¹ Diosonü jumaitsi Josué jawabelia: "Kujuna wijitsipame; jamatabü kuene faefaenaje tsipame. Itapere dajjita peka panepaenüanü penabé jawa. Hai tsimajjü tsiamüre. JJanü nekobeta kató kopatatsi Hai piaja reinü, Hai piaja jiwi, piaja tomaranü yajawa piaja iranü. ² Itsimü tsane Hai piaja reinü pakuenia itsimü Jericó piaja reinü yajawa, aekonojjaeta pa pitsianame pe jjainejebi jawanü pija baka bitsaütonü pajjamü nejja. Yamajjü itorobianame tomara pepünü werena." ³ Nejjata Josué nonata püna pe barütsia nejja wajabitsaü Hai tomarabetsia. Nejjata Josué itapeta treinta mil (30000) pa jiwitonübeje, pinijiyo jjanetonü pe apa ajjayonüanü, pitsa paya ejjanalia merawi. ⁴ Bajara ponü itoroba: "Pa yamajjü itorobianame ajara pamonae pija jiwi, bajara pamonae pe pünü wetsina. Tomara wekua tajü pütsa pa poname, baitsijane pa dajjitamü pa naetajjüto kaewetanubenaename. ⁵ JJanü yajawa dajjita pamonae ponaena tapüta, imojjoyotsianatsi tomara. Pakujinae nakatsimajjü pitsa pekaena, kujinayekaenatsi be waja rüküpekaewi nejja tsane pakuenia emata. ⁶ Naka bara kujinajinaerena tajü pija tomara wekua. Nejjata jumaitsi tsane: Pamonae raja rüküpeka pakuenia itsi emata'. Nejjata rüküpekaenatsi kujinajinaya. ⁷ Nejjata pajjamü pane namatayabi jawerena pa pitsa pekaename pa pitsianame tomara. Diosonü raja pa kato kanawiata ajara pa tomara pane kobeta. ⁸ Pakujinae pa jonename tomara jawalia, pa tajuitsianame. Pa itsimü tsane dajjita jjua Diosonü pa peka itorobi jawa. Pa taema, jjanü raja paka itorobatsi. ⁹ Josué itorobalia pe ponae nejjalia pe yamajjü itorobi nejja, na matayabanübena Betel yajawa Hai tutujuta, itsa yenepanabelia Hai. Pijinia Josué bajara pa merawi majita pija jiwi tutujuta. ¹⁰ Josué namatakota pepo bajayacunua tane pija wajabitsaünüanü pe najjania waetanübenae jawa, Josué penaweretsinüanü yajawa tsimajjü patajjubaya Hai tomara. ¹¹ Dajjita wajabitsaünüanü pe barü junaewetsia tomara imojjoyota. Pamonae imojjoyota tomara petajjunae itsi Hai yenepana wetsina. Ibo büjjüfoto yakaranatatsi Hai pija wiji ponae wekua. ¹² Itapeta cinco mil (5000) pa pebi beje pe yamajjü itorobanü benaewi nejja itsa tomara yenepana welia Betel yajawa Hai tutujuta. ¹³ Nubenaya ejjana dajjita piaja wajabitsaüto, dajjita piaja wajabitsaü, tomara itsa mujjunene werena, itsa wajabitsaü tomara yenepana wetsia. Ajara pa merawi Josué nakopata ibotusato jota. ¹⁴ Pakujinae Hai piaja reinü tane, bajara ponü piaja wajabitsaü yajawa pepo bajayakunua tsimajjü ponalia Israel piajiwi, Jordan mene ibotusato itapata. Apo yapütae baitsi jane pe yamajjü itorobi jawatsi pekowü werena petó tsimajjü joné nejjatsi piaja tomara. ¹⁵ Josué dajjita Israel piaja jiwi yajawa pe tsimajjü patsi jawatatsi rüküpeka petusatuabelia. ¹⁶ Nejjata dajjita tomara piajiwi nawawajai pe barajinae nejjalia, tomara wekua tajjü barajina Josué jawabelia. ¹⁷ Kae nü ata Hai yajawa Betel jota apo nakopabi pe bará ponaetalia Israel piajiwi. Baupasa piaja tomara puenetanuta pe baraponaetalia piajiwi Israel. ¹⁸ Diosonü Josué jawabelia Jumaitsi: "Kaita ropiremelia ne kobena nukaenaeta Hai jawabelia, Hai baitsi karajutsia natsi." Josué pe kobená nukae naeta bajara pa tomara kaita ropilia. ¹⁹ Wajabitsaü pe namataya banubenaewi, pe taeta Josue pe itaropitsi jawa, pitsapeka pe tsimajjü ponae nejjalia. Bajara pamonae kujinae jinalia, joneya tomara jawalia, epijiyo jawalia tajuitaba tomara. ²⁰ Hai piajiwi napüjüa naükobanu bena otjopa naükobalia pekowüyabelia. Ütsüjjü monae tomara jawelia pitsapa atjübüabetsia, akuenebi pe rüküpe kaejawa itsa jawabeliata. Baitsi Israelitawi pe rüküpe kaewi petusatuabelia, nawiabeka pe barü nabe nejjatsi. ²¹ Pakujinae Josué dajjita Israel piajiwi yajawa tane pe namatayabanü benaewi pe joné kuenelia, pe tsüjjümonae pe tsaena tsaena jaijawa, nawiabeka beyejeba Hai piajiwi jawabelia. ²² Itsa Israel piaja wajabitsaü nüanü, tomara jawalia pe jonewilia, tsimajjü pitsapeka. Nejjata Hai piaja jiwito nüanü, Israel piaja wajabitsaü tuatuajata nubenawanapa, itsa bitsaüto itsamüjjunene welia itsa monae itsa jawelia. Israel piajiwi bia Hai piaja jiwi jawabelia; kae jiwi ata apo nakopatsi. ²³ Hai piaja reinü piasaünü waeta batsi kaponare natsi Josué jawaberena. ²⁴ Pakujinae Israel piaja jiwi pe beyejebi kujinae dajjita Hai jota pe jinawanapaewi jawabelia, petusato ira mujjuneneta pe barajinawi jawabeliatsi, pakujinae baja dajjita beyebatsi piaja espadanü upita, dajjita Israel Hai jawabelia pona. Bajara pamonae bia piaja espadanü upianüta. ²⁵ Dajjita pe tüpaewi ajara pa matakabita, pe bijiwi pe tiriawi yajawa, pata doce mil (12000) pa jiwi beje, dajjita Hai piajiwi. ²⁶ Josué pe yotanukae kujinae piaja kurerebo, apo na kobe kanawiatsi, pe werewerekae jawabelia Hai tomara piajiwi. ²⁷ Israel dajjita nübeje bakanü nota tomara piaja jawanü yajawa, pakuenia Diosonü itorobatsi Josué jawabelia. ²⁸ Josué tajuitaba Hai tomara, werewereka dajjita matakabi jawabelia. kae jiwi ata mataüjüa apo ponaponae ajara jota ajena pamatakabi jawabelia ata. ²⁹ Wüsi kütarütsika Hai piaja reinü nae jawa jota naniwiyo jawabelia. Pakujinae juemeto kopia bokaejitsia, Josué itobora nae jawa wekua pe isinae jawa reinü petüparu kaenü, buata otjopa tomara baupa itapata. Ajara jota, tsimata jebatsi ibo monae petsuto kuenia. Ajarapa ibo tsuto eka ajena pa matakabi jawabelia: ³⁰ Nejjata Josué Diosonü to itsi altar, Israel piaja Dioso, Ebal unu jota, ³¹ pakuenia Moisés Diosonü piaja pianinü itoroba Israel piaja tomara jawabelia, pakuenia yakinarüta Moisés piaja bajjutota: "Altar dajjita ibotónüta, tsajota kae jiwi ata jieru jawata apo müjünene itsi." jotaje tojeba pe rajutsi jawa nejja pe tajue jawa Diosonü jawabelia, to bia pe rajutsi jawa pe jjania kuene jawalia nejja. ³² Ajara jota, Israel piajiwi itabü nejewa, bajara ponü yakinaje ibo jawata, jjua Moisés itorobatsi. ³³ Dajjita Israel, pe naweretsiwi, pe itorobiwi, pe matakajinawanapaewi arka mujjunene weliabeje nubena Dioso piajiwi Lewitawi yajawa mujjuneneta pe kaponaewi arka tsajota Diosonü pe jumé liwaisi jjaniawaeta buata, itsa jawerena peponaewi pakuenia ajara jota pe jinawanapaewi, itsa monae nubena Gerizim Unu jota itsa yajawünüwi Ebal unu jota. Bajara pamonaeje pejjania jumenü jumatsi Israel piajiwi jawabelia, pakuenia Moisés Diosonü piaja pianinü itoroba ájena tajjujjuaba. ³⁴ Dajjita ajara jjua kujinae, Josue leba dajjita pe itorobi jawatsi, pe jjania jawanü yajawa pebisia kuene jawa itsa jeme kowünüta o jume, pakuenia yakinaruta pe itorobi bajjüto. ³⁵ Josué leba kae jume kanakujitsia, dajjita jjuanü Moises itoroba, dajjita Israel pia jiwi tsajota nakae tuatanubena, petiriawi, pewajji, itsa nakua pia jiwi yajawa pe jinawanapaewi ajara pamonae jawata.