¹ Dario ä̧cuo̧mȩnä̧ ko̧cui̧nä̧tö̧ttö̧ hueö pänä, ttötä ichinösa̧

ppä'adö tta̧'a̧rö̧ Miguelrö.

² Jitämä ttötä jueönä ji̧dä̧cua̧'cua̧jä̧. Persiattö huämetucuä jo̧mȩ ttä̧rä̧mi̧ä̧cuo̧tö̧, ja̧'hua̧ta̧nö̧ pa̧ja̧cuä̧nö̧ hua̧mä̧ korotöttö abonänö pärätä ru̧hua̧ jä̧cua̧'a̧. Ja̧u̧ pärätä uruhuonä rä̧bä̧u̧ ö̧jo̧mȩnä̧mä̧, ja̧u̧mä̧ jȩä̧cua̧ o'catoinä ttörohuäunä Grecia ruhuo hueome. ³ Ya̧tȩ ju̧ru̧hua̧ ru̧hua̧ ä̧rä̧mi̧ä̧cua̧, uruhuocu hueapä'ö rȩjȩ rö̧ä̧ö̧nä̧ jo̧mȩ churutä pä̧huä̧rö̧jo̧mȩnä̧ huȩä̧hua̧. ⁴ Ja̧u̧ jo̧mȩnö̧ pä'iomenämä, uruhuo jä̧ji̧mä̧ pa̧ja̧cuä̧nö̧ jo̧mȩnä̧ pperehuächäcua'a. Ja̧hua̧nö̧ ja̧'a̧nä̧ chutä ahuäruhuätömä̧'cö̧, ujurunä hueinö'inä ji̧ya̧cua̧'a̧. Ja̧'hua̧nö̧ ja̧'a̧ttö̧ uruhuomä 'choicua̧'cua̧ korotötä iyähuäcua'a. ⁵ Kä̧hua̧ ö'ohue ja̧'a̧nö̧ ru̧hua̧tä̧ juiyo u̧ju̧ru̧huä̧cua̧, ja̧'hua̧nö̧ ja̧'a̧nä̧ u̧mu̧huä̧yä̧ su̧ro̧do̧u̧ ttu̧ru̧hua̧ ja̧u̧ttö̧'i̧nä̧ abonänö ju̧ru̧hua̧ i̧chä̧cua̧ ja̧'hua̧ta̧'a̧nö̧ uruhuo'inä pä̧i̧cu̧nä̧ huȩä̧cua̧. ⁶ Reccuo a̧'ȩ hueö o'ca'a, adiunä jo̧ pänä petecuächomenä, ja'huätömä ttesecuäcuotö. Kä̧hua̧ ö'ohue ja̧'a̧nä̧ ru̧hua̧ ittijumä kichäcuaju kä̧hua̧ u̧huo̧jua̧'a̧cu̧ ru̧hua̧ ö̧ja̧'a̧cu̧ ttesecuinö ta'anötä ttadita pä'ö. Ja̧'hua̧nö̧ ja̧'a̧nä̧ recuomä kujurucu ko̧co̧ju̧ käcuaju, chutä'inä ä̧rä̧mi̧'o̧cö̧ jä̧cua̧, jöjo'inäcö. Ja'huäjumä jaropi'äcuähuaju käcuaju, ja'huäju ja̧hua̧ta̧'a̧nö̧ jitö ja'huäjuru i'chächäjätörö'inä, kä̧'o̧tö̧'i̧nä̧, ja̧'hua̧ta̧'nö̧ i̧yȩnö̧ pä̧nä̧ ppä̧'ä̧dä̧rä̧tö̧rö̧'i̧nä̧. ⁷ Ja̧'hua̧nö̧ ja̧'a̧nä̧ ihuehui appiyä yuchähuipö pöttächi'äcua'a huorömä. Ja̧u̧mä̧ u̧mu̧huäyotö su̧ro̧do̧u̧cu̧ ppä'ädäcuäu ö̧ro̧huä̧huä̧cua̧ ja̧'hua̧nö̧ jȩpö̧ ujurucu do̧ä̧chä̧cua̧ kä̧hua̧ u̧huo̧jua̧'a̧cu̧ ru̧hua̧ öäre micuäju juäi ko̧cuo̧mȩ. Jahuätucu örohuä̧huä̧cua̧ ja̧u̧mä̧, ja̧hua̧nö̧tä̧ rohuäu 'cho̧i̧pä̧cua̧. ⁸ Ja̧u̧mä̧ ȩpä̧cua̧ Egiptora̧'a̧cu̧ yapare ö̧ä̧nä̧huo̧tö̧ cuoräuttu tätähuotörö ȩpö̧ ja̧'hua̧ta̧'a̧nö̧ o̧'ta̧hui̧yä̧ pärätättö orottö adicuä. Recuo a̧'ȩ jo̧mȩ oto ö̧jä̧cua̧ kä̧hua̧ u̧huo̧jua̧'a̧cu̧ ru̧hua̧ o̧jo̧mȩttö̧mä̧. ⁹ Ja̧'hua̧nö̧ ja̧'a̧ttö̧ kä̧hua̧ u̧huo̧jua̧'a̧cu̧ ru̧hua̧tä̧ 'cho̧'i̧pä̧cua̧ kä̧hua̧ ö'ohue ja̧'a̧nä̧ ru̧hua̧ uruhuomä, ja̧'hua̧nö̧ jȩpö̧ ppa̧huä̧chä̧cua̧ chutä i̧rȩjä̧ra̧'a̧cu̧. ¹⁰ I̧tti̧mu̧ jo̧mȩnö̧ adicuinätö̧ jinäyo̧mȩtȩ päi'inätö̧ su̧ro̧da̧u̧ recuätucu curä ttörohuahua peö. Tti̧chä̧cuo̧tö̧ ru̧hua̧ ojusodecu recuätönä ajé suädää ja̧i̧nö̧a̧nö̧ päi'önä. ¹¹ Ja̧'hua̧nö̧ ja̧'a̧ttö̧, ka̧huá̧ iohue ja̧'a̧cu̧ttö̧ ru̧huá̧ ri̧ȩnä̧ öjö'quiyönä pä̧i̧ä̧cua̧; Juo̧u̧mä̧ i̧'cha̧cua̧ rohuähuö ka̧huá̧ u̧huo̧jua̧'a̧cu̧ ru̧hua̧rö̧. Ja̧'hua̧nö̧ ja̧'a̧ttö̧ ka̧huá̧ u̧huo̧ jua̧a̧cu̧ttö̧ ru̧hua̧mä̧ jo̧mȩnö̧ cuupäcu ttädicua peö hueinä su̧ro̧da̧u̧rö̧, ja̧'hua̧nö̧ ja̧'a̧nä̧ su̧ro̧da̧u̧mä̧ ttö̧mu̧nä̧tä̧ ki̧i̧nä̧tö̧. ¹² Su̧ro̧da̧u̧mä̧ ttȩmi̧pi̧nä̧u̧ koromecu̧ ja̧'hua̧nö̧ ja̧'a̧ttö̧ ka̧huá̧ iohue ja̧'a̧cu̧ ru̧hua̧mä̧ esehuinö amiso'quittö, juo̧u̧mä̧ hueä̧cua̧ cuä'ö tticua peö recuätörö aboyotörö, ja̧'hua̧nö̧ ja̧'a̧nä̧ juo̧u̧mä̧ isó jo̧ȩpi̧yä̧cua̧. ¹³ Ja̧'hua̧'a̧nö̧ ja̧'a̧, kä̧huä̧́ uhuojua̧'a̧cu̧nö̧, ru̧hua̧mä̧ pääta'anö adiu huo̧juȩti̧ö̧'ca̧ ppa̧huä̧chä̧cua̧ umuhuäyotö su̧ro̧da̧'u̧rö̧, yabonänö recuätörö ä'coji ji̧no̧mȩttö̧'i̧nä̧ abonänö huotörö, juo̧nö̧ o'caa koro duonä pääta'anö ppa̧huä̧cha̧cua̧ urohuahua pä'ö kä̧huá̧ ieruhuaacunä suro̧da̧u̧ recuätucu ja̧'hua̧nö̧ ja̧'a̧nä̧ rohuacuähuä rö̧ȩnä̧ i'cächö. ¹⁴ Ja̧u̧nö̧ pänä recuätö ttä̧rä̧mi̧ä̧cuo̧tö̧ ttörohuahua pe'ö kä̧huá̧ ieruhua'acutö ru̧hua̧cu̧. Juätucu'inä tti̧jä̧cuo̧tö̧ korotö u̧mätö̧ suropätö Israelnämä, ja̧'hua̧ta̧'a̧nö̧ 'cuo̧ti̧nä̧ i̧jȩcuȩchi̧nö̧'a̧nö̧, ja̧'hua̧'a̧nö̧ ja̧'a̧nä̧ juaattömä hueyecuinätö̧. ¹⁵ Ru̧hua̧ ttö'ohue ja̧'a̧cu̧ kö̧mä̧ i̧chä̧cua̧, rȩjȩmä̧ ötahuiyä ttoecuäbäcu u'chu jö̧nä̧ pä̧mä̧dö̧nä̧ öta pä'ö, ja̧'hua̧nö̧ rötö ötahuiyä ttoecuäbä pparopö icu ttö̧ja̧rö̧mä̧ 'chu̧huä̧dä̧cua̧. Ttu̧huo̧jua̧'a̧cu̧nä̧ ka̧cuä̧tö̧mä̧ yȩnȩtä̧mä̧ ttö̧jö̧ juiyönä jä̧cua̧'a̧, su̧ro̧da̧u̧ rohuähuäcuähuä huo̧juä̧tö̧ jö̧ttö̧'i̧nä̧. Juȩnȩ ttö̧ja̧cua̧ pä'ö ttujurumä juittäcuotö. ¹⁶ Ja̧'hua̧nö̧ ja̧'a̧nä̧, ichömä̧ ja̧u̧ru̧mä̧ churutä pä̧huä̧rö̧ja̧'a̧cu̧ jȩä̧cua̧; ya̧tȩ'i̧nä̧ ja̧u̧ a̧mö̧cuädäjimä tto'epocö jä̧cua̧. Ja̧u̧mä̧ rȩjȩ adihuäjä̧nä̧ ö̧jä̧cua̧ ja̧'hua̧nö̧ kä̧nö̧mä̧ si'epö icua pä'ömä ja̧u̧ u̧mö̧nä̧tä̧ kä̧cua̧'a̧. ¹⁷ Ttu̧huo̧jua̧'a̧cu̧ kö̧ ru̧hua̧mä̧ a̧mö̧cuädäcua̧ ruhuo huȩä̧u̧ o'catoi'önä̧cu̧ icha pä'ö ja̧'hua̧nö̧ ichömä ja̧u̧cu̧ esecuäcua̧ u̧huo̧jua̧'a̧cu̧ kö̧rö̧ jȩä̧cuȩ a̧mö̧cuädömä. Ja̧u̧mä̧ ittiju yajuterö huȩä̧cua̧ tti̧rȩcua̧mö̧ päi'önä ttu'ohuecu kö̧ ruhuo kä'i icua pä'ömä. Ja̧'hua̧nö̧ jo̧mȩnä̧ tta̧mö̧cuädäji'i̧nä̧ ppädoca'a jä̧cua̧'a̧. ¹⁸ Pi̧yȩ jä̧ji̧ o'ca'a ttu̧huo̧jua̧'a̧cu̧ kö̧ ru̧hua̧mä̧ adiu to̧ä̧rä̧cua̧ ja̧'hua̧nö̧ topömä jahuätö nä̧tö̧ttö̧ recuätörö 'chuädäcua̧. Ja̧'hua̧nö̧ ja̧'a̧nä̧ su̧ro̧da̧u̧ ttu̧ru̧hua̧mä̧ pä̧i̧cua̧rö̧mä̧ ju̧huȩnȩ jubötä beipächönä jȩä̧cua̧ ja̧'hua̧ta̧'a̧nö̧ ja̧u̧ pä̧i̧cua̧rö̧mä̧ ka̧ra̧rö̧ surojuoepönä jȩä̧cua̧. ¹⁹ Ja̧'hua̧nö̧ päi'omenä ja̧u̧mä̧ adiu to̧ä̧rä̧cua̧ chutä idepiyu 'quiyönä aditö ku̧nä̧huo̧mȩmä̧, ja̧'hua̧nö̧ ja̧'a̧nä̧ ja̧u̧mä̧ ppe'ocuächö ma̧ä̧chä̧cua̧ ja̧'hua̧nö̧ ma̧ä̧chö̧ja̧'a̧mä̧ ttö̧'o̧cui̧'o̧co̧cu̧ jä̧cua̧. ²⁰ Ja̧'hua̧nö̧ ja̧'a̧ ja̧u̧ ö̧jö̧ji̧ o'comettö̧ ya̧tȩ ä̧rä̧mä̧cua̧ ja̧u̧mä̧ ru̧hua̧ iäre pärätä ö̧ca̧ca̧ta̧ pä'ö huȩä̧cua̧ ttö̧ja̧ ru̧hua̧ öäre pärätä tti̧mi̧tönä̧ uruhuo öädihuämä adihuomenä jö̧nä̧. Ja̧'hua̧nö̧ ja̧'a̧nä̧ koro mo̧ro̧mä̧, ja̧u̧mä̧ si'epötä i̧cuä̧huä̧cua̧, ja̧'hua̧nö̧ si'epö tticumä ra̧huä̧rö̧mä̧cö̧, curä rohuäumä̧cö̧. ²¹ Ja̧u̧ ö̧jä̧ji̧ o'come ya̧tȩ ttö̧ja̧sa̧ kö'cähuocö ttö̧ja̧'i̧nä̧ ucuo isopäi'önä ujuru'i̧nä̧ ttiyococu; ja̧u̧mä̧ tta̧ttä̧ro̧cö̧ mo̧ro̧ i̧chä̧cua̧ ja̧u̧tä̧ jä̧cua̧'a̧ ruhuo'i̧nä̧ yaretötä 'cho̧i̧pä̧cua̧mä̧. ²² Su̧ro̧da̧u̧mä̧ si'epötä icuähuäcuotö ajiya rö̧ä̧nä̧ ichoya ja̧u̧ ä'ca jo̧mȩttö̧ si'ecuächäji'a̧nö̧, ta̧ju̧cuäyotö jauhuätömä̧ su̧ro̧do̧u̧'i̧nä̧ ja̧'hua̧ta̧'a̧nö̧ ttö̧ja̧ ttu̧ru̧hua̧'i̧nä̧ siépö icuähuäcua'a. ²³ Ja̧u̧cu̧ esecu ö̧jä̧mä̧do̧mȩttö̧ kä̧mä̧dö̧, ja̧u̧mä̧ yaparetä jȩpö̧ ö̧jä̧cua̧; suro a̧'u̧cu̧nä̧tä̧ huotö ttö̧ja̧cu̧tä̧ ja̧'a̧nä̧ ujurumä u̧ju̧nä̧rä̧cua̧. ²⁴ Jiähuoca'atä, ja̧huä̧jä̧ rȩjȩttö̧mä̧ rö̧ä̧nä̧ ruhuoko̧mȩnä̧ i̧chä̧cua̧, ja̧'hua̧ta̧'a̧nö̧ ja̧u̧mä̧, jä̧'o̧tö̧ mi̧nä̧'i̧nä̧, jä̧do̧tö̧ mi̧nä̧'i̧nä̧ jȩtto̧cö̧ ji̧nö̧ jȩä̧cua̧. Ja̧u̧mä̧ rohuäu pärätä 'choipäjimä chutäcu 'chä̧tö̧rö̧mä̧ iyä'chäcua̧, Ja̧u̧mä̧ a̧mö̧cuädö u̧ju̧nä̧cua̧ ötahuiyä 'quiyönä̧ adicuome 'choipa pä'ö, ja̧'hua̧nö̧ ja̧'a̧nä̧ a̧'u̧cu̧nä̧ mo̧ro̧ jo̧mȩtä̧. ²⁵ Ja̧u̧mä̧ ujurucu ö'orächi̧'ä̧cua̧ kä̧cua̧ ieruhua'anä ru̧hua̧cu̧ örohuahua pä'ö umuhuäyotö curä rohuähuätucu. Ja̧'hua̧nö̧ ja̧'a̧nä̧ kä̧cua̧ mo̧ä̧cha̧'a̧cu̧ ru̧hua̧mä̧ örohuähuä̧cua̧ umuhuäyotö recuätucu juiyo juruhuätucu̧, ja̧'hua̧nö̧ ja̧'a̧nö̧ jahuätömä iso juottepiyäcuotö korotö ja̧u̧ru̧ kö'cotö suronä jȩttä̧'a̧tö̧. ²⁶ Chutäcu ttu̧cuä̧ adihuä juäi cuänö ko̧cuä̧'i̧jä̧ttö̧ ja̧'a̧nä̧ suro juottepa pä'ö jȩttä̧cuo̧tö̧. Ja̧u̧ umuhuäyotömä aje ȩmi̧pa̧'i̧nö̧'anötä recuätö totte'äcuotö. ²⁷ Pitö ta̧ju̧ ruhuotömä̧, tämucuädömä suronä jȩtta̧ pä'ötä ja̧cua̧'a̧ ka̧ra̧ ka̧ra̧nö̧, mesa isodänä pä̧mä̧dö̧ tucuocua'anä'inä yaparetä ja̧'hua̧'a̧ ka̧ra̧ ka̧ra̧nö̧ suro juottecua pä'ötä, ttucuocumä iso juottepiyäcuotö. Röjinämä jȩpu̧ cu̧nä̧huo̧mȩtä̧ pätecuächönä i̧chä̧cua̧. ²⁸ Ja̧'hua̧nö̧ ja̧'a̧ttö̧ kä̧cua̧ u̧cuo̧jua̧'a̧cu̧ttu ru̧hua̧mä̧ ppa̧huä̧chä̧cua̧ rö̧ä̧nä̧ öäre pärätäcu, suronä̧tä̧ jȩä̧cua̧ surojö jui̧'a̧ esecuinöji̧nö̧mä̧. Ja̧'hua̧nö̧ ja̧'ttö̧ ppa̧huä̧chä̧cua̧ chutä i̧rȩjä̧ra̧'a̧cu̧tä̧. ²⁹ Pä'ö ku̧nä̧huä̧ mo̧ro̧ pätecuächomenä, ja̧u̧mä̧ ppa̧huä̧chä̧cua̧ ja̧'hua̧ta̧'a̧nö̧ i̧chä̧cua̧ pä'äjita'anö kä̧hua̧ u̧huo̧jua̧'a̧cu̧ ru̧hua̧ ö̧ja̧'a̧cu̧. Ja̧'hua̧nö̧ ja̧'a̧nä̧ jitämä pä'äji ji̧nö̧'ä̧nö̧mä̧ jo̧ca̧'a̧ jä̧cua̧'a̧. ³⁰ Quitim rȩjȩra̧'a̧ttö̧ ri̧ä̧ huoi'canä ttichäcuotö ja̧u̧cu̧ ttörohuähua pä'ö, ja̧'hua̧nö̧ ttichäcu ye'ecui'ö ttöipä̧chä̧cua̧. Ja̧u̧mä̧ amisuräcua̧ chutä surojö juiyönä jȩchä̧cua̧sä̧ päinö ji̧nö̧, ja̧'hua̧nä̧ jo̧mȩnä̧tä̧ aadihua'a pä̧cua̧ chutä surojö juiyönä jȩchä̧cua̧sä̧ päino̧mȩttö̧ tö'ipächätörötä. ³¹ Ja̧'hua̧ta̧'a̧nö̧ u̧muhuäyotö su̧ro̧du̧u̧cu̧ ichö suronä jȩttä̧cuo̧tö̧ tto̧ȩpä̧ra̧'a̧nä̧ juruhuätöjä pä'ö ttö̧jode. Jahuätömä jȩpo̧co̧tö̧ ttäcuotö ttiäre ku icu iyähuä jȩttä̧'i̧'ö̧'i̧nä̧, ja̧'hua̧ta̧'a̧nö̧ ttö̧jä̧'i̧jo̧mȩ'i̧nä̧ toächometä̧ jä̧cua̧'a̧. ³² Jitö Dios esecuinö ji̧nö̧ suronä jȩpi̧nä̧tö̧mä̧, chutä yapare ji'äutä surojuoepäcuotö. Ja̧'hua̧nö̧ ja̧'a̧nä̧ TÖ̧Ä̧NÄ̧HUA̧ Diorö huo̧juä̧tö̧mä̧ ttujuruhuäcuotö ja̧hua̧nö̧tä̧ tta̧mi̧ 'qui'ächi'ö ttö̧jä̧cuo̧tö̧. ³³ Ötahuiyättö huo̧juä̧huä̧nä̧ ko̧cuä̧tö̧mä̧ recuätörö ttu̧huo̧huȩtä̧chä̧cuo̧tö̧. Ja̧'hua̧nö̧ ja̧'a̧nä̧ ja'huätömä döttöhuäcuotö curä'chucu ja̧'hua̧ta̧'a̧nö̧ ocuräcu'inä; Ja'huätömä döttähuäcuotö carenä ttö̧jo̧mȩ jacuätö ja̧'hua̧ta̧'a̧nä̧ ttabo'iyotötä ttöäre ttö̧nä̧u̧hui̧tä̧cuo̧tö̧. ³⁴ Ja̧'hua̧nö̧ ttusurähuomettö̧, ja'huätömä ji̧'chi̧cha̧nö̧ ppädäcuähua ttȩmä̧cuo̧tö̧. Esecuätöjä pä'ö a̧mo̧nä̧tö̧ jȩttä̧cuo̧tö̧. ³⁵ Huo̧juä̧tö̧ttö̧ yotucunämä döttäcuotö ppa̧'ȩpö̧'i̧nä̧, ttö'cö'icu'inä ja̧'hua̧ta̧'a̧nö̧ päjopö tticuome jubutä, pi̧jä̧ beipächome jubu. Ji̧yȩnö̧ mo̧ro̧ 'cuäopäcua'a pättinö tta̧'a̧rä̧tö̧jä̧. ³⁶ Ru̧hua̧mä̧ chutä pä̧huä̧rö̧jo̧mȩnä̧tä̧ jȩä̧cua̧. Ja̧u̧mä̧ rö̧ä̧nä̧ ȩsȩhuä̧cua̧ ja̧'hua̧ta̧'a̧nö̧ a̧mo̧nä̧ ttö̧ä̧nä̧huo̧tö̧ttö̧'i̧nä̧ abonanö buosä pä̧cua̧. Ja̧'hua̧nö̧ jȩpö̧ surojönätä̧ pä̧'chä̧cua̧ a̧mo̧nä̧ ttö̧ä̧nä̧huo̧tö̧ TÖ̧Ä̧NÄ̧HUA̧ Diorö, pä̧'chä̧cua̧ pättöjuiyö'anö jö̧'i̧nä̧, ja̧u̧mä̧ adiunätä jä̧cua̧ ttö̧a̧nä̧hua̧ a̧mi̧surächi'omejubutä. Pa̧'a̧nö̧ jä̧cua̧'a̧ päinöta'anö jä̧cua̧'a̧ttö̧. ³⁷ Ja̧u̧mö̧ toö jui̧yä̧cua̧ tä̧do̧tö̧ mi̧na̧ ttö̧ä̧nä̧huo̧tö̧rö̧'i̧nä̧, nä̧tö̧ ttöadihuättö ttö̧ä̧nä̧huo̧tö̧rö̧'i̧nä̧ topocö jä̧cua̧ korotö yapare ttö̧ä̧nä̧huo̧tö̧rö̧'i̧nä̧. Jahuätöttö'inä yabonänö, ja̧u̧mä̧ buo hua̧ chutö ja̧'a̧ttö̧ ³⁸ Ja̧u̧mä̧ ö̧ä̧nä̧hua̧ ju̧ru̧hua̧rö̧tä̧ ucuo tȩä̧huä̧cua̧, churutä ucuo tettähuahueimä. Jä̧'o̧tö̧'i̧nä̧ ttö̧ä̧nä̧hua̧ pocö pinö̧rö̧ ja̧u̧mä̧ ucuo teähuä̧cua̧ oronä̧tä̧, plaranä̧tä̧ ido'qui rö̧ä̧nä̧ mi̧cuöhuo'quinä̧tä̧ ja̧'hua̧ta̧'a̧nö̧ mippoönä̧ iyänä̧tä̧. ³⁹ Ja̧u̧mä̧ rö̧ä̧nä̧ 'quiyönä adicuome'i̧nä̧ u̧ro̧huä̧huä̧cua̧, ko̧ro̧jä̧ ttö̧ja̧ ttö̧ä̧nä̧hua̧ ppä̧dä̧ra̧'a̧nä̧, ja̧u̧rö̧ chu̧ä̧nä̧hua̧ pä'ömä ja̧rö̧ ucuo iyö jä̧cua̧'a̧. Ja̧u̧mä̧ ttö̧ja̧ recuätörö ruhuonä huettönä jȩä̧cua̧ ja̧'hua̧nö̧ jȩpö̧ tti̧rȩjä̧tä̧ iyä'chäcuotö micuä päi'önä̧mä̧. ⁴⁰ Röji mo̧ro̧ päi'omenä ru̧hua̧ ttö'ohuecu kö̧cu̧ u̧ro̧huä̧huä̧cua̧. Ru̧hua̧ ttu̧huo̧jua̧'a̧cu̧ kö̧mä̧ i̧chä̧cua̧ ö'ohuecu ja̧'a̧cu̧ kö̧cu̧ caruquiyänä'i̧nä̧ caballotö̧nä̧'i̧nä̧ rö̧ä̧u̧ huoi'quiyönä'inä rohuäu ichömä. Ja̧u̧mä̧ rȩjȩ ja̧'a̧cu̧nä̧ i̧chä̧cua̧, su'epö'i̧nä̧ i̧cuä̧cua̧, ja̧u̧mä̧ 'cuä̧o̧'ä̧cua̧. ⁴¹ Ja̧u̧mä̧ rȩjȩ adihuäjä̧nä̧ doächä̧cua̧ ja̧'hua̧nö̧ jo̧mȩnä̧ Israel ttö̧ja̧mä̧ recuätö totte'äcuotö. Ja̧'hua̧nö̧ ja̧'a̧nä̧ pitömä ja̧u̧ ujurutumä ttö̧ji̧pä̧cuo̧tö̧: Edomttö'i̧nä̧, Moabttö'i̧nä̧ ja̧'hua̧ta̧'a̧nö̧ Amon ttö̧ja̧ttö̧ tottea'anä ka̧cui̧pi̧nä̧tö̧ttö̧'i̧nä̧. ⁴² Ja̧u̧mä̧ ja̧huä̧jä̧ rȩjȩ jacuämä chutä ujurunä 'chu̧huä̧rä̧cua̧; Egipto rȩjȩmä̧ ki̧'o̧co̧jä̧ jä̧cuä̧jä̧. ⁴³ Ja̧u̧ u̧mö̧nä̧tä̧ kä̧cua̧'a̧ rö̧ä̧nä̧ micuäu oro'i̧nä̧ plata'i̧nä̧ ja̧'hua̧ta̧'a̧nö̧ Egipto ttö̧ja̧ järe ruhuotö jö̧nä̧ ttu̧ju̧nä̧ri̧nö̧mä̧; Libias ttö̧ja̧'i̧nä̧, Etíopias ttö̧ja̧'i̧nä̧ ja̧u̧ a̧mö̧cuäda'acutä tti̧'chä̧cuo̧tö̧. ⁴⁴ Ja̧'hua̧nö̧ ja̧'a̧nä̧ huȩnȩ ka̧hua̧ räopa'acuttö ucuohuönä u'ohuecu ja̧'a̧cu̧ ka̧cuä̧tö̧mä̧ yettecui'äcuotö, ja̧'hua̧nö̧ päi'omȩnä̧ o'cajuiyötä amisurächi'äcu jä̧ttä̧jä̧tä̧ si'epö i̧cuä̧cua̧, ttö̧ja̧ o'catoi'önä̧rö̧ si'epö icua pä'ömä. ⁴⁵ Ja̧u̧mä̧ ojusode ruhuode i̧sa̧ i̧jȩta̧ttö̧ 'tö̧ä̧huode aditö u̧huȩnä̧cua̧ aje rö̧o̧tottö'i̧nä̧, mö̧ä̧'ca a̧'cua̧cuä'ca surojö'i̧nä̧ jui̧yä̧'ca̧ 'cä̧tȩ jo̧mȩ päte'ö. Ja̧u̧mä̧ 'coru juo'ächötä i̧'chä̧cua̧ ja̧'hua̧nö̧ jo̧mȩnö̧ ja̧u̧ru̧ ppä'ädömä toäcua'a.