¹ Dariomä Asuero i̧tti̧ ji̧na'a̧, ttö̧ja̧ a̧cuo̧mȩnä̧ ko̧cui̧nä̧ttö̧ Medos isotö i̧sa̧. Asuero jinä'a ucuo ru̧hua̧ päi'önä ttu̧ru̧hua̧mä̧ Babiloniattö̧. ² Jitä, Dario ä̧cuo̧menä ruhuo hueö du'omä, ttö, Dario, huo̧ji̧pi̧nö̧sä̧ TTÖ̧Ä̧NÄ̧HUA̧ i̧huȩnȩ ko̧cu̧ o'tä, profeta Jeremiasrö̧ jiähuinöttö ko̧cu̧ topö huo̧ji̧pi̧nä̧sä̧. Jerusalénmä setenta a̧'ȩ jo̧mȩnä̧ jaropi'äcuähuotö ttäcuotö pä'ö. ³ Ja̧'hua̧nö̧ ja̧'a̧ttö̧ ttö CHÖ̧Ä̧NÄ̧HUA̧ Diosrö, ajuähuipönö jä̧'ȩpä̧ri̧nö̧sä̧ chu̧cuä̧'i̧nä̧ ä̧do̧chö̧, chö̧'ca̧ta̧huä̧ti̧yu̧'i̧nä̧ 'quiyäsanö jö̧tä̧ 'ca̧tä̧hui̧nö̧sä̧, ja̧'hua̧ta̧'anö ä̧ya̧ri̧sanä pä̧nö̧tä̧. ⁴ Ttö CHÖ̧Ä̧NÄ̧HUA̧RÖ̧ jä'epö ji'ähuinösä̧ ujutu suronä jȩttö̧. Ttö pä'inösä̧: CHÖ̧Ä̧NÄ̧HUA̧ retopö ppä'äditö, UCUMÄ buo DIOJÄ yedecuäcu, UCU esecu cu̧ju̧numä jueötä hua̧jä̧ ja̧'hua̧ta̧'a̧nö̧ ucumä repe'öjä repe'ätörömä ja̧'hua̧ta̧'a̧nö̧ UCU hue'ö ku̧ju̧ni̧nö̧ jȩpä̧tö̧rö̧mä̧ repe'öjä. ⁵ Ujutumä Diosrö jarodätöjä ja̧'hua̧ta̧'a̧nö̧ surojötä jȩpä̧tö̧jä̧. Surojönätä̧ jȩpä̧'i̧jä̧tö̧jä̧ ja̧'hua̧ta̧'a̧nö̧ hueähua'inä jarodä'ijätöjä, hueähuä huȩnȩ huecuinö'inä jȩto̧ca̧'a̧tä̧. ⁶ Ujutumä ä̧ju̧cuo̧co̧tö̧ pä'ijätöjä UCU cu̧mu̧huäyotö profetarö'inä turuhuotorö ucu cuiminä ttucuocua'anä, turuhuotö, tä̧do̧tö̧ minä ja̧'hua̧ta̧'a̧nö̧ o'catoi'önä pi̧jä̧nä̧ ko̧cuä̧tö̧rö̧. ⁷ Ucu, TÖ̧Ä̧NÄ̧HUA̧, ucunätä̧ ro̧ȩcuä̧ ka̧'a̧, jitä mo̧ro̧ ujuturu, ja̧'hua̧nö̧ ja̧'a̧nä̧, ujutu ja̧'a̧ dä'ä rö̧jä̧u̧mä̧ ttö̧ja̧ tottönä ttö̧ja̧'a̧ttö̧, Juda ahuaruhuä o'cotörö ja̧'hua̧ta̧'a̧nö̧ jitö Jerusalénnä ko̧cuä̧tö̧rö̧, Israel rȩjȩ o'cajuiyönä. Pi̧yȩmä̧ pätecuächa'a jitö tö'cönä ko̧cuä̧tö̧rö̧ ja̧'hua̧ta̧'a̧nö̧ oto ko̧cuä̧tö̧rö̧'i̧nä̧ tti̧rȩjä̧ pö̧nä̧ pperetö cuicuinäuu̧'i̧nä̧. Pi̧yȩmä̧ 'cuä̧o̧pä̧u̧jä̧ ucu päcuinä jȩto̧ca̧'a̧ korotä jȩta̧'a̧ttö̧. ⁸ TÖ̧Ä̧NÄ̧HUA̧, ujutu tidepänämä dä'ärö̧jö̧tä̧ ku̧nä̧rä̧tö̧jä̧, turuhuotö ruhuo hue'ätörö'inä, turuhuotörö'inä, ja̧'hua̧ta̧'a̧nö̧ tä̧do̧tö̧ mi̧nä̧rö̧'i̧nä̧, jua'amä ucuru suronä jȩti̧na̧'a̧ttö̧. ⁹ TÖ̧Ä̧NÄ̧HUA̧ Diosnätä ka̧'a̧ re toäcuähuä ja̧'hua̧ta̧'a̧nö̧ esecu icuähuä'inä, jua'amä ujutu JA̧U̧RU̧ töaroda'atö̧ . ¹⁰ Ujutumä TÖ̧Ä̧NÄ̧HUA̧ Dios päinöta'anömä jȩpo̧co̧tö̧jä̧ hueähua huene hueinönätä̧ 'chä̧nö̧ u̧mu̧huäyotö profetanä. ¹¹ O'catoi'önä Israél ttö̧ja̧mä̧ hueähuä huȩnȩ huecuinö jȩtto̧ca̧'a̧ jäyäcutä pporädö ku̧nä̧tö̧, ucu päcuinö jȩtto̧ca̧'a̧ta̧. Ro̧ȩcuä̧'i̧nä̧ ja̧'hua̧ta̧'a̧nö̧ jȩchä̧cua̧sä̧ päinömä juȩyu̧cua̧'a̧ pa̧'a̧nä̧ Moisésnä i̧huȩyu̧ti̧nö̧nä̧, Dios u̧mu̧hä̧yä̧nä̧, ujuturu pätecuächa'a ja̧u̧ ji̧nö̧mä̧, ja̧u̧ hueinö jarodö suronä jȩta̧'a̧ttö̧. ¹² Ujuturu jiähuinö TÖ̧Ä̧NÄHUA̧ curuhuotö'inä tösurähuäcuotö, ujuturu i'cächö surojoepinaa. Pi̧jä̧ rȩjȩttö̧ koro ötahuiyättö'inä abonänö ttösurähuiäcuotö Jerusalentömä. ¹³ Moisés i̧huȩyu̧ti̧nö̧nä̧ huȩyu̧cua̧ pa̧a̧ hueähuä huȩnȩmä̧, o'cajuiyönä pätecuächinaa̧ ro̧ȩcuä̧mä̧ ujuturu, ja̧'hua̧nö̧ ja̧'a̧nä̧, ujuturö ppadömä TÖ̧Ä̧NÄHUA̧ DIOS esetocotöjä a̧u̧tu̧tä̧ a̧u̧tä̧tö̧jä̧ adihuäjuäimä. ¹⁴ Ja̧'hua̧nö̧ ja̧'a̧ttö̧, TÖ̧Ä̧NÄHUA̧MÄ̧ jo̧mȩnö̧ jȩpu̧ ku̧ni̧nö̧ surojömä, ja̧'hua̧ta̧'a̧nö̧ TÖ̧Ä̧NÄHUA̧ DIOSMÄ päöta'anö hua̧ o'cajuiyönä jȩu̧mä̧, ja̧'hua̧nö̧ ja̧'a̧nä̧ ujutumä i̧huȩnȩ'inä esetocotö pinätö̧jä̧. ¹⁵ Ja̧'hua̧nö̧ ja̧'a̧ Ucu TÖ̧Ä̧NÄ̧HUA̧ Diosmä, cumöhuäyotö Israel ttö̧ja̧rö̧mä̧ Egipto rȩjȩttö̧ cujurunä rä'epö icuinö̧jä̧, ja̧'hua̧nö̧ jȩpö̧ cua̧mö̧nä̧ pa̧ja̧tö̧tä̧ cui̧mi̧mä̧ ucuohuächönä jȩpi̧nö̧jä̧, jitä mo̧ro̧ jubö päi'önä. Ja̧'hua̧nö̧ ji̧na̧'a̧nä̧ ujutumä ji̧nä̧ surojötä jȩpä̧tö̧jä̧, suronä̧ jö̧tä̧ jȩpi̧nä̧tö̧jä̧. ¹⁶ TÖ̧Ä̧NÄ̧HUA̧ ucu cuaditähuämä adihuäjueitä ja̧'a̧ cuamisurumä ja̧'hua̧ta̧'a̧nö̧ cu̧'ä̧i̧mä̧ Jerusalén ö̧ta̧hui̧yä̧ttö̧mä̧ pporädö ku̧ni̧, mö̧ä̧'ca surojö juiyä'cattömä. Ujutu suronä jȩtti̧nö̧ jähuänämä ja̧'hua̧ta̧'a̧nö̧ tä̧do̧tö̧ mi̧nä̧ surojö jȩtti̧nö̧ jähuänämä Jerusalén ttö̧ja̧'i̧nä̧ ja̧'hua̧ta̧'a̧nö̧ ucu cuahuaruhuä'i̧nä̧ korojuei ku'cähuocö jä̧'i̧nö̧'a̧nö̧ huotöjä jitö ujutu ttippeyänä ka̧cuä̧tö̧ttö̧mä̧. ¹⁷ Ja̧'hua̧nö̧ ja̧'a̧ Tö̧ä̧nä̧hua̧ Dios, ttö ucu cu̧mö̧huä̧ya̧ ucuocua'amä ä̧ju̧cui̧, jäepömä rö̧rö̧jö̧nö̧ topirö; ucu cuadihuänä TÖ̧Ä̧NÄ̧HUA̧ cuojusode toächächinodenä cui̧tȩya̧u̧ kä̧dȩpö̧nä̧ jȩpi̧. ¹⁸ Chuä̧nä̧hua̧ Dios cuä̧ja̧ ba'epö ä̧ju̧cui̧; cui'äre'i̧nä̧ ye'ädö topi. Ujutumä si'epö icuähuotötä huotöjä; topi cuidepiyu ttö̧ja̧ ucu cuiminä ki̧nä̧tö̧rö̧. Ujutu adihuomenä jȩta̧'a̧ ppäcuädatö pä'ömä jä'epocotöjä, ja̧u̧ ja̧jö̧jueimä rȩrö̧jö̧nö̧ to'cuatö pä'ötä. ¹⁹ TÖ̧Ä̧NÄ̧HUA̧, ¡Ä̧ju̧cui̧! TÖ̧Ä̧NÄ̧HUA̧ ¡suronä jȩti̧nö̧ jȩpö̧ icuitö! TÖ̧Ä̧NÄ̧HUA̧ adiu ä̧ju̧cu̧ ppä'ädipitö! Ucuru adihuomenä̧tä̧, recuomä tta̧cuä̧rä̧, TÖ̧Ä̧NÄ̧HUA̧ Dios, isopäi'önä ucu cumöhuäyotömä ja̧'hua̧ta̧'a̧nö̧ cui̧tti̧mö̧mä̧ ucu cuiminä todepätö ja̧'a̧." ²⁰ Ji̧nä̧ Diosrö ucuocu chö̧ja̧'a̧nä̧, ja̧'hua̧ta̧'a̧nö̧ surojö jȩchä̧'i̧jö̧ jidähua'anä juhua'atäcu chahuaruhuä Israel ttö̧ja̧ surojö jȩttä̧'i̧jö̧'i̧nä̧ ja̧'hua̧ta̧'a̧nö̧ TÖ̧Ä̧NÄ̧HUA̧ chö̧ä̧nä̧hua̧ Dios ä'ca jo̧mȩttö̧ jä'epinö̧sä̧ Dios möä'canä kö̧ ppädattö pä'ö. ²¹ ji̧nä̧ Diioscu chucuocua'anä̧, huȩnȩ ȩcua̧ ttö̧ja̧sa̧ Gabrielmä, ä̧cuo̧mȩ i̧jȩcuä̧cho̧mȩttö̧ tochinä̧cu̧mä̧, ttö chö̧ja̧'a̧cu̧ jurunä co'ö ichi'inö̧, ni̧pä̧ro̧mȩ i̧sa̧rö̧ cuä'ö icu ttiyö pä̧nä̧. ²² Ja̧u̧mä̧ chu̧huo̧jui̧pö̧nä̧ ji'äumä päinä̧cu̧sä̧: "Daniel, ucuru pi̧yȩ i̧jȩcuä̧ chi̧jȩpä̧cu̧ pä'ö rä'opäjisä ja̧'hua̧ta̧'a̧nö̧ cu̧huo̧jui̧pö̧nä̧ jidähuacu pä'ö. ²³ Rȩrö̧jö̧nä̧ toacu pä'ö kä̧mä̧dö̧ jäcuepäjinö, chicha pä'ömä hueähui'äja'a ja̧'hua̧nö̧ ja̧'a̧ttö̧ jäcuepäji jidehuacu pä'ömä ichäjisä, ja̧'hua̧nö̧ ja̧'a̧ ucumä rö̧ä̧nä̧ repeäcujä̧. Ja̧'hua̧nö̧ jo̧mȩttö̧ pi̧yȩmä̧ a̧mö̧cuädi ja̧'hua̧ta̧'a̧nö̧ i̧jȩcuä̧chä̧ji̧mä̧ huo̧jui̧'i̧. ²⁴ Setentanö semana jo̧mȩttö̧mä̧ siete a̧'ȩ jo̧mȩnä̧ ja̧'a̧ jȩttä̧cuȩ pä'ö ku̧nä̧huä̧mä̧ cuahuaruhuä'i̧nä̧ ja̧'hua̧ta̧'a̧nö̧ cuidepiyu surojö juiyome'i̧nä̧ suronä jȩpi̧nä̧tö̧ pähuämä beipächäcua'anö̧ juhua'atäcu surojö'i̧nä̧ ju̧huȩnȩ jubötä jä̧cua̧'a̧nö̧, suronä jȩttö̧mä̧ siecuächomenä̧ beipocö jueö huȩnȩ ichäcua'anö, i̧jȩcuä̧chä̧ji̧'i̧nä̧ 'cuäopä̧cuȩ jiäcuähuä'i̧nä̧ pätecuächa pä'ömä ja̧'hua̧ta̧'a̧nö̧ rö̧ä̧nä̧ ro̧o̧mȩ'i̧nä̧ 'cä̧'ȩpö̧ ku̧nä̧huä̧cua̧'a̧nö̧. ²⁵ Ucumä huäjunä̧tä̧ cu̧huo̧jua̧ pä'ö ja̧'a̧ pä'äjita'anö ttadita pä'ö hueähui'inome kä̧mä̧dö̧ ja̧'hua̧ta̧'a̧nö̧ pä'äjita'anö Jerusalén ötahuiyä tta̧di̧tä̧cuȩ'i̧nä̧ pojopö ku̧nä̧hua̧ ichome jubömä̧ (ja̧u̧mä̧ ttu̧ru̧hua̧ jä̧cua̧), siete semanas jo̧mȩnä̧ kä̧cua̧'a̧ ja̧'hua̧ta̧'a̧nö̧ setenta dos semanas jo̧mȩnä̧ a̧'ȩttö̧mä̧ (70 semanas) Jerusalén ötahuiyämä mäniyä̧'i̧nä̧ ja̧'hua̧ta̧'a̧nö̧ rejuhuiyä'i̧nä̧ adicui'äcua'a, rö̧ä̧nä̧ usurä ȩmä̧huä̧cuä̧huä̧ mo̧ro̧ ja̧'a̧nä̧. ²⁶ A̧'ȩttö̧ setenta dos semanas jo̧mȩnä̧ 'cuäopö o'ca'a, pojopö ku̧nä̧hua̧mä̧ si'epö i̧cuä̧huä̧cua̧ ja̧'hua̧ta̧'a̧nö̧ yorö'iso juiyönä ki̧'ä̧cua̧'a̧. Su̧ro̧da̧u̧ ya̧tȩ huȩä̧u̧ ichätömä ötahuiyämä si'epö tticuäcuotö ja̧'hua̧ta̧'a̧nö̧ ro̧o̧mȩ'i̧nä̧. Ajiya su'ädi'ötä beipächäcua'a ja̧'hua̧ta̧'a̧nö̧ curätä kä̧cua̧'a̧ beipächome jubö päi'önä̧. Surojuoepäjimä̧ beipächöäcua'a. ²⁷ Ji̧mu̧tȩ ta'are a̧'ȩ jo̧mȩ jubu ttö chesecuinö ji̧ä̧huä̧cua̧mä Ja̧u̧tä̧ ja̧'a̧. Ja̧u̧nu̧ oca'a ji̧mu̧tȩ ta'are a̧'ȩ kä'co jo̧mȩ pä̧i̧'o̧mȩnä̧, ja̧u̧mä̧ jȩö̧ jui̧yä̧cua̧ i̧sa̧rö̧ cuä'ö iyähuä'inä ja̧'hua̧ta̧'a̧nö̧ ttiäre iyähuä'inä. Ja̧'hua̧nö̧ jä̧'i̧jo̧mȩ ya̧tȩmä ujuabä juttö u̧ju̧nä̧cua̧ surojöna jȩä̧cuä̧huä̧ tätähuä'ca. Röji si'epö icuähuä pätetö ku̧ni̧nö̧ suronä jȩpi̧nö̧rö̧mä̧.