¹ PETUJJANENU tsita ptsapatsi Abraham robles kanakuijitsita Mamre jawata, pe ekae epatota pieja tienda boupata pe ataju kotie matakabita. ² Atjubuyotsia tane, yajawa taetaba, bajara ponü tsane akueyabi (3) ponubeje nubena peitabarata ponü. Itsa ponü taetaba, ponu kuijinaeataba boupa kanakuijitsi jawata pieja tiendata pebarü namata jjunaenejja bajara pamonae yajawa najuma tsutaba ira jawareka. ³ Ponu jumeitsi: "PETUJJANENU, itsa pane ita tsonia taneme paneita bu nejawa, rowia paponaejitsi pame yajawa puenetsipame nieja pienenu. ⁴ Pakato karena tsanetsi mera jawayo, paka tajju kietsienatsi yajawa panakuero ewetabare panae bujjupanata. ⁵ Pakato karena tsanetsi pejjaejawayo, pane keina jjuobinejja reka. Bajara jjua kuijinae panija namutua pa nubena ponaename, tsipaji panieja pienenu pa kuijibame." Pamonae jumeitsi: "Pakuenia jumetsimu itsimure." ⁶ Nejjata Abraham nejjatsiyo jonetabalia pieja boo burto jawalia Sara kujita, yajawa jumeitsi: "Najjatsieyo, karenamure 40 pa litrobeje harina beno, kuetsakare yajawa pan itsimure". ⁷ Nejjata Abraham kuijinaetabalia peyawu jjatatsi jawalia, kae terneronu pejenamu yajawa pejjanepanaenu, rajuta pieja pienenu, ponu najjatsiyo jayebataba. ⁸ Ponu pita requesón yajawa lechera, yajawa ternerowa pe setapoponae jawa, eta pejjaejawa peitabarata bajara pamonae, yajawa ponu pemujjunene jawata bajara pamonae naejawa bujjupana jawata nukajjuoba pejjayenaejawata pamonae. ⁹ Bajara pamonae jumeitsi ponu jawalia: " ¿Dejota nuka Sara ne pitsiwa?" Ponu jumeitsi: "Jota, boo burtota." ¹⁰ Ponu jumeitsi "Jjanu jjaniejanu nawietsienajü jjamuta pe bajju otjopae matakabita, nejumetaema jjanewaitsia, Sara ne pitsiwa jjeinaena pejjunato." Sara jumetaaenuka boupa werena pieja boo burto welia, tsipaji pepunu welia nuka ponu. ¹¹ Akonojjae Abraham yajawa Sara perujujiwibeje, bitso weybeje jjeina, Sara to panepatsi wey pa matakabi petiriewi pejjeinae nejja pejji. ¹² Nejjata Sara nakapona jjuoba bajara powa nejja, natsita jumeitsi: "Tapua perujuwabaja yajawa taja tujjanenu bitso atiri, ¿Jjeinaenajü akonojjae tanakojjitsijawa? ¹³ PETUJJANENU jumeitsi Abraham: "¿Dejjuatsia Sara nakapona yajawa jumeitsi: "¿Jjanewaitsia kueneta jjeinaenaju tajjunato, itsa perujuwanubaja? ¹⁴ ¿Itsa kuijiru to akuenebitsi PETUJJANENU nejja? jjanü ta itaropitsi matakabi, pe bajju atjopae jawata jjau nawietsienajü jjamuta. Be pitsi matakabi werena pa wey, Sara jjeinaena pejjunato." ¹⁵ Nejjata Sara jumejei yajawa jumeitsi: "Jjanu apo juojuojanu," Tsipaji powa junawa jjuoba. ponu jumeitsi: "Ajibi, jjamu juojuojamu," ¹⁶ Nejjata bajara pamonae nubenajjuoba pe ponae nejja yajawa tane Sodoma jawalia. Abraham barü najetaruka pamonae pe punajjuobinejja. ¹⁷ Beitsi PETUJJANENU jumeitsi: "¿Wekua jjanu matayatajü Abraham ta itsinejja jjanu jjua kaejawa tsanaje tarukae, ¹⁸ tsipaji Abraham, kajena, a yei nakua tsane yajawa pekapanepae nakua tsane, yajawa dajjita ira nakua bendiebenatsi bajara pomu pejumata? ¹⁹ Tsipaji jjanu itapetajü bajara ponu, bajara ponu pe kujuruobinejja pejji yajawa pieja boo bajara ponu kuijinae, pe kanajetarubenae nejja PETUJJANENU pieja namuto, pejjania kuene pe itsinejja yajawa jjanewaitsia pe jinonopaenejja, bajara pakuenia PETUJJANENU pe kanajetarukaenejja Abraham matatsunuta pakuenia ponu jumeitsi ponu jawalia." ²⁰ Nejjata PETUJJANENU jumeitsi: "tsipaji nekonitatsi Sodoma yajawa Gomorra ayeikuene, yajawa tsipaji pe nanekonitsijawa abeje, ²¹ Jjanu akonojjae runaerekajü bajara bereka yajawa taenajü pe nekonitsijume bajara pamonae yabara jjanu jawaberena pona itsa jjaniejei bajara pamonae itsi: Itsi ajibi, Jjanu yaputaenajü." ²² Nejjata bajara pa pebi jiwibeje ponabeje bajara nakua wekua, Sodoma jawabelia ponabeje, itsieta Abraham nuka PETUJJANENU peitabarata. ²³ Nejjata Abraham kuijita nejjata jumeitsi: "¿Bename pejjania jamatabukenewi pe ajama bejewi yajawa? ²⁴ Itsa bajara jota 50 pe jamatabu jjanepanaewi jinonopa bajara pa tomarata. ¿Beyeje biename yajawa apo bejiobitaemu tsane bajara panakua pejjania kuene 50 pamonae pe jamatabu jjanepanaewi bajara jota pejinonopaewi? ²⁵ Tajübelia katsita pamonae bajara pakuene ne itsijawa, nebeyejebijawa pe jamatabu jjanepanaewi yajawa pe jamatabu bejewi, bajara pakuenia pe jamatabu jjanepanaewi najupaeyana taena be pe jamatabu bejewi . ¡Tajü kawekua panae! ¿Apo itsitsane dajjita ira itoroberokaenu pejjania kuene jawa?" ²⁶ PETUJJANENU jumeitsi: "Itsa namatajjunaenajü Sodoma jawata 50 pa jiwibeje pe jamatabu jjanepanaewi bajara pa tomara unu jawata, nejjata JJanu itajjuto tsonia tanejü dajjita pa nakua bajara pamonae yabara." ²⁷ Abraham jume pita yajawa jumeitsi: "¡Taema. kabara kueikueijeitsi taja tujjanenu, atsa paju atanu yajawa pepaju! ²⁸ ¿Itsa cinco pa jiwibeje saya nubena apo cincuenta pe jamatabu jjanepanaewi? ¿Bename dajjita tomara itsa cinco pa jiwibeje ajibi? Nejjata ponu jumeitsi: "Jjanu apo benutsane, itsa JJanu namatajjunaenajü bajara jota cuarenta y cinco pa jiwibeje." ²⁹ Ponu barü kueikueijei ponu jawalia ikatsia, yajawa jumeitsis: "¿Yajawa itsa bajara jota nubena cuarenta pa jiwibeje?" Ponu jumeitsi: "Apo itsinutsane bajara pamonaae yabara cuarenta pa jiwibeje." ³⁰ Ponu jumeitsi: "Ne jumetaema, pütsa anaepaname, PETUJJANENU, takueikuei jeinejja jjanu. treinta pa jiwibeje tsipaji nubenaejitsipa bajara jota." Ponu jumeitsi: "Jjanu apo itsinutsane, itsa namatajjunaenajü treinta pa jiwibeje bajara jota." ³¹ Ponu jumeitsi: ¡Taema, kabaru kueikueijeitsi taja tujjanenumu! veinte pa jiwibeje tsipaji nebenaejitsipa bajara jota. "Ponu jumeitsi:" Jjanu apo benutsane bajara pamonae yabara veinte pa jiwibeje." ³² Penajume liweitsi weretsi kuijinae ponu jumeitsi: "Nejume tsoni taema anaepanaejitsipame, PETUJJANENU, apo kabaru kueikueijeitsanetsi baja najume weretsienaju. Meta tsipae diez pa jiwibeje nubenaejitsipa bajara jota. Nejjata Ponu jumeitsi: "JJanu apo benutsane diez pa jiwibeje yabara." ³³ Ponu PETUJJANENU pieja namutua nukapona penajume weretsi kuijinae ponu Abrahambeje, yajawa nawieta pieja boo yabelia.