¹ Ja̧'hua̧nö̧ ja̧'a̧ Davidmä pä'inö: TÖ̧Ä̧NÄ̧HUA̧ Dios ö̧jo̧demä penetä kä̧cua̧'a̧ Israel ttö̧ja̧rö̧ ttöäre iyähuä ocuränä ku iyähuä 'quȩ'ȩpö̧ ku̧nä̧huä̧'ca'inä. ² Ja̧u̧nu̧ o'ca'a Davidmä umöhuäyotörö hue'inö ji̧nä̧ yo̧mȩtȩ pätti'a pä'ö, o'catoi'önä ichäcuähuotörö Israel ttö̧ja̧ tti̧rȩjä̧nä̧ ka̧cuä̧tö̧cu̧ ttö̧ca̧ca̧cui̧'a̧ pä'ö. Ja̧u̧ hue'ö ku̧ni̧nö̧ inähuiyättö'inä, redä'ca 'quiyönä adicuä'cattö'inä Dios ö̧jo̧de ttadita pä'ö. ³ Davidmä jo̧mȩnö̧ jȩpö̧ ku̧ni̧nö̧ a̧di̧tä̧cuȩ'i̧nä̧ rö̧ä̧nä̧tä̧ 'quiyö jähuättö jutujui a̧ri̧ttö̧'i̧nä̧ äpatiyä doächäcuähuome ku̧nä̧huä̧cuȩ äpate bahuecuächönä ku̧nä̧huä̧ o̧bi̧'i̧nä̧, ja̧u̧ juäittömä̧ rö̧ä̧nä̧tä̧ aditö ku̧ni̧nö̧. Broncettö'inä. ⁴ Ja̧'hua̧ta̧'a̧nö̧ rö̧ä̧nä̧ Cedro dauhuiyättö'inä ttö̧'ca̧ra̧'a̧nö̧ ja̧'a̧. (Sidón ttö̧ja̧'i̧nä̧ ja̧'hua̧ta̧'a̧nö̧ Tiros ttö̧ja̧'i̧nä̧ i'cächinä̧tö̧ dauhuiyä o'ca rö̧ä̧nä̧ David ö̧jo̧mȩcu̧. ⁵ Davidmä pä'inö: Ttö chi̧tti̧ Salomón ja̧u̧ mö̧ä̧ya̧ ja̧'hua̧ta̧'a̧nö̧ ttu̧huȩpä̧rä̧cuä̧huä̧ juiyönä hua̧, TÖ̧Ä̧NÄ̧HUA̧ ojusode aditö'anö hua̧mä̧. Ucuotäcuä̧hua̧ jä̧cua̧. Ko̧ro̧jä̧ rȩjȩnä̧ ucuounä ja̧'hua̧ta̧'a̧nö̧ eseäcuähuättö'inä, ttö jo̧mȩnö̧ jȩpö̧ ku̧nö̧sä̧ cha̧di̧tä̧cuä̧'i̧nä̧. "Davidmä jo̧mȩnö̧ jȩpö̧ ku̧ni̧nö̧ 'corujuoächäcua'a ä'canämä. ⁶ Ja̧'hua̧nö̧ ja̧'a̧ i̧tti̧ Salomónrö huo̧pi̧nö̧ hue'ö ku̧ni̧nö̧ a̧di̧tö̧cuä̧, Israel ttö̧ja̧ TTÖ̧Ä̧NÄ̧HUA̧ ö̧jä̧cuodemä. ⁷ Davidmä pä'inö: Salomónrö: "Ttö chi̧tti̧, ä̧cuo̧mȩnä̧mä̧ a̧mö̧cuädinösä̧ chadita pä'ö ttö chojusode TÖ̧Ö̧Ä̧NÄ̧HUA̧ Dios i̧mi̧nä̧. ⁸ Ja̧'hua̧nö̧ ja̧'a̧nä̧ TÖ̧Ä̧NÄ̧HUA̧ ttörö ichö pääjäcusä: Ucurömä topösä ttucuoja päi'önä jȩ'cua̧'a̧ ja̧'hua̧ta̧'a̧nö̧ rö̧ä̧nä̧tä̧ rohuäu cu̧ja̧'a̧. Ucumä cuadita pä'ömä jui̧cuä̧cua̧jä̧ isode Ttö chiminämä, ttömä topösä rȩjȩttö̧mä̧ rö̧ä̧nä̧ ttucuoja päia'a. ⁹ Ja̧'hua̧nö̧ ja̧'a̧nä̧ cui̧tti̧ huȩnȩ juiyönä hua̧ ja̧u̧ ubomä. chi̧yä̧cua̧sä̧ o'cajuiyönä cuaboiyotörö koromecu̧ttö̧'i̧nä̧, ja̧u̧ i̧mi̧mä̧ Salomón ja̧'hua̧ta̧'a̧nö̧ chi̧yä̧cua̧sä̧ huȩnȩ'i̧nä̧ juiyönä ja̧u̧nu̧ mo̧ro̧ Israel ttö̧ja̧cu̧. ¹⁰ Ja̧u̧mä̧ a̧di̧tä̧cua̧ ttö chiminä yodete, Ja̧u̧mä̧ ttö chi̧tti̧ jä̧cua̧'a̧ ja̧'hua̧ta̧'a̧nö̧ ttömä ja̧u̧tä̧ jä'o päi'önä. Ttö jȩchä̧cua̧sä̧ ruhuo hue'ö kä̧cuä̧huä̧mä̧ 'cuäopönätä̧ Israel ttö̧ja̧cu̧. ¹¹ Ttö chi̧tti̧, TÖ̧Ä̧NÄ̧HUA̧MÄ̧ ucutäcu kö̧ ja̧'hua̧ta̧'a̧nö̧ ku̧ju̧nä̧ra̧ pä'ömä iyö. Cuadita pä'ö Cu̧ru̧hua̧ Dios ö̧jo̧de ja̧'hua̧nö̧tä̧ jä̧cua̧'a̧ pä'ö. ¹² TÖ̧Ä̧NÄ̧HUA̧ ya̧tȩtä̧ i̧yä̧cua̧ jȩchä̧cuȩ'i̧nä̧ ja̧'hua̧ta̧'a̧nö̧ ttu̧huȩpä̧rä̧cuä̧huä̧'i̧nä̧ hueähuä huȩnȩttö̧'i̧nä̧, ucuotäcuähuättö'inä ucu Cu̧ä̧nä̧hua̧ Dios ja̧u̧tä̧ u̧ju̧nä̧cua̧jä̧ ruhuo huecua pä'ö'inä Israel ttö̧ja̧rö̧. ¹³ Ucumä o'ca juiyönä cu̧ju̧nä̧rä̧cua̧jä̧ ttö̧ȩcuä̧nä̧ ucuotönö hueähuä huȩnȩttö̧'i̧nä̧ cu̧ru̧hua̧ iyinä Moissésrö'inä, Israel ttö̧ja̧rö̧'i̧nä̧. Cujuruhuajä̧ repe'önö̧tä̧, Yecuecui'ö juiyönä ja̧'hua̧ta̧'a̧nö̧ 'cuächi'äcuähuä'inä juiyönä. ¹⁴ Topi pä̧i̧cu̧nä̧ adicua'a cu̧ru̧hua̧ ö̧jo̧de orottömä rö̧ä̧nä̧tä̧ 3,400nö̧ jo̧mȩnä̧ ja̧'hua̧ta̧'a̧nö̧ platattö'inä 34,000nö jo̧mȩnä̧ ja̧'hua̧ta̧'a̧nö̧ bronce'inä, juhua'atäcu 'quiyö juäi rö̧ä̧nä̧tä̧ ja̧'hua̧ta̧'a̧nö̧ dauhuiyättö'inä inähuiyättö'inä. Ucumä o'cajuiyönä cuȩmö̧'a̧nö̧ ja̧'a̧. ¹⁵ Ucumä ku̧nä̧rö̧jä̧ rö̧ä̧nä̧ adicuä ttö̧ja̧rö̧; inähuiyättö adicuä ttö̧ja̧rö̧'i̧nä̧, dauttö adicuä ttö̧ja̧rö̧'i̧nä̧, redä'cattö tätö adicuä ttö̧ja̧rö̧'i̧nä̧ ja̧'hua̧ta̧'a̧nö̧ pa̧cuo̧mȩ juiyönä korottö'inä adicuä ttö̧ja̧rö̧. ¹⁶ Ttaditö'anö huotö orottö'inä, platattö'inä, broncettö'inä, ja̧'hua̧ta̧'a̧nö̧ 'quiyöttö'inä. Kä̧mä̧dö̧tä̧ cuaditö'anö ja̧'a̧ CU̧Ä̧NÄ̧HUA̧MÄ̧ ucutäcu ö̧jä̧cua̧. ¹⁷ Davidmä hue'inö Israel ttö̧ja̧ttö̧ tä̧mö̧ jö̧nä̧ huotörö Salomónrö ppättäda pä'ö chutä i̧tti̧rö̧-- pä'inö. ¹⁸ TÖ̧Ä̧NÄ̧HUA̧ Dios ucutäcu ku̧, ja̧'hua̧ta̧'a̧nö̧ huȩnȩ juiyönä iyäjäcujä kara'acuttö'inä. Ja̧u̧mä̧ ttujurucu kä̧cuä̧huä̧ iyäjäcusä ötahuiyä ttö̧ja̧cu̧ kä̧cuä̧huä̧. Recuätö ka̧cuä̧tö̧mä̧ CU̧RU̧HUA̧ ä'ca jo̧mȩttö̧ iyähuiotö cutahuiyä päi'önä. ¹⁹ Usi TÖ̧Ä̧NÄ̧HUA̧ Diosrö o'cajuiyönä cuami iso'qui jacuättö ja̧'hua̧ta̧'a̧nö̧ cua̧'cua̧rö̧ jacuättö'inä juhua'atäcu Dios esecuinä ȩco̧ca̧'i̧nä̧ i'cächö cuichö'anö ja̧'a̧, o'cajuiyönä ka̧cu̧'i̧nä̧ TÖ̧Ä̧NÄ̧HUA̧ Dios iminä adicui'inodenä.