¹ Pitö ji̧na̧'a̧ umätö ichinätö̧mä̧ David ö̧jo̧mȩcu̧ Siclagnä, a̧'cua̧ tta̧'ȩcu̧ ö̧jo̧mȩ ji̧na̧'a̧ Saúlro amöcuä̧rö̧ ja̧u̧mä̧ Cistä i̧tti̧ ji̧na̧'a̧. Jahuätömä ka̧cui̧nä̧tö̧ su̧ro̧da̧u̧cu̧, curä rohuäu 'chä̧tu̧cu̧ ppä̧'ä̧dä̧rä̧cuä̧u̧ ttö̧ja̧ pä'ö. ² Jahuätömä ka̧cui̧nä̧tö̧ jo̧mȩnö̧ 'po'obucu ja̧'hua̧ta̧'a̧nö̧ huȩnȩ juiyunä metta̧ pä'ö ttumö ttu̧huo̧jua̧'a̧na̧'i̧nä̧, ttieruhua'anä'inä inädö tticua pä'ö 'po'obunä 'opttähua pä'ö'inä, jahuätömä Benjamita ttö̧ja̧ tti̧tti̧mö̧ ji̧na̧'a̧, Saúltä ahuaruhuä esecu ttö̧jä̧u̧ ji̧na̧'a̧. ³ Ja̧'hua̧nö̧ ja̧'a̧ ttu̧ru̧hua̧ päi'önä ki̧nö̧mä̧ Abiezer ji̧na̧'a̧ ja̧u̧nu̧ o'ca'a Joás ji̧na̧'a̧ jahuätö ta̧ju̧cuäyotö Semaa i̧tti̧mö̧ ji̧na̧'a̧ guibeatita ttö̧ja̧sa̧. ja̧'hua̧nö̧ ka̧cui̧nä̧tö̧ Jeziel'i̧nä̧ ja̧'hua̧ta̧'a̧nö̧ Pelet'i̧nä̧, Azmavet i̧tti̧mö̧ ji̧na̧'a̧. ja̧'hua̧ta̧'a̧nö̧ ka̧cui̧nä̧tö̧ Beraca'i̧nä̧ juhua'atäcu Jehú'inä anonita ttö̧ja̧sa̧ ji̧na̧'a̧. ⁴ Gabaonita ttö̧ja̧sa̧ ji̧na̧'a̧ Ismaíasmä su̧ro̧da̧u̧ ttö̧jda̧sa̧ ji̧na̧'a̧ 30nö̧ huotu su̧ro̧da̧u̧cu̧ ki̧nö̧, ja̧'hua̧ta̧'a̧nö̧ 30nö̧ huotörö hue'inö su̧ro̧da̧u̧ru̧, Jeremias'inä, Jahaziel'inä, Johaná'inä Jocabad'inä Geratita ttö̧ja̧sa̧ ji̧na̧'a̧. ⁵ Eluzai'i̧nä̧, Jerimot'i̧nä̧, Bealías'i̧nä̧, Semarías'i̧nä̧, Sefatías'i̧nä̧ harufita ttö̧ja̧sa̧ ji̧na̧'a̧, ⁶ coreítas Elcana ttö̧ja̧'i̧nä̧, Isías'i̧nä̧, Azareel'i̧nä̧, Joezer'i̧nä̧, Jasobeam'i̧nä̧, ⁷ ja̧'hua̧ta̧'a̧nö̧ Joela'i̧nä̧ Jeroham Gedor ttö̧ja̧sa̧ i̧tti̧ Zebadías'i̧nä̧. ⁸ Korotö pönä Gaditas ttö̧ja̧cu̧ ppä'ächi'inä̧tö̧mä̧ Davidcu ttujurucu möä'cara̧'a̧ tti̧cha̧ pä'ö, pitömä ä̧tȩcuä̧nä̧tä̧ curä rohuähuäcuähuä ttö̧ja̧ ji̧na̧'a̧, ja̧'hua̧nö̧ huo̧juȩcu̧nä̧ curä tturohuähua pä'ö huo̧juȩtä̧cuä̧huo̧tö̧ ji̧na̧'a̧, ja̧'hua̧ta̧'a̧nö curä rohuäu ttoecuäcuähuä obi'inä cuoräu o̧juä̧ttö̧ so̧u̧nä̧ adicuä o'chu'inä huo̧jui̧nä̧tö̧ 'chu̧ttä̧ra̧ pä'ömä; tti'ättö'inä pä̧i̧cuä̧tö̧ jö̧nä̧ yähui pä̧i̧cua̧ jä̧'i̧nö̧'a̧nö̧ huinätö̧. Ja̧'hua̧ta̧'a̧nö̧ juruhuinätö korojua̧ i̧sa̧ ji̧'qui̧cha̧hua̧ e'ärä böo meje'canä kö̧ jä̧'i̧nö̧'a̧nö̧. ⁹ Ju̧huȩnȩtä̧ ki̧nö̧ ucuo ttö̧ja̧sa̧ Ezer'i̧nä̧, ta̧ju̧ päi'önä Obadías'inä, huämetucuä päi'önä Eliab'inä, ¹⁰ pa̧ja̧cuä̧nö̧ päi'önämä Mismana jina̧, ji̧mö̧tȩ ruhuä päi'önämä Jeremías ji̧na̧'a̧, ¹¹ ko̧ro̧mö̧ttö̧ ya̧tȩnö̧mä̧ Atai ji̧na̧'a̧, ko̧ro̧mö̧ttö̧ ta̧ju̧ päi'önämä Eliel ji̧na̧'a̧, ¹² Ko̧ro̧mö̧ttö̧nö̧ huämrtucuämä Johanán ji̧na̧'a̧, ko̧ro̧mö̧ttö̧ pa̧ja̧cuä̧nö̧mä̧ Elzabad ji̧na̧'a̧, ¹³ tomöre ruhuä päi'önämä Jeremías ji̧na̧'a̧, ttö̧jä̧pö̧ttö̧ ya̧tȩnö̧mä̧ Macbanai ji̧na̧'a̧. ¹⁴ Pitö ji̧na̧'a̧ Gad i̧tti̧mö̧mä̧ curä rohuähuäcuähuä ttö̧ja̧ tturuhuotö pinätö̧mä̧. Pabonänö hua̧mä̧ hue'inö 100nö jo̧mȩnä̧ ja̧u̧ttö̧'i̧nä̧ abonänö hue'inö 1000nö jo̧mȩnä̧ huotörö. ¹⁵ Jahuätömä ä̧cuo̧mȩnä̧ji̧ kä̧hua̧nä̧ 'cuä'opinä̧tö̧ Jordán rȩjȩra̧'a̧, rä̧'o̧pi̧nä̧tö̧ ttöaje beipö mo̧ro̧ ä̧'cuo̧mȩnä̧tä̧ huerächina'a ja̧'hua̧ta̧'a̧nö̧ rö̧'ä̧ri̧nä̧tö̧ meje'canä̧ ka̧cuä̧tö̧rö̧ ja̧'hua̧ta̧'a̧nö̧ kä̧hua̧ ma̧ä̧cha̧'a̧cu̧'i̧nä̧ ¹⁶ Korotö pönä Benjamin umöhuäyotö'inä, Judá umöhuäyotö'inä 'chinättö 'quiyönä Davidcu ttö̧ja̧ pä'ö. ¹⁷ Ja̧hua̧nö ja̧'a̧ raopinö Davidmä jahuätöcu ca̧ca̧cu̧ ö̧'ä̧mä̧da̧ pä'ö ja̧'hua̧nö̧ ja̧'a̧ päinäu jiturutä: Isopäi'önä retopö ttörö ppäcuädipätucua pä'ö cuichäjätucuttömä, ucututä jinä yotute pä'i'ö cu̧jä̧tu̧cua̧'a̧nö̧ ja̧'a̧, ja̧'hua̧nö̧ ja̧'a̧nä̧ ucutu yapare pä'ö chaboiyotö jö̧nä̧ cu̧jä̧tu̧cu̧ttö̧mä̧, tä̧do̧tö̧ mi̧nä̧ ttä'o Diostä to̧ä̧cuä̧u̧jä̧, ja̧u̧tä̧ ro̧ȩpä̧tu̧cua̧cu̧jä̧, ja̧'a̧tä̧ra̧'a̧mä̧ surojömä jȩcho̧ca'a̧ttö̧. ¹⁸ Ja̧u̧nu̧ o'ca'a adihuä a̧'cua̧ru̧hua̧mä̧ ichinö Amasai jacuänä, ja̧u̧'i̧nä̧ ki̧nö̧ 30nö huotö ttu̧ru̧hua̧ päi'önä, pä'inö Amasaimä: "Ujutumä ucu cumöhuäyotö päi'önä huotöjä, David. Ujutumä ucutäcu kä̧tö̧jä̧, Isaítä i̧tti̧mä̧ huȩnȩ juiyönä ja̧'hua̧ta̧'a̧nö̧ ucuturu ppä'ädä̧rä̧tö̧rö̧'i̧nä̧ huȩnȩ juiyönä ppätädäcuotöjä̧, ja̧'hua̧nö̧ ja̧'a̧ttö̧ cuä'o Dios ppädacujä. Ja̧u̧nu̧ o'ca'a Davidmä jahuätörö esecuäji'ca̧mä̧ umöhuäyotö tturuhuotö päi'önä u̧ju̧ni̧nä̧u̧. ¹⁹ Ja̧'hua̧ta̧'a̧nö̧ Manasés umöhuäyotö'inä yotucupönä icuipinä̧tö̧ Davidcu ttesecua pä'ö ji̧yȩ mo̧ro̧ ichinätö filisteoscu, Saúltä tta̧bo̧i̧ya̧ jö̧nä̧ tturohuähua pä'ö, ja̧'hua̧nö̧ ja̧'a̧nä̧ ppä'ädocotö pinätö filisteos ttö̧ja̧rö̧mä̧, jahuätö filisteos ttö̧ja̧mä̧ jä'eputä ä̧ju̧cui̧nä̧tö̧ Davidrö ya'opö tticua pä'ö, jahuätömä pä'inätö̧: "Ja̧u̧mä̧ icuipö jui̧yä̧cua̧ ujturu u̧ru̧hua̧ Saúlcu icha pä'ömä ujuturu i̧mi̧cu̧nä̧ 'cuäopa'acu pä'ö. ²⁰ Siclagra̧'a̧cu̧ ichinö umöhuäyotö ppä'ächinä̧tö̧mä̧ pitö ji̧na̧'a̧ Adnas'i̧nä̧, Jozabad'i̧nä̧, Jediaiel'i̧nä̧, Micael'i̧nä̧, Jozabad'i̧nä̧, Eliú'i̧nä̧, Ziletai'i̧nä̧, tturuhuotö päi'önä ki̧nä̧tö̧ Manasés umöhuäyotömä. miles jo̧mȩnä̧ ji̧na̧'a̧. ²¹ Jahuätömä David ppä'ädinä̧tö̧ rohuäu ttiäre näucuärä̧huä̧cuä̧ ttö̧ja̧rö̧, ä̧tȩcuä̧nä̧tä̧ curä rohuähuäcuähuä ttö̧ja̧ ji̧na̧'a̧. Ja̧u̧nu̧ o'ca'amä jahuätömä curä ruhuähuätö ttö̧ja̧ tturuhuotö päi'önä ki̧nä̧tö̧. ²² Mo̧ro̧ 'cuäopäji o'ca'a koro mo̧ro̧ i'chächinä̧tö̧ Davidrö ppättäda pä'ö, ja̧u̧nu̧ o'ca'a recuätö su̧ro̧da̧u̧ru̧ ku̧nä̧ri̧nö̧, Dios umöhuäyotö recuätörö u̧ju̧nä̧ri̧nö̧ ta'anö. ²³ Pitö ji̧na̧'a̧ ja̧'hua̧nö̧ huȩyu̧tu̧ rutähuotö pinätö̧mä̧ curä rohuähuäcuähuä ttö̧ja̧mä̧, David ö̧jo̧mȩcu̧ Hebrónnä, ja̧'hua̧nö̧ Saúl uruhuo jä̧ji̧ ttiyipa pä'ö, u̧ru̧hua̧ Dios päinöta'anö. ²⁴ Judáttö rä'opinätömä curä obittömä, cuoräu o̧juä̧ so̧u̧nä̧ aditäcuähuä ju'cohuinätömä pitö ji̧na̧'a̧ 6,800nö̧ huotö curä tturohuähua pä'ömä jo̧mȩnä̧ hui̧nä̧tö̧. ²⁵ Simeonitas ttö̧ja̧ttö̧mä̧ 7,100nä̧ huotö ji̧na̧'a̧ curä tturohuähua pä'ömä jo̧mȩnö̧ huinätö̧. ²⁶ Levita ttö̧ja̧ttö̧'i̧nä̧ ka̧cui̧nä̧tö̧ 4,600nö̧ huotö curä rohuähuäcuähuä ttö̧ja̧mä̧. ²⁷ Aarón ahuaruhuä 'cotö ttu̧ru̧hua̧ ji̧na̧'a̧ Joidamä, ja̧u̧cu̧mä̧ ka̧cui̧nä̧tö̧ 3,700nö̧ huotö. ²⁸ Ja̧'hua̧ta̧'a̧nö̧ Sadoc ubo mö̧ä̧ya̧ ju̧ru̧hua̧ yecuäcuähuä'inä jui̧'a̧, jä'o ahuaruhuättömä ku̧nä̧ri̧nö̧ 22nö̧ huotö ttö̧ja̧ tturuhuotörö. ²⁹ Ja̧'hua̧ta̧'a̧nö̧ Benjamin ahuaruhuä o'cotöttö ja̧'hua̧ta̧'a̧nö̧ Saúl ahuaruhuä o'cotöttömä tres milnö huotö ji̧na̧'a̧. Jahuätöttö yotucupönämä Saúl hueinöta'anötä̧ jȩpä̧tö̧ji̧na̧'a̧ jita pi̧yȩ mo̧ro̧ jubö. ³⁰ Efraím ahuaruhuä o'cotöttömä 20.800nö curä ruhuä ji̧na̧'a̧, tä̧'o̧tö̧ mi̧nä̧tö̧tä̧ päi'önä ucuounä ko̧cuä̧tö̧. ³¹ Ja̧'hua̧ta̧'a̧nö̧ Manasés ahuaruhuä ju'totö jomenö huotömä̧ dieciocho milnö huotö u̧mä̧tö̧ ucuounä ko̧cuä̧tö̧ i̧chi̧nä̧tö̧ ji̧na̧'a̧ David ru̧hua̧ päi'önä ppättäda pä'ö. ³² Isacarttömä doscientonö tturuhuotö täbocu Israel ttö̧ja̧ jȩtä̧cuo̧tö̧ja̧ ujutumä päcuta'anö pättinö ji̧nö̧ huo̧juä̧tö̧ ji̧na̧'a̧. O'catoi'önä jahuätö ttahuaruhuämä jahuätö huetta'anätä ko̧cui̧nä̧tö̧. ³³ Zabulón ahuaruhuättömä cincuenta milnö curä ruhuä ji̧na̧'a̧, jo̧mȩnö̧ huo̧juȩtö̧ ku̧nä̧huo̧tö̧ rohuäcuähuättömä jo̧mȩnö̧ huotö pätecuächomenä pättöta'anö ttörohuähua pä'ö. ³⁴ Neftalí u̧mu̧huäyotö su̧ro̧do̧u̧ttö̧mä̧ jahuätö o'catoi'önämä treintasiete milnö su̧ro̧do̧u̧ ji̧na̧'a̧ tto'ecuäbi'inä ja̧'hua̧ta̧'a̧nö̧ dacua o̧'quȩ su̧'ä̧rä̧ huotö. ³⁵ Dan umuhuäyotöttömä 28,600nö huotö u̧mä̧ttö̧ jo̧mȩnö̧ huo̧juȩcuo̧tö̧ ttörohuähua pä'ö. ³⁶ Aser umuhuäyotöttömä 40,000nö huotö u̧mä̧ttö̧ jo̧mȩnö̧ ttörohuähua huo̧juȩcuo̧tö̧ ji̧na̧'a̧. ³⁷ Jodán aje päcuädotonämä, rubenitattö'inä gatitattö'inä ja̧'ha̧ta̧'a̧nö̧ Manasés u̧mu̧huäyotömä 120,000nö u̧mä̧tö̧ curättö rohuäcuähuämä jo̧mȩnö̧ 'chu̧'ä̧rä̧tö̧ ji̧na̧'a̧. ³⁸ Pitö su̧ro̧do̧u̧mä̧ jo̧mȩnö̧ rohuäcuähuä ku̧nä̧rä̧tö̧mä̧ ichinätö̧ Hebrónra̧'a̧cu̧ David'rö Isrel rȩjȩ o'cajuiyönä ruhuo hueönä pättäda pä'ö. O'catoi'önä Israel ttö̧ja̧'i̧nä̧ David'rö ru̧hua̧ ö̧ji̧ya̧tö̧tä̧ päi'önätä. ³⁹ Jahuätömä David ö̧jo̧mȩ ko̧cui̧nä̧tö̧ hubodäcua mo̧ro̧ ttu̧cua̧ cuä̧nö̧ au hua'amä ttahuaruhua ttu̧cuä̧'i̧nä̧ tta̧huä̧'i̧nä̧ huettäja'attö̧. ⁴⁰ Ja̧'hua̧nö̧ ja̧'a̧nä̧'i̧nä̧ jitö tö'cönä kocuätö Isacar'inä Zebulón'inä ja̧'hua̧ta̧'a̧nö̧ Neftalí'i̧nä̧ i'chächinä̧tö̧ ttu̧cuä̧ pan burroto̧nä̧'inä camellotö̧na̧'i̧nä̧ mulanä'inä ja̧'hua̧ta̧'a̧nö̧ pä̧cä̧yö̧na̧'i̧nä̧, koro'inä pasteles de higo, pasa i̧sa̧ppȩ'i̧nä̧ vino isoya 'inä a̧dȩja̧'inä pä̧ca̧yö̧rö̧'i̧nä̧ ja̧'hua̧ta̧nö̧ ovejatö̧tö̧'i̧nä̧, Israel ötahuiyättömä pä'cäri esehuinätö.