¹ Itsa jiwi ata baja pakujinai bijiobi kuenia rajuta ofrenda jawa kuenia pejjania kuenia pe ponaponai nejja rajuta kainü dajubi bitsaüto yajawünü, apo itsa kuene itsa pebito itsa jume itsa pesorrowato, baja kajena be rajuta pejjania dajubinü potabü nejewa PETUJJANENÜ. ² Bajarra nakobe buatsiana pemata boko jawata ofrenda jawa penakaitutsibo baupa itapa jawata beyajjuabiana. Bajarra jjua kujinai pejji Aarón sacerdotenü tsikabiana pijanata Altar mujjunene jawa. ³ Pebi itsa rajuta bijiobi kuenia ofrenda jawaisotota pe itsi jawa pejjania kuenia pe ponaponai nejja PETUJJANENÜ pitabü nejewa. Papenasitsi jawa jjua ba yajawa namatarrapata pe unuta, ⁴ yajawa najua marra uthuto beje yajawa pnasitsi jjua yajawa ruka pejuma epato jawa, bajarra pakuenia ata peko jjojjowi jawa dajjita tijjitsiana bajarra jjua. ⁵ Bajarra jjua tajuitsiana Aarón pejji Altar jawata petajuitsian ofrenda jawa yajawa, jjua baja boka naijawa jawa jjua boka isoto matatsunüta. Nejjata bajarra jjua pejjania tujju jjaikai jawa kapitsapaina PETUJJANÜ nejja; bajarra jjua baja isotota pe itsi jawa. ⁶ Itsa baja pebi pe rajutsi jawa ofrenda jawa kuenia PETUJJANENÜ jawabelia itsa baja piaja dajubi bitsaüto jawa pejjania kuenia pe ponaponai nejja; itsa baja pebito itsa baja peorrowato ata, ⁷ baitsi jane pejjane panai dajubi pe rajutsi nejja ofrenda kuenia. Pakujinai baja itsa rajuta ovejanü bijiobi kuenia, nejjata baja be rajuta pitabü nejewa PETUJJANENÜ. ⁸ Bajarra ponü nakobe buatsiana pematabokotota bijiobi kuenia pe rajutsinü bajarra jjua kujinai beyajjuabiana pena kaituatsibo itapa jawata. Bajarra jjua kujinai Aarón pejji pijanata tsikabiana pemujjunene jawa Altar. ⁹ Pebi rajutsiana bijiobi kuenia pe ponaponai nejja be sebi jawa isotota PETUJJANENÜ nejja. Penasitsi, dajjita pe boso nasitsi jawa yajawa na kaukutsiana ata imojjoyo petabü sipa jawata, yajawa dajjita pe unu nasitsi jawa, yajawa dajjita penasitsi jawa jjua baja panasitsi jawa yajawa jjaina, jjua baja büpünü jawata rubena, ¹⁰ jjua baja najua marra üthuto beje penasitsi jawa ba rukarreka pejuma sirrito jawa berreka ata kojjojjowi jawa berreka, bajarra pakuenia ata pemarra üthuto wekua tijjitsiana dajjita bajarra jjua. ¹¹ Bajarra jjua kujinai, sacerdotenü taujuitsiana dajjita Altar jawata pakuenia ba itsitsi pejjai jawa PETUJJANENÜ. ¹² Itsa pebi rajuta ofrenda kuenia cabra, Nejjata baja itsi tsane pitabü nejewa PETUJJANENÜ. ¹³ Bajarra ponü cabra matabokoto jawata nakobe buatsiana bajarra jjua kujinai beyajjuabiana penakaituatsibo wajunai jawa werrena. Bajarra jjua kujinai Aarón pejji tsikabiana Altar dajjita yenepana. ¹⁴ Pebi rajutsiana bijiobi kuenia isotota pe itsi jawa PETUJJANENÜ nejja. Bajarra ponü tijjitsiana dajjita büpünü piji nasitsi, yajawa ata jju rubena büpünü jjua rubena. ¹⁵ Bajarra ponü tijjitsiana pemarra uthuto beje yajawa penasitsi jawa bajarra jjua yajwa, jjua baja rukarreka pejuma sirrito jawaberreka, pekojjowi jawa pemarra uthuto beje yajawa. ¹⁶ Sacerdotenü tajutsiana dajjita bajarra jjua Altar jawata ofrenda jawa kuenia be petajuitsi pejjaijawa, pekapitsapai nejja pejjania jjaikai tujju jawa. Dajjita penasitsi bajarra jjua PETUJJANENÜ piaja jawa. ¹⁷ Bajarra pa liwaisi pe tsitekai dajjita wirria nejja nija jiwi kai tajjunai kanakujitsia itsa jita pajjamü pa itsimü panijabonü, pajjamü baja apo be pajjaimü penaitsi pijana ata.''