¹ Nite jliaji itajlicanati Nabucodonosor Babilonia dajli jlidecayanmina Conias Joacim ienipe, itajlicanati Juda dajli tsaca, nite natsaca napji itajlicanati ienipe principenai iofacape Juda nite napji idejicape torropesho piomi napji idejicape owirrisho Iofacape Jerusalen nadecana Babilonia nirse, waminajli icañataca nocapa yamada tseto nacadaji Dios iapajlico. ² Apada tseto jlirso matsiaperi ipaniatidape matsiaperitsa paiñaca, nite jliaji apadaa tseto matsiperin napji ipaniatidape, curim mitsa pataita paiñacana. ³ Nite nominajli iaco norso: ¿cooca picaajli Jeremias? ipaniatidape matsiaperi nite ipaniati matsiperincoripetsa pataita paiñaca. ⁴ Nite waminajli iaco inoca noicaojle, jliaco: ⁵ Cai jliaco jliaji waminajli Israel iDiote, cai nocapaca napji nadeji Juda nirse pacapacani napji ipaniatidape matsiaperi, ima notaaca nopeco jaitenaji Caldeo jipaite nacojle matsiacaro naofaca nirse. ⁶ Matsia watsa nocapaca narso nite nodietatsena caotsana cayojleaji nopaitenaco. matsia nocadaca naofao curimi watsa norapitetacana. ⁷ Nocadaotsa nacaojlewa nanicarro nuaca jliaji Dios. nonaquitecaotsana nite naDiotecaotsa nua niniwatsa naomaca nua nacaojlericuite. ⁸ Cai watsa nacayosho napji ipaniati matsiperi curipe pataita paiñaca cai jliaco waminajli caiwatsa nonaitaca jliaji itajlicanati Sedequias Juda ienipe piomi jlitsolidaunai iapiya nite Jerusalen riicope napji iofacapetsa apji jipainaco o napji iofacape Egipto riico. ⁹ Nocadacaotsana ifietetacaope nite matsiwatsana, oopi nacaro nacapana natishono piomidajli neepaite icaon, namatsicana ima, nacaniwatsa naicao piomi querecatsa nocadaca naniacao. ¹⁰ Nomenacaotsa nomatsetan naocaojle, mawitacai, nite jipoati querrecaotsa nowayaquetana jliricoda jliaji jipai noanda naufacaroapiwa piomi nanirinai iapiya.