¹ DIOSONÜ barükuikuijai Moisés. Bajaraponü jumaitsi: ² "Barükuikuijamüre Israel tomara. Jumaitsimüre: "Pakujinae pebi o petiriwa ata DIOSONÜ nejja natsata baja de itapetsinütsi kuenia, ³ bajara ponü apo apae tsane uwara, o pe yamenia jebi ra. Akueni pe apae jawa pe amene tsenenaera pora juka uwabüanü jawata o pejjai jawa uwa o pejana kenaebüanü. ⁴ Dajjita matakabi jjanü nejaita, akuenebi pe jjaijawa jjuanü uwa jawata ejjana, jjuanüta ba uba o pejjutonü. ⁵ Dajjita pa matakabi jawalia najamatabü ruta Dioso nejja, apo na matajjunae tsane pa matakabi natoruta DIOSONÜ nejja to kopia patsianatsi. Natsatsiana DIOSONÜ nejja. Na mata ná kopatsiareka. ⁶ Dajjita pa matakabianü DIOSONÜ nejja ponaponaena, akuenebi pe imojjoyotsi jawa pe tüpaenü ata. ⁷ Akuenebi pe jayabi jawa, pajja o pena ata, pejuyapijinü o pejuyapijiwa ata, tüpaeta. Tsipaji bajara ponü natsata Dioso nejja, dajjita tane pe amataná piajjae. ⁸ Dajjita pa matakabi beje natsata Dioso nejja, bajara ponü pebijia kuene apo jjaina, kaenü DIOSONÜ nejja. ⁹ Itsa jiwi ata jemata tüpa pe müjjuneneta y matasipa bijianatsi, nejjata na mata kasibiana pa matakabi kaewüalia jjanewaetsianatsi, siete (7) pa matakabi beje jawata namatakasibiana. ¹⁰ Ocho (8) pa matakabi beje kujinae, anija ukukuto beje o pejana ukukuto beje sacerdotenü jawaberena karenatsana pe nakaetuatsibo paupata. ¹¹ Sacerdotenü kaenü to itsi tsane pe nekoni yabara itsanü to tsakiapaena. JJuaje pe nekoni ikinaena imojjoyotsi jjae pe tüpaenü. Kaewüalia ikatsia pe namataná kopatsi jawa bajara pa matakabi tajjujjubiana. ¹² Bajara ponü natsatsiana ü DIOSONÜ nejja pa matakabi jawalia najjanewaeta ponpona. To kalia tsane pejana kabritoyo kae wai pe jjainaenü pe rajutsi nejja pe nekoni yabara. Pe wajünaya pa matakabianü amatamojibi tsane, tsipaji pe najjanewaetsi jawa to kopia ukutajarabatsi. ¹³ Ma jjuaje pe najjewaetsi Dioso nejja pa liwaisije pakujinae piaja matakabi pe najjanewaetsi jawa kopia patajopa. Kalia tsane penakaetuanae bo baupata. ¹⁴ To kalia tsane pe rajutsi jawa nejja DIOSONÜ. To kajuitsiana oweja kae wei pe jjainaenü apo pe nabejenaenü. To karena tsane oweja pejjania kuenia nejja apo pe nabejenaenü. Pijinia karena tsane piataja paün mumubi, ¹⁵ pejjania penamatamotsi bene paün büanü pe janejai jawata pe tsapakae jawa, pe karukaru jai paün mujjupanü pe kaikinaejawa pe janejai jawata, yajawa pe rajutsi nejja pejjujawanü y pe apaeranü. ¹⁶ Sacerdotenü DIOSONÜ jawabelia tsitajü tsiana. Pe natsatsi Dioso nejja to buatojopaerena pe itsi jawa yabara y peto tajuitsi jawa nejja. ¹⁷ Pe ataja paün mumubi, tsitajütsiana pejana oweja petó peyajjuabi nejja, perajutsi nejja pejjaniakuenia pe jinawanapaya ejjanae nejjatsi DIOSONÜ. Sacerdotenü pijinia pejjutonü jawa to buatojopaena y pe apae jawanü{ ¹⁸ Pe najjawaetsinü Dioso nejja namata kasibiana yapütaya ejjanaejitsia pe natsi jawa Dioso nejjape nakaetuanae bo baupata. Na mataná pitsiana buatsiana isoto jawata jjua pe jjaniakuene pe jinawanapae ejjanae nejjatsi to tajuitabiaba. ¹⁹ Sacerdotenü pitsiana pe jjorapae pejumawito pejana oweja, paün mujjupa pe yajinae ejjanae jawa nejewa mumubi jawata, y atsi paün müjjupayo. Tsikobe kajjiukaena pe namatakasibi kujinae nayapütaya ejjanaena Dioso ejjana penatsatsikuene. ²⁰ Sacerdotewi ya jüjütsiana be perajutsi jawa DIOSONÜ itabü nejejwa. Itsa wito pe jjanewaetsi jawa sacerdotenü nejja, pemipabo y petjaü wito pe yajüjüatsi jawa jjua sacerdotenü jawabelia tsitsajüta. Dajjita jjua kujinaje, pe najjanewaetsinü Dioso nejja apajetsipa uwa jjutonüta pe jutsi ra. ²¹ JJua maje to yakinarubatsije pe najamatabü rutsiwi DIOSONÜ nejja y natsata bajara jjua nejja. Itsa kuene waja ata jjua bajara ponü rajuta, pe itsi nejja pakuenia najamatabü ruta pe itsi jawa, pakuenia yakinaruta pe jinawanapaiwi nejja ü Dioso nejja.'" ²² Ikatsia DIOSONÜ Barü kuikuijai Moisés. Bajara ponü jumaitsi: ²³ "Barü kuikuijamüre Aarón yajawa pejji y jumaitsimüre: 'Pajjamü pejjania kuenia pa itsimüre Israel tomara jawabelia. Pajjamü pane jumaitsi nejjaje: ²⁴ "DIOSONÜ pejjania kuenia ka rajutsi y kaewetsi. ²⁵ DIOSONÜ pejjania pane naükotsi pa tajjitamü, y pa paka itajjuto bijiobiatae pajjamü, ²⁶ DIOSONÜ pakayawenonae y jjanewaetsia paka jinawapae ejjanae." ²⁷ "Pakueniaje pamonaeje ne wünüjonaena Israel tomara piajiwi. Nejjata jjanü pejjania kuenia yawenonaenajü.