² Dioso jumaitsi Moiséta Moab woyofota tusatota jordan Jerico jawata pakueniaje: ¹ "Itorobare Israel tomara pijiwi pe rajutsinejja ira mujjunenejji Levitawi. Pa rajure bajara pamonae tomaranü pe jina wono pae nejja pona pe pünü jawa mata toyorotsia bajara pa tomaranü. ³ Levitawi jjainaina tomaranü pe jinawanapai nejja. pona pijinia piaja bakanü nejja, dajjita bitsautonü dajubiwi. ⁴ Poona mata toyorotsia tomara pane rajutsi jawa pajjamü ayaijawa tsane mata tojjenetsia peya nakaranatsi jawatomara be 450 pa metro beje kuenia kai tusato yene pana kanakujitsia. ⁵ Pa ka jütsianame 900 pa metros beje kuenia woyofo werena kujinae tomara bajara pakuenia kai yenepana kanakujitsia 900 pa metro beje tsaponai namata enetsia. Bajara pa poona tomara piaja jawa. Tomaranü tuatujuta enaina. ⁶ Seis pa tomara beje kuenia pa raajutsianame Levitawi be pa to nakuenebame pe jinawana painejja. Pajjamü be pa wajütame bajara pa tajjunainü pijiwi beyajjuaba jiwitonü be wemajjü panepa. Bajara pakuenia, panatsi wajünae taema 42 pa tomara beje. ⁷ Pa tomaranü pa rajutsianame Levitawi dajjitata 42 jjüa beje tsane. Pa rajutsianame piaja pona yajawa . ⁸ Pekanua Israel tomaranü, pa wiriawi pekanua iranü jjaina, be rajuta pekanua tomaranü. pijinia tsikiri wiriajji be rajuta be tsikiri tomarajji. kai wiria kanakujitsia rajutsiana Levitawi pe rajutsia jawatsi." ⁹ Bajara jjua kujinae Dioso jumaitsi Moiséta pakueniaje: ¹⁰ "Jumaitsimüre Israel tomara pijiwita: 'Itsa pa nikabame Canaan mene, ¹¹ Kajena baja pa itapetsianame pa tomaranüta panakuene bijitsiamü pane yajawa jinawapai nejja pajjamü, pa tajjunaeta jiwitonü be beyajjuaba anekonijibia, be wemajjü panepa. ¹² Bajara pa tomaranü raja pe jina wonopai nejja pe kuene sauwi, baitsi Jane ponü ba nekonitatsi apo be beyapjjuabitsi apo yapütai nejewa Pepo kuene tomara itabünejewa. ¹³ Be itapeta 6 pa tomara beje pe jinawanapai nejja. ¹⁴ Be rajuta 3 pa tomara beje bebeliayo jordan wekua yajawa 3 pa tomara beje Canaan irata. ¹⁵ Bajara pa tomaranü raja pejinawono pai nejja. Israel tomara pijiwi, pe nubena jinaiwi, saya pena jinawanapaiwi pajjamüta, bajara pamonai nejja bajara pa tomaranüta pe jinawanapai nejja pe beyajjuabiwi itsa jiwiyo apo yapütai nejewa, pe najitabijiribi jiwiyo. ¹⁶ Baitsi Jane pa pebi wünüjonatsi pe be jawa pe kueyanü jiarü jawata, itsa baja pe kueyanü thüpa, nejjata baja pe wünüjonai nütsi baja kajena jiwi benü. ¹⁷ Bajara ponü baja nejjata be tüpa. Itsa pebi pewünü jonai nütsi baja itsa Bia pe kueyanü ibotota pe kobeta itsa beyajjuaba e kueyanü, itsa ekueyanü thüpa, nejjata kajena bajara ponü jiwi benü. Bajara ponü nejjata baja be thüpa. ¹⁸ Itsa pebi pe wünüjonai nütsi Bia pe kueyanü nae epatota itsa beyajjuaba pe kueyanü, nejjata baja itsa pekueyanü thüpa, nejjata baja bajara ponü jiwi benü. Bajara ponü nejjata be thüpa. ¹⁹ Peya matamatsinü piaja monae, be beyajjuaba jiwi benü. Itsa namatajjuna, Bajara ponü be beyajjuaba. ²⁰ Itsa pebi pe wünüjonai nütsi bijiobi ejjana itsa jiwiyo pe anaipani jawata itsa tsi bijjana jjuaba bajara ponü jawabelia, pe thüpai nejja, ²¹ Itsa bajara ponü bia pe kobeta pekueyanü pe thüpainejja, nejjata bajara ponü pe wünüjonai nütsi be thüpa. Bajara ponü Jiwi benü. Peyamatamasinü piaja monae kuene kaüjüpa tsi pe beyajjuabi nejja jiwi benü itsa namajjuna. ²² Baitsi Jane itsa pa pebi wünü jonatsi jemata itsa Bia pe kueyanü apo itoya nejewa jemata saya tsi jjuaba pe be nejja pekueyanü apo Tae nejewa. ²³ itsa tsi jjuaba iboto pe beyajjuabinejja pe kueyanü apo Tae nejewa e kueyanü, nejjata pe wünü jonai nütsi apo; pekueyanü apo siwa najamatabü jjainai pe beya jjüabinejja pe kueyanü. bajara jjua itsa baja kajena pekueyanü itsa thüpa. ²⁴ Nejjta, tomara pijiwi be nekonita jiwi benü yajawa jiwi peya matamatsinü iaja monae ma pajume pakuenia jumaitsi je. ²⁵ Tomara pijiwi be wekua tsata pe nanekotsinü wekua peya matamatsinü piaja monae. tomara pijiwi be kanawiata pe wünü jonainütsi piaja tomara Elia itsa belia najitabijiriba kopiya. Bajara jota be ponapona pe thüpa jawabelia ayai kuenia sacerdotenü pitabünejewa, pe ejjabi nütsi aceiterata santo jawata. ²⁶ Itsa nejjata pebi pena nekonitsinü itsa matakabi jawabelia Itsa pona pe kopiya rukae jawabelia tomara itsa belia najitabijiriba, ²⁷ Nejjata peya matamotsinü piaja monae itsa namatajjuna itsa mujjuneneta, itsa beyajjuaba pe nanekotsinü, bajara ponü apo wemajjü nanekonitsi tsanetsi. ²⁸ Tsipaji bajara pa pebi wünü jonatsi apo be pitsapai pa tomara jawata ponapona sacerdote ata pe thüpai jawabelia. Bajara jjua kujianae pe thüpai kujinae sacerdotenü, be nawiata bajara pa pebi piaja irabelia itsa jota jjaina pe Kobe kowü. ²⁹ Ma pa liwaisi bajjutoje be pa yeiyatae tane me pajjamü pane wajünaewita panija tomara pijiwi tayajawa dajjita jawa itsajota pa jinawonopame ata. ³⁰ Itsa jiwi ata itsa beyajjuaba jiwitonü, pena mujjünitsinü kajena be thupa, pakuenia baja paeba dajjita pe taewitsi. Baitsi Jane apo be jume namatamotsi kai jiwiyo pe beyajjuabi nejjatsi pe beyajjuabi nejjatsi. ³¹ Pajjamü, ata apo be pa yamatamatsimü itsa jiwi ata pewü jonai nütsi jume. kaikueni be thüpa. ³² Kajena baja be thupa. apo be pato jejamü kae jiwi ata pe ponai jiwi wekua pe ponaponai jawata wekua itsa jota pikani ponapona. Apo be be pato jejamü pe ponaponai nejja panija Boo jawata ata pe thüpai jawabelia sacerdotenü. ³³ Pa bijianame pütsa pa iraje bajara pakueniaje itsa jota pa jina wonopame, tsipaji pe janata jiwi benü pa bijiana ira. Itsa jawa ata tsikatsi ata pijana itsa jopatsi ira, baitsi Jane itsiata pa jiwi jjuaba pijana. ³⁴ Bajara jjüata, apo be bijinae pe jina wonopai irata tsipaji JJanü bajara jota ponaponajü bajara pa irata. JJanü Diosonü, israelitawi tomara tutujuta ponaponajü.'''