¹ Baitsi jane jomo bitso ajamatabü kuene matatojjenetsi piayaiwi bajarra pa woyofo jawata piasaüwi pamonai waja TUJJANENÜ DIOSO itsi. Bajarra ponü nejjata jumaitsi petirriwa jawabelia: ''¿Pepo kuene tsaja DIOSO jumaitsi: 'Apo jjaimü tsane itsa kuene kuito ata ma pa pabi jawaje'?'' ² Nejjata petirriwa jumaitsi jomo jawabelia: ''Pajjaijitsipajü beje itajjutejema kui pa pabi pijijawa, ³ Baitsu jane pe kui ponai nuka pabi tutujuta, DIOSO jumaitsi: ' Apo be pajjaimü beje, apo be pa jayatsi atamü beje, tsipaji raja pa tüpainame beje.''' ⁴ Nejjata jomo jumaiatsi petirriwa jawabelia: ''Pepo kuene raja apo pa tüpaimü beje tsane. ⁵ Tsipaji DIOSO yapütane pakujinai itsa pa jjaneme beje bajarra pa nai kui, pana itajjuto patsianame beje be pa DIOSO jamatabü kuenemü beje tsane, pa yapütainame beje pejjania kuene bajarra pakuenia ata pabisia kuene.'' ⁶ Nejjata petirriwa tsita jjanepanatsi pejjai nejja bajarra panaikuito, bitso baja tsita itajjuto jjanepanatsi, bajarra ponai ata apo tsita pabisianaitsi peyapütai ejjanai nejjatsi, nejjata bajarra powa pe ukutsi kujinai jjane bajarra panai kuito. Bajarra jjua kujinai tsikobe tsata pamona, nejjata najua jjane beje. ⁷ Bajarra jjua kujinai naitajjuto pata beje nejjata nayapütane beje pe jumasa pe ponaponai jawabeje. Bajarra pa jiwi beje jorroka higo bajju bajarra jjuata nakarranata bajarra pa jiwi beje. ⁸ Nejjata jumetane beje pe najumebi waja TUJJANENÜ DIOSO pe nukaponai jawa bajayakanua pabi jawa, nejjata pebi barru namatayaba pijawa waja TUJJANENÜ DIOSO pitabü nejewa pabi bakabota. ⁹ PETUJJANENÜ DIOSO junata pebi yajawa jumaitsi: ''¿Detsa jitan nukame?'' ¹⁰ Nejjata pebi jume pita jumaitsi: ''Ka jumetanetsi ne nuka ponai jawa pabita nejjata ka kujunawatsi tsipaji jumasa ponaponajü. Bajarra jjuata namatayabajü.'' ¹¹ DIOSO jumaitsi: ''¿Depatsa katsipaiba jumasa ne ponaponai jawa? ¿Tsipaji tsaja jjaneme taka itawetsi nai kuito?'' ¹² Pebi jumaitsi: ''Powa ne rajutame tane yanabi nejja, bajarra powa ne rajuta bajarra panaikuito nejjata jjanü jjanijü.'' ¹³ PETUJJANENÜ DIOSO jumaitsi petirriwa jawabelia: ''¿Detsa jjua itsimü?'' nejjata petirriwa jumaitsi: ''jomo raja neyamajju itojorroba bajarra jjuata jjanijü.'' ¹⁴ PETUJJANENÜ DIOSO jumaitsi jomo jawabelia: ''Detsa jjuajitsia itsimaü bajarra jjua, pabisia kueneta pona ponainame nija epato dajjita wirria dajubi pitabü nejewa woyofo pijiwi. Nekoto büta pona ponainame bajarra jjua kujinai pepajumü tsane bajarra pitsi paju jjainame dajjita matakabi jawabelia. ¹⁵ Paka na itoyamü beje tsane pajjamü beje petirriwa beje, ne ubi jawa bajarra powa pe ubi jawa. Bajarra powa ka mata tsapababena jjamü pijini tajju salibü bijia paitsianame.'' ¹⁶ Petirriwa jawabelia pijinia jumaitsi: ''Ayai kuenia nawijjai tainame pakujinai nakojjitsianme; yanawijjai tainame bajarra jjua kujinai ejjanainame nejji. Ne jitsipai jawa amona nejja tsane, bajarra ponü jume kowünütsianame jjua ka itorroba jjamü.'' ¹⁷ Pijinia Adán jawabelia jumaitsi: ''Tsipaji jjamü jume kowünütame nijawa pe jume, apo ne jume kowünütsimü jjaneme jjua ka itawetatsi: 'nejjai yaniwa bajarra jjua yabarra,' jjamü baja nejjata irra pabisia kuene tsane; ayai saü kueneta nakuenebianame ne jjainejja dajjita matakabi jawabelia. ¹⁸ Bajarra pa irrata naitajübiana pe e pejjainainü pe tseke nai jawanü jjamü nejja, jjainame woyofo piji naikui. ¹⁹ Nitabarra jaaneta jjainame pejjai jawa, ata ne nawiatsi matakabi irrabelia, tsipaji bajarra pa irra werrena kapitatsi. tsipaji baja kajena pepajümü, bajarra jjuata pe pajü jawabelia nawiatsianame.'' ²⁰ Nejjata pebi wünü junata piajawa Eva tsipaji bajarra powa pikani pena dajjita jiwi piasaüwi. ²¹ PETUJJANENÜ DIOSO nejjata to nakueneba Adán nejja piajawa ata penajjatatsi nejja beje dajubi bokonüta nejja bajarra pakunia jumasa apo ponaponai beje. ²² PETUJJANENÜ DIOSO jumaitsi: ''Nejjata baja pebi naka jüpa wajjaitsi kuenia, yapütane baja jjua jjanenpana yapütane baja jjua abeje ata. Bajarra jjuata, nejjata baja apo to yapüjjanepanai tsanetsi pe ukutsi nejja pe kobeta, piasaü pe kuito, pejjainejja, pe ponaponai yaniwa dajjita matakabi jawabelia.'' ²³ Nejjata baja, wajanTUJJANENÜ kapitsapa Edén pabi wekua woyofuabelia, jumatejema pe ubinejja pa irra pita bajarra ponü. ²⁴ Bajarra jjuata DIOSO kapitsapa pebi Edén pabi wekua, juya pekowüta nuba querubinewi itsa wetsina ba pitsapa matakabu piji juameto Edén pabita pekotia espada pejjainai jawa najiarratanüka dajjita yenepana jawa, pe ya ewetsinejja pekui ponai dajjita matakabi jawabelia piasaü yaniwa.