¹ Pi̧yȩta̧ ja̧'a̧ TTÖ̧Ä̧NÄ̧HUA̧ Dios ttörö i̧jȩpa̧ji̧mä̧. ¡Topí, duhuonä u̧huä̧ju̧ dejäcä! ² Ja̧u̧ pä'inö: "¿Däje tocu'ättö, Amos?" ttö pä'inösa: "Jicate duhuonä u̧huä̧ju̧ dejäcä." Ja̧u̧nu̧ o'ca'a TTÖ̧Ä̧NÄ̧HUA̧ päinäcu̧sä̧: "Isrél ttö̧ja̧mä̧ täcö jo̧mȩnö̧ huottö; Porö yabocumä ja̧'a̧tä̧mä topocöchä̧cua̧sä̧. ³ Dios ö̧jo̧dettö ra̧'ö̧ huottä'ijömä ji̧yȩnö̧ mo̧ro̧mä̧ päröhuächäcua'a ajacuähuänätä̧," Pa̧'a̧nö̧tä̧ pä'ö TTÖ̧Ä̧NÄ̧HUA̧ Diomä. "Recuötö ja̧'a̧ 'corujuottächäcuotömä, ji̧yȩcu̧du̧nä̧ttö̧ 'corujuäinätä dochäu tticuäcuotö!" ⁴ Ä̧ju̧cuä̧tu̧cui̧, Ucutumä ja̧'a̧ 'cuȩcuä̧tö̧mä̧ recuäö̧jä̧u̧ru̧ ja̧'hua̧ta̧'a̧nö̧ usurä i̧so̧tö̧rö̧mä̧ si'epötä icuätöjä pi̧jä̧ttö̧mä̧. ⁵ Jahuätö pä'ätö: "¿Ti̧yȩnö̧ki̧jä̧ 'cuä̧'o̧pä̧cua̧ jareönä yodo kä̧hua̧mä̧, u̧huä̧ju̧ o̧tȩ micuänä tiyapä'ämä? ¿Ti̧yȩnö̧ki̧jä̧ beipächäcua'a 'cuä'ächö pä̧cuä̧huä̧ mo̧ro̧mä̧, pä'äjita'anö micuänä tiyä trigo? ujutumä jȩtä̧cuo̧tö̧jä̧ pa̧ja̧cuä̧ttö̧ a̧'u̧cu̧pö̧nä̧tä̧ jö̧nä̧ ja̧'hua̧nö̧ jȩpö̧ micuähuomettö abonänö 'chatädäcuotöjä, ja̧'hua̧nö̧ jȩpö̧ amäcö rö̧nä̧huä̧'i̧nä̧ jäyä jo̧nä̧ jȩtä̧cuo̧tö̧jä̧. ⁶ Pa̧'a̧nö̧ jȩtö̧mä̧ micuänä tiya pä'ö trigo surojuoächö'inä, u̧su̧rä̧ i̧sa̧rö̧mä̧ pärätänä ȩmö̧, ja̧'hua̧ta̧nö̧ recuärö̧jä̧cuu̧ru̧ tö̧jä̧pö̧ isayatä iyö." ⁷ TÖ̧Ä̧NÄ̧HUA̧MÄ̧ a̧mu̧nä̧ pa̧ja̧tö̧tä̧ pä'äu ku̧nä̧ji̧jä̧ Jacob ucuo teäu jähuänä̧: "Isopäi'önä̧tä̧ Ttömä yorö'iso ucutu jȩ'cuä̧tu̧cu̧mä̧ u̧ni̧chi'ocö chä̧cua̧sä̧." ⁸ ¿Pa̧'a̧nö̧ jo̧mȩttö̧ rȩjȩmä̧ ttö̧ȩpo̧ca̧'a̧ jä̧cua̧'a̧, ja̧'hua̧ta̧'a̧nö̧ ja̧huä̧jä̧nä̧ ka̧cuä̧tö̧ o'catoi'önämä ajahuocotö ttäcuotö? Nilo aje kiädia'a jä̧'i̧ja̧'a̧nö̧ ttä̧rä̧mi̧'ä̧cuo̧tö̧ ja̧'hua̧ta̧'a̧nö̧ icu tticuomenä a̧'u̧ tticuäcuotö Egipto ajenä. ⁹ Ja̧u̧nu̧ mo̧ro̧mä̧ rȩbȩhuä̧cua̧'a̧, pä'ötó TÖ̧Ä̧NÄ̧HUA̧ Diosmä: Ttömä mo̧ro̧ kä̧hua̧mä̧ mo̧ro̧ kä'co nipä̧chi̧'ö̧nä̧ jȩchä̧cua̧sä̧, ja̧'hua̧ta̧'a̧nö̧ pi̧jä̧ rȩjȩmä̧ mo̧ro̧mä̧ yo̧i̧'ö̧nä̧ jȩchä̧cua̧sä̧. Pä'cari jȩpö̧ tesehuäjimä a̧'u̧ ttu'u ttajahuönätä jȩchä̧cua̧sä̧ juhua'atäcu ra̧huä̧huä̧mä̧ ajahuäcuähuä jö̧nä̧tä̧ pärotö chi̧cuä̧cua̧sä̧. ¹⁰ Ttömä ucutu o'catoi'önä sacu oyutä ku̧'ca̧tä̧huä̧tu̧cua̧ pä'ötä jȩchä̧cua̧sä̧ ja̧'hua̧ta̧'a̧nö̧ yotucunä̧ ttunämä ttuhuo'chemä juiyönä̧tä̧. Ttömä tti̧tti̧ ä̧cuo̧mȩnä̧ i̧sa̧ 'corujuoächomenä a̧'u̧ ttutta'a jä̧'i̧nö̧'a̧nö̧ jȩchä̧cua̧sä̧, juhua'atäcu röjinä̧mä̧ ttöjö'cö juiyönätä ttäcuotö. ¹¹ Topätucui, ji̧yȩ mo̧ro̧ rȩbȩhuomenä, TÖ̧Ä̧NÄ̧HUA̧ Diosmä huäjuetö icu jiähuäji, jua̧jä̧ rȩjȩnä ppäi ttöhuähuä rȩbȩhua̧ pä'ö huedomenä, ja̧u̧mä̧ ttucua ppä̧i̧rö̧jö̧tä̧mä̧cö̧, ttahua a̧di̧ri̧ju̧tömä̧ ja̧'hua̧nö̧ ja̧'a̧nä̧ ji̧nä̧somä TÖ̧Ä̧NÄ̧HUA̧ I̧huȩnȩ cuä̧ju̧cua̧ pä'ö jä̧cua̧'a̧. ¹² Jahuätömä aje rö̧o̧to ppahua'a jä̧'i̧nö̧'a̧nö̧ ttäcuotö; jahuätömä jottäcuotö ttu̧huo̧jua̧'a̧cu̧ttö̧ kä̧mä̧dö̧ kä̧hua̧ räopa'acu TÖ̧Ä̧NÄ̧HUA̧ i̧huȩnȩ usu 'chä̧nö̧mä̧, ja̧'hua̧nö̧ jotta'anä po̧cui̧po̧co̧tö̧ ttäcuotö. ¹³ Ja̧u̧ mo̧ro̧mä̧, nä̧ttö̧ muäyotö adihuätö'inä uborö jerupätödä̧jä̧ ttahua adiri̧jä̧u̧ ttidiyahuächi'äcuotö. ¹⁴ Jitö Samariattö surojö jȩtti̧nö̧nä̧ huȩnȩtö̧ pä'ätömä, jahuätömä mattä̧chä̧cuo̧tö̧ ma̧ttä̧cho̧mȩnä̧mä̧ pä'äjita'anömä yorisotä ärämi'ocotö ttäcuotö.''