¹ Ja̧u̧nu̧ pä̧nä̧ TÖ̧Ä̧NÄ̧HUA̧ päinä̧cusä: I̧nä̧ obi tobirenä 'co̧'i̧ ä̧cuo̧mȩnä̧ ji̧nö̧ta̧'a̧nö̧, ja̧'hua̧nö̧ jȩpu̧ ichi muä'carä'acu TTÖ chö̧jo̧mȩcu̧, ja̧'hua̧ta̧'a̧nö̧ aditi i̧so̧ca̧ dauttu. ² TTÖTÄ chi̧huȩyu̧tä̧cua̧sä̧ ä̧cuo̧mȩnä̧ isoda di'ö cuicuinodänä chi̧huȩyu̧ti̧nö̧ta̧'a̧nö̧, juo̧ca̧ i̧so̧ca̧nä̧ ucutä cuȩnä̧cua̧jä̧". ³ Ja̧'hua̧nö̧ ja̧'a̧ttö̧ aditinösä acasia dau isodättö ä̧cuo̧mȩnä̧ ji̧nö̧ta̧'a̧nö̧ i̧nä̧ obi tobire 'co̧'ö̧ ä̧cuo̧mȩnä̧ chaditinöta'anö ja̧'hua̧nö̧ a̧di̧tä̧ji̧'ca̧ tobire chu̧mu̧nä̧ 'chuä̧rä̧nö̧ 'chi̧nö̧sä̧ mu̧ä'ca̧ra̧'a̧. ⁴ JA̧U̧TÄ̧ huȩyu̧ti̧nö̧ ja̧u̧ obinä ä̧cuo̧mȩnä̧ i̧huȩyu̧ti̧nö̧ta̧'a̧nö̧, to̧mu̧rȩnö̧ jo̧mȩ hueähuä huȩnȩ TÖ̧Ä̧NÄ̧HUA̧ ttörö ucuocuinö̧ ji̧nö̧ ocuräma̧nä̧ muä'cara'attö ji̧nä̧ yo̧mȩtȩ ca̧ca̧cu̧ tucuocuomȩ; Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧ ttörö iyinäcu̧sä̧. ⁵ Muä'cara̧'a̧ttö̧ ppa̧'a̧chö̧ mȩyȩhui̧nö̧sä̧, ja̧'hua̧nö̧ ja̧'a̧ juodä isodä rötinösä̧ i̧so̧ca̧ tötä cha̧di̧ti̧no̧ca̧nä̧; juȩnȩtä̧ pȩja̧'a̧, TÖ̧Ä̧NÄ̧HUA̧ hueinäta'anötä̧. ⁶ Israél ttö̧ja̧mä̧ i̧hui̧nä̧tö̧ Beerot Bene Jaacánttö Moseracu. Juorö 'corupä'i'inö Aarón, ja̧'hua̧nö̧ ja̧'a̧ttö̧ juȩnȩtä̧ rȩä̧dö̧ tticuinäcu̧; I̧tti̧ Eliazartä ji̧na̧'a̧ Sacerdote päi'önä pätecuächinömä jä'o ö̧ja̧'i̧jo̧mȩ. ⁷ Juorö kä̧mä̧dö̧ i̧hui̧nä̧tö̧ Gudgodara̧'a̧cu̧, Gudgodattö Jotbatacu, rȩjȩ ajé pönä ma̧o̧mȩcu̧. ⁸ Jo̧u̧nö̧ pä̧nä̧ TÖ̧Ä̧NÄHUA̧ ȩmi̧nö̧ Leví ttö̧ja̧ttö̧ cuettäda peö ucuocu u̧ju̧ni̧nö̧ huȩnȩ ȩjo̧ca̧ TÖ̧Ä̧NÄHUA̧, jo̧u̧ TÖ̧Ä̧NÄHUA̧ ö̧jo̧mȩ känö ttiya pe'ö ja̧'hua̧ta̧'a̧nö̧ esehuächiönä ttiya pe'ö ttö̧ja̧ tti̧mi̧nä̧, jitä moró̧ jö̧ta̧'a̧nö̧. ⁹ Ja̧'hua̧nö̧ ja̧a̧nä̧'i̧nä̧ leví isotömä rȩjȩ iya pä̧i̧nä̧jä̧mä̧ ȩmo̧co̧tu̧ pinätö̧ a̧hua̧rö̧hua̧cu; iya päinöttö̧mä U̧RU̧HUA̧TÄ̧ ji̧na̧a̧, I̧Ä̧NÄHUA̧ DIOTÄ ja̧'hua̧nö̧ ucuo cuinäcu̧. ¹⁰ Ttömä kö̧sä̧ mu̧ä̧'cattö ä̧cuo̧mȩnä̧ ji̧nöta̧'a̧nö̧, cuarentanö moró̧ ja̧'hua̧ta̧'a̧nö̧ yo̧do̧'i̧nä̧. Juo̧nö̧ pä̧nä̧'i̧nä̧ TÖ̧Ä̧NÄHUA̧ ä̧ju̧cui̧nä̧cu̧sä̧; TÖ̧Ä̧NÄHUA̧MÄ̧ siepu icuapäocö pinö. ¹¹ TÖ̧Ä̧NÄHUA̧ päinäcu̧sä̧: ä̧rä̧mi̧ö̧, tä'i̧ cuahuaruhuä tti̧'chä̧'a̧nä ocuipatö; jahuätö tti̧'chä̧cuo̧tö̧ ttä̧dó̧ mi̧nä̧rö̧ chi̧yä̧cua̧sä̧ pä̧di̧nä̧ja̧ra̧'a̧ ttö̧ja̧ pe'ö. ¹² Jitämä Israel ttö̧ja̧, ¿TÖ̧Ä̧NÄ̧HUA̧MÄ̧ ucurumä däjetä jäepa'attö̧? Ppächi'ö̧nä̧ jö̧mä̧ TÖ̧Ä̧NÄ̧HUA̧RÖ̧ yecuecua pä'ö jö̧ ja̧'a̧, päö'acuä̧ cui̧'cha̧ pä'ötä, repe'önö ucuo tecuähua pä'ö ja̧'a̧ TÖ̧Ä̧NÄ̧HUA̧ DIOSRÖMÄ cuamiso'qui o'cajuiyönä, cua̧'cua̧rö̧ o'cajuiyönä, ¹³ TÖ̧Ä̧NÄ̧HUA̧TTÖ̧ hueähuä huȩnȩmä̧ jȩpö̧ kä̧hui̧ ja̧'hua̧ta̧'a̧nö̧ jȩ'cua̧ pä'ö huȩyu̧tu̧ rutähuä'inä, jitä mo̧ro̧ huedäcujä̧ cuamö̧nä̧ adiu jȩ'cua̧ pä'ötä? ¹⁴ Adiu ä̧ju̧cui̧ttö̧, TÖ̧Ä̧NÄ̧HUA̧ DIOSMÄ mo̧ro̧jä̧'i̧nä̧ ja̧huä̧jä̧nä̧tä̧ ka̧cu̧'inä; rȩjȩ'inä ja̧'huä̧jä̧nä̧tä̧ ka̧cu̧'inä u̧ru̧hua̧ ja̧'a̧. ¹⁵ TÖ̧Ä̧NÄ̧HUA̧MÄ̧ cuä'otö̧rö̧mä̧ suro esehuomettötä̧ repearö pä'ö ja̧'hua̧ta̧'a̧nö̧ jahuätö tto'comenämä tti̧tti̧mö̧ttö̧'inä pojopö eminö, korotö ttö̧ja̧ttö̧ ttȩma̧jueimä, jitä mo̧ro̧ jȩö̧ta'anö. ¹⁶ Ja̧'hua̧nö̧ ja̧'a̧ttö̧ cuamiso'quitucunä ka̧cu̧ surojömä ȩmä̧u̧ icuätucui, ja̧'hua̧ta̧'a̧nö̧ yabonömä cua̧mi̧'quicuädäcuähuätucuä. ¹⁷ Isopäi'önä TÖ̧Ä̧NÄ̧HUA̧ CUÄ̧NÄ̧HUA̧TU̧CU̧ DIOSMÄ, ttö̧ä̧nä̧huo̧tö̧ ttö̧ä̧nä̧hua̧ DIOS ja̧'a̧ ja̧'hua̧ta̧'a̧nö̧ ucuo ruhuotö'inä TU̧RU̧HUA̧MÄ̧, DIOS rö̧ä̧nä̧ böomä, JU̧RU̧HUA̧MÄ̧ ja̧'hua̧ta̧'a̧nö̧ YE'ECUÄCUA̧HUA̧MÄ̧, ya̧tȩrö̧'inä esecuä'chocömä juhua'atäcu ppädatö pä'ö pärätä iyähuocömä. ¹⁸ Ja̧u̧mä̧ adihuomenä jȩpö̧ reyotörö'inä ja̧'hua̧ta̧'a̧nö̧ recuamö̧rö̧'inä juhuatäcu korojä̧ra̧'a̧ttö̧ ichäcuähuotörö'inä eseu repe'ömä ttu̧cuä̧'inä iyö kä̧nö̧mä̧ ttö̧'ca̧tä̧huä̧ti̧yu̧'inä iyö. ¹⁹ Ja̧'hua̧nö̧ hua̧ ja̧'a̧ttö̧ ko̧ro̧jä̧tö̧ ichäcuähuotörömä eseu repe'ö; isopäi'önä ucutumä ko̧ro̧jä̧ Egipto rȩjȩttö̧ ichäcuähuotö pinätö̧jä̧. ²⁰ TÖ̧Ä̧NÄ̧HUA̧ CU̧Ä̧NÄ̧HUA̧TU̧CU̧ DIOSRÖTÄ yecuäcua̧; Ja̧u̧rö̧tä̧ ucuotönä esehuäcua̧. Ja̧u̧rö̧tä̧ cua̧'cua̧ cu̧huȩnä̧ra̧ pä'ö jä̧cua̧'a̧ ja̧'hua̧ta̧'a̧nö̧ huȩnȩtö̧ cucuomenä cucuomenämä ja̧u̧ i̧mi̧nä̧tö̧ cucuojá. ²¹ Ja̧u̧tä̧ ja̧'a̧ eseu ra̧cuä̧cu̧mä̧ juhuatäcu ja̧u̧tä̧ ja̧'a̧ CU̧Ä̧NÄ̧HUA̧ DIOSMÄ, pi̧yȩ rö̧ä̧u̧ jähuä jȩpi̧nö̧mä̧ ja̧'hua̧ta̧'a̧nö̧ yettecunä jö̧'inä, ja̧u̧ ji̧na̧'a̧ ucu to'cuinömä. ²² Cuä'otö̧ mi̧nä̧mä̧ Egipto rȩjȩtö̧ tti̧mȩyi̧hui̧nö̧mä̧ setentanö jö̧nä̧ jo̧mȩnä̧tä̧ huinä̧tö̧ ttö̧ja̧mä̧; jitämä TÖ̧Ä̧NÄ̧HUA̧ CU̧Ä̧NÄ̧HUA̧TU̧CU̧ DIOSMÄ cuirecuächätucunä̧ jȩi̧nä̧u̧jä̧ si̧ri̧'cö̧ mo̧ro̧jä̧ rö̧jä̧tö̧ jä̧'i̧jö̧'a̧nö̧.