¹ PETUJJANENÜ barru kuikuijai Moisé Aaron bejeta jumaitsi: ² Pakujinai itsa jiwin jjaina pe perrabuto sana itsa baja perrabü natsebokota itsa baja perrabu kapanapanawa niweniwen jaiya itsa bajarra jjua ya witanebatsi jjua baja jjaina pe perrabüto jawata, nejjata bajarra pa jiwi naka ponaina Aarón jawabelia piniji sacerdotenü, pejjunato jawabelia ata baja be nakapona sacerdotenü jawabelia. ³ Bajarra jju kujinai sacerdotenü padomai jjaina pe perrabütota. itsa bajarra jjua pekowuta pitsapa pinali nato, nejjata bajarra pa domai bitso ayai kuene pe perrabütota, nejjata bajarra pa domai piaya domai. Bajarra jjua kujinai sacerdotenü pe tai kujinai jumaitsi tsane bajarra pa domai pabisia domai. ⁴ Itsa baja pe perrabü kapanapnawi niojai, itsa bitso apo büpünü perrabüto matatojjenetsia itsa baja petajjunai jawata pa nato juwa apo niojai, nejjata baja sacerdotenü yakarranütsiana piaja domai yabarra siete (7) pa matakabi beje. ⁵ Nejjata baja sietematakabita sacerdotenü kanaüjubiana peyapütai nejja pakuenia bajarra ponü jumaitsi jitsia itsa baja bitso tsaponai pe awitane jawa, itsa baja apo ya kaüjüpai pe perrabü jawa. Itsa ajibi, nejjata bja sacerdotenü ya karrenatanütsiana siete (7) pa matakabi beje kuenia ikatsia. ⁶ Sacerdotenü ikatsia taina sietematakabita pe yapütai nejja itsa baja pewitane ajibi tsaponai itsa baja apo ya kaüjüpai pe perrabü matatojjenetsia. Itsa baja ajibi, sacerdotenü baja nejjata yapütai ejjanaina pe jjanepanai jawa. Petsi perrabü pitsapatsi jawa yabarra. Bajarra ponü kiatsiana penajjatatsi jawa, bajarra jjua kujinai bajarra ponü baja jjanepanaina. ⁷ Baitsi jane itsa perrabü sana itsa ya kaüjüpa pe perrabuto jawa petsitajutsi kujinai sacertdonü bajarra ponü pijakueneta pe jjaniawaitsi nejjatsi, nejjata baja ikatsia ponaina sacerdotenü jawabelia. ⁸ Sacerdotenü baja nejjata ikatsia taina itsa baja pe sanai jawa pe perrabüto jawa sana najetarruka bitso. itsa baja natsana, nejja baja sacerdonü jumaitsi tsane bajarra ponü rabaja abeje. Bajarra jjua baja piaya witane. ⁹ Itsa baja pakujinai pabisia witane petsabanai jawa itsa tsiperrabü pitsapatsi itsa jiwiyo, nejjata bajarra pa jiwiyo nakaponaina sacerdotenü jawabelia. ¹⁰ Nejjata baja sacerdotenü kanaüjübiana bajarra ponü itsa baja peneta ya perrabü yajinaina peniojai jawa pe perrabütota, itsa baja penato niojai itsa baja peneta ajibi peéjana wito pe yajinai jawata. ¹¹ Itsa baja yajinai, nejjata baja kajena piayai piniji witane pe perrabüto jawa, sacerdotenü baja be paiba bajarra ponü yabarra pia beje yabarra. apo yakarranatsi tsane. tsipaji bajarra ponü baja abeje. ¹² Itsa baja ya kaüjupa ayai kuenia pe perrbüto jawata dajjita baja perrabü ya kaüjupa bajarra pa witane pemata bokoto jawa werreka kujinai ata petajju ajwa berreka, pe tai kuenia baja sacerdoenü, ¹³ Nejjata baja sacerdotenü be tane jjaniawaitsia bajarra ponü itsa baja perrabü matafobinatsi bajarra pa witane domai. Itsa baja itsi, nejjata baja sacerdotenü bajarra jjua yabarra jumaitsi tsane bajarra pa domai bitso apo piaya jawa. ¹⁴ Baitsi jane itsa wi pitsapa, bajarra ponü abeje tane. ¹⁵ Sacerdotenü taina piasiawi nejjata baja tsipaibiana bajarra ponü jawabelia pe abeje jawa tsipaji piasiawi bajarra jjua abeje. Bajarra jjua raja piabeje domia. ¹⁶ Baitsi jane itsa piasiawi ikatsia niojai, nejjata bajarra pa jiwiyo be pona sacerdotenü jawabelia. ¹⁷ Nejjata baja sacerdotenü kanajutsiana bajarra ponü petai nejja itsa baja pewito itsa niojai. Nejjata baja itsa bajarra itsi sacerdotenü be tsipaiba bajarra pa jiwiyo pe jjane panai jawa. ¹⁸ Itsa baja kai jiwiyo jjaina ulcera tsi perrabü pitsapatsi bajarra jjua kujinai baja jume, ¹⁹ bajarra pa ulcera kowüta itsa yajina niojai itsa baja niwejai, itsa baja niojaiya yajawa tsaüjai, nejjata baja tsitajutsiana sacredotenü jawabelia. ²⁰ Sacerdotenü baja taina itsa pe perrabüto jawa bitso büpünü tsabana, itsa baja pinali itsa pitsapa bajarra jota. Itsa baja itsi, nejjata baja sacerdotenü be tsipaiba bajarra ponü piabeje jawa. bajarra pa domai baja pe tsabanai jawa, jjua baja pitsapa ulcera kowü jawata. ²¹ Baitsi jane sacerdotenü kanaüjubiana taina pe niojaina itsa apo juwi tane bajarra jota ajibi baja pe perrabütota jawata, nejjata sacerdotenü baja yakarranatsiana siete (7) pa matakabi beje. ²² Itsa witsaba najetarruka pe perrabütota, nejjata sacerdotenü tsipaibiana pabia jawa bajara ponü. ²³ Baitsi jane pe niweniwe jai jawa itsa kai kowüta nakopata jopa apo natsanai, nejjata saya baja ü ulcerakowü nejjata sacerdotenü bajarra ponü be tsipaiba pe jjanepanai jawa. ²⁴ Pakujinai pijinia perrabü tajuatsi nejjata piasiawi petajuitsi jawata naitothiana peya yajinai jawa niojai tsobia yajawa itsa baja yajawa kapanapanawa pe niojai jawa, ²⁵ Nejjata baja sacerdotenü kanajübiana petae nejja itsa pe matana niojai be pinali itsa baja bitso büpünüa matatojjenetsia pe perrabüto. Itsa baja itsi nejjata bajarra jjua piayai domai jawa. Ya perrabü kaüjüpa bajarra jjuata petajue jawata nejjata baja pijini sacerdotenü be tsipaiba bajarra jjua pia beje kuene jawa. bitso bajarra jjua piayai domai. ²⁶ Baitsi jane sacerdotenü pekanajütsi jawata itsa namatajjuna pe ajibi jawa peniiojai nato be pinali nato, pe perrabü tsabanai jawata pe tsabanai jawata peperrabüto büjjupanata itsa baja tsewa, nejjata baja sacerdotenü ya karranatanütsiana siete (7) pa matakabi beje. ²⁷ Nejjata bajarra jjua kujinai sacerdotenü siete (7) matakabita kanajutsiana. Itsa baja yakaüjüpa dajjita perrabüto ayai kueneta pe perrebüto jawata, nejjata baja sacerdotenü tsipaibiana bajarra ponü piabeje jawa. tsipaji bajarra jjua piayai domai. ²⁸ Itsa baja pe nioniowi jawa nakopatarruka apo namatarraspatsi baja nejjata ajibi, nejjata baja saya be petajue jawa ya yajina sacerdotenü baja tsipaibiana pe jumatejema jawa tsipaibiana pe jjanepanai jawa, tsipaji baja saya petajue kowü jawa. ²⁹ Itsa baja pebi petirriwa ata jjaina piayai domai pematabokotota pebüjjusalito jawata ata baja. ³⁰ Nejjata baja sacerdotenü kanajütsiana pa jiwi peto tai nejja piayai domai kuene pe tai nejja itsa bitso to ayai jawa pe perrabütota, itsa baja to pitsapatsi tsikirri natojji pe wayanai natojji bajarra jota. Itsa baja nejja itsa pitsapa, nejjata baja sacerdotenü be tsipaib piabeje jawa bajarra ponü. Bajarra jjua petini jawa, piayai domai pemata tsabanai jawa bajarra pakuenia ata pe büjju salito jawata. ³¹ Itsa sacerdotenü kanajutsiana pa domai jjua pe tini jawa itsa baja tane pe perrabü büjjupanata itsa baja ajibi petsaibia nai baajarra jota, nejjata baja sacerdotenü ya karranatanütsiana bajarra pajiwi piaja domai ajawa petini domai siete (7) pa matakabi beje. ³² Siete (7) matakabita baja sacerdotenü kanajutsiana padomai jjaina yapütaina itsa baja ya kaüjupa dajjita perrabüto. Itsa baja pewayanai na ajibi itsa baja saya ü domai pe perrabüto jawata, ³³ Nejjata bajarra ponü be namata kasiba baitsi jane bajarra pa domai kowü jawata apo be kasibi nejjata baja sacerdotenü be nawekua tsata pajiwi jjainai petini domai siete (7) pa matakabi ikatsia. ³⁴ Siete (7) matakabita sacerdotenü kanajübiana pa domai jjaina pe tai nejja itsa baja apo perrabü ya kaüjüpai. itsa baja apo matatojjenetsi pe perrabü, nejjata baja be tsipaiba bajarra ponü jawabelia pejjanepanai jawa. Bajarra pajiwi baja be najuma ese kiata nejjaba jjanepana. ³⁵ Itsa pe tini domai bitso yakaüpa ayai kuenia pe perrabüto jawa sacerdotenü pe paibi kujinai pejjanepanai jawa. ³⁶ Nejjata sacerdotenü baja ikatsia sacerdotenü peéjana kuenia kanajutsiana ikatsia. Itsa bajarra pa domai baja ikatsia yakaüjüpa pe perrabüto jawa, sacerdotenü baja apo namatawenonai pe jaitsi jawa pewayanai na. Bajarra pa jiwi baja abeje. ³⁷ Baitsi jane itsa sacerdotenü pitabü nejewa pe tini jawa baja bewelia juwa baja pe tsaibia na bajarra pa kowüta, nejjata baja jume. JJanepa baja, sacerdotenü baja be tsipaiba pejjanepanai jawa bajarra ponü. ³⁸ Itsa pebi petirriwa ata baja jjaina peniojai tsapatonü pe perrabütota, ³⁹ Nejjata sacerdotenü be kanajuta pajiwi pe tae nejja itsa jjaina penio jai farratonü itsa baja saya penajerronai farratonü, jjua baja saya jima pdesanai jawanü pe perrabütota, bajarra pa jiwi itsiata baja jjanepana. ⁴⁰ Itsa baja pebi matana othopa, bajarra ponü baja amatanajibi baitsi jane itsiata jjanepana. ⁴¹ Itsa baja itapa na othopa bajarra pa jiwyo baja aitapanajibi, itsiata baja jjanepana. ⁴² Baitsi jane itsa matatsabana pe tsobia niojai jawa pe matabokoto jawa pitapa jawata ata baja, bajarra jjua raja petsabanai najerrukai jawa. ⁴³ Nejjata baja, sacerdotenü kanajübiana itsa baja itapa yajina itsa jota mata wijjaibatsi piamatanajibi jawata pitapa jawata baja itsa baja tsaüjai yajawa niojai, pakuenia baja piayai domai pe perrabütota. ⁴⁴ Itsa baja itsi, nejjata bajarra ponü piayai domai jjaina abeje baja bajarra ponü. Sacerdotenü baja tsipaibiana bajarra ponü jawabelia piabeje jawa jjua baja petsima pitsai yabarra jawatsi. ⁴⁵ Pajiwiyo jjaina piayai domai be najjatata pe titika eseto, bena matana kotabuarreka, bajarra pa jiwi bena itabarra karranata pe pümüthaito jawata yajawa be wawajai tsaponaponai: 'piabejenü, piabejenü.' ⁴⁶ Dajjita matabi pa matakabi beje bajarra pa domai yajawa ponapona bajarra tsipaji bajarra ponü abeje. Tsipaji bajarra ponü abeje pa domai peyakaüjupa domai, bajarra ponü be ponapona kainü. Bajarra ponü be ponaóna panabo wekua. ⁴⁷ Kai pena itabütsi jawa itsa bajarra jjua baja beje itsa jjaina pe tsabanai jawa domai, itsa baja lana jawa itsa baja lino jawa. ⁴⁸ Itsa baja pe kiobi jawa lana jawata itsa baja lino jawata, itsa peboko jawata jjua ba itabüta. ⁴⁹ Itsa jjaina jjaina piabeje jawa itsa baja raüjai itsa tsaü jai ata bajarra pa pena itabütsi jawa, bajarra pakuenia ata pebokoto jawa, nejjata bajarra baja lepra jjua baja ayaijawa tsanajetarrukai; bajarra jjua baja betsitajuta sacerdotenü jawabelia. ⁵⁰ Sacerdotenü baja kanajutsiana pena itabütsi jawa itsa baja jjaina piayai jawa; bajarra ponü baja tsatsiana siete (7) pa matakabi beje pe jjainai jiwiyo. ⁵¹ Bajarra ponü kanajütsiana ikatsia (7) matakabita. Itsa baja bitso ayai baja pena itabütsi jawata jjua baja pe kiobi jawa lana jawata itsa pe itsi jawa lini jawata ata, bajarra pakuenia ata pe itsi jawa itajjutema bokoto jawata, nejjata baja piayai lepra domai bajarra pa penaitabütsi jawanü baja abeje. ⁵² Bajarra ponü baja be tajuita bajarra pa pena itabütsi jawanü, bajarra pakuenia ata baja pe farratsi jawanü lana jawanü lino jawa ata, pe boko jawa ata, jjua itajjutejema jawa itsa jota jjaina piayai domai, tsiapaji bajarra jjua tajjujjuabi ejjanaijitsia piayai domai. Nejjata baja penaitabütsi jawa tajuitsiana dajjita. ⁵³ Itsa baja sacerdotenü kanajüta penaitabütsi jawanü itsa baja tane apo pe witsabi jawa penaitabütsi jawata itsa pe farratsi jawata lino jawata jjua pe itsi jawa, itsa pe itsi jawa pe bokotonü jawata. ⁵⁴ Nejjata bajarra ponü itorrobiana pe kiatsi nejja bajarra pa penaitabaütsi jawa jjua baja tsi othopatsi lepra jawa, nejjata bajarra ponü bajarra jjua tsatsiana siete (7) pa matakabi beje ikatsia. ⁵⁵ Nejjata baja sacerdotenü kanajütsiana penaitabütsi jawa pe kiatsi kujinai. Itsa baja piayai domai akotia jjaibi ejjanatsi, abajjua baja apo nakayatsia, bajarra jjua baja abeje. JJamü baja tajuitsianame bajarra jjua, apo tsijepai nejewamü pa piayai domai waitabatsi. ⁵⁶ Itsa baja sacerdotenü kanajuta tane penaitabütsi jawa pekiatsi kujinai baja itsa akotiajibi wajuto, nejjata bajarra ponü be yajawünü kaukuta piabeje jawa pebokoto jawa, jjua baja pe kiobijawa ata. ⁵⁷ Itsa baja tsiteka pitsapa pena itabütsi jawata, itsa baja pe kiobi jawa pebokotonü jawa, itsa baja ayai jawa tsaponai. JJamü baja tajuitsianame bajarra jjua pena itabütsi jawa tsipaji baja jjaina piayai domai. ⁵⁸ Pena itabütsi jawa dajjita yajawa jjua pe kiobi jawa, bajarra pakuenia ata peboko jawa kiatsiname jjua baja itsimü pe boko jawa pe ponai nejja piayai domai, nejjata baja kiatsianame peéjana kuenia pejjanepanai nejja bajarra jjua. ⁵⁹ Ma pa liwaisije jjua pabisia kuene yabarra jawa jjua ba rubena pena itabütsi jawata lana jawa lino jawata ata itajjutejema jawata jjua ba pe farratsi jawa, pe bokoto jawa ata jjua ba itsi peboko, pajjamü pane paibi nejja pejjane panain jawa piabejen jawa ata.''