¹ Nejjata, irajawata pejjaejawa ajibi, kopieya najjaebi pe ajibi kuijinae Abraham pamatakabi itsa asou tsaponaponae. Isaac kuijita Abimelec, pematakanukaenu filisteowi Gerar jawata. ² Akonojjae, PETUJJANENU tsita naitajutatsi ponu jawalia yajawa jumeitsi: "Putsa Egipto nakua poname; pa ira katsitajutsienatsi neponaponaenejja bajara jota nukaename. ³ Bajara pa irajawata ponaponaename yajawa JJANU kayajawa nukaenatsi yajawa ka bendiciebienatsi; tsipaji jjamu yajawa nemomojji paka rajutsienatsi dajjita pa ira mujjupa, yajawa pajume jjanu to kakueikuieijanu pejjania kuene rajutsienajü Abraham, ajja. ⁴ JJanu ayeikueneta nemomojji ka jjeinaeya ejjanaenatsi be tuluputo itabojjotatsia rubena itsitsane, yajawa rajutsienajü nemomojji dajjita pa ira mujjupa. Tsipaji nemomojjita dajjita pa ira pijiwi na bendiciebiena. ⁵ JJanu itsinutsane jjua tsipají Abraham nejume kowunta Taja jume yajawa jjanewaita Patakujuruobijawa, Pakuenia pakamata kaponsi, Pakuenia panejinonopaenejja jjanewaitsia yajawa Pakuenia wajjeitsi waja najumetaenejja." ⁶ Bajara pakuenia Isaac Gerar jawata ponapona apo natijjitsi itsajawabelia. ⁷ Itsa yanijobatsi pebijiwi bajara panakua pijiwi piejawa nejja, ponu jumeitsi: "Powa tajuyapijiwa." Ponu kujunawa jjuoreka pejumeitsi nejja: "Powa tajawa," tsipaji ponu najamatabu jjeinajjuoreka: "Papebijiwi panakua pijiwi nebeyajjuobijitsipa pepitsinejja Rebeca, tsipaji powa bitso pejjaniewa." ⁸ Bajara jjua kuijinae ayei epato Isaac peponaponaejjae bajara jota, Abimelec, Filisteowi pemata kanukaenu, ventana jawalia bepe taetabi jitsipae. Ponu taetaba, pataema, Isaac jayebanuka Rebeca, piejawa jjae. ⁹ Abimelec jjunatsi ejjana Isaac yajawa jumeitsi: "Taema, jjanewaitsia kueneta powa niejawa. ¿Dejjuajitsia jumeitsimu, 'Powa tajuyapijiwa'?" Isaac jumeitsi ponuta: "Tsipaji meta itsajiwiyo nebeyajjuobiena pepitsi nejjatsi jamatabu janu." ¹⁰ Abimelec jumeitsi: "¿Dejjua jjania pane nanekontsi enejjame pajjanu? Itsajiwiyo patomarata pejinonopaewi jjanewaitsia kueneta baru majitsipatsi nijawa yajawa pajjanu pane nanekonitsi ejjanaejitsipame." ¹¹ Bajara jjuajitsia, Abimelec dajjita tomara pijiwi mujjujioba yajawa jumeitsi: "Itsajiwiyo ata itsa ponu itsakuijiruba tsipaji meta piejawa ata tsipae, jjanewaitsia kueneta nabeyajjuobi ejjanaena." ¹² Isaac bajara pa iratajawata uba yajawa pe ubijawa jeita ayeikueneta cien kuene kuijiru bajara paweyta, tsipaji PETUJJANENU bendiciebatsi. ¹³ Bajara papebi narikuoyaba yajawa to ayeijawa tsaponaetsi yajawa ayeikueneta baja tsaponae apo to koujupaetsi nejjata peponu jjaneto. ¹⁴ Ponu bitso pejjenaenu ovejawi yajawa baka bitsouto yajawa pieja monae bitsouto. Bajara jjuota filisteowi itoyatsi ponu. ¹⁵ Akonojjae nejjata, dajjita mutjuranu pajja pijinu pe kuepentsi ejjanaejawa Abraham pe asou epatota, pajja, filisteowi wu akabapenta atsata wunuta dajjita. ¹⁶ Abimelec jumeitsi Isaac: "Taju pane wekua ponare, tsipaji jjamu peponumu ne asoubejenu pajjanu ajibi." ¹⁷ Nejjata Isaac pitsapa bajara panakua wekua yajawa baru pata Gerar tusato jawata penaitabara taenukae tsutobeje bajara pa panabo boka, yajawa baru pata bajara jota. ¹⁸ Ikatsia apo kaeto ata, Isaac kuepenta mera mutjura, tsipaji pamonae bajayatami pajja Abraham pe asou matakabi kueya ejjana. Beitsi jane filisteowi wu akatapenta penajjuobi kuijinae Abraham. Isaac wunu ruba mutju pakuenia pajja pijinu wuru ruta. ¹⁹ Itsa pieja pienejiwijji Isaac mutju kueyapenta bajara pa tusatota, pamonae manatájjuna bajara jota mera mutjupijira ira bujjupana pe najetarukaera. ²⁰ Pe jinonopaewi Gerar jawata pastorwi nayaba bijataenubena Isaac pieja pastorwi yajawa, nejjata jumeitsi: "Pataja mera." Bajara jjuota Isaac wunu ruta mutjura Esek, tsipaji pamonae baru nabiejatane. ²¹ Nejjata, pamonae itsa mutju kueyapenta, yajawa nabará anaepananubena bajara pa mutju yabára, bajara jjuajitsia pewunu Sitna. ²² Ponu wekua pitsapa bajara jota yajawa kueyapenta itsa mutju, itsieta jane pamonae apo baru anaepanae bajara jjuanejja. Bajara jjuajitsia ponu wunu ruta Rehobot, yajawa jumeitsi: "Akonojjae PETUJJANENU nakato túsato rutsika wajjeitsinejja, yajawa ayei kuijiru jjeinainatsi pairata." ²³ Bajara jjua kuijinae, Isaac junaponaya bajara jota kuijinae Beerseba jawabetsia. ²⁴ PETUJJANENU tsita pitsapatsi ponu bajara pamerewita yajawa jumeitsi: "JJanu pieja Diosonunu Abraham, nieja ajja. Junawijitsipame, tsipaji JJanu kayajawatsi yajawa kabendiciebienatsi jjamu nemomojji, Abraham jamatabu kuijiru jawa." ²⁵ Isaac to nakuenebeta paburu nejjata PETUJJANENU junatabieba bajara pa tajjunaeta. Bajara jota, pieja boo burto nuta yajawa pieja pienenujji mutju mera kueyapenta. ²⁶ Nejjata, Abimelec púnakotokaewa Gerar jawa wélia pitsapa, Ahuzatbeje, penajua ponaponaejiwibeje, yajawa Ficol, pemata kaponaenu ejercitowi. ²⁷ Isaac jumeitsi pamonaeta: "¿Dejjuatsia jjanuta panajetarubena poname, pajjamu pane itoyamu yajawa täju pane itorobame pajjamu wekua?" ²⁸ Nejjata pajiwibeje jumeitsi: "Pajjanubeje patanejübeje jjanewaitsia kueneta PETUJJANENU pekabaru ponaponaejawa. Bajara jjuota pajumeitsinubeje kae jume kuenia najamatabu jjeinainatsi wajjeitsi waja jinonopaewi, itsa jüjamu, pajjanu yajawa jjamu. Nejjata, kae jume waja jjeinaenejja jjamu jawalia, ²⁹ jjamu apo pane itsakuijiru ejjanaemu tsane, jjanewaitsia kueneta paka baru jinopatsi bajara jjuota taju paka itorobatsi yajawa jjanewaitsia kueneta. Payaputanejü, jjamu PETUJJANENU peka bendiciebinu." ³⁰ Nejjata Isaac pejjaejawa to setsi ejjana bajara pamonae nejja pe abatsinejja, yajawa pamonae jjane yajawa apa. ³¹ Bajaya kunua nounkoba yajawa kae jume kuenia pena yeyataenejja najumeitsi tsanubenae penaitoyakuene pe ajibi nejja. Nejjata, Isaac napújioba, yajawa jjanewaitsia kueneta nawieba. ³² Bajara pamatakabi Isaac pieja pienewi patarubenapona yajawa jumeitsitsi mutju mera liweisijawa pekuejawa pamonae. Pamonae jumeitsi: "Panamatajjunajü mera." ³³ Wunu ruta bajara pamera mutju pijara Seba, bjara patomara pewunu Beerseba pamatakabi jebi. ³⁴ Esaú itsa jjeina cuarenta paweybeje pita piejawanejja, Judit, Beeri pejjunatoyo hititanu, yajawa pita Basemat, Elón pejjunatoyo hititanu. ³⁵ Powabeje to kanajetarukatsi pe jamatabukuenebeje jawa Isaac yajawa Rebeca.