¹ Abraham itsawa pita piejawa nejja; Cetura wunuwa. ² Powa ejjana Zimram, Jocsán, Medán, Madián, Isbac yajawa Súa. ³ Jocsán pejjibeje Seba yajawa Dedán. Dedán pejji tsanajetarubenae asiriowi tomara pijiwi, letuseo yajawa leumeo. ⁴ Madián pejji pijinia Efa, Efer, Hanoc, Abida yajawa Elda. Dajjita pamonae Cetura pieja wiria tsanejetarubenae. ⁵ Abraham rajuta dajjita pekobe kowu Isaac. ⁶ Itsieta jane, itsa asou tsaponaponae, rajuta itsa kuenejawajji pejji nejja juya wata yajawa itoroba itsa ira jawabelia ikotia pe pitsapaenania, Isaac taju wekua, pejjunato. ⁷ Paweyobeje peponaponae kuene itsa asou Abraham: 175 paweybeje. ⁸ Abraham jjanewaitsia kueneta asou tsaponaponae yajawa najjuoba itsa bitso perujunüyo pejjania kueneta, yajawa punajjuobatsi pieja tomara jawabelia. ⁹ Isaac yajawa Ismael, pejjibeje, mutjutatsi Macpela mutju jawata, Efrón tusato nakua jawata, Zoar pejjunato hititanu, peponaponaenu imojjoyo Mamre jawata. ¹⁰ Pa tusato nakua Abraham komuota Het pejjita. Abraham bajara jota mutjutatsi Sara piejawa pemujjuneneta. ¹¹ Bajara jjua kuijinae Abraham pe najjuobi kuijinae, Dioso bendicieba Isaac pejjunato, nejjata Isaac ponapona imojjoyo Beer Lajai Roi mujjuneneta. ¹² Akonojjae, Ismael pieja wiria tsanajetarubenae, Abraham pejjunato, Agar pejjunato egipciawa, Sara pieja pienewa, to ejjana Abraham. ¹³ Dajjita pamonae pejji Ismael pewunu, penaejjanae kueneta wunu rubatsi: Nebaiot, kopieya penaitajútsinu ismael totsi, Cedar, Adbeel, Mibsam, ¹⁴ Misma, Duma, Masa, ¹⁵ Hadar, Tema, Jetur, Nafis y Cedema. ¹⁶ Pamonae Ismael pejji tsanajetarubenae, yajawa pewunu, pakuenia pieja tomara tsi taepona yajawa pieja booburtojji; doce ponubeje peyeyataewitsi pieja wiria tsitaepona. ¹⁷ Paweibeje asou tsaponaponae Ismael: 137 paweybeje. Kae jumaliyo najumali pitaba yajawa najjuoba, yajawa pieja tomara jawabelia punajjuobatsi. ¹⁸ Pamonae jinonopa Havila nakuota Shur yenepana jawareka, Egipto nakua imojjoyo jawareka, Asiria namutuoreka be peponae namutureka. Pamonae jinonopa be pekueyawi pejjeinaewi nakae monae ata. ¹⁹ Mapa liwesi Isaac pieja liweisi jume, Abraham pejjunato. Abraham Isaac pajja. ²⁰ Isaac jjeina cuarenta paweybeje itsa pita Rebeca, Betuel pejjunatoyo, arameonu Padán Aram pe ponaponaenu, yajawa pejuyapijiwa Labán arameonu. ²¹ Isaac wajuka PETUJJANENUTA piejawa pejamatu itsijjae, tsipaji powa pejji apo jjeinae yajawa PETUJJANENU jumetane pe wajukaejawa yajawa Rebeca, piejawa, yakotajina. ²² Najua jiwibeje nabeibiebabeje powa pe unuta, yajawa powa jumeitsi: "¿Dejjuajitsi pakuenia itsinu jjanu?" Powa nejjata yanijoba PETUJJANENUTA paliwisi jawa. ²³ PETUJJANENU jumeitsi powa: "Najua nakua yakotajiname, yajawa najua tomara tsatsi ejjanainatsibeje ne unuwerena. Kae tomara asoubeje tsane itsa tomara wekua, yajawa matapijinu kuijiru ewetsiena peto nakuenebinejja pejuyapijinu." ²⁴ Peto patsi matakabitsi pe ejjanaenejja, pataema, penajupae nakuetobeje tsikoto ekalietsibeje. ²⁵ Kopieyanu itsa ejjanareka dajjita petsobienu penabinutsi dajjitanu. Wunu rutatsi Esaú. ²⁶ Bajara jjua kuijinae, pejuyapijinu pitsapareka. Pekobe waitaba Esaú petajju solibú. Jacob wunu rutatsi. Isaac jjeina sesenta paweybeje itsa piejawa pejji to jjeinatsi. ²⁷ Pejjibeje to witsabatsi, yajawa Esaú petsokonai pebi nakujuruoba pekujuaniata, petusatota peponaponaenu; Jacob pijinia pemoyanu, pieja boo burtota peponaponaenu. ²⁸ Akonojjae, Isaac asiwa Esaú tsipaji ponu petsekonaejawa jjayabieba, itsania pijinia Rebeca asiwa Jacob. ²⁹ Jacob seta pejjaejawa guisojawa. Esaú patanukapona petusatonakua werena yajawa kuerenapata piejanijawa. ³⁰ Esaú jumeitsi Jacobta: "Neabare nieja tsobia tsapatorata. Nebijiobi taema, ¡bitso kuerenajü!" Bajara jjuata wunu rutatsi Edon. ³¹ Jacob jumeitsi: "Kopieya, nekanajere matapijinukuenejawa." ³² Esaú jumeitsi: "Netaema, imojjoyo baja tatupaenejja. ¿Neto jjanepana matapijinu kuenejawa nejjanu?" ³³ Jacob jumeitsi: "Kopieya neto jurabajjuore," nejjata Esaú tojuraba, yajawa bajara pakuenia ponu kanajetajjuoba matapijinu kuijirujawa Jacob. ³⁴ Jacob rajuta Esaú panbu yajawa lenteja tsapatora.