¹ DIOSONÜ barükuikuijai Moisés jawabaelia. Bajaraponü jumaitsi: ² "Itorobare Israel piaja tomara pia jiwi pe jukaenejjalia pa tajjunae wekua dajjita pe jjainaewi pe yaponae domae pe perabütota, yajawa dajjita monae wajünübatsi, pa jiwi ata jayaba pe tüpaewi. ³ Pebi jiwi o petiriawi ata, pa tajjunae weliaje pa jukaeremelia. Paka tsiyanukae yenewa pa tajjunaetaje. Tsipaji jotaje jjanü ponaponajü." ⁴ Tomara piajiwi itsi pe itorobi kueniatsi. Jukalia tajjunae jawelia, pakuenia DIOSONÜ itorobatsi Moisés. Israel tomara jumekowünüta DIOSONÜ jawabelia. ⁵ Ikatsia DIOSONÜ barü kuikuijai Moisés jawabelia: Bajara ponü jumaitsi: ⁶ "Barü kuikuijamüre Israel tomara. Pakujinae pebi o petiriewa ata pebisia kuene ejjana jjua na itsi jiwi itsa monae jawabelia, y apo ne jjania tae, bajara ponü pe jamatabü kuene tsane. ⁷ Nejjata paebiana jjua kuene ejjana. Matamotsiana dajjita jjua pejamatabü kuene bijiana itsajawayo yajawa bajara jjua pematamo jawa. Rajutsiana pa jiwiyo jawabelia bajaraponü to bijiana. ⁸ Baitsi jane pebisiakuene pe itsi jiwiyotsi apo jjainae piaja monae pe pitsi nejja pe matamo, jjanü jawaberena ne matamotsiana pe nakobewaintsijawa sacerdotenü jawa, yajawa pejana oweja, pe wünüta ta beyajjuabi nejja. ⁹ Kae pe rajutsi kanakujitsia Dioso jawabelia Israel tomara piajawa, jjuanü pe mujjuneneta jeba pe kaponae nejja Israel piaja tomara sacerdotenü jawabelia, piajawa tsane bajara ponü. ¹⁰ Dajjita jiwi pe rajutsi jawanü sacerdotenü nejja; itsa jiwi ata rajuta itsa kuene jawa sacerdotenü nejja, rajutsiana pe jjainae jawa." ¹¹ Ikatsia, DIOSONÜ barü kuikuijai Moisés jawabelia. Bajara ponü jumaitsi: ¹² "Barü kuikuijamüre Israel tomara. Jumaitsimüre: "Itsa pe nakojiobi wa yamajji itorobijitsipa pamona jawabelia y besikuene itsitsipae pamona jawabelia. ¹³ Nejjata itsa pebi barü majita bajara powa jawabelia. Bajara jjua yabara, powaje ajjuiraje. Pakujinae pamona apo tae atatsi o apo yapütae ata, kae jiwi ata apo tae atatsi pe itsi tsanukaejawa o pe nekonitsi jiwiyotsi, ¹⁴ jai ataje, pe üwijawa pamona tsijamatabü patsi patsi piaja wa pe ajjuira jawa. Itsiata, pe üwi jamatabü kuene tsijamatabü patajopatsi patsi ajibi nejewa pebi piaja apo ajjuira ata. ¹⁵ Nejjata, piajawa karenatsane sacerdotenü jawaberena. Bajara ponü kaponaena pe apaera pe rajutsi nejja Dioso bajara powa yabara. Bajara ponü karena tsane cebada bene anija litro beje. Bajara ponu apo tsimata epanae tsane pejane jaira o petujjujjuwi jawa tsipaji pejjü rajutojoparena pe üwi yabara, pejju rajuta pakujinae pebisia kuene ejjana. ¹⁶ Sacerdotenü imojjoyo jawaberena kaponaena y buatojopaena DIOSONÜ itabarata. ¹⁷ Sacerdotenü asinaya pe etsi mera wajjita pitsiana y pe nakaetuanae bo irata pe pürü pitsiana. Pe pürü mera jawalia otjonaena. ¹⁸ Sacerdotenü notsiana bajara powa DIOSONÜ itabarata y bajara ponü matana isinaena petiriwa. Bajara ponü tsikobe buatsiana pejjujawa pe rajutsi nejja, pajjujawa rajulia pe najamatabü jjainae jjae peyamajjutorobi jawa. Sacerdotenü piatsajja mera kobena nukaena tsijopaya ejjanajetsipatsi pebisiakuene. ¹⁹ Sacerdotenü petiriwa jawalia yanijobiana pe jumaitsi nejja Dioso itabü nejewa y jumaitsi tsane: Itsa kaenü ata apo ka barü majitsi, itsa jjamü apo jopaemütsika o pebiswia kuene apo itsimü, nejjata piatsajja mera apo kabijianae tsane jjua pe ayai kuene katsijopajitsipa. ²⁰ Baitsi jane jjamü, amona ne jjainaewa itsa jopaimika, itsa yamajju itorobame, itsanü kabarü majita, ²¹ nejjata, (sacerdotenü Dioso itabü nejewa jumaitsi ejjanaena jjua tsijopajitsipatsi, jjua kujinae jukaitsilia tsane) DIOSONÜ pebisia kuene katsi jjuabiana tomara jawabelia bajara pakuenia natsitajütsiana. JJuaje itsa DIOSONÜ nejji apo kajjainae ejjanae tsane y jjamü koto yajinaename. ²² Pa meraje pebisia kuene pe kaponae ra katsi kotsoro jonena pe itsi jawabelia ne koto yajinae nejja y jjamü apo nejjainae nejja nejji. Bajara powa jumaitsi tsane: "Je, jema baitsi baja tsane, itsa nekoni jjainajü". ²³ Sacerdotenü yakinaena jjuanü pebijia kuene tsijopajetsiatsi pe kionae bajjutota, bajara jjua kujiane kiatsialia pe yakinarubi jawa piatsajja merata. ²⁴ Sacerdotenü bajara powa jawabelia piatsajja mera apaya ejjanaena pe jjainae jawa pebijia kuene. Pa mera pebijiakuene jjaina tsijonenatsi y atsajja tasane. ²⁵ Sacerdotenü perajutsi jawa nejja pejjujawa pe üwi yabara wekobe pitsiana petiriwa jawabelia. Bajara ponü pitsiana pejju perajutsi jawa nejja DIOSONÜ itabüta y katsia tsane altar jawabetsia. ²⁶ Sacerdotenü kae kobe kuenia mojotsiana pejju jawa pe yapütaya ejjanae nejja piajawa kuene, y tajuitsiana altar jawata. Bajara jjua kujinae rajutsiana petiriwa jawabelia piatsajja mera. ²⁷ Pakujiane bajara ponü apaya ejjanaena mera, itsa bajara powa nekoni jjaina pe jjamajjü itorobi jjae pamona, nejjata pebijia kuene pe jjainae mera tsijonenatsi powaje atsajja tsane. Kotobüjjü yajinaena pejji apo jjainae tsane. Bajara powa pebijiakuene taenatsi piaja tomarata. ²⁸ Baitsi jane bajara powa itsa apo nanekonitsi y kuene jjanepata, nejjata a ekoniji tsane. Bajara powa pejji jjainaena. ²⁹ JJua maje rutaje pe üwi monae nejja. JJua maje rutaje petiriwa nejja itsanü itsa wekua jaita pamona y jaita itsanü jawabelia. ³⁰ JJua maje itoroba pe üwi jiwi nejja pakujinae bajara ponü üwa piaja wa jawabelia. Bajara ponü piaja wa karenatsana DIOSONÜ itabara yaberena, sacerdotenü pe itsi nejja bajara powa jawabelia dajjita jjua pe üwi jawa ya yakinaruba. ³¹ Bajara pa pebi pe akuenebejenü kuene apo taetsanetsi pe kaliajjae piaja wa sacerdotenü jawbaelia. Petiriwa itajjutejema pe jamatabü kueneta kaponaena.