¹ Dioso jumaitsi Moiseta. Pakuenia je: " ² Itsimüre najua trompeta pe niwe jai jawata. tsakire bajara jjüa ni itsi nejja. Bajara pa trompeta kana kuene bianame ne kaituatsi nejja tomara pijiwi bajara pakuenia junatsianame pe tijjibinejja piaja boojji. ³ Sacerdotewi najumetsi ejjanana trompetanü pe junatsi nejja dajjita bajara pa tomara pijiwi baupa itapata kanakijitsita pena kaituatsi boota. ⁴ Itsa sacerdotewi saya kai trompeta itsa oba nejjata, penamata kaitoro biwi, penama ta kajina wonopaiwi israelita wiriawi, nakaituatsiana jjanü jawata. ⁵ Pakujinae obiana asaaüyata, nejjata baja itsa yenepana jawa berena pa tajjünai baja tajjü jjübiana pe na tijjibinejja. ⁶ pakujinae ikatsia najumetsiana ayaikuenia, nejjata baja itsa yenepana werena patajjünaenü natijjibiana. Bajara pamonae asaüyata najumetsi ejjanaena pe natijjibinejja. ⁷ Pakujinae baja dajjita tomara pijiwi na kaituta pa najutsi ejjanare trompeta baitsi jane apo ayi jumeta. ⁸ Pejji Aarón,sacerdotewi, bajara pamonae najumetsi ejjanaena trompetanü. bara pa kuenai itsi tsabiabi tsane pitorobi kuenata pa jjamü wiria nejja. ⁹ Pakujinae itsa paponainame piayai ira belia pane kueyawi anaipanaina, nejjata pajjamü pa najutsi ejjanainame trompetanüta. JJANÜ PANIJA DIOSONÜ, dajjita paka najamatabü napitatsi pataka yawenonai nejja pane kueyawi wekua. ¹⁰ Pijinia, pa matakabianü pato itabütame, pejjania kuenia fietanüta bea jjaayo kuenia peejana kopiaya juameto kopianüta, pa najumetsi ejjanainame trompetanü pa ne yaiya tai kuenia jjüa rajutabiaba pejjania kuenia pe tajuatsi nejja yajawa pakuenia bijiobi kueia rajutabiaba jjanaiawaitsia pe jinawana painejja. Mara jjuaje pa kato jjane panaina pata ne naja matabü na pitsinejjamü pajjamü, JJanü, DIOSONÜ. pa dajjitamü panija DIOSONÜ." ¹¹ ija wai beje kujinae, anija juameto beje kujinae, 20 matakabita bajara pa juametota, nawüyota pajubo pena kaituatsiboo wekua. ¹² Israel pijiwi nejjata wekua pona Sinaí tusato. Ikatsia nejjata pajubo ruka jopa Parán tusato jawata. ¹³ Tajjüjjüaba janebaja kopiaya namuto, pakuenia jumaitsi DIOSO Moise jawabelia. ¹⁴ Juda wiriawi piaja bandera karunaika piaja tajjünai wekua kopiaya pe ponai nejja, bitsojinai ejjana piaja waja bitsaü. Nejjata, Naasón, Aminadab pejjünato, mata kaitoroba dajjita wajabitsü Judá piaja jiwi. ¹⁵ Natanael, pejjünato Zuar, mata kaitorba dajjita wajabitsaü yajawa dajjita Isacar piaja wiria. ¹⁶ Eliab, Helón pejjunato, mata kaitoroba dajjita wajabitsaü yajawa Zabulón piaja wiria ¹⁷ Gersón piaja wiria Merari pijiwi ata, pe ewetsiwi pena kaituatsi boo, bajara pamonae jonapeneta bajara pa booyo nejjata bajara pakueia na pona. ¹⁸ JJukujinae, wajabitsaü karunaika Rubén piaja bandera bajara pamonae ata na pona. Elisur, pejjunato Sedur, mata kaitoroba Rubén piaja wajwbitsa. ¹⁹ Selumiel, pejjunato Zurisadai, mata kaitoroba dajjita wajabitsaü yajawa Simeón piaja wiria. ²⁰ Eliasaf, pejjunto Deuel, mata kaitorba dajjita wajabitsaü yajawa Gad piaja wiria. ²¹ Coatita wa tajjü jjüaba pe ponai jawa. Dajjita kuene kapona jjuanü kanakueneba biaba pe yaiya jawanü nejja. itsamonai pijinia nakueneba dajjita pena kaituatsi boo nejja pe patsi wajunaya coatitawi bajara pa tajjünaita. ²² Wajabitsaü karunaika Efraín piaja wiria yajawa bajara jjüa kujinae na pona. Elisama, pejjüna Amodud, mata kitoroba wajaitsaü Efraín piajawi. ²³ Gamaliel, pejjunato Pedasur, mata kaitoroba dajjita wajabitsaü yajawa dajjita Manase piaja wiria. ²⁴ Abidan, pejjunato Gedeoni, mata kaitoro wajabitsaü dajjita yajawa benjamin piaja wiria. ²⁵ Pa wajabitsaü nubena othopa bajara pamona karunaika bandera Dan piji wiria bajara pamonae kotokaiwa najetarubena. Ahizer, pejjünato Amisadai, mata kaitoroba dajjita wajabitsaü Dan piaja jiwi. ²⁶ Pagiel, pejjünato Ocran, mata kaitiroba dajjita wajabisaü yajawa dajjita piaja wiria Aser. ²⁷ Ahira, pejjunato Enan, mata kaitoroba dajjita wajabitaü yajawa Neftali piaja wiria. ²⁸ Pakueniaje tajjü jjüaba wajabitsaü Israel pijiwi pe ponai nejja. ²⁹ Moise jumaitsi Hobab, pejjünato Reuel, madianitanü. Reuel Moise pijawa pajja. Moise jumaitsi Hobab jawabelia pakueniaje: " wajjaitsi baja kajena najetarubenatsi bajara jota pakuenia DIOSO naka itoroba DIOSO jumaitsi: 'JJanü paka rajutsiana pa dajjitamü.' Paponainame pa jjanü jawa berena najua itsi tsanetsi pejjania kuenia.DIOSO baja najume kapanepa pejjania kuene peto itsi nejja Israel pijiwi." ³⁰ Baitsi jane Hobab jumaitsi Moise ta:" JJanü baja ponainajjü taja ira belia pepo taja jiwi jawabelia." ³¹ Jjata Moise jume pita: " Putsa abajjü poname. JJamü yapüaneme pakuenia tajjunaebo ne nakuenebi nejja petusatota. jjamü pane ya ewetsianame pa dajjitamü. ³² Itsa na poname pa jjanüta, pakato itsi tsanetsi bajara pakuenia pe jjania kuene pakuenia DIOSO nakato itsi tsabiabi dajjita wajjaitsinejja.'' ³³ Ponaika DIOSO piaja ünü jawa wetsika akueyabi pa mata kabibeje. ya baulaa pena jume kapane jume DIOSO pe wajunaya najetaruka akueyabi pa matabi beje pe namatajjünai nejja pe kuero ewetsi nejja. ³⁴ DIOSO piaja pajubo najetaruka biaba pemata tsunüyo matakabita peponai jawata ³⁵ Pakujinae ya baula kapona penajume kopatsi liwaisi Moise jumaitsi: '' Namatakore DIOSO. yorota ne kueyawi. to kopare pa monae kaitoya pe rüküpekai nejja jjamü wekua. ³⁶ Pakujinae ya baula kanubena othopa/ Mose jumaitsi: Nawiare, DIOSO, ayaibitsaüto jjaneto Israelitawi jawa berena."