¹ Pakujinai Abram jjaina noventa y nueve pa wai beje, PETUJJANENÜ tsita naitajütsi Abram jumaitsitsi: '' JJANÜ ma DIOSONÜJE dajjita kuenesaü ta jjainainü.JJaniawaitsia najetarrukainame tawajünaya jjanü, najjaniawaitsianame jjai waitsia. ² Nejjata JJANÜ kayapütai ejjanainatsi tana jume kopatsi jawa jjanü ta jjamü jawabelia, ka ayai bitsaü ejjanainatsi piniji kuenia.'' ³ Abram pe mata bakabüta eka irra taitsia bajarra jota DIOSO barru kuikui jaitsi bajarra ponü, jumaitsitsi:'' ⁴ JJanü ta kuene yabarra, taima, jjua ka jumaitsitsi jjamüta. JJamü pajjamü tsane piniji bitsaüto nakuanü jjanetinü. ⁵ Apo ne wünü baja tsane Abram, newünü baja juya tsane abraham, kawünü rutatsi bajarra pakuenia tsiopaji baja pajjamü ayai nakua jjanetonü. ⁶ Piniji bitsaüto jjainainame nijamonai, jjamü yabarra ayai nakuanü tsane, jjamü nija wirrata pitsapaina reinüanü. ⁷ JJANÜ kato kopatatsi ta najume kopatsi jawa bajarra pakuenia ata dajjita nija monai nejja jjamü kujinai ata, apiaya dajjita ija wirria dajjita matakabi jawabelia nejja, jamü nija DIOSO nejja yajawa dajjita nija wirria ata. JJamü ⁸ karrajutsianatsi, jjamü kujinai nija wirria ata, pa irrata jjamü ponaponame, dajjita Canaán irra, dajjita matakabi jawabelia nejja, nejja bajarra pakuenia JJANÜ nija DIOSONÜ tsane.'' ⁹ Nejjata DIOSO jumaitsi Abraham jawabelia: '' jjamü yabarra pijinia, neto jjania waitsianame taka najume itorrbi jawa, jjamü bajarra pakuenia ata dajjita nija wirria jjamü kujinai apiaya nijamonai. ¹⁰ Bajarra jjua raja jjanü kaitorrobatsi jjamü bajarra pakuenia ata pamonai jjamü kujinai ata, jjua baja pa jjaniawaitsi jitsiamü: Kai pebi kanakujiatsia pajjamü jawata pa tsatsianame pena circunsidabi nejja. ¹¹ Pajjamü ata be pana circuncidabame panewi perrabuto jawa pijijawata, bajarra jjua paka nayapütai ejjanaina ü wajjaitsi kuene. ¹² Kai pebi kanakujitsia pajjamü jawata pejjainai jiwi ocho pa matakabi beje bena Circuncidaba, apiaya dajjita nija wirria tomarra. bajarra jjua ata baja kajena pamonae pe naitajübiwi nijabo jawata pamonai ata pe omuakaiwitsi palatata itajjutejema ata itsa jawa werrena peponai jiwi ata apo nija monai jiwiyo ata. ¹³ pajiwi kato naitajuta nijabo jawata pajiwiyo komuatame palatata bajarra pamonai ata baja circuncidabianame. Bajarra pakuenia nayapütaina takato najume kopatsi jawa panewitonü jawabelia ata dajjita matakabi jawabelia nejja. ¹⁴ Itsa itajjutejema pebi apo pena circuncidabinü pepperrabütota bajarra ponü nawekua natsatsiana piaja toamarra wekua. Tsipaji bajarra ponü apo ne jume kowünü jjua najume kopatajü.'' ¹⁵ DIOSO jumaitsi Abraham jawabelia: ''Baja pijinia Sarai jjamü nijawa, pütsa baja wünü junatame Sarai. Bajarra juya pewüta, pewünü tsane Sara. ¹⁶ Pejjania kueneta tainajü, bajarra pakuenia ka rajutsianatsi kainü nejjunato bajarra powa jawabelia. Pejjania kuenia tainajü, bajarra powa naitothianaina dajjita nakua pena. Pitsapaina Reinuanü tomarra ewetsinüanü bajarra powa jawa werrena.'' ¹⁷ Nejjata Abraham pematabaka büta nuka irrataitsia, jumaitsi, barruyaya, jumaitsi pejamatabü kueneta: ''¿Beto naitajütatsi meta pe jjainainü cien (100) pa wai beje? ¿Depakuenia Sara, pe jjainaiwa noventa (90) pa wai beje be ejjana pejewajji nakueto?'' ¹⁸ Abraham jumaitsi DIOSO jawabelia: ''¡Oh Ismael baja ponaponaina nitabü nejewa jjamü!'' ¹⁹ DIOSO jumaitsi: ''jume, Sara nijawa baja kajena itsiata ejjanaina nejjunato nakueto, wünü rutsianame Isaac. JJanü najume kopatsianajü bajarra ponü jawabelia be dajjita matakabi jawabeli bajarra ponü kujinai ata. ²⁰ Pijinia Ismael, kai jume tanetsi ata. Taima, ajena konojjai, JJANÜ tainajü pejjania kueneta, ayaibitsaüto ejjanainajü, pejjania kueneta piniji bitsaü tsane. Bajarra ponü doce (12) pa wirria beje pajja tsane, JJanü ta jamatabü kueneta pinijiyo tsane dajjita nakua jawa. ²¹ Isaacta pijinia jjua je to itsinü tsane je, ponü Sara ejjanaina jjamü nejja ajena konojjae pa wai najetarrukaina.'' ²² Nejjata baja najume kopata pe kuikui jai jawa bajarra ponü jawabelia, DIOSO baja kopata Abraham. ²³ Nejjata baja Abraham pita Ismael pejjunato, yajawa dajjita pamonai naitajuba pijabo jawata, dajjita bajarra pamonai komuata piaja palatata, dajjita pa pebi jiwi jinawonopa Abraham pijabota, nejjata baja circuncidaba pe perrabüto jawata bajarra pa matakabita baja kajena, pakuenia baja jumaitsi DIOSO jawabelia. ²⁴ Bajarra pakujinai Abraham jjaina noventa y nueve (99) pa wai beje pakujinai naperrabüwi kaukuta. ²⁵ Bajarra pakujinai pijinia Ismael jjaina trece (13) pakujinai naperrabüwi kaukuta. ²⁶ Bajarra pamatakabita Abraham Ismael beje pejjunato beje naperrabüwi kaukuta beje kai matakabita. ²⁷ Dajjita pebi jiwi pijabo pijiwi bajarra pakuenia nacircuncidaba bajarra pakujinai, bajarra pakueia ata pamonai naitajüba piajabo jawata bajarra pakuenia ata pamonai komuaka itsa jawa werrena pe patsinü piaja palatat.