¹ Davidmä recuätörö hue'ätörö'inä ja̧'hua̧ta̧'a̧nö̧ ciennö huotörö tturuhuotörö'inä jä'epö ä̧ju̧cui̧nö̧. ² Davidmä ttö̧ja̧ o'catoi'önä̧rö̧ pä'inö: Ucuturu adihuomenä jö̧ttö̧mä̧, pi̧yȩmä̧ TÖ̧Ä̧NÄ̧HUA̧TTÖ̧ ichö jö̧ttö̧mä̧ o'cajuiyönä̧tä̧ tahuaruhuä ti̧jä̧hua̧tö̧ Israel ttö̧ja̧ tti̧rȩjä̧ pönä'i̧nä sacerdotetö̧ ttö̧ja̧cuo̧mȩ'i̧nä̧, Levi ahuaruhuä ttö̧ja̧cu̧ ötahuiyänä'inä huȩnȩ ȩcuä̧ ttö̧ja̧rö̧ huedönä hue'ätucuittö. ³ Ujutu pätti'a pä'ö ji'ähuätucuitö. Tö̧ä̧nä̧hua̧ Dios esecuinö ȩco̧ca̧ pä'äjita'anö ujutu tö̧jo̧mȩcu̧ chi'chächa hue'ätucuittö, isopäi'önätä Saúl ruhuo hueinö pä̧nä̧mä̧ churutä pä̧huä̧rö̧jö̧mä̧ usocotö pinä̧tö̧jä̧. ⁴ Ttö̧ja̧mä̧ o'catoi'önä jäepäjimä jȩpi̧ pättinäcu̧, juhua'amä ttö̧ja̧ tottomenämä adihuomenä ja̧'a̧ttö̧. ⁵ Ja̧'hua̧nö̧ ja̧'a̧ Davidmä Israel ttö̧ja̧ o'catoi'önä̧rö̧ ji̧nä̧ yo̧mȩtȩ ca̧ca̧ti̧pi̧nö̧, Egiptonä ro̧to Sihorttö kä̧mä̧dö̧ Hamat jubö cä'ädö, TÖ̧Ä̧NÄ̧HUA̧ esecuinö ȩco̧ca̧ Quiriat Jearimra̧'a̧ttö̧ i'cächa pä'ömä. ⁶ Davidmä ja̧'hua̧ta̧'a̧nö̧ Israel ttö̧ja̧'i̧nä̧ o'catoi'önä̧cu̧ Baalara̧'a̧cu̧ 'cha'achinä̧tö̧, ju̧huȩnȩmä̧ Quiriat Jearim pä'ö ottinome ji̧na̧'a̧, Juda ttö̧ja̧ tti̧rȩjä̧ttö̧ TÖ̧Ä̧NÄ̧HUA̧ esecuinö ȩco̧ca̧ tti'cächa pä'ö TÖ̧Ä̧NÄ̧HUA̧ i̧mi̧nä̧ u̧cuo̧cuä̧cuä̧huo̧ca̧, huä̧mȩnä̧ querubien pä̧ttä̧u̧ ttö̧ja̧cuo̧ca̧. ⁷ Ja̧'hua̧nö̧ ja̧'a̧ jahuätömä TÖ̧Ä̧NÄ̧HUA̧ esecuinö ȩco̧ca̧mä̧ carucätta jareättanä rötinätö̧. Jahuätömä Abinadab ojusodera̧'a̧cu̧ i'cächinä̧tö̧. Aza'inä Ahio'inämä carucätta juȩ'ȩpä̧ri̧nä̧tö̧. ⁸ David'inä ja̧'hua̧ta̧'a̧nö̧ ttö̧ja̧ o'catoi'önä̧cu̧ ttujurucu Dios to̧ö̧rä̧mȩttö̧ eseu tö'inä̧tö̧. Jahuätömä appiyänä 'porö, isäbanä cuä'ö, obi korobicu cuähuächönä cuä'ö ja̧'hua̧ta̧'a̧nö̧ trompetanä ppö'ö ra̧'i̧nä̧tö̧. ⁹ Jahuätömä pättanä Quidón pättome (Trigo) ttitirome tti̧rȩbȩhui̧'o̧mȩnä̧, Uzamä i̧so̧ca̧ 'chuhuäda pä'ö umö ki̧'ä̧di̧nö̧ pä̧cä̧yu̧ äcuächi'ö ma̧tti̧yä̧cu̧. ¹⁰ Ja̧'hua̧nö̧ ja̧'a̧ TÖ̧Ä̧NÄ̧HUA̧ ö̧'ä̧i̧mä̧ rö̧ä̧nä̧ tejädi'ina'a Uzarö ja̧'hua̧nö̧ päi'omenä TÖ̧Ä̧NÄ̧HUA̧MÄ̧ ja̧u̧rö̧ cuä'ö icuinö, juhua'amä i̧so̧ca̧ 'chuhuäda pä'ö umö ki̧ä̧dä̧jo̧ȩmȩttö̧. Ja̧u̧mä̧ Dios ä'ca jo̧mȩttö̧ 'coru pä'i'inö. ¹¹ Davidmä ra̧huä̧ri̧nö̧ TÖ̧Ä̧NÄ̧HUA̧ Uzarö cuä'ö icuäjiyäcu. Ju̧huȩnȩ ji̧no̧mȩmä̧ jitä mo̧ro̧ jubö päiu'önä Pérez Uza pä'ö ottomä. ¹² Davidmä ye'ecuinö̧ Diosrö ja̧u̧nu̧ mo̧ro̧mä̧. Ja̧u̧mä̧ pä'inö: "¿Tocu chi'chächa'anö̧ttö̧ TÖ̧Ä̧NÄ̧HUA̧ esecuinö ȩco̧ca̧mä̧ isodera̧'a̧cu̧mä̧?" ¹³ Ja̧'hua̧nö̧ ja̧'a̧ttö̧ Davidmä idepiyuttömä ju̧huo̧ca̧mä̧ pporädömä icuocö pinö, ja̧'hua̧nö̧ ja̧'a̧nä̧ Geteo ttö̧ja̧sa̧ Obed Edom ojusode jätätä rötinö̧. ¹⁴ Dios esecuinö ȩco̧ca̧mä̧ Obed Edom ojusodenä̧mä̧ kä̧hua̧tö̧ huämetucuä jo̧mȩnä̧ ki̧na̧'a̧. Ja̧'hua̧nö̧ ja̧'a̧ TÖ̧Ä̧NÄ̧HUA̧MÄ̧ ahuaruhuärö'inä iäre u̧ju̧nä̧rö̧'i̧nä̧ adihuomenä ppädinä̧cu̧.