¹ Balsasar Babilonia ru̧hua̧ ruhuo ä̧cuo̧mȩnä̧ hueinö ä̧'ȩnä̧, Danielmä ji̧yȩtȩ 'cuo̧ti̧'i̧nä ja̧'hua̧ta̧'a̧nö̧ i̧jȩcuä̧chö̧'i̧nä̧ 'cuäopinä̧cu̧ ä̧'ä̧ma̧nä̧ sä̧bu̧cä̧nö̧ ö̧'a̧'a̧nä̧. Ja̧'hua̧nö̧ ja̧'a̧ u̧'cuo̧ti̧nä̧ toinö̧mä̧ huȩyu̧tu̧ rötinö̧. Ja̧u̧ i̧huȩyu̧ti̧nö̧mä̧ korottö'i̧nä̧ yabonä̧nö̧ jö̧tä̧ huȩyu̧tu̧ rötinö. ² Danielmä jiähuinö."Ttönä yodomä̧ i̧jȩcuä̧cha̧'a̧ topinösä̧ mo̧ro̧jä̧ttö̧ pa̧ja̧cuä̧nö̧ o'cajuiyönä kä̧rö̧'co̧huo̧ppa̧mä̧ aje rö̧o̧to ppahuepinoppa. ³ isotö̧ tä̧mu̧ pa̧ja̧cuä̧nö̧, huotö ya̧cu̧punä̧ yorätehuocotömä, aje rö̧o̧tottö rä'o'inä̧tö̧. ⁴ Ä̧cuo̧mȩnä̧ i̧sa̧mä̧ mö̧ yähui jä'inö'a̧nö̧ huinö ja̧'hua̧nö̧ hua̧ ja̧'a̧nä̧ ujuabiyämä̧ mu̧ca̧ ujuabiyä ku̧nä̧ri̧nö̧. Ttömä ji̧nä̧ to̧chä̧ra̧'a̧nä̧, ujuabiyämä queähuächinä̧cu̧ ja̧u̧mä̧ pi̧jä̧ttömä̧ cättepicu̧ ja̧'hua̧ta̧'a̧nö̧ ö̧jä̧pi̧yä̧ to̧'u̧rȩcuȩ'ö̧nä̧ ä̧rä̧mi̧'ö̧ ö̧ja̧ pä'ö huettinä̧cu̧, ttö̧ja̧sa̧ jä̧'i̧ja̧'a̧nö̧. A̧mö̧cuädömä ttö̧ja̧sa̧ amucuädötä iyähui'inä̧cu̧. ⁵ Ja̧'hua̧nö ja̧'a̧ ka̧ra̧ ta̧ju̧ päi'önä i̧sa̧ ki̧nö̧, oso jä̧'i̧nö̧'a̧nö̧ hua̧, ja̧'hua̧nö̧ ja̧'a̧ ja̧u̧mä̧ beberönö̧ pi̧nö̧; ä jacuä ka̧cu̧ acu a'chenä̧mä̧ tti'esubä huäbabäcuä jo̧mȩ ki̧na̧'a̧. Ja̧u̧ru̧ pä'inä̧tö̧: "Ä̧rä̧mi̧'ö̧ ttö̧ja̧ recuätärö 'chä'chäpö cui'i'i" ⁶ Pi̧yȩ jä̧ji̧ o'ca'a pä'äji jä̧ji̧ta̧'a̧nö̧ koro topinö̧sä̧. Ju̧huȩnȩmä̧ i̧sa̧ ka̧ra̧ ki̧nö̧, yahui huȩyu̧cua̧ jä̧'i̧nö̧'a̧nö̧ huinö. Ja̧u̧ u'upi'canä̧mä̧ ujuabiyämä pa̧ja̧cuä̧nö̧ abiyä ku̧nä̧ri̧nö̧, ppiyuhuä ujuabä jä̧'i̧nö̧'a̧nö̧ jabä ja̧'hua̧ta̧'a̧nö̧ upiyämä pa̧ja̧cuä̧nö̧ ku̧nä̧ri̧nö̧. Ja̧u̧ru̧mä̧ ucuo iyähui'inä̧cu̧ ruhuo huea pä'ö. ⁷ Pi̧yȩ jä̧ji̧ o'ca'a yodomä chu̧'cua̧ti̧nä̧ topinö̧sä̧ isotöttö pa̧ja̧cuä̧nö̧ päi'önä hua̧rö̧, yettecunä̧ ye'epä'churö ja̧'hua̧ta̧'a̧nö̧ ju̧ru̧hua̧rö̧. Ja̧u̧ acupa'chemä cuoräu isa'che rö̧a̧'che ku̧nä̧ri̧nö̧; ra'adi'ömä, 'co'ö icuinö̧, ppo̧u̧cu̧tä̧ päi'önä ja̧'hua̧ta̧'a̧nö̧ ö̧jä̧pi̧yä̧ dȩa̧'a̧ pȩju̧mä̧ 'cuȩcu̧ icuinö̧. Pidemä korotö isotöttö'i̧nä̧ i̧mi̧cu̧nä̧ huinö̧ ja̧'hua̧ta̧'a̧nö̧ ä̧ja̧hui̧yä̧ ona̧mä̧ to̧mö̧rȩ jähuä o̧na̧ jo̧mȩnä̧ ku̧nä̧ri̧nö̧. ⁸ Ji̧nä̧ ä̧ja̧hui̧yä̧ onatä̧ to̧pä̧rö̧ chö̧ja̧'a̧nä̧, topinö̧sä̧ ja̧u̧ o̧na̧ttö̧tä̧ korona ä̧ja̧ i̧sä̧na̧ a̧'u̧cuä̧na̧ räoa'a. Ä̧cuo̧mȩnä̧ ä̧ja̧ o̧na̧ huä̧bo̧na̧cuä̧ jä̧ji̧mä̧ 'chu̧huä̧ro̧mȩmä̧ o'cajuiyötä que'opö tticuinö. Rä̧o̧pä̧jä̧na̧nä̧mä̧ i'äre ki̧na̧'a̧ ttö̧ja̧sa̧ i'äre 'cua̧ra̧re ja̧'hua̧ta̧'a̧nö̧ änämä̧ rö̧ä̧u̧ jähuä ucuo tö'cö ucuocuina'a ⁹ Ji̧nä̧ to̧pä̧rö̧ chö̧ja̧'a̧nä̧, dȩ'ä̧qui̧yä̧ ka̧ pä'ö jo̧mȩ ku̧nä̧hui̧'i̧na̧'a̧, ja̧'hua̧nö̧ ja̧'a̧ täcö juiyo bö̧o̧sä̧ ja̧huä̧cä̧nä̧ pä̧mä̧di̧nö̧. Ö̧'ca̧tä̧huä̧ta̧mä̧ isoppa jä̧'i̧ja̧'a̧nö̧ teina'a juhua'atäcu uhuo'chemä oveja uhuo'che päcuäitä jä'che jä̧'i̧ja̧'a̧nö̧ ji̧na̧'a̧. I̧dȩä̧cä̧mä̧ ocuräma̧ jä̧'i̧ja̧'a̧nö̧ ja̧'hua̧ta̧'a̧nö̧ kärähuä'camä ocurä cuoa'a jä̧'i̧ja̧'a̧nö̧ ji̧na̧'a̧ ¹⁰ Ja̧u̧ ä'ca jo̧mȩttö̧ ocurä ajiya räopina̧'a̧; juiyo recuätö ja̧u̧rö̧ ppä̧'ä̧dä̧ri̧nä̧tö̧ ja̧'hua̧ta̧'a̧nö̧ cien millones jo̧mȩnä̧ huotö Ja̧u̧ ä'ca jo̧mȩ ka̧cui̧nä̧tö̧. Täcö pä'ö icuähuä jo̧mȩ päi'omȩnä̧ cuyärö o'tämä bachächipina̧'a̧. ¹¹ Ttö to̧pä̧rö̧ 'chi̧nä̧sä̧ öjö'cö huiyönä ucuocua'anä ä̧ja̧ isanänä̧ pä'ö. Ttö topinösä̧ i̧sa̧rö̧ cuättänä̧'i̧nä̧ ja̧'hua̧ta̧nö̧ idepä siepu tticua'a'inä, ja̧'hua̧ta̧nö̧ iyinä̧tö̧ ku tticua pä'ö. ¹² Korottö pa̧jä̧cuä̧nö̧ huotö isotörömä, tturuhuo huettä pä'ömä 'hottipinä̧u̧, ja̧'hua̧nö̧ ja̧'a̧nä̧ ji̧nä̧ ä̧'cua̧rö̧ ttö̧ja̧ pä'ömä ja̧'a̧ttä̧ tottinä̧u̧. ¹³ Ja̧u̧ yodo inä topinösä̧, mo̧ro̧jä̧ isoppanä icha'a ya̧tȩ ubo i̧tti̧ 'cua̧rö̧nä̧; JÄ̧U̧ ichinö ya̧tȩ juiyo buo i̧sa̧ ö̧jo̧mȩcu̧ ja̧'hua̧nö̧ ja̧'a̧ttö̧ ja̧u̧ ö̧jo̧mȩcu̧ ttȩpi̧nä̧cu̧. ¹⁴ Uruhuo ösäru ujurucu huea pä'ö iyähuinä̧cu̧ ttö̧ja̧ pi̧jä̧nä̧ ko̧cuȩtö̧ o'catoinä tteseta pä'ö tti̧huȩnȩ punä. JA̧U̧ uruhuo hueömä 'cuäopunä̧tä̧ kö̧ beipächocö jä̧cuä̧, ja̧'hua̧ta̧nö̧ ja̧u̧ uruhuomä siepu'inä icuähuocö jä̧cuä̧. ¹⁵ Ja̧'hua̧nö̧ ja̧'a̧nä̧ ttö, Daniel, Dios a̧'cua̧ru̧hua̧mä̧ ttö jacuänämä a̧'cua̧ tta̧'ȩcuä̧ji̧, jua'amä Dios ttörö i̧jȩpi̧nö̧ tochina'a̧ttö̧ chamöcuädönä suronä ji̧nä̧cu̧sä̧. ¹⁶ Ttömä ya̧tȩ juȩnȩ kö̧ ö̧jo̧mȩcu̧ 'chä̧hui̧'i̧nö̧sä̧ ja̧'hua̧nö̧ 'chä̧hui̧'ö̧ jä'epinösä i̧jȩpa̧ttö̧ pä'ö tta̧'a̧nö̧ pä'ö ja̧ pä'ö ja̧'hua̧nö̧ jö̧mä̧. ¹⁷ Pitö isotä tä̧mö̧mä̧, pa̧ja̧tö̧mä̧ pa̧ja̧cuä̧nö̧, pa̧ja̧cuä̧nö̧ ruhuotö ji̧na̧'a̧ pi̧jä̧ rȩjȩttö̧ ttä̧rä̧mi̧'ä̧cuo̧tö̧mä̧. ¹⁸ Ja̧'hua̧nö̧ ja̧'a̧nä̧ mo̧ro̧jä̧ ru̧hua̧ u̧mu̧huäyotö surojö jui'ätötä ttȩmä̧cuo̧tö̧ ruhuomä, ja̧'hua̧nö̧ ja̧'a̧ttö̧ jahuätömä ttu̧ju̧nä̧rä̧cuo̧tö̧ 'cuäopönätä̧. ¹⁹ Ja̧'hua̧nö̧ ja̧'a̧ chuhuo̧jua̧ päösä pa̧ja̧cua̧nö̧ de'a isotö ttitö'cö; korotöttö'inä i̧mi̧cu̧nä̧ huinätö̧ ttäcupiyä'inä cuoräutä huinätö̧ tti̧no̧ji̧yä̧'i̧nä̧ broncetä huinätö̧ ja̧hua̧nö̧ ja̧'a̧ ri̧ȩnä̧ yeecue'inö̧sä̧; sesepicu cuinätö̧ ja̧'hua̧ta̧'a̧nö̧ ki̧ä̧ji̧mä̧ tti̧jä̧pu̧ dȩa̧a̧ ki̧ö̧nä̧ 'cuȩcui̧cuinätö̧. ²⁰ Ttö chuhuo̧jua̧ päösä tomure jähuä isotö ttönä ka̧cu̧ ttäjäsänä ötö'cö, rijinä räopäjimä käicuinö ttäjäsä'o̧ná̧ ja̧'hua̧nö̧ ja̧'a̧ koro o̧na bahui'inaa. chu̧huo̧jua̧ pä'ösä ttäja̧ o̧na̧ ttiäre ka̧cu̧ ja̧'hua̧ta̧'a̧nö̧ ttäinä ki̧na̧'a̧ ja̧'hua̧nö̧ ja̧'a̧ttö̧ ri̧ȩnä̧ cuinätö̧ suttädi'önä korottöttö'inä abonänö tämu pinätö̧. ²¹ Ji̧nä̧ topärö̧ chö̧ja̧'a̧nä̧, juo̧u̧ ttäja̧ o̧na rohuähuicu juruhuinö o̧na̧ ttö̧ja̧ surojö jui'ätörö. ²² Ja̧'hua̧nö̧ ja̧'a̧ rä'o'inö tȩa̧pa̧ bu̧o̧sa̧ ja̧'hua̧ta̧'a̧nö̧ ppa'adinö adihuä i̧sa̧mä ttö̧ja̧ surojö jui'ätörö. Ja̧'hua̧nö̧ ja̧'a̧ttö̧ pätetinäu̧ ruhuó ttȩma̧ pö'ö DIOS umuhuäyotö ja̧'a̧ttö̧. ²³ Pi̧yȩ ja̧'a̧ jahuätö ttö̧ja̧ pättinö̧mä̧: Isotöttö pa̧ja̧cuä̧nö̧ päi'önä hua̧rö̧, ja̧u̧ tö'cömä ja̧huä̧jä̧ rȩjȩnä̧ pa̧ja̧cuä̧ päi'önä ru̧hua̧ ä'coji hue'ä'ijätö o'catoi'önä̧ttö̧'i̧nä̧ imicu̧nä̧ huȩä̧cua̧ ötö'cö ja̧'a̧. Ja̧huä̧jä̧mä̧ jä̧ttä̧jä̧tä̧ si'epö i̧cuä̧cua̧ ja̧'hua̧ta̧'a̧nö̧ 'cuȩ'cu̧ i̧cuä̧cua̧ juhua'atäcu 'chä'ö i̧cuä̧cua̧. ²⁴ Tö̧mö̧rȩ jähuä ä̧ja̧ o̧na̧ tö'cömä, ja̧u̧ ruhuottömä tömöre ruhuotö rätto'äcuotö ja̧'hua̧ta̧'a̧nö̧ jahuätö tto'comenä ka̧ra̧ ru̧hua̧ rä̧o̧i̧'ä̧cua̧. Ja̧u̧mä̧ ä'coji hue'ä'ijätö'a̧nö̧mä̧ huocö jä̧cua̧ ja̧'hua̧nö̧ hua̧ jo̧mȩttö̧ huämetucuä ruhuotörö kä'ö i̧cuä̧cua̧. ²⁵ Ja̧u̧mä̧ mo̧ro̧jä̧nä̧ kö̧rö̧'i̧nä̧ to'ija̧'a̧cu̧ pä̧cua̧ ja̧'hua̧nö̧ jȩpö̧ mo̧ro̧jä̧ kö̧ u̧mö̧huäyotö pojopö u̧ju̧ni̧nä̧u̧rö̧ usurä ttȩmä̧u̧nä̧ jȩä̧cua̧. Ja̧u̧mä̧ pä'cäri kä̧cuȩ mo̧ro̧'i̧nä̧ ja̧'hua̧ta̧'a̧nö̧ hueähuä huȩnȩ'i̧nä̧ pärotö icua pä'ö jȩä̧cua̧. Pi̧yȩ ja̧u̧ u̧mö̧nä̧ iyähui'äcua'a ya'ute a̧'ȩ jo̧mȩtä̧'i̧nä̧, todäre a̧'ȩ jo̧mȩtä̧'i̧nä̧ ja̧'hua̧ta̧'a̧nö̧ a̧'ȩ kä'co jo̧mȩtä̧'i̧nä̧. ²⁶ Röji pä'ö icuähuä i̧sa̧mä̧ jo̧mȩnö̧tä̧ ö̧jä̧cua̧ ja̧'hua̧nö̧ ja̧'a̧ jähuätömä isopäi'önä ujurumä 'cho̧tti̧pä̧cua̧ to'ädäji tticuarö pä'ö ja̧'hua̧ta̧'a̧nö̧ ju̧huȩnȩbötä si'epö tticuarö pä'ö. ²⁷ Ruhuo'i̧nä̧, ttö̧ja̧rö̧ 'chu̧'ä̧rö̧ hueähuä'i̧nä̧ ja̧'hua̧ta̧'a̧nö̧ mo̧ro̧jä̧ dȩa̧'a̧ttö̧ ruhuonä hueähuä'i̧nä̧ mo̧ro̧jä̧ ru̧hua̧cu̧ ka̧cuä̧tö̧ surojö'i̧nä̧ jui'ätörötä ja̧u̧mä̧ iyähui'äcua'a. Ja̧u̧ru̧ hueö ruhuo beipocö jä̧cuȩ ja̧'hua̧nö̧ ja̧'a̧ttö̧ korotö ruhuotömä ja̧u̧ hueötä jȩpö̧ ttö̧jä̧cuo̧tö̧ ja̧'hua̧ta̧'a̧nö̧ ttucuotäcuotö. ²⁸ Toinömä pȩnȩbötä beipa'a. Ttötä Daniel chötö'cömä, chamöcuädömä rö̧ä̧nä̧ yei'ina'a ja̧'hua̧nö̧ jo̧mȩnä̧ chi'ämä pärohuächi'ina'a. Ja̧'hua̧nö̧ jä̧ji̧mä̧ korotörömä ji'ähuocö pinö̧sä̧.