¹ Pi̧yȩ huȩnȩ ä̧ju̧cui̧, ajacuähuä Ttö chäräbe'ö ucutu Israel ttö̧ja̧rö̧. ² Israel ttö̧ja̧ surojönätä̧ to'e'ächinä̧tö̧, yabonö̧mä̧ ä̧rä̧mo̧co̧tö̧ ttäcuotö, jahuätömä tti̧rȩjä̧nä̧tä̧ tti̧cui̧pi̧nä̧u̧; ya̧tȩ'i̧nä̧ toa'a jahuätörö äräbe'ä pä'ömä. ³ Isopäi'önä TÖ̧A̧NÄ̧HUA̧MÄ̧ pi̧yȩ pä'ötó: ötahuiyä ttö̧ja̧ milnö jo̧mȩnä̧ chä̧jä̧tö̧ttö̧mä̧ ciennö jo̧mȩnä̧tä̧ ttö̧ja̧cui̧'ä̧cuo̧tö̧, ja̧'hua̧ta̧'a̧nö̧ ciennö huotö 'chä̧jä̧tö̧ttö̧mä̧ dieznö huotötä ttö̧ja̧cui̧'ä̧cuo̧tö̧, Israel ttö̧ja̧ttö̧ ka̧cui̧pä̧jä̧tö̧ttö̧mä̧." ⁴ isopäi'önä TÖ̧Ä̧NÄ̧HUA̧MÄ̧ Israel ttö̧ja̧rö̧mä̧ pi̧yȩ pä'ötó: "¡Usätucuittö ku̧ja̧cuä̧tu̧cua̧! ⁵ Betelmä cusätucuä; Gilgalra̧'a̧mä̧ docuächätucuä; Beersebarömä eseäcuähuötämä cu̧jä̧tu̧cuä̧. Isopäi'önä Gilgame cärenä pȩju̧tä̧ ti̧chä̧cuo̧tö̧ ja̧'hua̧ta̧'a̧nö̧ Betelmä si'epötä icuähuäcuotö. ⁶ TÖ̧Ä̧NÄ̧HUA̧RÖ̧ Usu kä̧hui̧, Ja̧u̧mä̧ ocurä jä'inö'a̧nö̧ ja̧'a̧nö̧ ujurucu doächi'ä̧cua̧ José ojusodenä̧mä̧. Cuo'ö icuäcua'a, Ja̧'hua̧ta̧'a̧nö̧ ya̧tȩ'i̧nä̧ na̧huȩpa̧'a̧nö̧ hua̧mä̧ to'äcua'a Betelmä̧. ⁷ ¡Jahuätö ttö̧ja̧mä̧ ttö'ärohuächäcuotö surojäjimä adiunätä̧ jö̧nä̧ ja̧'hua̧nö̧ ja̧'a̧ttö̧ jueönä̧ i̧cuä̧cua̧ rȩjȩra̧'a̧cu̧!'' ⁸ Diosmä Aditinö Si̧ri̧'cö̧ oyunä rö̧jä̧tö̧rö̧; Ja̧u̧mä̧ ja̧'hua̧nö̧ ja̧'a̧ttö̧ pärötö icua pä'ö'inä ja̧'a̧ yö̧'ä̧i̧nä̧ja̧ yö̧'ö̧nä̧, ja̧u̧mä mo̧rö̧ ja̧i̧'mä̧ yö̧i̧'nä̧ yodo päi'önä jepu aje rö̧i̧'ȩto̧ttö juo'opusä̧, Cuoya ajiyämä̧ pi̧ja̧rä̧ ichunä̧ huȩ'ö̧sä̧. ¡TÖ̧Ä̧NÄ̧HUA̧ i̧minä! ⁹ Ja̧u̧tä̧ ja̧'a̧ ujuru kö̧mȩi̧'nä̧ si'äcuächomä bu päi'önä jȩpu̧mä̧ ja̧'hua̧'a̧nö̧ urucuo komei̧'nä̧ siepicumä̧. ¹⁰ Ja'huätömä ttämi su̧rä̧u̧ pä̧huä̧rö̧jö̧'a̧nö̧ pa̧'a̧nö̧ jö̧'a̧nö̧ ja̧'a̧ pä'ätörömä ötahuiyä apate doächäcuähuomȩttö̧mä, ja̧'hua̧ta̧'a̧nö̧ körötö adiu jue'önä̧ ucuocuätörömä. ¹¹ Ucumä̧ tocu pä'ö juiyo cuju'cö juiyönä̧ tocuä usuräisa̧rö̧mä̧ ja̧'hua̧ta̧'a̧nö̧ ucumä ja̧u̧ u̧cuä̧ trigottö ji̧'qui̧cha̧nö̧ ȩmu̧jä̧, inä̧huiyättö cuoju'ode cuaditina'a̧nä'inä, ucumä̧ ja̧u̧ odenä̧mä cu̧jui̧yä̧cua̧jä̧. Uvas pättiyu'inä̧ a̧cua̧cu̧nä ku̧nä̧rö̧jä̧, ja̧'hua̧nö̧ ja̧'a̧nä̧ vino isoyamä ahuo'cöcuä̧cua̧jä̧. ¹² Tocu pä'ö ttömä huo̧jua̧sä̧ ucu suronätä̧ jȩpu̧ huocu'ä'chömä ja̧'hua̧nö̧ ja̧'a̧ttö̧ juiyo rö̧'a̧'a̧ ucu surojö ku̧ju̧nä̧rö̧mä, ucumä adihuä i̧sa̧rö̧mä a̧'cua̧tta̧huȩcu̧nä̧ jȩpu̧jä̧, amo̧nä̧tä̧ esecujä ja̧'hua̧ta̧'a̧nö̧ recuä rö̧jä̧cu̧ru̧mä̧ pporädötä icujä ötahuiyä apate doächäcuähuomȩttö̧mä̧. ¹³ Ja̧'hua̧nö̧ ja̧'a̧ttö̧, ttö̧ja̧rö̧ suronä jömä jittähuoca'atä ko̧cuȩttö̧ pi̧yȩ pänä̧mä̧, pi̧yȩnä̧mä̧ surojö pänä̧ ja̧'a̧ttö̧. ¹⁴ Adiutä usí surojömä'cö̧, a̧'cua̧rö̧ cu̧ja̧ pä'ömä. Ja̧'hua̧nö̧tä̧ TÖ̧Ä̧NÄ̧HUA̧MÄ̧ su̧ro̧do̧u̧'i̧nä̧ TTÖ̧Ä̧NÄ̧HUA̧ Dioma, iso päi'önätä̧ ucucu ö̧jä̧cua̧, ucutä iso päi'önä ja̧u̧ta̧ ja̧'a̧ päcuome jubu. ¹⁵ A̧'u̧tu̧ surojömä, adihuä jue'itä repe'ö, ro̧'ȩcuä̧ttö̧ isojö̧nä̧ jȩpä̧tu̧cui̧ ötahuiyära̧'a̧ do'ächäcuähuomettömä. Ja'huanö jo̧mȩnä̧ TÖ̧Ä̧NÄ̧HUA̧MÄ̧ su̧ro̧do̧u̧'i̧nä̧ TTÖ̧Ä̧NÄ̧HUA̧ Dioma, rȩrö̧jö̧nä̧ to̧'ä̧cua̧ José ahuaruhuä o'cötörömä. ¹⁶ Ja̧'hua̧nö̧ ja̧'a̧ttö̧, pi̧yȩ ja̧'a̧ TÖ̧Ä̧NÄ̧HUA̧ pä'ömä ja̧'hua̧ta̧'a̧nö̧ su̧ro̧do̧u̧'i̧nä̧ TTÖ̧Ä̧NÄ̧HUA̧ Dioma, TÖ̧Ä̧NÄ̧HUA̧: "Ajuäutä cu̧jä̧cuo̧tö̧jo̧ mä̧ni̧jä̧ u̧jyu̧'ca̧ri̧ ju̧du̧nä̧, mä̧ni̧yä̧ jö̧ ta̧'a̧nö̧ pättä'chäcuotö: ¡Aco! ¡aco! adicuä ttö̧ja̧rö̧ ttichänä huopö ja̧'hua̧ta̧'a̧nö̧ suronä jä̧u̧mä̧ ttajahuäcuotö. ¹⁷ O'cajuiyönä uva pättiyumä ajuähuäcua'a, juȩnȩ cu̧'cä̧tȩnä̧ TTÖ 'cuä̧do̧pä̧cua̧sä̧, pä'ö TTÖ̧Ä̧NPHUA̧MÄ̧. ¹⁸ !Äyó ucutuhué TÖ̧Ä̧NÄ̧HUA̧ u̧mo̧ro̧ pätecuächado pä'ätöhumä! ¿Tta̧'a̧nö̧ pä'ö TÖ̧Ä̧NÄ̧HUA̧ u̧mo̧ro̧ pätecuächado päcuätucua'a jä̧ttö̧? tȩ'a̧u̧mä̧ juiyäcua'a yo̧'ö̧tä̧ yo̧'ä̧cua̧'a̧, ¹⁹ ya̧tȩ ttö̧ja̧sa̧ mö̧yähui ö̧jo̧mȩttö̧ töipächa'a 'cua̧rö̧nä̧ ja̧'hua̧nö̧ jo̧mȩnä̧ ajeyähui ö̧'o̧cui̧'a̧'a̧ 'cua̧rö̧nä̧, ja̧hua̧nö̧ jo̧ca̧'a̧ isodera̧'a̧ 'chä̧nö̧ isode isä'canä u̧mu̧ u̧huä̧ no̧mȩnä̧ äca yö̧a̧'a̧ jä̧'i̧nö̧'a̧nö̧. ²⁰ ¿TÖ̧Ä̧NÄ̧HUA̧ u̧mo̧ro̧mä̧ päi'omenämä yo̧ä̧cua̧'a̧'cö̧ ja̧'hua̧nö̧ jö̧ juiyöttömä tȩa̧huä̧cua̧'a̧'cö̧? ¿tta̧'cua̧ tta̧huȩpö̧nä̧ jä̧cua̧'a̧'cö̧ ja̧'hua̧nö̧ jö̧ juiyöttömä adiunätä kä̧dȩpä̧cua̧'a̧'cö̧? ²¹ "TTÖMÄ a̧'u̧tu̧sä̧, TTÖMÄ esehuo'cösä pä'cäri jȩcu̧'ä̧'chö̧mä. TTÖMÄ eseunumä topocösä jȩcu̧'ä̧tu̧cua̧ pä'ö ca̧ca̧cu̧ cucuocuätucumä. ²² I̧sa̧rö̧ ku'icu iyähuä cuiyätucua'anä'inä u̧huä̧ju̧ ote cuiyätucua'anä'inä, TTÖMÄ cuiyätucu ȩmo̧cö̧chä̧cua̧sä̧, topö'inä topocöchä̧cua̧sä̧ ku'icu iyähuä esecu aditö isotörö pöttädö cuiyätucu'inä. ²³ TTÖ chä'ca jo̧mȩttö̧ pporädö icuí ra̧cu̧'i̧nä̧; Cui̧ä̧rȩ arpa rä̧mi̧pö̧'i̧nä̧ ä̧ju̧cuo̧cö̧chä̧cua̧sä̧. ²⁴ Ja̧'hua̧nö̧ jo̧ca̧'a̧, ro̧ȩcuä̧mä̧ yoräteunätä ajiyä huerächa'a jä̧'i̧nö̧'a̧nö̧ juerächönä, adiunä kä̧cuä̧huä̧'inä ajiyä huerächa'a jä̧'i̧nö̧'a̧nö̧ 'cuäopönä huerächö kö̧nä̧. ²⁵ ¿De'a jui̧yä̧jä̧ra̧'a̧ ta̧ju̧jo̧mȩ a̧'ȩ jo̧mȩ cue'ächö cu̧jä̧tu̧cua̧'a̧nä̧ i̧sa̧rö̧ ku'icu iyähuä'inä iyi'änätöjä, Israél rȩjȩra̧'a̧ttö̧mä̧? ²⁶ cuȩcuä̧dä̧du̧a̧jä̧ Sicut'ru cu̧ru̧hua̧ päi'önä, Quiyún, cu̧'ä̧nä̧hua̧ siri'corö, yapare cu̧'ä̧nä̧huä̧'catucu ucututä cuaditinätucuä'ca ja̧'a̧ttö̧. ²⁷ Ja̧'hua̧nö̧ ja̧'a̧ttö̧, TTÖTÄ Damosco rȩjȩttö̧'i̧nä̧ yabonänö pporädö chu̧ju̧nä̧cua̧jä̧," pä'ö TÖ̧Ä̧NÄ̧HUA̧MÄ̧, ja̧u̧ i̧mi̧mä̧ mi̧cua̧ su̧ro̧do̧u̧'i̧nä̧ TTÖ̧Ä̧NÄ̧HUA̧ pä'ö.