¹ Dariorömä ruhuo hueome adiunä ja̧rö̧ pä'ö, 120nö huotö ruhuotörö hue'ö ku̧ni̧nö̧ ttidepiyunä hue'ö ttö̧ja̧ pä'ö. ² Ja'huätöttömä huä̧metucua hue'ipotö jo̧mȩ ji̧na̧'a̧ ruhuo adihuomenä 'chö̧nä̧ to̧pä̧rä̧tö̧mä̧, ja̧'hua̧nö̧ ja̧'a̧ttö̧ Danielmä jahuätöttö ya̧tȩ ji̧na̧'a̧. Pitö ruhuo adihuomenä 'chö̧nä̧ to̧pä̧rä̧tö̧mä̧ cä'epö ku̧nä̧huo̧tö̧ ji̧na̧'a̧ ttidepiyunä ruhuo hue'ätö ttaditähuä to̧ttä̧rȩa̧ pä'ö, ru̧huä̧ o'cajuiyönä 'cuäopö u̧huo̧jua̧ pä'ö. ³ Daniel ji̧na̧'a̧ jahuätö ruhuo adihuomenä 'chö̧nä̧ to̧pä̧rä̧tö̧ttö̧'i̧nä̧ ttu̧ru̧hua̧ jö̧nä̧ huinömä, jua'amä yabonänö a̧'cua̧ru̧hua̧nä̧ juo̧huä̧huä̧ u̧ju̧nä̧ra̧'a̧ttö̧. Ja̧'hua̧nö̧ ji̧yä̧cu̧ ru̧hua̧mö̧ uruhuo o'cajuiyönä iyipä pä'ö amucuädänäcu̧. ⁴ Ja̧'hua̧nö̧ ja̧'a̧ttö̧ korotö ruhuo adihuomenä 'chu̧nä̧ to̧pä̧rä̧tö̧mä̧ usinätö̧ Daniel ruhuonä aditomettö̧ jäyä jȩa̧ pä'ö, ja̧'hua̧nö̧ ja̧'a̧nö̧ po̧cui̧po̧co̧tö̧ pinätö̧ aditähuättö suronä jȩö̧mä̧ ja̧u̧mä̧ u̧ru̧hua̧ päöta'anö jȩa̧'a̧ttö̧. Jarodäcuähuä ja̧'hua̧ta̧'a̧nö̧ jäyä jȩä̧cuä̧hua̧'inä juiyina'a ja̧u̧nä̧mä̧. ⁵ Ja̧'hua̧nö̧ ji̧yä̧u̧ ja'huätömä pä'inätö̧: "Ujutumä po̧cui̧po̧co̧tö̧jä̧ suronä jȩö̧mä̧ Danielrö suronä pätä'cha pä'ömä, TÖ̧Ä̧NÄ̧HUA̧ Diosttö hueähuä huȩnȩ päoca'acu jȩö̧ttö̧ täcö̧." ⁶ Ja̧'hua̧nö̧ ja̧a̧ ru̧hua̧ ä'cajo̧mȩ ȩpu̧ i̧jȩpi̧nä̧tö̧ ttäditä̧cuei̧ ttö̧ja̧rö̧ hueö ttä̧huä̧cuä̧huä̧ ruhuotö. Jahuätö päinätö̧: Ru̧hua̧ Dario, ¡ucú 'cuäpunä cui̧jä̧cua̧jä̧! ⁷ O'catoinä ä̧cuo̧mȩnä̧ ruhuotöttö ttö̧ja̧rö̧ ttä̧hua̧rä̧cuä̧huä̧ ttö̧ja̧, ruhuotö tti̧rȩjä̧ pu̧nä̧ ka̧cuä̧tö̧, ruhuotö jäyänä ka̧cuä̧tö̧'i̧nä̧, huȩnȩ ki̧ȩdä̧rä̧tö̧'i̧nä̧ ja̧'hua̧ta̧'a̧nö̧ ruhuotö'inä ji̧nä̧ yo̧mȩtȩ päiö jäepu ä̧ju̧cuä̧tö̧ ucurö, ru̧hua̧, esecu adicuä huecua'anö ja̧a̧ jȩtä̧cua̧'a̧nö̧, ya̧tȩi̧nä̧ jäepiyaanö ja̧a̧ i̧ä̧nä̧hua̧rö̧mä̧ treintanö moro̧ jo̧mȩnä̧, ru̧huá̧, ucú huecú jȩpo̧cö̧rö̧mä̧, juo̧ú̧ ttö̧ja̧sä̧rö̧mä̧ mu̧yä̧hui̧tö̧ ttiäjura̧a̧ käö i̧cuä̧huä̧cua̧. ⁸ Ja̧'hua̧nö̧ ja̧a̧, ru̧hua̧, huȩyu̧tu̧ hueinö hueähuä huȩnȩ́ pojänä tti̧mi̧ tti̧huȩyu̧ta̧ peö juo̧u̧mä̧ pärotöicu'inä icuähuocö jä̧cuȩi̧, juo̧u̧ hueähuä huȩnȩ́mä̧ jä̧cuȩi̧ medosnä'i̧nä̧ ja̧'hua̧ta̧'a̧nö̧ persasnä'i̧nä̧, siepu tticuiyäcuaanö. ⁹ ja̧'hua̧nö̧ ja̧'a̧ttö̧ ru̧hua̧ Dario huȩyu̧ti̧nö̧ i̧mí̧ juä'tänä pähuädö̧nä̧ esecu hueö jȩä̧cuä̧huä̧ hueähuä huȩnȩnä̧. ¹⁰ Danielmä cuyärö isoyänä huȩyu̧cuä̧mä̧ hueähuä huȩnȩ jö̧nä̧tä̧ pärohuächäja'a huo̧jui̧'ö̧, ja̧u̧mä̧ ojusodenä do'ächi'ö (ja̧'hua̧nö̧ ja̧'a̧ ojusodettö ju'tonä̧ i̧so̧ca̧ ventanamä Jerusalénra̧'a̧cu̧ bahuecuina̧'a̧) ja̧'hua̧nö̧ ja̧'a̧ i̧huȩ'qui̧yu̧nä̧ pämädö̧, ya'ute mo̧ro̧mä̧ huäbodäcuä jo̧mȩnä̧ ucuocuä'ijöta'anö̧ ucuocumä Dios ä'ca jo̧mȩttö̧ adihua'a pä'ö ucuocuinö̧, ä'coji ucuocuä'ujöta'anö̧tä̧. ¹¹ Ja̧'hua̧nö̧ ja̧'a̧ pitö ttö̧ja̧ tta̧mö̧nä̧ pa̧ja̧tö̧ suro juottepa pä'ö a̧mö̧cuädätömä Daniel ji̧yȩtȩ jäepa'a topinä̧tö̧ ja̧hua̧ta̧'a̧nö̧ Dios ppädarö pä'ö usa'a'i̧nä̧. ¹² Ja̧'hua̧nö̧ ja̧'a̧ ru̧hua̧rö̧ ttö'cönä̧nö̧ ichi'ö ja̧u̧cu̧ hueähuä huȩnȩ ötö'cö ucuocuinätö̧: "¿Ucumä hueähuä huȩnȩnä̧mä̧ treintanö mo̧ro̧ jo̧mȩtä̧ hue'ö ku̧nö̧jä̧cö̧ pätinä̧, o'cato'iönä ttö̧ä̧nä̧hua̧rö̧cö̧ ttö̧ja̧sa̧rö̧cö̧ jä'epätömä, ucutä'i̧nä̧ jäcuepöttömä̧ mö̧ yä̧hui̧tö̧ ti̧rejunä do'opö icuähuäcuotö jö̧nä̧? Ru̧hua̧mä̧ ädätinö. "Ja̧u̧ tö'cö täcö hue'ö ku̧nä̧hua̧'a̧, medosttö hueähuä huȩnȩttö̧'i̧nä̧ ja̧'hua̧ta̧'a̧nö̧ persasttö hueähuä huȩnȩttö̧'i̧nä̧: jȩpö̧mä̧ i̧cuähuoca'a jä̧cua̧'a̧ jö̧nä̧tä̧." ¹³ Ja̧'hua̧nö̧ ja̧'a̧ jahuätömä ru̧hua̧rö̧ ädätinä̧tö̧: Ja̧u̧mä̧ Daniel ja̧'a̧, judá rȩjȩra̧'a̧ttö̧ i̧chä̧cuä̧hua̧ ucu huecuäji jȩa̧ pä'ocömä jȩtta̧ pä'ötä cudo'che i̧so̧bö̧nä̧ ta'ö huecuäji'i̧nä̧. Ja̧u̧mä̧ ö̧ä̧nä̧hua̧ Diosrö ya'ute mo̧ro̧ttö̧mä̧ huäbodä jo̧mȩnä̧ ucuocu." ¹⁴ Ru̧hua̧mä̧ pi̧yȩ ä̧ju̧cu̧mä̧, rö̧ä̧nä̧ a̧'cua̧tta̧ päi'inä̧cu̧ ja̧'hua̧nö̧ jä̧cu̧ a̧mö̧cuädinö tocu jȩpö̧ jäyä päi'öjittömä̧ ja̧u̧ ö̧ji̧pö̧nä̧ ppädö'anö ja̧ pä'ö. Ja̧u̧mä̧ a̧mö̧cuädönä aditinö kä̧hua̧ ma̧ä̧cho̧mȩ jubö päi'önä Danielrö ja̧u̧ huȩnȩttö̧ rä'epö icua pä'ömä. ¹⁵ Ja̧'hua̧nö̧ ja̧'a̧ jahuätö ttö̧ja̧ surojuottepa pä'ö jȩpä̧jä̧tö̧mä̧ ca̧ca̧cui̧pö̧ ru̧hua̧cu̧ ucuocumä̧ pä'inä̧tö̧: "Ucu ru̧hua̧mä cu̧huo̧jua̧ pä'ö ja̧'a̧ medosttö'i̧nä̧, Persattö'i̧nä̧ hueähuä huȩnȩ jȩtta̧ pä'ö hueähui'äjimä, ru̧hua̧ jȩttä̧cuȩ hueinömä̧ yorö'iso pärohuächa pä'ömä juiya'a." ¹⁶ Ja̧'hua̧nö̧ ja̧'a̧ ru̧hua̧mä̧ ji̧yȩtȩ hue'ö ku̧ni̧nö̧ ja̧'hua̧nö̧ hueäja'amä Danielrö i'cächinä̧tö̧ ja̧'hua̧nö̧ i'cächipö mö yä̧hui̧tö̧ ttäjunä ki'opö tticuinä̧cu̧. Ru̧hua̧mä̧ Danielrö pä'inö: "Cu̧ä̧nä̧hua̧ Diostä 'cuäopönä hueö jȩ'cui̧yä̧cu̧tä̧, cu̧ji̧pö̧nä̧ ppädäcu." ¹⁷ Inäbi i'cächipö mö yä̧hui̧tö̧ ttäju ä'ca mö̧ttȩpäbinä ru̧hua̧mä̧ udo'che i̧so̧bö̧ 'co̧'ö̧ a̧di̧cuo̧bö̧nä̧ ji̧yȩtȩ pä̧mä̧dö̧nä̧ ta'inö, ja̧'hua̧ta̧'a̧nö̧ ippeya ruhuotö'i̧nä̧ yabonö tti̧nȩpo̧bö̧mä̧ Daniel juorö ö̧ji̧pö̧nä̧mä̧ ppä̧do̧co̧bö̧ ji̧no̧bö̧. ¹⁸ Ja̧'hua̧nö̧ ja̧'a̧ ru̧hua̧mä̧ ojusode ruhuodera̧'a̧ ppa̧'ä̧chä̧chä̧ji̧'ca̧mä̧ ja̧u̧ yodomä u̧cuä̧mä̧ ucuoca'atä 'cuä'opinö. Yorö'iso korojuei'i̧nä̧ ä'ca jo̧mȩcu̧mä̧ tti'cächiyarö pä'ömä jo̧ca̧'a̧ ji̧na̧'a̧, ja̧'hua̧nö̧ ja̧'a̧ ja̧u̧nö̧mä̧ pudimä juiyinä̧cu̧. ¹⁹ Ja̧'hua̧nö̧ ja̧'a̧ttö̧ kä̧hua̧ pä'ö räopöta'anö, ruhua porächö ä̧rä̧mi̧'ö̧ jurunä 'chä̧nö̧ mö̧ yä̧hui̧tö̧ ttö̧'ä̧jura'a topö 'chi̧nö̧. ²⁰ Rejura̧'a̧ ötö'cöhuächö ta'anö, i̧huȩnȩ a̧'cua̧ttä̧nä̧ huo̧pä̧ri̧nö Danielrö, Danielrö pa̧'a̧nö̧ pä'ö: "Daniel, Dios ihueyetä kö̧ u̧mu̧huä̧ya̧, ¿CUÄ̧NÄ̧HUA̧ Diosma ppä'ädäji, 'cuäopönä cua̧u̧ cu̧huä̧nä̧rä̧cu̧mä, mö yä̧hu̧yi̧tö̧ttö̧ cu̧ji̧pö̧nä̧?" ²¹ Ja̧'hua̧nö̧ ja̧'a̧ Daniel ru̧hua̧rö̧ pä'inö: "¡Ucu ru̧hua̧mä̧, 'cuäopönätä̧ cu̧jä̧cua̧jä̧! ²² TTÖ CHÖ̧Ä̧NÄ̧HUA̧ Diosmä u̧mu̧huäyotörö huä'äji mö yä̧hui̧tö̧ ttäpiyä mu̧ttȩpa̧ pä'ö, ja̧'hua̧nö̧ ja̧'a̧ttö̧ ttörömö ubara ttu'epäcotö päjätö. U̧huo̧jua̧'a̧ttö̧ ttömä ja̧u̧ru̧ suronämä jȩcho̧ca̧'a̧ttö̧ ja̧'hua̧ta̧'a̧nö̧ ucutu cuä'catucu jo̧mȩttö̧'i̧nä̧, ru̧hua̧, ucuru suronämä jȩpo̧cö̧ pä'ijösä." ²³ Ja̧'hua̧nö̧ jo̧mȩnä̧ ru̧hua̧mä̧ rö̧ä̧nä̧ esehuinö. Ja̧u̧mä̧ hue'inö Danielrö hue'inö rejuttu rättätarö pä'ö. Ja̧'hua̧nö̧ ja̧'a̧ttö̧ Danielrö rejuttu tä'epinätö̧. Ja̧u̧nä̧mä̧ i̧'qui̧cha̧nä̧'i̧nä̧ suronä jo̧mä̧ po̧cui̧po̧co̧tö̧ pinätö, jua'amä Ö̧Ä̧NA̧HUA̧ DIOSRÖ A̧'cua̧ u̧hua̧na̧ra̧'a̧ttö̧. ²⁴ Ru̧hua̧mä̧ i̧jȩttȩ hue'inö, ja̧'hua̧nö̧ jo̧mȩnä̧ i'chächinätö̧ Danielrö ja̧'hua̧nö̧ jȩpä̧ji̧ pä'ätörö ja'huätörömä mö̧ yä̧hu̧yi̧tö̧ ttö̧jo̧cuäju jacuä tti̧cui̧nä̧u̧, ja'huätö tti̧tti̧mö̧'i̧nä̧ ja̧'hu̧ta̧'a̧nö̧ tti̧rȩcua̧mö̧rö̧'i̧nä̧. Ji̧nä̧ rȩjȩ pättä'oca'anä, mö̧ yä̧hu̧yi̧tö̧mä ma̧'ä̧mi̧nä̧tö̧ ja'huätörö ja̧'hua̧nö̧tä̧ ttihue'quiyu'inä ppo̧u̧cu̧nä̧ ttu̧cui̧'i̧nä̧u̧. ²⁵ Ja̧'hua̧nö̧ ja̧'a̧ttö̧ ru̧hua̧ Dariomä o'catoi'önä ttö̧ja̧ ttu̧huo̧jua̧ pä'ö huȩyu̧ti̧nö̧, ruhuo hueome pa̧ja̧cu̧nä̧ tti̧huȩnȩnä̧ jö̧ pö̧nä̧ tti̧rȩjä̧nä̧ ko̧cuä̧tö̧rö̧: "Huȩnȩ juiyönä kä̧cuä̧huä̧tä̧ rö̧ächä̧cua̧'a̧ ucutunä." ²⁶ Pojänä, ttö huȩyu̧tö̧sä̧ esecu kunö jȩä̧cuä̧huä̧ huȩnȩ́ ttö ru̧hua̧ huȩdönämä, ucutönö yeecu tti̧ä̧u̧nö̧ kä̧tu̧cui̧ ttö̧ja̧ Daniel u̧ru̧hua̧ DIOS ä'cajo̧mȩ, Juo̧u̧tä̧ ja̧a̧ DIOS ä̧'cua̧rö̧ ku̧mä̧ cuäpunätä̧ ja̧'hua̧nö̧ ja̧'a̧ttö̧ curuhuomä beepeipu icuyä̧cua̧; huecuä cua̧jä̧ huecuomebu. ²⁷ Juo̧u̧tä̧ ttä̧a̧rö̧'i̧nä̧ ppäädö'inä, ja̧'hua̧ta̧'a̧nö̧ moro̧jä̧ttö̧'i̧nä̧ rȩjȩttö̧'i̧nä̧ i̧jȩcuä̧ a̧'cua̧cu̧nä̧ i̧jȩpu̧; Juo̧u̧tä̧ tta̧a̧ri̧nö̧mä̧ Danielrö'inä muyä̧hui̧tö̧ ttujuröhuomettö̧'i̧nä̧. ²⁸ Ja̧'hua̧nö̧ ja̧a̧ Danielmä ucuo i̧sä̧ ki̧nö̧ ru̧hua̧ Dario huȩi̧nö̧ pänämä ja̧'hua̧ta̧'a̧nö̧ ru̧hua̧ Ciro hueinö pänä'inä Persas rȩjȩttö̧'i̧nä̧ ja̧'hua̧nö̧tä̧ tottinäcu̧.