¹ Nite, jliawajli once jamojlinaco, madajlipi cadanaco querri, jlinitaca danacua querri, Waminjli iaco inoca nuicaojle jliaco norso. ² Atsia yenipe, picaite Faraon itajlicanati Epigto dajli irso, narso tsaca napji jlirsoperri: ¿caconadajlicaojli pia cooca picapajli picao? ³ Jliapia jliaji Asirio jaicona maquini matsiaperica napji jliqui Libano riico. jlilipaca jliaji jaiconan jiiocatsao iyadaocanaco. ⁴ Uuni icadaca jlitaoñawa, uuni tewacadajli jlicadaca jlitaoñawa jajlipani. jliarocao querreca wajlecatsa, nite jlionitena yarocao nanaco napji jaico eacadajicope. ⁵ Jajlipanican piomi naoya napji jaico wacajlicoperi, jorsedajlica nataoñacao napji jliquinape; nataoñacao jajlipanipe napji jliquina ima jorseca uuni yaroca nanaco nataoña cadanacua. ⁶ Nanaitaca narropocowa jliquinaco napji wipiaruapape, nite napji mawicajlinape quenipecana jliapite. piomi napji yacajlenape naofacao jaico yapite. ⁷ Ima, matsianica jlitaoñacao jliaji jaico macanipe napji jliquinapen, ima, unirico nataoñawa napji jlipali. ⁸ Curim cooca itaitaca pacuaca jlianai jliaji Dios ipaniacawan. curim apaana jacona taimini yemacua itaitaca pacuacaca jliqui yapiya, curim tsaca tsonipecan ipacuacataca jliqui inai. curim pacapaca apana jaico apji Dios ipaniapirico cayoniaji jlimatsiacasho. ⁹ Ima nonaitaca matsianin matsiape napji jliquinape nite napji jaico Eden riicope aperipiaji Dios ipaniapirico naquemican nacapacadanacon. ¹⁰ Nini, cai Waminajli iacoaji: cuaada jajlipanicajletsa pia, cuaada macanicajletsa pitaoñacao piocatsao iyadauca nacojle. ¹¹ Nuacaa pia nacapirico napji yacajle caconaperi. nanaitacaro piapiya coamicatsa naomaca. ima nuenitaca pia nooyao. ¹² Nawaya quetaotsa pia napji apana jipai nacoperi, napji yacajle caconaperi, napecuatsa piwao; jliqui iwaotsawa jipananaco nite piomi napji jliquinape tocomicaotsa nawacadanacua barrancojlico. nite jlipodan, piomi napji yacajle jipainacope namotutsao jlipite nite nenitacacaotsa jlioya. ¹³ Piomi napji wipiaruapape naofacaotsa jlipocodananco nite natsaca napji mawicajlinape wacadeta naofacaotsa jliquinapenaco. ¹⁴ Cai jliayapacao curicaro pacapaca apana jaico yemacana tewaca uuni rico wadenta jlitaoñacao macaani, curicaro jlitaoñacao pacauca nacayosho apana jaico irracanape uuni wadecanta jlitaoñacao jajlipa. ima oopi nocadaca mayamicajli yocaca nanaco. tewacajle jipai nainai napji atsai yenipe, nacaotsawa mayacan iriricojle. ¹⁵ Cai Waminajli iacoaji: jliwajli jliroco iririjlico, nocadaca coyojlecana, nocadaca cadaocacani nite curica nocadaca uuni imotucao, ima jliaji uuni macapawan curica cayuanai iarocao. nuacatsa jliaji jinaitaca cai, nite nocadaca coyojlecajli Libano irso. nite, piomi napji jaico wacadajlicope naiyaaca caica pua nayapacao. ¹⁶ Canaanica jliaji jajledauca jlimasho jliwaweri cuenawa, nopecowerico jliwao iririjlico napiya napji jiwacapeo tewacapirico. nomayaquetaca piomi napji jaico Eden riicope yofacape jliricoda jliaji tewacapi. ima icatsa nuenitanipiaca matsiaperi jaiconape Libano riicope, jaico irracapepia uuni caidajlitsa. ¹⁷ Ima natsaca yaaca jliricuapi jliaji iririapi, napji mayanperin matsetasho. icatsa caidaperipiaca inapa, napji yacajle yofacapepia imawadaca jaico yapite. ¹⁸ ¿Cuanini jaicoca Eden ricuitena pacuaca jliapiya jliaji matsiadajli? ima pacuacaotsa nopecoca pia napiya napji jaico Eden riicope teewacajle jipai naicaojle napji mepacaperin; piofacaotsa nanai napji nainonin matsetasho. Icatsa Farao yofacao napiya napji jlirsoperi. catsa jlicaiterica jliaji Waminajli Dios.