¹ Ja̧'hua̧nö̧ ja̧'a̧ Israel ttö̧ja̧'i̧nä̧ Filisteos ttö̧ja̧cu̧ ro̧huä̧hui̧nätö ttö̧ja̧mä̧ yotucu pönä ä̧ju̧cuä̧cuä̧hui̧nä̧tö̧ ² filisteos ttö̧ja̧rö̧ rohuäu totte'inö huȩnȩ Gilboa meje'cara̧'a̧ttö̧. Filisteos Saúl i̧tti̧mö̧rö̧ ru̧huä̧rö̧ ki̧nä̧tö̧, filisteos ttö̧ja̧mä̧ jahuätörö Jonatánrö'inä, Abinabadrö'inä ja̧'hua̧ta̧'a̧nö̧ Malquisuárö'inä tti̧tti̧mö̧rö̧'i̧nä̧ cuä'äu icuinätö̧. ³ Saúlcu tturohuähua pä'ömä ra̧huȩji̧na̧'a̧ jahuätö curä rohuähuätö 'po'obö 'chu̧'ä̧rä̧tö̧ tta̧ttä̧ri̧nö̧mä̧ 'pottina̧'a̧ttö̧ rö̧ä̧nä̧ ubara ttu'inö. ⁴ Ja̧u̧nu̧ o'ca'a umöhuä̧ya̧rö̧ pä'inö Saúlmä curä'chu 'chu'ähuo'ö jahuä'chunätä̧ ta'ö icuittö, pide ö̧dä̧pä̧rö̧ päjure 'cui'ocuocö ichiömä suränä jȩä̧cua̧sä̧. Ja̧'hua̧nö̧ pä'anä umöhuä̧ymä̧ ye'ecu päömä jȩä̧a̧mä̧ pä'ocö pinö, ja̧'hua̧nö̧ ji̧yä̧cu̧ Saúlmä chutä ucurä'chu ȩmä̧huo̧'ö̧ huä̧mä̧dä̧cuä̧hui̧nö̧. ⁵ Saúl umöhuä̧ya̧ toomenä 'coru päi'a'atä ji̧yä̧cu̧, chutä'inä ucurä'chu ȩmä̧huo̧'ö̧ Saúl jä̧ji̧ta̧'a̧nö̧ huä̧mä̧dä̧cuä̧u̧ 'coru pä'i'inö. ⁶ Ja̧'hua̧nö̧tä̧ Saúlmä to'e'inö i̧tti̧mö̧ huämetucuäcu ja̧'hua̧ta̧'a̧nö̧ yo̧mȩtȩnä̧ ojusodenä ka̧cuä̧tö̧mä̧ to'e'ächinätö̧. ⁷ Israel ttö̧ja̧ o'catoi'önä pämäroppä päi'omettömä döttecuächaja'a topömä, Saúl'inä i̧tti̧mö̧cu̧ oe'ächä̧ji̧yä̧u̧mä̧ ttidepiyuttö dö'ecuächömä icuähui'inä̧tö̧. ⁸ Ja̧'hua̧nö̧ jä̧ji̧ o'ca'a filisteosmä ju̧huȩnȩ ichäjä'cotö ka̧cui̧nä̧tö̧. Koro mo̧ro̧ juoomenä 'cuäopina'a, filisteos 'corujuo'ächäjätörö dochäu tticua pä'ö tti̧'chä̧ja̧'a̧mä̧ Saúl'inä i̧tti̧mö̧cu̧ Gilboa möä'canä 'corujuo'ächäjä'cotö ttö̧'ȩja̧'a̧tä̧ po̧cui̧pi̧nä̧tö̧. ⁹ Jahuätömä ö̧'ca̧tä̧huä̧ta̧ ko̧'ä̧dö̧ icu, uyuyu'inä ja̧'hua̧ta̧'a̧nö̧ ucurä'chu'inä ȩmi̧nä̧tö̧, jahuätömä huȩnȩ ȩcuä̧ ttö̧ja̧rö̧ hue'inä̧tö̧ filisteas ttö̧ja̧rö̧'i̧nä̧, ttö̧ä̧nä̧hua̧ o'carö'inä ja̧'hua̧ta̧'a̧nö̧ ttö̧ja̧rö̧'i̧nä̧ jittähuiyatö pä'ö. ¹⁰ Jahuätömä curä'chumä ttö̧ä̧nä̧hua̧ ä'ca jo̧mȩ ku̧ni̧nä̧tö̧ ja̧'hua̧ta̧'a̧nä̧ U jäyumä ttö̧ä̧nä̧hua̧ ö̧jo̧denä ti̧'ä̧dö̧ ru̧ni̧nä̧tö̧. ¹¹ O'catoi'önä Jabes ttö̧ja̧ja̧ filisteos Saúlrö jȩttä̧ji̧ ttä̧ju̧cuo̧mȩnä̧, ¹² curä rohuähuäcuähuä ttö̧ja̧mä̧ 'chi̧nä̧tö̧, 'chä̧jö̧'co̧tö̧mä̧ Saúl o'co jähuä ȩmi̧nä̧tö̧ ja̧'hua̧ta̧'a̧nö̧ i̧tti̧mö̧ tto'co jähuä'inä Jabes ttö̧ja̧ ttidepiyucu ȩpi̧nä̧tö̧, jahuätömä cedro dau Jabes ttö̧ja̧ ttidepiyunä käi dȩa̧'a̧ Saúl ihue'quiyumä 'turu icuinä̧tö̧. Ja̧'hua̧nö̧ jȩpä̧jä̧'co̧tä̧mä̧ 7nö̧ mo̧ro̧ jo̧mȩnä̧ ttu̧cuä̧ a̧do̧chi̧nä̧tö̧. ¹³ Pa̧'a̧nö̧tä̧ Saúlmä to'e'ächinö TÖ̧Ä̧NÄ̧HUA̧ päinö ji̧nö̧ jȩo̧come ji̧no̧mȩnä̧, TÖ̧Ä̧NÄ̧HUA̧ hueäjimä ocuotoca'a jo̧mȩnä̧, ttucuotajueimä hua'inätucu ucuocuäjucu jijähuarö pä'ö jäepinomettö. ¹⁴ Ja̧u̧mä̧ TÖ̧Ä̧NÄ̧HUA̧ jihuiparö pä'ömä jä'epocö pinö, ja̧'hua̧nö̧ jo̧mȩttö̧ TÖ̧Ä̧NÄ̧HUA̧MÄ̧ cuä'ö icuinä̧cu̧ ja̧'hua̧nö̧ jȩpö̧mä̧ ruhuo jä̧ji̧mä̧ Isaí i̧tti̧ Davidrötä iyähui'ina'a.