¹ Ja̧u̧nu̧ pä̧nä̧ täcö Davidmä ö̧jö̧ttö̧mä̧ juiyo bö̧o̧sa̧ ja̧'a̧, i̧tti̧ Salomónrö̧ Israel ttö̧ja̧rö̧ ruhuo hueönä ku̧ni̧nö̧. ² Ja̧u̧mä̧ Israelttö ucuo ttö̧ja̧rö̧'i̧nä̧, sacerdotetö̧rö̧'i̧nä̧ ja̧'hua̧ta̧'a̧nö̧ leví ahuaruhuä 'cotörö'i̧nä̧ ca̧ca̧ti̧pinö. ³ leví ahuaruhuä 'cotörömä̧ 30nö a̧'ȩ ku̧nä̧rä̧tö̧rö̧tä̧cö̧ yabonänö̧cö̧ pa̧ja̧ti̧nä̧tö̧. Jahuätö o'catoi'önä̧mä̧ 38 milnö jo̧mȩnä̧ ji̧na̧'a̧. ⁴ Jahuätöttö 24 milnö huotö ji̧na̧'a̧ TÖ̧Ä̧NÄ̧HUA̧ ö̧jo̧de tta̧'a̧rö̧ aditätömä ja̧'hua̧ta̧'a̧nö̧ 6 milnö jo̧mȩnä̧ ji̧na̧'a̧ su̧ro̧da̧u̧ tturuhuotö'i̧nä̧, juhua'atäcu röji pähuä ttö̧ja̧cu̧mä̧. ⁵ Tta̧huä̧rä̧cuä̧huä̧ ttö̧ja̧mä̧ 4 milnö, ja̧hua̧ta̧'a̧nö̧ 4 milnö ji̧na̧'a̧ TÖ̧Ä̧NÄ̧HUA̧RÖ̧ ucuo te'au ttö chaditinö̧nä̧ 'porö ra̧'ä̧tö̧mä̧, pä'inö Davidmä. ⁶ Jahuätörömä 'cä̧'chö̧ icuinö Leví i̧tti̧mö̧ 'cotöcu pätti'önä; Gersóncu̧'i̧nä̧, Coatcu̧'i̧nä̧ ja̧'hua̧ta̧'a̧nö̧ Meraricu'i̧nä̧. ⁷ Gersón ö̧tä̧mö̧mi̧nä̧ttö̧ i̧tti̧mö̧ pinä̧tö̧mä̧ Laadán'i̧nä̧ Simeí'i̧nä̧ ji̧na̧'a̧. ⁸ Laadán i̧tti̧mö̧mä̧ huämetucuä ji̧na̧'a̧: Jehiel'i̧nä̧, ttö̧ja̧ ttu̧ru̧hua, Zetam'i̧nä̧ ja̧'hua̧ta̧'a̧nö̧ Joel'i̧nä̧. ⁹ Simeí i̧tti̧mö̧mä̧ huämetucuä ji̧na̧'a̧: Selomit'i̧nä̧, Haziel'i̧nä̧ ja̧'hua̧ta̧'a̧nö̧ Harán'i̧nä̧. Pitö ji̧na̧'a̧ Laadán ö̧tä̧mö̧ mi̧nä̧ttö̧ i̧tti̧mö̧ ttö̧ja̧ tturuhuotö päi'önä ka̧cui̧nä̧tö̧mä̧. ¹⁰ Simeí i̧tti̧mö̧mä̧ pa̧ja̧cuä̧nö̧ jo̧mȩnä̧ ji̧na̧'a̧: Jahat'i̧nä̧, Zina'i̧nä̧, Jeús'i̧nä̧ ja̧'hua̧ta̧'a̧nö̧ Beríá'i̧nä̧. ¹¹ Ä̧cuo̧mȩnä̧ i̧tti̧mä̧ jö̧ huinömä Jahat ji̧na̧'a̧, ja̧u̧ o'comenämä̧ Zina pä'ö micuinö, ja̧'hua̧nö̧ ja̧'a̧nä̧ Jeus'i̧nä̧, Beríasnömä tti̧tti̧mö̧ recuätörömä to'inä̧tö̧ ja̧'hua̧nö̧ jo̧mȩttö̧ ttaditähuättömä ya̧tȩtä̧ i̧tti̧mö̧ jä̧'i̧nö̧'a̧nö̧tä̧ ttu̧ju̧ni̧nä̧u̧. ¹² Coat i̧tti̧mö̧mä̧ pa̧ja̧cuä̧nö̧tä̧ ji̧na̧'a̧: Amram'i̧nä̧, Izhar'i̧nä̧, Hebró'i̧nä̧ ja̧'hua̧ta̧'a̧nö̧ Uziel'i̧nä̧. ¹³ Amram i̧tti̧mö̧mä̧ pitö ji̧na̧'a̧: Aarón ja̧'hua̧ta̧'a̧nö̧ Moises'i̧nä̧. Aarónmä 'cä̧'ȩpö̧ ku̧nä̧hua̧ ji̧na̧'a̧ ro̧ö̧ ka̧cuo̧mȩ chutä'i̧nä̧ i̧tti̧mö̧'i̧nä̧ TÖ̧Ä̧NÄ̧HUA̧ ä'ca jo̧mȩttö̧ incienso kuhuinä̧tö̧ Ja̧u̧ hueö'acuä jȩpö̧mä̧ ja̧'hua̧ta̧'a̧nö̧ ja̧u̧ i̧mi̧nä̧ 'cuopönä̧tä̧ adiunä̧ ji̧ya̧tö̧ pä'ömä. ¹⁴ Ja̧'hua̧nö̧ ja̧'a̧nä̧ Moisés Dios u̧mö̧huä̧ya̧, i̧tti̧mö̧mä̧ Leví ahuaruhuä 'cotöcu ppä'ächi'inä̧tö̧. ¹⁵ Moisés i̧tti̧mö̧mä̧ Gersón'i̧nä̧, Eliezer'i̧nä̧ ji̧na̧'a̧. ¹⁶ Gersón ä̧cuo̧mȩnä̧ji̧ i̧tti̧mä̧ Sebuel pä'ö micuinö̧. ¹⁷ Eliezer ä̧cuo̧mȩnä̧ji̧ i̧tti̧mä̧ Rehabías ji̧na̧'a̧. Eliezer korotö i̧tti̧mö̧rö̧mä̧ to'inö̧, ja̧'hua̧nö̧ ja̧'a̧nä̧ Rehabíasmä i̧tti̧mö̧ recuätörö ku̧nä̧ri̧nö̧. ¹⁸ Izhar ä̧cuo̧mȩnä̧ji̧ i̧tti̧ ttö̧ja̧ ttu̧ru̧hua̧mä̧ Selomit pä'ö micuinö. ¹⁹ Hebrón i̧tti̧mö̧ttö̧ ä̧cuo̧mȩnä̧ji̧ i̧tti̧mä̧ Jerías pä'ö micuinö, ja̧u̧ i̧jä̧hua̧mä̧ Amarias ji̧na̧'a̧ huämetucuä päi'önä̧mä̧ Jehaziel ji̧na̧'a̧ ja̧u̧ ö̧jä̧hua̧mä̧ Jecamán pä'ö micuinö̧. ²⁰ Uziel i̧tti̧mö̧mä̧ pitö ji̧na̧'a̧: ä̧cuo̧mȩnä̧ji̧ i̧tti̧mä̧ Micaía ji̧na̧'a̧, ta̧ju̧ päi'önämä̧ Isaía ji̧na̧'a̧. ²¹ Merari i̧tti̧mö̧mä̧ Mahli'i̧nä̧ Musi'i̧nä̧ ji̧na̧'a̧. Mahli i̧tti̧mö̧mä̧ Eleazar'i̧nä̧ Cis'i̧nä̧ ji̧na̧'a̧. ²² Eleazarmä i̧tti̧mö̧ u̧mä̧tö̧mä̧ to̧'a̧tä̧ suro nä̧tö̧rö̧tä̧ u̧ju̧nä̧ra̧'a̧ 'corujuo'ächinö. Cis i̧tti̧mö̧ u̧mä̧tö̧mä̧ jahuätö nä̧tu̧cu̧ tti̧rȩcua̧mö̧ päi'önä ȩmä̧cuä̧hui̧nä̧tö̧. ²³ Musi i̧ti̧mö̧mä̧ Mahli'i̧nä̧, Eder'i̧nä̧ ja̧'hua̧ta̧'a̧nö̧ Jeremot'i̧nä̧ ji̧na̧'a̧. ²⁴ Leví ö̧ta̧mö̧ mi̧nä̧ttö̧ i̧tti̧mö̧mä̧ pitö ji̧na̧'a̧, jahuätömä ttö̧ja̧ tturuhuotö jö̧nä̧ huinä̧tö̧, tti̧mi̧ huȩyu̧tu̧ pa̧ja̧cuo̧tö̧mä̧ ttö̧tä̧mö̧ mi̧nä̧ttö̧ ttaditinö̧tä̧ TÖ̧Ä̧NÄ̧HUA̧ ö̧jo̧denä̧mä̧ aditinä̧tö̧, 20nö a̧'ȩ jo̧mȩnä̧ yabonä̧nö̧'i̧nä̧ ku̧nä̧rä̧tö̧tä̧. ²⁵ Ja̧'hua̧nö̧ ja̧'a̧ Davidmä pä'inö: TÖ̧Ä̧NÄ̧HUA̧ Israel ttö̧ja̧ ttö̧ä̧nä̧hua̧mä̧ umöhuäyotörömä 'cuä'ächi'ö ttö̧'ä̧jä̧mö̧nä̧ jȩpi̧nö̧. Ja̧u̧mä̧ ttojusode jö̧nä̧ 'cuäopönä ttö̧ja̧cui̧ya̧rö̧ pä'ö Jerusalénnätä̧. ²⁶ Leví ahuaruhuä 'cotömä yabonö̧ Dios ö̧jo̧de cuettädö juiyäcua'anö ja̧'hua̧ta̧'a̧nö̧ o'cajuiyönä juodetä jacuättö adicuä'i̧nä̧ cuettädö juiyäcua'anö̧. ²⁷ David röji i̧huȩnȩ ji̧nö̧mä̧ Leví ahuaruhuä 'cotöttö 20nö̧ a̧'ȩ yabocu ku̧nä̧rä̧tö̧rö̧ ttö̧'a̧ta̧ pä'ö ucuocuinö. ²⁸ Jahuätö ttaditähuämä Aarón i̧tti̧mö̧cu̧ ppä'ächi'ö TTÖ̧Ä̧NÄ̧HUA̧ ö̧jo̧denä ttadita pä'ö ji̧na̧'a̧. Jahuätömä umi isarä'i̧nä̧, ä'ähuä o̧ca̧'i̧nä̧, töcäu icuähuä TÖ̧Ä̧NÄ̧HUA̧ jähuä'i̧nä̧ ja̧'hua̧ta̧'a̧nö̧ koro TÖ̧Ä̧NÄ̧HUA̧ ö̧jo̧de adicuä'i̧nä̧ tta̧ttä̧ra̧ pä'ö huȩä̧hui̧'i̧nä̧u̧. ²⁹ Ja̧'hua̧ta̧'a̧nö̧ pan o̧ppä̧ TÖ̧Ä̧NÄ̧HUA̧ ä'ca jo̧mȩ rutähuä'i̧nä̧ trigo i̧sa̧ppȩ adihuäjuäi iyähuä'i̧nä̧ pan o̧ppä̧ ppö̧ä̧mö̧ juiyö'i̧nä̧, ȩttö̧ iyähuä'i̧nä̧, a̧dȩjacu huihuatö iyähuä'i̧nä̧ ja̧'hua̧ta̧'a̧nö̧ o'cajuiyönä ö̧rö̧ä̧ pa̧ja̧tö̧ rö̧nä̧huä̧'i̧nä̧. ³⁰ Ja̧'hua̧ta̧'a̧nö̧ jahuätömä mo̧ro̧ juoöta'anö TÖ̧Ä̧NÄ̧HUA̧RÖ̧ ucuo te'äu ttesehua pä'ö porächi'änä̧tö̧. Ja̧'hua̧nö̧ jö̧ta'anö nipä̧ro̧mȩcu̧'i̧nä̧ ³¹ cuä'ächi'ö pä̧mä̧dä̧cuä̧huä̧ mo̧ro̧'i̧nä̧, kä̧hua̧ ja̧rȩpa̧ pä'cärinä̧'i̧nä̧ ja̧'hua̧ta̧'a̧nö̧ pä'cärinä'i̧nä̧ ttöäre iyähuämä̧ TTÖ̧Ä̧NÄ̧HUA̧RÖ̧ ttiyäcua'anö̧. Juȩnȩnä̧ recuätö jä̧cua̧'a̧ pä̧hui̧'i̧nö̧'a̧cuä̧tä̧ 'cuäopönä TTÖ̧Ä̧NÄ̧HUA̧ ä'ca jo̧mȩmä̧ ka̧cui̧nä̧tö̧. ³² Jahuätö ttu̧mö̧nä̧ ki̧na̧'a̧ ca̧ca̧cu̧ pä̧cuä̧huo̧ca̧ surojö'i̧nä̧ jui̧yo̧ca̧mä̧ ja̧'hua̧nö̧ ja̧'a̧ttö̧ ttahuaruhuä Aarón i̧tti̧mö̧rö̧ TTÖ̧Ä̧NÄ̧HUA̧ ö̧jo̧denä ttaditomenämä ppä̧'ä̧dä̧ri̧nä̧tö̧.