¹ Ja̧'hua̧nö̧ ja̧'a̧ttö̧ CU̧Ä̧NÄ̧HUA̧TU̧CU̧RU̧MÄ̧ repeätucui ja̧'hua̧ta̧'a̧nö̧ hueinömä cuamucuädönä 'cuäopunä ȩnä̧rä̧tu̧cui̧, hueähuä huȩnȩ i̧nä̧, pä'ö cu̧nä̧huä̧'i̧nä̧ ja̧'hua̧ta̧'nö̧ hue'ö u̧ju̧ni̧nö̧ ji̧nö̧'i̧nä̧. ² Pi̧yȩmä̧ cui̧tti̧mu̧römä chucuocuocö, jahuätömä jerupätö ucu CUÄ̧NÄ̧HUA̧ DIOS ro̧'ȩpu̧ juä'imä topocotö, ö̧rö̧ä̧'i̧nä̧ ujuru'inä u̧mu̧ öjo ujurunä reö'inä jerupätö, ³ JA̧U̧TÄ̧ i̧jȩcuä̧ päi'önä jȩpi̧nö̧'i̧nä̧ Egipto ru̧hua̧ Faraónrö, Egiptottö ucuo ru̧hua̧rö̧, i̧rȩjä̧ttö̧ o'cajuiyönätä. ⁴ topocotö pinätö̧ Egipto su̧ro̧do̧u̧ jȩtti̧nö̧'i̧nä̧, ttä̧ji̧mu̧ ca̧hua̧yu̧tu̧ru̧'i̧nä̧ jahuätö dottö'ocä'inä, Ja̧u̧mä̧ jȩpi̧nö̧ duboro tuhuora'inä suhuädi'änä o'ca'anö ru̧ttä̧ro̧mȩnä̧mä̧ ja̧'hua̧ta̧'a̧nö̧ TÖ̧Ä̧NÄ̧HUA̧ si'epä icuinö jitä mo̧ro̧ jubu päi'önä ⁵ ja̧u̧mä̧ ucuturu'inä ppä'ädinö de'a jui̧yä̧jä̧ra̧'a̧ttö̧ pȩnȩ́ jubu päcui'ätucunä. ⁶ Ja'huätömä topocotö TÖ̧Ä̧NÄ̧HUA̧ jȩi̧nö̧ Datánrö ja̧'hua̧ta̧'a̧nö̧ Abiramrö̧'i̧nä̧, Eliab i̧tti̧mu̧rö̧'i̧nä̧, Rubén i̧tti̧mu̧rö̧'i̧nä̧; rȩjȩ ä bahuecuächa'attö ra̧huä̧di'inäu̧, ttojuisode'inä, ttiäre ko̧cuo̧mȩ'i̧nä̧, ja̧'hua̧ta̧'a̧nö̧ jahuätucu 'chä̧tö̧ isotö'inä, Israél ötahuiyä kä'conä. ⁷ Ja'huätömä o'catoi'önä topinätö̧ TÖ̧Ä̧NÄ̧HUA̧ rö̧ä̧nä̧ jähuä jȩa̧'a̧'i̧nä̧. ⁸ Ja̧'hua̧nö̧ ja̧'a̧ttö̧ o'cajuiyönä huaadö kö̧nä̧tö̧cui̧ hueähuä huȩnȩmä̧ ttö jitä moró̧ huedöta'anö, ucutu rȩjȩ́ docuä chätucua pe'ö 'cuä'öpö cujuröhuä tucuäcua'anö ⁹ ja̧'hua̧ta̧'a̧nö̧ ucutu recuó cui̧jä̧tu̧cuo̧tö̧jä̧ TÖ̧Ä̧NÄHUA̧ rȩjȩ́ ucuocu jiäu i̧yi̧nä̧jä̧nä̧ cuä̧do̧tu̧cu̧ mi̧nä̧rö̧ ja̧'hua̧ta̧'a̧nö̧ ucutu cuahuaruhuätucurö'inä, juä̧jä̧ rȩjȩmä̧ pä̧cä̧yö̧rö̧'i̧nä̧ ja̧'hua̧ta̧'a̧nö̧ mä̧ya'inä a̧di̧huä̧jä̧. ¹⁰ Ucutu cui̧rȩjä̧tu̧cu̧mä̧, Egipto rȩjȩ jö̧a̧'a̧nö̧mä̧ jo̧co̧jä̧, cuichinätu̧cuomettö̧mä̧, ucutu ö̧huä̧ju̧ oba jacuäjähuä o̧bi̧ cu̧ju̧ni̧nä̧tu̧cuo̧mȩ, ja̧'hua̧ta̧'a̧nö̧ cui̧jä̧ pu̧nä̧tä̧ 'chi̧nä̧tu̧jä̧ ajiya cuiye pätucua peömä, ku̧nä̧huo̧mȩ ja̧'tö̧bȩ ja̧ peömä; ¹¹ ja̧'hua̧nö̧ ja̧'a̧nä̧ rȩjȩ́, cui̧rȩjä̧tu̧ä̧jä̧mä̧ mö̧ä̧'qui̧yu'inä mö̧ä̧tȩtȩju̧'i̧nä̧ jä̧jä̧ ja̧'hua̧ta̧'a̧nö̧ ajiya'inä i̧chä̧jä̧, ¹² juä̧jä̧ rȩjȩmä̧ CUI̧Ä̧NÄHUA̧ DIOSTÄ ttä̧huä̧rä̧jä̧; CUI̧Ä̧NÄHUA̧ DIOSTÄ 'cuäpunä ttä̧huä̧rä̧cua̧, a̧ȩmä̧ 'cuäpunätä̧ ttä̧huä̧rä̧cua̧ a̧ȩ beipomebu. ¹³ 'Cuäopäcua'a, Ttöttö hueähuä huȩnȩ amöcuädönä cuä̧ju̧cuä̧tu̧cu̧ttö̧mä̧ ttö jitä mo̧ro̧ ucuturu huedö, TÖ̧Ä̧NÄ̧HUA̧RÖ̧ repecuätucua pä'ö ja̧'hua̧ta̧'a̧nö̧ Ja̧u̧ päö jȩ'cuä̧tu̧cua̧ pä'ö, cuamiso'quitucu o'cajuiyönä, cua̧'cua̧ru̧tu̧cu̧ o'cajuiyönä, ¹⁴ ajiya icha pä'ö jö̧ mo̧ro̧mä̧ ichönä jȩchä̧cua̧sä̧, ä̧cuo̧mȩnä̧ ichoya'inä ja̧'hua̧ta̧'a̧nö̧ röjinä ichoya'inä jö̧nä̧, cu̧cuä̧tu̧cu̧ u̧huä̧ju̧ ote cu̧ca̧ca̧tä̧tu̧cuä̧cua̧'a̧nö̧, vino jareö'inä ja̧'hua̧ta̧'a̧nö̧ a̧dȩ'inä, ¹⁵ Ttömä cuä̧ji̧mö̧ ttucuä'cuacu chiyäcuotöjä cuäjimötu̧cu̧ ttucua pä'ö ja̧'hua̧ta̧'a̧nö̧ ucutumä cuä̧nö̧mä̧ sucuädi'äcuotöjä. ¹⁶ Ucututä cua̧mö̧nä̧ pa̧ja̧tö̧ adiu ä̧ju̧cuä̧tu̧cui̧ cuaniso'quitucu uyaparehuätucuäcu ja̧'hua̧nö̧ jo̧mȩnä̧ ucutumä ppa̧'a̧chi̧'ö̧ korotö ttö̧ä̧nä̧huo̧tö̧rö̧ ucuo te'äu jahuätörö cuihue'quiyunä kä̧mä̧dö̧ jȩ'cuä̧'chä̧tu̧cua̧'a̧cu̧; ¹⁷ Tö̧ä̧nä̧hua̧ ucuturu ö̧ra̧huä̧ra̧'a̧cu̧; ja̧'hua̧nö̧ jö̧ttö̧mä̧ mo̧ro̧jä̧mä̧ mö̧'ȩpo̧cö̧ jä̧cua̧ ajiya ichö juiyönämä ja̧'hua̧ta̧'a̧nö̧ u̧huä̧ju̧ huȩju̧ juiyömä ja̧'hua̧nö̧ jo̧mȩnä̧ ucutumä jurunä tocue'ächätucu juiyäcua'anö o'cajuiyönä rȩjȩ adihuäjä̧ TÖ̧Ä̧NÄ̧HUA̧ iyinäjä̧mä̧. ¹⁸ Ja̧'hua̧nö̧ ja̧'a̧ttö̧ pi̧yȩ chi̧huȩnȩ cuamiso'quitucunä ku̧nä̧huä̧tu̧cui̧, cua̧'cua̧rö̧tu̧cu̧nä̧, ti̧'ä̧dö̧ rö̧nä̧huä̧tu̧cui̧ cu̧mö̧tu̧cu̧nä̧ amöcuädäcuähuä jö̧nä̧ ja̧'hua̧ta̧'a̧nö̧ cuhuocuorätucunä'inä ru̧nä̧huä̧tu̧cui̧. ¹⁹ Ucutumä cui̧tti̧mö̧tu̧cu̧rö̧ cu̧huo̧juȩtä̧tu̧cua̧já̧ ja̧'hua̧ta̧'a̧nö̧ cucuocuätucuajá cuojusode cu̧'ä̧jä̧mä̧tu̧cuo̧mȩnä̧'inä, mänättö̧'inä cucuocuätucuajá, cuä'ätucuäcua'a ä'canä'inä juhua'atä cu'orächätucuomenä'inä. ²⁰ Ucutumä äpate jäyänä odiyänä'inä cui̧huȩyu̧cuä̧tu̧cua̧já̧ ja̧'hua̧ta̧'a̧nö̧ ötahuiyära̧'a̧cu̧ doächi'äcuähuome'inä, ²¹ cu̧mo̧ro̧ mo̧ro̧'i̧nä̧ juhua'atäcu cui̧tti̧mö̧ ttu̧mo̧ro̧ recuo ttö̧jä̧cuo̧tö̧ TÖ̧Ä̧NÄ̧HUA̧ cu̧tä̧mö̧ mi̧nä̧tu̧cu̧rö̧ iya pä̧i̧nä̧jä̧nä̧ kä̧tö̧rö̧ iya päinäta'anö 'cuäopönä ku̧jä̧cuo̧tö̧jä̧ ja̧huä̧jä̧nä̧mä̧ mo̧ro̧jä̧ jö̧ta'anö. ²² Ja̧'hua̧nö̧ ja̧'a̧nä̧ pi̧yȩ o'cajuiyönä hueinö ucuturu chiyinö ttu̧'ȩpä̧rö̧nä̧ 'chu̧cuä̧rä̧cuä̧huä̧tu̧cu̧ttö̧tä̧, ja̧'hua̧nö̧ jȩ'cuä̧tu̧cu̧ttö̧mä̧, TÖ̧Ä̧NÄ̧HUA̧ CU̧Ä̧HUA̧TU̧CU̧ DIOSRÖ eseunö, o'cajuiyönä chutä päö'acuä cui̧'chä̧tu̧cu̧ttö̧mä̧ ja̧'hua̧ta̧'a̧nö̧ churutä cua̧'cua̧ cu̧huȩnä̧rä̧tu̧cu̧ttö̧mä̧, ²³ ja̧'hua̧nö̧ jö̧ttö̧tä̧ cuä'ca jo̧mȩ ka̧cuä̧tö̧ ttö̧ja̧rö̧mä̧ rä'epö i̧cua̧ TÖ̧Ä̧NÄ̧HUA̧MÄ̧ ja̧'hua̧nö̧ jo̧mȩnä̧ ucumä korotö ttö̧ja̧ttö̧'inä ttö̧huä̧mȩnä̧ huotörö si'epö cuicuäcua̧jä̧ juhuatäcu ucututtö'inä abonänö juruhuätörö. ²⁴ O'cajuiyönä cu̧jä̧pö̧ kȩdä̧huä̧cho̧mȩmä̧ ucutä cui̧rȩjä̧ jä̧cua̧'a̧; de'a jui̧yä̧jä̧ Libanottö kä̧mä̧dö̧ Eufrate ajenätä̧ 'cuä'o'ö aje dä'ähuotottömä kä̧hua̧ ma̧ä̧cha̧'a̧cu̧ttö̧mä̧ jäyoto jubö jä̧cua̧'a̧. ²⁵ Ya̧tȩ ucuturu tto̧'ȩpä̧ra̧ pä'ö hua̧mä̧ toäcua'a, TÖ̧Ä̧NÄ̧HUA̧ CU̧Ä̧NÄ̧HUA̧TU̧CU̧ DIOSTÄ jä̧cua̧'a̧ yecuecuätucu juiyönä jȩä̧cua̧mä̧ ja̧'hua̧ta̧'a̧nö̧ ucutu cu̧jä̧mä̧dä̧tu̧cuä̧jä̧ttö̧mä̧ ucuturu yepä'chu juiyönä, ja̧'hua̧nö̧tä̧ ucuturu ja̧u̧ päinöta'anö̧tä̧. ²⁶ Ä̧ju̧cuä̧tu̧cui̧, TTÖ jitä mo̧ro̧ ucutu cuä'catucu jo̧mȩ ku̧nu̧sä̧ ppädäcuähuä'inä ja̧'pä'ö ja̧'hua̧ta̧'a̧nö̧ surojötä ja̧'pä'ö jö̧'i̧nä̧: ²⁷ Ppädäcuähuä ja̧ttö̧ ja̧ pä'ömä, ucutumä CUÄ̧NÄ̧HUA̧TU̧CU̧ Dios hueö cuesetätucua'anö ja̧'a̧ jitä mo̧ro̧ ttö hueö chu̧ju̧nu̧. ²⁸ Surajattöjá pä'ö jö̧ttö̧mä̧ ucutumä CUÄ̧NÄ̧HUA̧TU̧CU̧ Dios hueömä jȩ'cuä̧tu̧cuä̧, ja̧'hua̧nö̧ ja̧'a̧nä̧ jitä mo̧ro̧ ttö huedome mä̧nä̧ttö̧ rä'opächö 'chänö cui̧'ä̧ru̧huä̧u̧ yapare ttiänä̧cuo̧ttö̧rö̧ jö̧ttö̧mä̧. ²⁹ 'Cuä'opäcua'a, CUÄ̧NÄ̧HUA̧TU̧CU̧ DIOS ucuturu 'cächö̧ cui̧rȩjä̧tu̧cu̧ iyomenä, Gerizin de'anä kä̧mä̧dö̧ ucutumä jäcuepäcuotöjä adiunä ppädäcuähuätä, ja̧'hua̧nö̧ ja̧'a̧nä̧ Ebal de'attömä suroja pä'ötä. ³⁰ ¿Jahuätömä ko̧co̧tö̧ tä̧jí̧ Jordán yabonänö, kä̧hua̧ mo̧ä̧cha̧'a̧cu̧ mä̧nä̧ päteö, cananeos tti̧rȩjä̧cu̧ Arabanä ka̧cuä̧tö̧, Gilgal pä̧tȩcuä̧nö̧, robles'inä Moré'inä dauhuiyä ji̧nä̧ yo̧mȩtȩ ka̧cuo̧mȩttö̧?. ³¹ Ja̧'hua̧nö̧ ja̧'a̧ttö̧ ucutumä 'cuäcuopäcuotöjä Jordán ajé'inä cui̧rȩjä̧tu̧cu̧ cuȩmä̧tu̧cua̧ pä'ömä TÖ̧Ä̧NÄ̧HUA̧ DIOS i̧yä̧jä̧, ucutumä cuȩmä̧cuo̧tö̧jä̧ juä̧jä̧nä̧tä̧ cu̧jä̧cuo̧tö̧jä̧. ³² Ucutumä jȩcu̧'ä̧cuo̧tö̧jä̧ huedinö ja̧'hua̧ta̧'a̧nö̧ pädinö'i̧nä̧ ucuturu hueda pä'ö pätecuächa'a jitä.