¹ PETUJJANENÜ barru kuikuija Moiséta jumaitsitsi: ² ''Ma paliwaisi je pamonai ba pe awitawi nejja je pa matakabi najjaniawaita. Bajarra ponü kaponainatsi sacerdotenü jawabelia. ³ Bajarra pa sacerdotenü wekua pitsapaina pe tajjunaibo wekua pe taina nejja piaperrabü witanenü baja pe jumejawa. ⁴ Bajarra jjua kujinai bajarra pa sacerdotenü itorrobiana pawiyo baja na jjaniawaitsiana pitsiana baja nejjata pejjanepanainü beje, bajarra pakuenia cedro nai, bajarra pakuenia pe tsobia maüto bajarra pakuenia ata hisopo wünü jawa. ⁵ Sacerdotenü itorrobiana pe beyajjuabi ejjanaina kai yajawünü ukkuto pejjania merra jawata jjua ba eka kanalito. ⁶ Nejjata sacerdotenü pitsiana piasü ukukuto cedro naijawa ata, petsobia maüto ata bajarra pakuenia hisopo wunü jawa ata, bajarra ponü dajjita bubukaina bajarra jjua, pa ukukuto péjana piajanata ponü beyajjuabatsi pijanata. ⁷ Bajarra jjua kujinai tsikabiana sacerdotenü siete (7) jjua beje pajiwiyo baja najjaniawaita pona piaja domai wekua, nejjata baja sacerdote baja wünü tsipaibiana pejjanepanai kuenia. Bajarra jjua kujinai kopatsiana piasaünü peniji tusato jawata. ⁸ Pajiwiyo baja na jjaniawaita be kiata baja pena jjatabi jawa, namatana sibiana dajjita, bajarra jjua kujinai merrata nawaina, bajarra pakuenia baja nejjata baja jjanepanaina. Bajarra jjua kujinai baja rena tsane tajjunaibo jawa berrena, baitsi jane bajarra ponü ponaponaina piajabo wekua siete (7) pa matakai beje. ⁹ Siete (7) matakabita bajarra popnü namatajjunaina dajjita, bajarra pijinia pakuenia nabüjjupina jjunaina bajarra pakuenia ata naitapena jjunaina. Dajjita be namatajjuna, bajarra ponü ata be nawane bajarra jjua jujinai merrata; nejjata baja jjanepanaina. ¹⁰ Ochomatakabita bajarra ponü pitsiana najua oveja pébito beje penio jainübeje, bajarra pakuenia kai oveja pesorrowato kai way pejjinaiwa bajarra pakuenia peniojaiwa, bajarra pakuenia ata 11.1 kg. jetsa beno pe kakiatsi beno yajawa aceite jawa be pejjania pejjuofrenda jawa yajawa aceitewajjiyo. ¹¹ Pa sacerdote jjaniawaita nukai ejjanaina pajiwiyo baja jjanepana, PETUJJANENÜ pitabarra jawata pena kaituatsi baupa jawata. ¹² sacerdotenü yajawünü pitsiana pebito oveja bajarra ponü rajutsiana be ofrenda kuenia penane konitsi jawa, yajawa aceite wajjiyo; bajarra ponü be ofrenda kajitsipainatsi pe jirrejirenai jawa pewajünai PETUJJANENÜ. ¹³ Bajarra ponü beyajuabiana oveja pebito pa tajjunai jawata bajarra pamonai beyabiaba ofrenda nejja penanekonitsi yaniwa jjua baja ata tajuitabiaba, pena kaituatsibo imojjoyo jawata, tsipaji bajarra pa ofrenda sacerdotenü piaja jawa, pakuenia penanekotsi yaniwa pa ofrenda, tsipaji bitso pejjania jawa. ¹⁴ Sacerdotenü yajawü jana pitsiana tsikirri jawayo wajüta jjua penekoni jawa yabarra itsi tsabiabi pe mujjuyorro kopiata jiwi pajiwiyo baja nakobe matajarranai jjaniawaita, pe kobe kujanenia, bajarra pakuenia ata piniji tajju matajarranai jawa pekuja tajju nenia. ¹⁵ Nejjata bajarra pa sacerdotenü pitsiana aceitewajjiyo penatsi kobe japa tsikabinejja pekobe tsawenonenia, ¹⁶ Nakobesi jabütsiana pekobe kujanenia aceitewajjiyota jjua kanuka pekobe tsawenonenia, bajarra pakuenia tsikabiana pekobesitota siete (7) jjua beje kuenia pewajunaya PETUJJANENÜ. ¹⁷ Bajarra pa sacerdotenü natsikobe ejjabiana peyajawünü napatsi aceite jawa penatsi mujjuyorro kujanenia kopia ejjabi nejja pejjanepanai jiwi nejja, pekobesi matajarranai jawawelia pe kujanenia, bajarra pakuenia petajju matajarranai jawa petajju kujanenia. Bajarra ponü tsiana buatsiana bajarra pa aceite pijana jawa jjua rajutabiaba penakonitsi jawata. ¹⁸ Bajarra jjua peyajawünü nakotsi aceite jawa jjua natsikobe ejjaba sacerdotenü, bajarra ponü tsimata rutsiana pajiwiyo pana jjaniawaitsi jiwiyo nejja, nejjata baja sacerdotenü kapitsapa ejjanaina pewajüyan PETUJJANENÜ. ¹⁹ Nejjata sacerdotenü rajutsiana penakoni jawami nejjata kapitsapaina bajarra ponü wekua, bajarra pajiwi jjaniawaitsianatsi penajjuirrabi jawami yabarra, bajarra jjua kujinai beyajjuabiana oveja ofrendata petajuitsi jawa. ²⁰ Nejjata sacerdotenü rajutsiana ofrenda petajuitsia jawa bajarra pakuenia ata ofrenda pejju jawa Altar jawata. Sacerdote wekua jjuabiana jiwi wekua, nejjata bajarra ponü jjanepanaina. ²¹ Baitsijane bitos bajarra pamonai nejjata apo be rajutsi pe nekoni matamo, nejjata bajarra ponü pitsiana oveja pebito ofrenda nejja penakonitsi jawami peya jiarratsi nejjatsi, pe wekua jjuabinejja bajarra jjua nejja, yajawa 3.7 kg. pekakiatsi beno pe titiwi kuenia aceite jawa yawa ofrendajju jawa nejja, kai litro jawa yajawa, ²² Kaijawata najua peéjana ukukuto beje yajawa, pakuenia baja pina bajarra ponü pe pitsi nejja, itsanü pina penanekoni tsiwi nejja itsanü pina baja pijinia petajjuitsinü nejja. ²³ Ocho (8) matakabita bajarra ponü karrena tsane pena jjania waitsi nejja sacerdotenü jawa berrena, pena kaituatsi bo mujjuneneta, pewajunaya PETUJJANENÜ. ²⁴ Sacerdotenü pitsiana ofrennda nejja, bajarra ponü yajawa pitsiana kai litro aceite olivo jawa, nejjata bajarra ponü yotsiana athubüabetsia pakujinai bajarra ponü tsitajuta PETUJJANENÜ jawabelia. ²⁵ Bajarra ponü beyajjuabian oveja pebto ofrenda nejja penanekonitsi yabarra jawa, bajarra ponü yajawü pitsiana pijana ofrenda jawa jjua penanekonitsi yabarra jawa nejja natsi mujjuyorro kopia rutsiana pekujabelia itsa belia baja kiatsiana, bajarra pakuenia ata pekobe kuja nenia piniji kobesito nenia, bajarra pakuenia ata piniji kobesito nenia ata petajju kuja nenia welia. ²⁶ Bajarra jjua kujinai sacerdotenü nakobe epanaina petsaweno jawawelia, ²⁷ bajarra ponü tsikabiana pekuja kobesito jawawelia tsikirri aceite jawata jjua baja natsikobe epanai jawa pekobe tsaweno jawawelia siete jjua beje PETUJJANENÜ pitabü nejewa. ²⁸ Nejjata baja sacerdotenü pa aceiterra tsikobe yajawünü nakopatsi mujjuyorro kopia ejjabiana pe mujju tsaweno nenia pa yenepanenia baja kiatsi jitsia, piniji kobesi kuja nenia, bajarra pakuenia ata peta kuja wüsitota, pakuenia itsi pijanata bajarra itsi pakuenia itsi penanekonitsi. ²⁹ Bajarrra ponü mata ejjabiana penkopatsi aceiterrata pajiwi kiatsijitsia be jjania waitsi nejja pitabü nejewa PETUJJANENÜ. ³⁰ Bajarra ponü yajawü rajutsiana kai ukukuto peéjananü, pakuenia baja jiwitonü pe kuene kaüjupai kuenetatsi-- ³¹ kainü pe rajutsi nejja penanekonitsi yabarra itsanü bja pijinia ofrenda kuena pe tajuitsi nejja, yajawa pejju ofrenda jawa. Bajarrajjua kujinai sacerdotenü jjaniawaitsiana pa jiwi kiatsi jitsi petabü nejewa PETUJJANENÜ. ³² Ma baja pijinia pa liwaisije pajiwi ba jjaina piayai domai pe perrabu tsabana, pajiwi bapona kuene kaüpaitsi pe matamotsijawa pe kiatsi nejjatsi,'' ³³ PETUJJANENü barru kuikuijai Moisé jawabelia bajarra pakuenia ata Aarón jawabelia, jumaitsitsibeje; '' ³⁴ Pakujinai pa jonename beje Canaán irrabelia jjua baja paka rajutsi pene najjainayabi nejja, itsa baja pakujinai pabisia kuene natsanai ejjanajü kaibo jawata nenajjainayabi irrata, ³⁵ nejjata bojjanainü betsipaiba joparrena sacerdotenü jawaberrena. Bajarra ponü be jumaitsi: 'tajabota bitso pabitsia kuene kowü ya pata.' ³⁶ Sacerdotenü baja nejjata bajarra pamonai pesabo etsi ejjanaina bajarra ponü pejone wajünaiya pe tai nejja jjua baja pabisia jawa kuene, pe abeje yaniwa bajarra pabota itsa kuene jawa. bajarra jjua kujinai sacerdotenü jonena bo unuabelia. ³⁷ Bajarra ponü kanaujubiana pe yapütai nejja itsa jota ruba bajarra jjua bo yenepanata, itsa baja peneta raüjai itsa baja peneta tsaüjai boyenepana jawata. ³⁸ Itsa baja peneta bo jjaiana pabisia kuene jawa nejjata baja sacerdotenü pitsapaina bo wekua baupa jjatatsiana siete(7) pa matakabi beje. ³⁹ Nejjata baja sacerdotenü bajarra jjua kujinai ikatsia nawiatsiana siete (7) pa matakabi beje kujinai itsakatsia baja pe kanajubi nejja itsa abajju bo jjaiana pabisia kuene jawa bitso ya kaujupa dajjita bo yenepana. ⁴⁰ Itsa bajara itsi, nejjata baja sacerdotenü itorrobiana bajarra pamonai pejutsi nejja pa iboto jjua baja pabisia kuene jjaina pe jjuabi nejja pabisia tajjunai jawabelia tomarra pe pünü yabelia. ⁴¹ Bjarra ponü namata wenoanaina pe kasibi jawa dajjita yenepana bajarra pabó, bajarra pamonai baja notsiana jjua piabeje jawa jjua baja pekasibi jawa pe penetsi nejja tomarra pünü jawabelia piabeje tajju nai jawabelia. ⁴² Bajarra pamonai ikatsia pitsiana itsa ibotonü pe rubi nejja bajarra jjua pe tajjunai njawata, nejjata ikatsia peéjana tsorrobo jawa tabü farratsiana. ⁴³ Ikatsia bajab itsa pabisiaa kuene junua bo jawabelia jjua baja pa ibotonü pe tijjitsi jawami bo yenepana jawata jjua baja kasiba ikatsia baja be peéjana kuenia itsi, ⁴⁴ Nejjata sacerdotenü jonena pe tainejja pe kanajutsi nejja itsa baja jjaina pabisia kuene jawa peya kaüjupa jawa dajjita bo ünü. Itsa baja nejjata ya kaüjüpa, nejjata baja pepo pabisia kuene jawa, nejjata baja bajarra pabo abeje. ⁴⁵ Bajarra pabo baja jjuabianika. Pa ibo baja jjaina, pa naijawa baja jjaina, jjua baja dajjita pe katsanai jawa ata dajjita bajarra jjua baja naka ponaina tomarra pünüyabelia piabeje tajjunai jawabelia. ⁴⁶ petsimata jjuuabi jawanü, itsa jonena pakujina bajarra pabo abajju nabaupa jjatata ajjuirra tsane ya kaniwiyo tsane. ⁴⁷ Pa jiwi majita bajarra pabo jawata najuma ese kiatsiana, itsa bajarra pabo jawata ata na jjane bajarra pakuenia ata najuma ese kiatsiana. ⁴⁸ Itsa sacerdotenü junua bajarra pabo jawa pe kanajubi nejja itsa jjaina abajju pabisia jawa peyakaüjupai jawa bo unu jawa pe mata jjatatsi kujinai, nejjata baja, itsa pabisia kuene ajibi pona baja, bajarra ponü baja jumaitsi tsane bo rabaja ajjuirrajibi. ⁴⁹ Nejjata sacerdotenü pitsiana naju aukukuto beje pe kiatsi nejja bo, bajarra pakuenia ata itsi tsane cedro naijawanü hilomaü pe niweniwenai jawa bajarra pakuenia ata papaüpütonü. ⁵⁰ Bajarra ponü beyajjuabiana kai ukukuto peéjana puatsi merrata kanalito jawata porra eka. ⁵¹ Bajarra ponü pitsiana cedro nai, bajarra pakueia ata papaüpüto, pe niweniwenai hilo maüto baja yajawa, piasaü ukukuto yajawa, bubutsiana pethupainü pijanatarra jawata, bajarra pakuenia ata merra jawata, nejjata baja tsikabiana siete (7) jjua beje. ⁵² Bajarra ponü kiatsianabo bajarra pa jana jawata ukukuto janata bajarra pakuenia ata merrata, piasaü ukukutota, cedro nai jawata, papaüpütota, peniweniwenai hilo maütota. ⁵³ Baitsi jane jane bajarra ponü ponai ejjanaina tomarra wekua petusato jawabelia. Bajarra pakuenia bajarra ponü jjania waitsiana bo, nejjata apo ajjuirra tsane. ⁵⁴ Dajiita ma pajume liwaije jjua dajjita witane jjua ba nakatsi perrbü pitsapa jjuab ba naka witane ejjana bajarra jjua nejja, waja naka tini nejja, ⁵⁵ Pakuenia ata be manepa penajjatabi jawata bo unu jawata, ⁵⁶ peya sanai jawa nejja, peya tsabanai nejja, peya binebinenai nejja ata, ⁵⁷ Bajarra pa witane raja pabisia witane pajjamü nejja itsa baja bitso abeje. Ma pa liwaisije jjua ba naka waitaba pabisia witane waja perrabütota be orro kuenia ata''