¹ Diosonü barü kuikuijaitsi Moisés.Nejjata jumaitsi: ² "Barü kuikuijamüre Israel monae baja ra pakuenia namtájjünare baja ra pamonae pija naebonü, kaijiwiyo kanakujitsia pija salinae, doce ponáyobeje. Yakinare kainü kanakujitsia pewünü nija naebota. ³ yakinarüre Aarón pewünü levi pija naibota. Boka meta pekobe naebo pi torrobinü piaja monaemi. ⁴ Rubianame naebonü pekaituata-biabi-boyo jawata liwaisi itapata, itsajota kabarü nakaetuata biabatsi. ⁵ Pakuenia itsi tsaneje ponü itapetsianajü pija nae tó namatono tsianatsi. Jjanü itsinü tsane Israel monae pejumé núkajopaijitsia, pamónae kuikuijai jjamü yabara." ⁶ Nejjata Moisés tsipaiba Israel tomara pijiwi jawábelia. Dajjita pija jivi pejjainae nüanü rajutatsi naebonü, kai pito-robinü kanakujitsia kainaebo, pe-rubikuenia bajayata pamonae pija salinae, doce ponaibeje dajjita ta. Nejjata Aarón pija naibo baja ra pa tuatuajüta naboka. ⁷ Nejjata Moisés jeba naibonü Dioso pitabü nejewa pabota pitorobi liwaisianü bobena. ⁸ Itsa matakabita, Moisés joneya penamatámatsi liwaisi pebobenai boyabelia nejjata, majótaje, Aarón pija naebo namatafota levi pija monae nejja. ¡Tó júwatsi pemajjürrü-nanü pematono pekui yajawa petsóbiajawa! ⁹ Moisés kapitsapa dajjita naibonü Dioso pitabünejewa Israel mónae jawáberena dajjita, kaenü kanakujitsia pita pija naebo. ¹⁰ Diosonü Moisés jawabelia jumaitsi: "Nure Aarón pija naebo peyeiyatae liwaisi itapá jawata. Baja ra jjua to ruta biabiana penayá pütaenaejja pija nekoni pamonae wekua napünüyoroba, baja ra pakuenia ajibi ejjanai jitsianü tanebará büjai liwaisi, nejjata baja ra pamonae tüpaena." ¹¹ Moisés itsi pakuenia Dioso pitorobi kueniatsi. ¹² Israel tomara pijiwi Moisés jawábelia kuikuijai pakueniaje: "Pajjanü patüpaenajü jotaje.¡Pajjanü dajjita pajibinütsane! ¹³ Dajjita pamonae ponaérena, imojjoyo-biarena Dioso pija pekaetuatsi boyo jawáberena, tüpaena. ¿Dajjita wajjaitsi be werewerekatsi?"