¹ PETUJJANENÜ barru kuikuijai Moisé, jumaitsitsi: ² ''Israel pijiwita jumaitsimürre: 'Itsa baja itsa jiwi nanekonita apo jitsipai nejewa, itsa baja itsi jjua PETUJJANENÜ itorroba apo pe itsi nejja, itsa bajarra ponü bajarra ponü itsi peitawetsi jawa, nejjata baja itsi tsaneje. ³ Itsa baja sacerdotenü nanekonita, itsa bajarra ponü wünü jonatsi nejjata baja nekonita piaja tomarra, nejjata bajarra ponaü rajutsiana penanekonitsi yabarra, kai baka peéjananü apo pe kapanapanawinü PETUJJANENÜ rajutsiana ofrenda jawa kuenia penanekonitsi yabarra. ⁴ Bajarra ponü rajutsiana baka baüpa jawata pena kaitutsibo jawa pitabü nejewa PETUJJANENÜ, matabokotota nakobe buatsiana, nejjata beyajjuabiana pitabü nejewa PETUJJANENÜ. ⁵ Sacerdotenü pe ejjabinütsi bakajana yajawünü pitsiana nejjata bajarra jjuata kiatsiana penakaitubiabi bo jawata. ⁶ Sacerdotenü nakobesi jabütsiana pijanarrata bajarra jjua kujinai tsikabiana bijiata siete (7) jjua beje pitabü nejewa PETUJJANENÜ, cortina imojjoyo jawata santo tajjunai jawata. ⁷ Nejjata sacerdotenü pijana yajawünü jebana Altar mataetota incienso jawa petujju jjanepanai jawa pitabü nejewa PETUJJANENÜ, jjua baja nuka pena kaituatsi bo jawata, bajarra ponü baja tsikabiana peyajawünü nakopatsi baka janata Altar tabütopata petajuitsi ofrenda jawa nejja, jjua baja nuka pena kaituatsi boo baupata. ⁸ Bajarra ponü kaukubiana dajjiata bakanasitsi jjua baja ofrenda jawa nejja penanekonitsi jawa; pa penasitsi ba ya karranata pe unu, yajawa dajjita pa nasitsi ba yajawa rubena pe unuta. ⁹ Pe marra uthutonü jawata ata panasitsi rubena, jjua baja rubena pejuma sirrito jawarreka, pekojjowi, pemarra uthuto beje bajarra jjua bajarra ponü dajjita kaukubiana. ¹⁰ Bajarra ponü kaukubiana dajjita bajarra jjua, pakuenia bajarra ponü kaukuba baka pe rajutsi jawa ofrenda jjua pejjania kuenia pe ponaponai nejja yabarra. bajarra jjua kujinai, Sacerdotenü bajarra jjua tajuitsiana Altar jawata petajuitsi ofrenda jawa nejja. ¹¹ Baka pe boko pewi jjua baja yajawünü nakopata, pamatabokoto petajjua yajawa peunu baja yajawa,. ¹² Dajjita baja jjua baka yajawünü nakopata, bajarra ponü baja kaponaina bajarra jjua panabo wekua patajjunai jawabelia bajarra pamonai jjaniawaita jjanü nejja, itsa jota othoka biaba ipumana; bajarra pamonai bajarra jota tajuitsiana naijawanü jawata. Bajarra pamonai baja tajuitsiana bajarra jjua itsa jota bajarra pamonai othoka biaba ipumana. ¹³ Itsa baja dajjita penakaituatsi jawata nanekonita apo yapütai nejewa, baja nejjata pena kaituatsiwi apo yapütai jjua PETUJJANENÜ itorroba jjua apo pe itsi jawa nejja, itsa baja nejjata nanekotita. ¹⁴ Nejjata baja, pakujinai bajarra pamonai yapütane jjua yabarra nanekonita, nejjata bajarra pamonai rajutsiana ofrenda kai baka peéjananü penanekonitsi yabarra kaponairrena penakaituatsibo jawaberrena. ¹⁵ Penawerretsiwi Ancianowi pena kaituatsiwi nakobenubiana baka matabokoto jawata pitabü nejewa PETUJJANENÜ, nejjata baja beyajjuabiana pitabü nejewa PETUJJANENÜ. ¹⁶ Sacerdotenü pe ejjabinütsi karrena tsane tsikirri bakajana pena kaituatsibo jawa berrena, ¹⁷ Nejjata sacerdotenü nakobetsi jabutsiana pijanata bajarra jjuata tsikabiana siete jjua beje pitabü nejewa PETUJJANENÜ, cortina wajüna jawata. ¹⁸ Bajarra ponü ejjabiana tsikirri bakajanata Altar pemata eto jjua baja nuka pewajünai PETUJJANENÜ, jjua baja nuka penakaituatsibo jawata, bajarra ponü epanaina dajjita jana Altar tabütopa jawata petajuitsi ofrenda jawa nejja, jjua baja nuka penakaitutsino itapa jawata. ¹⁹ Bajarra ponü kaükutsiana dajjita penasitsi jawa bajarra jjua tajuitsiana Altar jawata. ²⁰ Bajarra jjua baja itsi tsane bajarra pa bakata. pakuenia baja itsi itsa bakata pakuenia itsi penanekonitsi ofrenda jawa, bajarra pakuenia ata itsi tsane bajarra pa bakata, sacerdotenü jjaniawaitsiana piaja jiwi tomarra, nejjata bajarra pamonai apo nanekonitsi tsane baja. ²¹ Bajarra ponü kaponaina bajarra pa baka panabo wekua nejjata baja tajuitsiana pakuenia itsi kopiaya baka. Bajarra jjua baja penakaituatsiwi penekoni yabarra. ²² Pakujinai baja pe itorrpbinü nanekonita apo yapütai nejewa, itsa baja itsi itajjutejema baja jjua baja PETUJJANENÜ DIOSO itorroba apo pe itsi jawa nejja, nejjata bajarra itsa bajarra jjua itsi nejjata baja nanekonita, ²³ Nejjata baja pe yabarra nanekonitsi jawa nayapütaina, bajarra ponü naja karrena tsane pe nekoni yabarra pebito cabra, kai pebito apo penakatsapabinü. ²⁴ Bajarra ponü nakobe nutsiana baka matabokoto jawata bajarra jjua kujinai baja beyajjuabiana pa tajjunai jawata bajarra pamonai beya biaba peto tajuitsi jawa PETUJJANENÜ pitabü nejewa. ²⁵ Bajarra pa ofrenda baja pe nekoni jawa yabarra. Sacerdotenü yajawünü pitsaiana piajana jjua penanekonitsi ofrenda jawa pekobesitota rutsiana baja Altar mata eto jawata petajui jawa nejja, bajarra ponü epanaina pijanarra Altar tabütopa jawata petajuitsi ofrenda jawa nejja. ²⁶ Bajarra ponü dajjita nasitsi tajuitsiana Altar jumata, pakueia baja itsi pa ofrenda jawa rajutatsi pejjania kuenia pe ponapona. Sacerdotenü baja jjaniawaitsiana pitorrobinü penanekonitsi yabarra, nejjata baja pitorrobiwi anekonijibi tsane. ²⁷ Itsa jiwi baja itsa nanekonita apo nanekonitsi jitsipai ata, itsa baja itsi itajjutejema jawa jjua baja PETUJJANENÜ itsi apo pe itorrobi jawa, itsa baja matapania yapütane pe nanekotsi jawata, ²⁸ Nejjata baja penanekonitsi jawata itajju tejema pe itsi yabarra, matapania baja yapütaina bajarra ponü pe itsi jawa, nejjata bajarra ponü karrena tsane Cabra pe rajutsi nejja, bajarra pakuenia ata karrena tsane pesorrowato pejjane panaiwa, penanekonitsi yabarra jjua bajarra ponü pe itsa jawa. ²⁹ Bajarra ponü nakobe buatsiana ofrenda jawata pe matabokotota jjua rajuta penanekonitsi jawa yabarra beyajjuabiana ofrenda jawa nejja jjua penanekonitsi jawa yabarra itsa pa tajjunai jawata tajuita ofrenda. ³⁰ Sacerdsotenü yajawünü pitsiana tsikirri jana jawa pekobesitota pe rutsi nejja Altar mataeto jawata pe tajuitsi ofrenda jawa nejja. Bajarra ponü epanaina dajjita peyajawünü nakopatsi jana Altar tabutopa jawata. ³¹ Bajarra ponü dajjita nasitsi kaukubiana, pakuenia baja itsi panasitsi jawa jjua rajuta ofrenda pejjania kuenia pe ponaponai nejja. Sacerdotenü bajarra jjua tajuitsiana Altar jumata pekapitsapai nejja pejjaikai tujju PETUJJANENÜ nejja. Sacerdotenü jjanepanai ejjanaina, nejja bajarra ponü apo nanekonitsi tsane. ³² Isa kai pebi to karrena oveja pebito ofrenda kuenia perrajutsinejja penanekonitsi yabarra, karrena baja yajawa pesorrowato pejjane panaiwa. ³³ Bajarra ponü nakobe buatsina ofrenda jawata jjua penakonitsi yabarra jawa bajarra jota nejjata beyajjuabiana ofrenda nejja penanekonitsi yabarra bajarra pa tajjunai jawata bajarra pamonai itsa jota beyajjuaba petajuitsi nejja ofrenda jawa. ³⁴ Sacerdotenü pitsiana pijana jawayo yajawünü jjua rajuta ofrenda penanekonitsi yabarra pekobesitota jjua Altar mataeto jawata rutsiana petajuitsi ofrenda jawa, bajarra pakuenia dajjita jana epanaina Altar tabütopata. ³⁵ Bajarra ponü kaukubiana penasitsi, bajarra pakuenia ata oveja nasitsi jawa kaukuba ofrenda jawa pejjania kuenia pe ponaponai, nejjata baja sacerdotenü tajuitsiana Alar jumata ofrenda PETUJJANENÜ piajawa jjua baja itsi isotota. Bajarra ponü sacerdotenü jjaniawaitsiana penanekonitsi jawami jjua bajarra ponü pe itsi jawami nejjata bajarra ponü itajjuto tsonia tainatsi apo nanekonitsi tsane.