¹ Ru̧hua̧ Belsasar ruhuo huea'attömä̧ huabodäcuä a̧'ȩ päi'omenä̧, ttö Danielmä̧ 'cua̧ti̧cui̧nö̧sä̧, ji̧yȩtȩ i̧jȩcuä̧cha̧'a̧ topinö̧sä̧ (a̧cuo̧mȩnä̧ i̧jȩcuä̧cha̧'a̧ tochinö ji̧nö̧ta'anö) ² Ttömä̧ i̧jȩcuä̧cha̧'a̧ topinö̧sä̧, ji̧nä̧ Susa jacuä ttoecua'a kä̧nö̧ to̧pinö̧sä̧ Elam rȩjȩttö̧mä̧. Ttö i̧jȩcuä̧cha̧'a̧ topinö̧sä̧ Ulai jayoto sahuähuomȩ ppeyänä̧ chö̧ja̧'a̧. ³ A̧je huerächa pä'ö sahuähuome kä̧nö̧ bo̧yu̧cu̧ tochomenä oveja ä̧ja̧hui̧yä̧ o̧na̧ ku̧nä̧rö̧rö̧ ajiya huerächa pä'ö sahuähuose jäyä ö̧ja̧'a̧ topinösä̧. Ji̧natȩmä̧ ko̧ro̧na̧ttö̧'i̧nä̧ yabonänö otoinä̧na, Ja̧'hua̧nö̧ ja̧'a̧nä̧ o̧to̧ä̧namä̧ a̧'cuo̧pu̧nä̧ buo juoina'a̧ beö o̧na̧ttö̧'i̧nä̧ yabonä̧nö̧. ⁴ Ttömä̧ topinö̧sä̧ oveja ubo doächi'a'a kä̧hua̧ maächa̧'a̧cu̧'i̧nä̧ ja̧u̧nu̧ o'ca'amä kä̧huä̧ u̧huo̧jua̧'a̧cu̧'i̧nä̧, ja̧u̧nö̧ o'ca'amä̧ kä̧cua̧ ö'ohue ja̧'a̧cu̧'i̧nä̧ yorö'iso ya̧tȩ I̧sa̧mä̧ ja̧u̧ ä'ca jo̧mȩ ö̧jä̧mä̧da̧ pä'ö juiyina̧'a̧. Yorö'iso ya̧tȩ'i̧nä̧ toina'a ja̧u̧ u̧mö̧ttö̧ 'choipa pä'ömä, Ja̧u̧ jȩa̧ päjimä̧ o'cajuiyunä̧tä̧ jȩpi̧nö̧, ja̧'hua̧nö̧ jepö yabonö̧tä̧ juruhuinö̧. ⁵ Ttö pi̧yȩ 'cuäopö chamucuädomenä, ya̧tȩ cabra ubo kä̧hua̧ ma̧ä̧cha̧'a̧cu̧ttu̧ icha'a topinösä̧, 'cuä'opinä pi̧jä̧ rȩjȩnä̧, o'capäi'önä jopö, rȩjȩ'i̧nä̧ me'ä̧huä̧chö̧ juiyönä 'cua̧ri̧na̧'a̧. Cabra ubomä i'äriyä ö̧'cä̧tȩ i̧sä̧na̧ ki̧nä̧cu̧. ⁶ Ja̧u̧mä̧ 'chi̧nö̧ oveja ubo ä̧ja̧ i̧sä̧na̧ to̧na̧rȩ ku̧nä̧rö̧ jo̧mȩcu̧; Ttömä topinösä̧ oveja ubomä ö̧ja̧'a̧ aje jäyoto, ja̧'hua̧nö̧ ja̧'a̧ttö̧mä̧ Cabra ubo päjimä jopinö ka̧ra̧ carnero ubo ö̧ja̧'a̧cu̧ pä̧i̧cu̧nä̧ ö̧'ä̧i̧cu̧. ⁷ Topinösä̧ cabra ubo ötö'cöhuächa'a oveja ubo ö̧ja̧'a̧cu̧. Ja̧u̧mä̧ juiyo amisurunäcu̧ oveja uborö, cuäinäcu̧ ja̧'hua̧nö̧ cuäomenä ä̧ja̧ o̧na̧ to̧na̧rȩ'i̧nä̧ 'toruhuipänä. Oveja ubo päjimä ja̧u̧ ö'cajo̧mȩ ä̧rä̧mi̧'a̧ pä'ö'inä juiyupinö. Cabra ubopäjimä rȩjȩ cuä'epö rötö 'cuȩ'cui̧nö̧ carnero uborö. Ya̧tȩí̧nä̧ toina'a oveja uborö ujuruhuächi'önä ppäda pä'ömä. ⁸ Ja̧'hua̧nö̧ ja̧'a̧ttö̧ cabra ubomä juiyo böo pinö. Ja̧'hua̧nö̧ ja̧'a̧nä̧ rö̧ä̧nä̧ ujuruhuächomenämä, ä̧ja̧ i̧sä̧na̧ rö̧ä̧na̧mä̧, 'tahui'inäcu̧, ja̧hua̧nö̧ 'tahui'inomemä pa̧ja̧cuä̧nö̧ o̧nä̧ bahuinäcu̧, ja̧u̧ o̧na̧mä̧ pätetö ku̧ni̧na̧'a̧ pi̧jä̧ pa̧ja̧cuä̧chö̧nä̧. ⁹ Ji̧nä̧tȩ ttö̧ja̧ i̧sä̧na̧ttö̧, ko̧ro̧nä̧ buo juoina'a̧, ä̧cuo̧mȩnä̧mä̧ a̧u̧cui̧na̧'a̧, ja̧'hua̧nö̧ ja̧'a̧nä̧ kä̧hua̧ ieruhua'anäcu̧ttu̧ juiyo buopinö, kä̧hua̧ räopa'acuttu rȩjȩ öädihuätä i̧jȩcui̧na̧'a̧. ¹⁰ Juiyo rö̧ä̧nä̧ buo juo'inö mo̧ro̧jä̧ra̧'a̧ttö̧'i̧nä̧ su̧ro̧do̧u̧ru̧ ärohuähuö'anö. korotöpönä su̧ro̧do̧u̧ ja̧'hua̧ta̧'a̧nö̧ korotöpönä si̧ri̧'cö̧'i̧nä̧ pi̧jä̧ra̧'a̧ kä'ö tti̧cui̧nä̧'u̧, ja̧'hua̧nö̧ ja̧'a̧nä̧ ä̧ja̧ i̧sä̧nä̧ buo juo̧i̧nä̧na̧tä̧ kä̧dö̧ i̧cui̧nä̧u̧. ¹¹ Chutä a̧mo̧nä̧tä̧ buo juo'inö, juiyo buo pinö su̧ro̧do̧u̧ tu̧ru̧hua̧ jö̧ ta̧'a̧nö̧. Ja̧u̧mä̧ ttiäre ku iyahuä'inä ttiyöjuoyönä 'cho'ipinö, Dios ö̧jo̧mȩ surojö juiyome'inä ucuotoca'a suro juo'epinö. ¹² Suronä amucuädä jȩa̧'a̧ttö̧, su̧ro̧do̧u̧mä̧ iyähuäcuotö ttäcuotö cabra ubo ä̧ja̧sä̧na̧rö̧ ja̧'hua̧ta̧'a̧nö̧ ttiäre ku'icu iyähuä'inä ttiyäjuiyänä 'chu'ädö ku̧nä̧hui̧yä̧cuo̧tö̧. Ttä̧ja̧ i̧sä̧na̧mä̧ iso jö̧mä̧ rȩjȩtä̧ tticuäcuotö, ja̧'hua̧nö̧ jȩpö̧ ttaditähua yabocu rö̧'ä̧di̧nä̧tö̧. ¹³ Ja̧'hua̧nö̧ ja̧a̧ ä̧ju̧cui̧nö̧sä̧ isoppa huotö Dios umuhuäyotö tucuocua ka̧ra̧mä̧ ädätinö: " ¿Tta̧a̧nö̧ recuäcuaattö̧ pi̧yȩ i̧jȩcuä̧chö̧mä̧, kuicu iyähuä'inä, suronä jȩttö̧ttö̧ ro̧ȩcuä̧'i̧nä̧, surojö juiyome ttiyö'inä ja̧'hua̧ta̧'a̧nö̧ moro̧jä̧ttö̧ su̧ro̧da̧u̧nä̧ kȩdö̧ tticuöcuotö? ¹⁴ Juo̧u̧ päinäcu̧sä̧ ni̧pä̧ro̧mȩ'i̧nä̧ ja̧'hua̧ta̧'a̧nö̧ moro̧ päiacu'inä 2,300 pätecuächomebu. Pi̧yȩ 'cuäpu'caa, Dios i̧jo̧dȩ'i̧nä̧ adihuächäcuaa. ¹⁵ Ttö Daniel, ya̧nä̧ i̧jȩcua̧a̧ topinösä, ttö chi̧'cä̧chä̧cua̧sä̧ ttö̧cuȩpä̧rä̧chi̧ö̧nä̧ pä'äa. ja̧'hua̧nö̧ ja̧a̧ juorö, ttö chä'cajome ka̧mä̧dö̧ ya̧tȩ i̧jȩcuä̧chi̧nö̧ ttö̧ja̧sä̧. ¹⁶ Ttö ä̧ju̧cui̧nö̧sä̧ ya̧tȩ ttö̧ja̧sä̧ huo̧pä̧rö̧ ö̧ja̧a̧ ajiya huerächa peö 'quiädäcuähua̧ra̧nä̧ jäyä känö. Juo̧ú̧ päinö: Gabriel, ppäädirö pide ttö̧ja̧sä̧rö̧ ttö̧huȩpä̧rä̧chi̧ö̧nä̧ yanä́ jähuä toömä. ¹⁷ Ja̧'hua̧nö̧ ja̧'a̧ttö̧ juo̧ú̧ ichi'inö ttö'cönänö ttö chö̧jo̧mȩcu̧. Juo̧ú̧ ichiomenä, ri̧ȩnä̧ yeecueö rȩjȩcu̧ ma̧ä̧mu̧ ja̧rȩyu̧ päi'önösä̧. Juo̧ú̧ päinäcu̧sä̧: huo̧juä̧chi̧i̧, ttö̧ja̧sä̧ i̧ttí̧, ya̧nä̧́ jähuä to'cumä yodoji 'cuä̧o̧pä̧cuȩi̧. ¹⁸ Ja̧u̧ ttöcu ucuocuäcumä rö̧ä̧nä̧ pö̧di̧ri̧jä̧chi̧a̧'a̧ttö̧ chi'ä rȩjȩcu̧ ma̧'i̧nö̧sä̧, ja̧'hua̧nö̧ ma̧di̧yä̧cu̧ ja̧u̧mä̧ mȩ'ö̧ ä̧rä̧mi̧'ö̧ chö̧jä̧mä̧dö̧nä̧ jȩi̧nä̧cu̧sä̧. ¹⁹ Ja̧u̧mä̧ pä'inö̧: Topittö, ttömä̧ ji̧dä̧huä̧cua̧jä̧ pä̧i̧ beipächomenä mä̧cuä̧nä̧nö̧ 'cuä̧o̧pä̧cuȩ, isopäi'önä i̧jȩcuä̧cuä̧ji̧mä̧ 'cuäopäcua'atä ja̧'a̧, röji mo̧ro̧ 'cuäpäcua'a pä'ö kö̧nä̧huä̧mä̧. ²⁰ Oveja ubo, ä̧ja̧ o̧na̧ to̧na̧rȩ u̧ju̧nä̧ra̧'a̧ to'cuäjimä, media ru̧hua̧'i̧nä̧, Persia ru̧hua̧'i̧nä̧ ötö'cö ja̧'a̧. ²¹ Cabratöttö̧ ubo päjimä Greciattö ru̧hua̧ ja̧'a̧, ä̧ja̧ i̧sä̧na̧ rö̧ä̧na̧ kä'co kä̧re i'äre järemä ä̧cuo̧mȩnä̧ ru̧hua̧ ja̧'a̧. ²² Ä̧ja̧ o̧na̧ dirächächäji tö'cömä, ja̧u̧ o̧na̧ ka̧cuä̧jo̧mȩmä̧ koro pa̧ja̧cuä̧nö̧ o̧na̧ räreipina̧'a̧, pa̧ja̧cuä̧nö̧ ruhuotö tti̧rȩjä̧nä̧ huettäcuotö, ja̧'hua̧nö̧ ja̧'a̧nä̧ tta̧mö̧nä̧ ttujurunä̧mä̧cö̧. ²³ ja̧u̧ ruhuo ju̧huȩnȩ jubötä beipächäcua'a, Suronä̧ hueättö pä'ätö täcö ju̧huȩnȩ jubötä tti̧rȩbȩhuo̧mȩnä̧. Ru̧hua̧ ya̧tȩ a̧'cua̧pö̧nö̧ hua̧ttö̧ ya̧tȩ juiyo huo̧jua̧mä̧ a̧rä̧mi̧'ä̧cua̧. ²⁴ Ujurumä̧ yabonötä̧ rö̧ä̧chä̧cua̧'a̧, ja̧'hua̧nö̧ ja̧'a̧nä̧ chutä a̧mö̧nä̧ ujurunä̧mä̧cö̧. Ja̧u̧mä̧ si'epö icumä̧ rö̧ä̧nä̧ yettecui'ö jähuä ja̧'a̧, Ja̧u̧ jȩö̧mä̧ isojuoäcua'a. Ja̧u̧mä̧ juruhuätörömä̧ si'epö i̧cuä̧cua̧, pojopö ku̧nä̧huo̧tö̧ ttö̧'cä̧tȩttö̧mä̧. ²⁵ Chutä a̧mö̧nä̧ u̧huo̧ju̧nä̧mä̧ yapare ji'äcuähuätä ruhuo jueönä̧mä̧ rö̧ä̧chö̧nä̧ jȩä̧cua̧. Ja̧u̧mä̧ chutä amönä a̧mö̧cuädönä̧mä̧ ucuo i̧sa̧ jö̧nä̧ i̧rȩbä̧huä̧cua̧. Ja̧u̧mä̧ ttö̧ja̧ recuätörö tta̧huä̧rä̧cuä̧huä̧ juiyönä̧tä̧ si'epu i̧cuä̧cua̧. Ja̧'hua̧ta̧'a̧nö̧ ja̧u̧mä̧ ruhuotö ttu̧ru̧hua̧rö̧'i̧nä̧ to'ija̧'a̧cu̧tä̧ jȩä̧cua̧. Ja̧'hua̧nö̧ jo̧mȩnä̧ uruhuo hueä'ijömä̧ beipächäcua'a, ja̧'hua̧nö̧ ja̧'a̧nä̧ pi̧jä̧ ttö̧ja̧sa̧ u̧mö̧nä̧mä̧cö̧. ²⁶ Ni̧pä̧cho̧mȩ'i̧nä̧ ja̧'hua̧ta̧'a̧nö̧ pä'ö mo̧ro̧ päi'a tochönä i̧jȩcuä̧chi̧nö̧ tö'cö jicuähuinö̧mä̧ isopäi'önä huȩnȩ ji̧na̧'a̧. Ja̧'hua̧nö̧ ja̧'a̧nä̧ ja̧u̧ i̧jȩcuä̧chi̧nö̧mä̧ 'cuchächi'önä̧ pä̧mä̧di̧na̧'a̧, ja̧u̧ tö'cömä recuo mo̧ro̧ jä̧cuȩ jiähua'a." ²⁷ Ja̧'hua̧nö̧ ja̧'a̧ Ttö, Daniel, ȩmä̧hui̧'i̧nö̧sä̧ ja̧'hua̧ta̧'a̧nö̧ recuo mo̧ro̧ tȩba̧ba̧nö̧ pi̧nö̧sä̧. Ja̧'hua̧nö̧ ja̧'a̧ ä̧rä̧mi̧'i̧nö̧sä̧ juhua'atäcu yabonö̧tä̧ ru̧hua̧ hueömä yabonö̧tä̧ aditö ki̧nö̧sä̧. Ja̧'hua̧nö̧ aditö chö̧ja̧'a̧nä̧ i̧jȩcuä̧cho̧mȩnä̧ na̧'a̧chi̧pi̧nö̧sä̧ ja̧'hua̧nö̧ na̧dä̧chi̧pa̧'a̧mä̧ yȩtȩ'i̧nä̧ toina̧'a̧ ja̧u̧ hui̧jui̧'ö̧mä̧.