo̧ca̧'a̧, CU̧Ä̧NÄ̧HUA̧ DIOS ä'cajo̧mȩtö̧tä̧ cu̧cui̧'ä̧cua̧jä̧ CU̧Ä̧NÄ̧HUA̧ DIOS porö jä̧cua̧'a̧ päömettö̧; Ucú'inä, cui̧tti̧mö̧ u̧mä̧tö̧ nä̧tö̧'i̧nä̧, ucu huȩcuä̧u̧ u̧mä̧tö̧'i̧nä̧, ucu huȩcuä̧u̧ nä̧tö̧'i̧nä̧ ja̧'hua̧ta̧'a̧nö̧ Levi ttö̧ja̧ apate ttoecua'a jacuä ko̧cuä̧tö̧'i̧nä̧; Ttesehuäcuotö TÖ̧Ä̧NÄ̧HUA̧ DIOS ä'cajo̧mȩttö̧ o̧'ca̧jui̧yö̧nä̧ ucu jȩcu̧'u̧mä̧. ¹⁹ Cua̧mo̧nä̧tä̧ adiunä topäcuähui ja̧'a̧tä̧ tocu'ä Leví ttö̧ja̧ cui̧rȩjä̧nä̧ ko̧cuä̧tö̧rö̧mä̧. ²⁰ CU̧Ä̧NÄ̧HUA̧ DIOS cui̧rȩjä̧ jo̧mȩ yabonänö 'to'opö iyomenä, Chutä päinöta'anö, ja̧'hua̧nö̧ jo̧mȩnä̧mä̧ ucumä pä'öjä: "Jitämä idepä chu̧cuä̧cua̧sä̧", jua'amä idepä cucua pä'ö cuamucuäda'attö, idepätä cu̧cuä̧cuä̧jä̧, 'cua̧'cua̧nä̧ pä̧huä̧rö̧jö̧nä̧ cuamucuätötä. ²¹ Ucuttö otonänö topi CUI̧Ä̧NÄHUA̧ DIOS ö̧jä̧cuo̧mȩ, ja̧'hua̧nö̧ ja̧'a̧ttö̧ TÖ̧Ä̧NÄHUA̧ ucurö iya'attö cuäcua̧cua̧jä̧ cuä̧ji̧mu̧ pä̧cä̧yö̧ ttö̧ja̧cuo̧ca̧ttö̧, ttö ucurö huedinöta'a̧nö̧, cu̧cuä̧cua̧jä̧ cu̧jo̧mȩ ötahuiyä jacuattö, ucutätä cujö'cätucomenä. ²² ja̧'hua̧ta̧'a̧nö̧ ttöcua'anö huottömä gacela'inä yä̧mä̧'i̧nä̧, pitöttötä cucuäcuotöjä; ttö̧ja̧ surojö juiättö'inä ja̧'hua̧ta̧'a̧nö̧ ttö̧ja̧ suröjö ku̧nä̧rä̧tö̧'i̧nä̧ töcuäcuotö jahuätörö yoräteunätä̧. ²³ Ja̧'hua̧nö̧ ja̧'a̧nä̧ ttöcuojamä cucuä, ttucuojanä 'chö̧ja̧'a̧ttö̧; cucuätucuä ttidepäcu'inä ttöcuojacumä. ²⁴ Cucuä; ajiya 'cua̧rö̧nä̧ riri'cuajá rȩjȩtä̧. Cucuätucuä, ²⁵ TÖ̧Ä̧NÄHUA̧ ö̧jo̧mȩttö̧ jȩ'cuä̧tu̧cu̧mä̧ adihuäcua'anö, ucuru'inä ja̧'hua̧ta̧'a̧nö̧ ucú cui̧tti̧mu̧ o'cotörö'inä adihuäcua'anö. ²⁶ Ja̧'hua̧nö̧ ja̧'a̧nä̧ korojuäi TÖ̧Ä̧NÄ̧HUA̧ iäre ucu cu̧ju̧nä̧rö̧mä̧ ja̧'hua̧ta̧'a̧nö̧ chi̧ya̧já̧ pä'ö cu̧ju̧ni̧nu̧'i̧nä̧, ja̧u̧mä̧ ȩmi̧pö̧ cui̧'cha̧jä̧ TÖ̧Ä̧NÄ̧HUA̧ pojopö ȩmi̧no̧mȩcu̧. ²⁷ Juhuorötä cuiyajá ku icu iyähuämä, idepä'inä, ucuoja'inä, TÖ̧Ä̧NÄ̧HUA̧ öärome ku icu iyähuome, i̧sa̧ cuä'ö i̧cuä̧hua̧ ucuojamä TÖ̧Ä̧NÄ̧HUA̧ öäre ku icu iyähuome toähuäcua'a ja̧'hua̧nö̧ jȩpö̧ idepämä cucuojá. ²⁸ Adiu tta̧cuä̧ra̧já̧ ja̧'hua̧ta̧'a̧nö̧ ttö ucuru huedömä o'cajuiyönä̧tä̧ ä̧ju̧cui̧, ucutä'inä, cui̧tti̧mö̧'inä juhua'a yabo tti̧mö̧'inä 'cuäopönä̧tä̧ adihuometä tti̧'chä̧cua̧'a̧nö̧, adiu'i̧nä̧ ja̧'hua̧nö̧ jueö huȩnȩ'inä TÖ̧Ä̧NÄ̧HUA̧ to̧ä̧ro̧mȩttö̧ jȩ'cuo̧mȩnä̧mä̧. ²⁹ TÖ̧Ä̧NÄ̧HUA̧ CU̧Ä̧NÄ̧HUA̧TÖ̧CU̧ DIOS cuä'ca jo̧mȩttö̧ ttö̧ja̧rö̧ rä'epö icuomenä, cu̧ja̧cuä̧tu̧cua̧ pä'ö docuächi'ätucuomenämä ja̧'hua̧ta̧'a̧nö̧ ja̧'huä̧jä̧ cui̧rȩjä̧tu̧cu̧ päi'önä cuȩmä̧tu̧cuo̧mȩnä̧mä̧ juhua'atäcu jahuätö tti̧rȩjä̧nä̧ cu̧jä̧cu̧tu̧cuo̧mȩnä̧mä̧, ³⁰ ucumä adiu ä̧ju̧cui̧jó, jahuätö jȩttö̧'a̧nö̧mä̧ jȩ'cuó, jahuätörö cuä'catucuttö si'epö tticu o'ca'a'inä, ttuyaparehuäcu tocu huinätö̧ttö̧ ttö̧ä̧nä̧huo̧tö̧mä̧ pä'ö'inä jȩ'cuä̧'chä̧ ja̧'hua̧ta̧'a̧nö̧ jä̧cuȩpä̧rä̧: ¿Tocu pitö ttö̧ja̧mä̧ ttö̧ä̧nä̧hua̧rö̧mä̧ ucuo te'ähuätöttö pä'ö'inä? Ttö'inä ja̧'hua̧ta̧'a̧nö̧tä̧ jȩchä̧cua̧sä̧". ³¹ Ja̧'hua̧nö̧mä̧ ucuo tecuähua pä'ömä jo̧ca̧'a̧ TÖ̧Ä̧NÄ̧HUA̧ CU̧Ä̧NÄ̧HUA̧TÖ̧CU̧ DIOSRÖMÄ, ja̧u̧ o'cajuiyönämä TÖ̧Ä̧NÄ̧HUA̧MÄ̧ u̧su̧ru̧tö̧ ja̧'a̧, ja̧u̧ öjö'cocömä, jähuätömä ttö̧ä̧nä̧huo̧tö̧rö̧ ucuo te'äu jȩttä̧'i̧jö̧ ja̧'a̧; koro jȩttä̧'i̧jö̧mä̧ tti̧tti̧mö̧ u̧mä̧tö̧rö̧'inä, nä̧tö̧rö̧'i̧nä̧ ttö̧ä̧nä̧huo̧tö̧rö̧ iyö ocuränä ku icu ttiyä'ijö ja̧'a̧. ³² Ji̧yȩtȩ Ttö huedömä adiu usähuätucui. Yabonö'inä huȩyu̧tö̧mä̧ cutätucuä, ȩmö̧'inä cuicuätucuä.