¹ Itsa Isaac perujunu baja yajawa itsa ita tsukunu apo tae jjanepanae, ponu junata Esaú, pejjunato manapijinu, yajawa jumeitsi: "Tajjunato." Ponu jumeitsi: "Jota nukajü." ² Ponu jumeitsi: "Taema jota, perujununu baja. Apo yaputaenu ta tüpae matakabi. ³ Bajara jjuota, pire netsokonae nae, nieja kuererebo doro yajawa nieja bitsabinae, ponare unu jawabelia neto tsekonare pewi rukaenu jjanu nejja. ⁴ Neto sere pejjanepanae pejjaejawa jjanu nejja, bitso tajitsipae jawa, yajawa neto karenamure tajjae nejja yajawa taka bendiciebinejja ta asou epato ta tupae wujunae". ⁵ Akonojjae Rebeca jumetane Isaac pejumeitsijawa pejjunato Esaú nejja. Esaú naropotaba petsekonae nejja pewi rukaenu yajawa pekanawietsinejjarena. ⁶ Rebeca jumeitsi pejjunato nejja Jacob yajawa jumeitsi: "Taema jota, jjanu jumetanejü ajja pejumeitsijawa Esauta nemata pijinu. Ponu jumeitsi: ⁷ 'Neto kanajetarukare pewi rukaenu yajawa neto setajjuore pejjania kueneta, jjanu tajjaenejja yajawa kabendiciebijitsietsi PETUJJANENU peitabu nejewa tatüpae wujunae.' ⁸ Akonojjae, nejjata, tajjuntato, nejume jjania taema jjanu ka itorobatsi. ⁹ Liemure pabitsouto jawabelia nejjata neto karenamutsane pejenanubeje cabrayobeje; yajawa jjanu setsieta pejitsipaejawa pajara pajiwibeje pe setabiebijawa ajja nejja, pakuenia jjayabieba bitso pejitsipaejawa. ¹⁰ JJamu to kaliemutsane ajja, bajara ponu pe jjaenejja, peka bendiciebinejja ponu petupae wujujunae." ¹¹ Jacob jumeitsi pena nejja Rebeca: "Taema, Esaú tamatapijinu bitso dajjitanu perabu nabitsunu jjanu pijinia aperabu najibinu. ¹² Tajja meta nejayebijitsipa, yajawa jjanu meta tsita yamajju itojorobijitsipajü. JJanu nejja kanajetarukaejitsipajü pe ayeikuene juya pejjania kuene neto ajibi tsipae." ¹³ Pena nejjata jumeitsi: "Tajjunato, jemabaja jjanu netsí jopae pebisia kuene. Saya nejume covunre, liemure, neto karenamure jjanu jawarena." ¹⁴ Nejjata Jacob lietsatabi yajawa karena cabranubeje pejenanubeje pena jawarena, nejjata pena setapenta pejjaejawa pejjania kueneta, pakuenia pajja jitsipabieba. ¹⁵ Rebeca pita Esaú pejuma ese pejjaniajawa, pejjunato matapijinu, pena piejaboota pe bobenaejawa, yajawa Jacob juma jjataba, pejjunato juyapijinu. ¹⁶ Cabra bokotota kobe jjataba yajawa peajibijawa jjataba pewusitota. ¹⁷ Powa to jeba pejjania kuene peto setsijjae yajawa pan peto sebijawa pekobeta pejjunato Jacob. ¹⁸ Jacob lietsatabi pajja jawabelia yajawa jumeitsi: "Taja Ajja." Ponu jumeitsi: "Jota ekajü; ¿Jipatsamu, tajjunato?" ¹⁹ Jacob jumeitsi pajjata: "JJanu Esaunu matapijinu; pakuenia ne itoribame itsinu. Akonojjae ekare yajawa jjaema pewi, tane bendiciebimunejja." ²⁰ Isaac jumeitsi pejjunato yabara: "¿Depakuenia jjania najjatsiyo namatajjunatabame, tajjunato?" Ponu jumeitsi: "Tsipaji PETUJJANENU nieja Dioso neto kanajetaruka." ²¹ Isaac jumeitsi Jacob: "Nekuijire taka jayebinejja, tajjunato, yajawa tayapütaenejja tajjunojawamu tsipaji ajibi meta tsipae tajjunato jawamu Esaú." ²² Jacob kuijita pajja Isaac nejjata Isaac jayeba yajawa jumeitsi: "Nejume Jacob pejume, itsieta pekobe Esaú pekobe." ²³ Isaac apo yaputae itsa kobe jayeba tsipaji kobenabatsi pakuenia pematapijinu Esaú itsi, bajara jjuota Isaac bendicieba. ²⁴ Ponu jumeitsi: "¿JJaniejamu tajjunato jawamu Esaú?" Yajawa ponu jumeitsi: "JJanu rabaja." ²⁵ Isaac jumeitsi: "Neto karenamure yajawa tajjaepentsinejja newitojji, taka bendiciebinejja." Jacob to kalietsatabi pejjaejawa. Isaac jjane, yajawa Jacob rajuta vinora, yajawa ponu apaepenta. ²⁶ Nejjata pajja Isaac jumeitsi: "Neimojjoyore akonojjae yajawa neitaba tsutsunere, tajjunato." ²⁷ Jacob kuijitabalia yajawa itabara tsutsune, yajawa tujjune pieja ese yajawa bendicieba. Ponu jumeitsi: "Taema, tajjunato petusato nakua tujju itsi tsipaji PETUJJANENU pakuenia rajuta. ²⁸ Karajutsi Dioso dono ema topjora itabojjo wetsika, karajutsi ira mujjupa jjaneto, yajawa jetsa kuei jjaneto yajawa pejena vinora. ²⁹ Dajjita tomara pekato nakuenebinutsane yajawa dajjita nakua pijiwi pemata bakabuta kato nawu jebiereka. Petujjanenumu tsane nejuyapijiwi jawata, yajawa ena pejji pematabakabuta kato nubenaina. Pamonae peka wunu abeje ejjanaewi pebisia kuene tsi jopaenatsi; peka bendiciebiwi pejjania kuene tsi jopaenatsi." ³⁰ Isaac baja pepua bendiciebitabi Jacob nejja, yajawa Jacob ajena pitsapa najetaruka pajja Isaac peita bará werena, Esaú pemata pijinu patanajetaruka petsokonaenu. ³¹ Ponu ata setaponapona pejjaejawa pejjaniakueneta yajawa to karena pajjanejja. Ponu jumeitsi pajjata: "Ajja, nountapunare yajawa jjaima pewi takato kanajetarukaejawa, tane bendiciebimunejja." ³² Isaac pajja jumeitsi: "¿Deponumu?" Ponu jumeitsi: "Nejjunatonunu, matapijinu Esaú." ³³ Isaac nekotatsi bitso yajawa jumeitsi: "¿Depitsa upajjuoba pawi yajawa neto kanajetaruka? JJanu jjaipentajü dajjita jjamu nepatsi wujunaeyota, yajawa bendiciebapentajü. JJaniejanu beitsi baja, bendiciebienatsi." ³⁴ Itsa Esaú jumetane pajja pejume liweisi, nueyapenta ayeikueneta yajawa najamatabu jjeinaya, yajawa jumeitsi pajja jawabelia: "Nenabendiciebare jjanu nua, ajja." ³⁵ Isaac jumeitsi: "Nejuyapijinu najametsuntsiaya najetaruka yajawa kawekua pita taka bendiciebinejja jawa." ³⁶ Esaú jumeitsi: "¿Jacob jjanewaitsia kueneta apo pitsi? Tsipaji anijato beje neya mujjuitojoroba. Newekua pita matapijinu kuijiru jawa, yajawa taema, akonojjae newekua pita tane bendiciebikuijiru jawamu nejja." Nejjata ponu jumeitsi: "¿Apo neto buotsimu itsa bendicionkuene jawayo jjanu nejja?" ³⁷ Isaac nejjata jumeitsi Esaú jawabelia: "Taema, nieja tujjanenu nejja to wajutajü, yajawa rajutajü dajjita nejuyapijiwi pieja pienewinejja yajawa rajutajü dajjita jetsa kuey yajawa pejena vinoranu. ¿Dejjua kato wajukaejitsipatsi jjamu nejja, tajjunato?" ³⁸ Esaú jumeitsi pajjata: "¿Itsa kuene jawayo apo neto wajutsimutsipae jjanu nejja, ajja? Nebendiciebare jjanu nua, ajja." Esaú ayei jumeta nueyapenta. ³⁹ Isaac pajja jume kanawieta yajawa jumeitsi: "Nejume taema, panakua ponaponame táju kawekua bokaena pejjania ira, atjubu wetsika donóra apo kato runae tsane. ⁴⁰ Nieja wakapata neponaponaenumu tsane, yajawa nejuyapijinu neto nakuenabinumu tsane. Bitso itsa apo yeyataimutsane, ne anaepanae kuene kanekotsiena newusito wekua." ⁴¹ Esaú itoya Jacob pewekua pitsijjae pe bendiciebijawatsi pajja petojumeitsijawa. Esaú natsita jumeitsi pejamatabu kueneta: "Tajja penajjuobi matakabi nejja to kaejawatsi; bajara jjua kuijinae tajuyapijinu Jacob beyajjuobienajü." ⁴² Esaú pejume liweisi pejjunato matapijinu Rebeca jawabelia tsipaebatsi. Nejjata junatsi ejjana pejjunato Jacob juyapijinu yajawa jumeitsi: "Jume taima, nematapijinu Esaú pieja kueneta nabaru kueikuiejei peka beyajjuobinejja najamatabu jjeina. ⁴³ Akonojjae, nejjata, tajjunato, nejume yeyataima yajawa naitabijirabare Labánta, tamata pijinu, Harán jawata. ⁴⁴ Bajara ponuta naponaponaename netae matakabibeje, nematapijinu bejamatu kuene kaewi pe anaepanaejawa, ⁴⁵ be jamatabu kuene kaewi nepatapijinu be moyatsaponaponae jjamu jawalia, yajawa be nakopjuntsi newekua pitsijawa. Nejjata jjanu ka pitsi ejjanaelietsi. ¿Dejjuajitsia kae matakabita paneto najjubijitsipame pajjamubeje?" ⁴⁶ Rebeca jumeitsi Isaacta: "Belia baja kuerenajü taponaponaejawa tsipaji Het pejjunatoyobeje nekuerenae ejjana. Itsa Jacob pita Het pejjunatoyo piejawa nejja, be pitsiwabeje, itsa jiwiyo ata pa ira pijiwi pejjunatoyo, ¿dejjuojitsia taja asou tsipae?"