¹ Nejjata rey itoroba baja rá ponü pekáe tuatsi nejja dajjita ancianowi Judá Jerusalén pijiwi yájawa. ² Dé jjüa kruijinae tayójopaya rey Dioso piaja boyábetsia dajjita Judá pijiwi, pejinawa paewi Jerusalén jawata sacerdote profetawi, dajjita tomara pijiwi tsikiri nüjji welia kuijiinae ata pena beretsi nüanü, baja rá jüa kuijinae yoroba pena kae tuatsi jawata dajjita pejume bájjuto pejume kowünütsi nejja Dioso pena matajjüna Dioso piaja bota ³ Nonotaputa rey nuka columna pemujjü neneta jumaitsi Dioso jawabelia, kajume kowünü tsianatsi dajjita matakabi nejja, jai Dioso jawabelia, bá rajané maje paka punaya jinawana paenatsi paka jume kowünü tsianatsi paka nawajü kaenatsi jjamü jawabelia, paka wünüpaeba ponaénatsi diosonüjji jábabelia rabaja ápo pana wajükaenü tsane, pataja jamatabü ütüto wetsina, dajjita jumali wetsina kujijinae, ü pejume kowünütsi nejja pajume beje kuaikuijai Dioso jawabelia, nejjata dajjita jiwiyóbeje najamatabü jüpa pejjania jai kuene. ⁴ Rey nut a Hilcías reye monae pitorobinü nejja, baupa éwetsiwi pijinenia, pejukaenejja Dioso piaja templo werrena dajjita pá wajji yóbeje Baal nejja Asera beje, dajjita pá estrella beje atjübütatsi rubena, nejjata tó tajuita tajü Jerusalén wekua itsa unuábelia, Cedrón büjjü fotuanü jawabelia, baja rá werrena pepaju kapona Betel jawabelia. ⁵ Nejjata wekua pitsapa sacerdotewi piaja dioso nüjji pejjai naewi, baja rá pamonae reyewi Judá pita petajuitsi nejja tsakia pajitsia tujjü juvi jawa pejúma tsutó nü jawa pa tomaranü jjaina Judá pijinema matá toyó rotsia Jerusalén. ⁶ Júkae ejjana Asera dowali pejumape Dioso piajabó wekua Jerusalén táju wekua Cedrón büjjü toluana jawabelia, tajuita baja rá jota tajuita pebeno nákopata baja rá benota tsimata otoka diapa mutjuanü. ⁷ Irrajueeta pemajita biábi jawata pebijiwi piajawa jawata bé pamónae taejitsia Diosonü saikaya jota piajabó, jota jjataba biaba petirriabi jjata bijitsia Asera. ⁸ Junata dajjita sacerdote niyobeje Judá pijiwi bijiana petsútuanü itsa jota sacerdotewi tajuita biaba, Geba werrena kuijibenaejawa baupa jawá penamata jjainae baupata Josué piaja baupata pitórrobinü tomara penukaejawa petsaweno neniá tomara. ⁹ Itsiata baja rá sacerdotewi apo tó kopatsitsi petajuítsi nejja Dioso piaja altar Jerusalén jáwata, baja rá pamonae malicika perri jjaine ü nakae monae. ¹⁰ Josías Jafet jamabü bijiana, Ben Himon bujjü fotuanü jawatalia pena kojji rajutsia yenivav Moloc nejja. ¹¹ Baja rá ponü kapona caballos bitsaüto reye monae Judá pé rajutsijawa mata kabi piaja juameto. Baja rá pamonae nübena imojjoyo baupa wekua Dioso piajabó, imojjoyo jota majjita biaba Natan Melec wajabitsaunü. Josías tajuita mata kabi piaja jumeto piaja carruanü. ¹² Josías reinü tojjobabia jota tajuita biaba penübi jawa bó juma wetsica itsa jota majita biaba Acaz, Judá piaja reyewi petó ejjanae jawatsi, petajuita biabi jawabeje Manaés pitsa jawa ajinia jawabeje Dioso piaja bota. zjosías tojjjobabia penanü penerreka Cedrón bujjü fotua reka. ¹³ Reinü werrebiaba tajü tajjünaenü itsa netsina pitsapa biaba juameto pewajünae wetsina Jerusalén, waüya betsiá pá unuanü abeje ejjana, Salomón, Israel piaja rey petó nakuenebi jawa Astoret nejja apo pita jipae jumapianü sidonios pijiwi; Quemos nejja, apo pita jitsipaé jumapianü Moab; pijinenia Milkon nejja apo pita jitsipae jumapianü Amón piaja tomara pijiwi. ¹⁴ Pénetsi pejumape nüanü ponüta nawajuka biaba baja rá pamonae, púrrü baba pejumapíanü Asera baja rá pakowüta najumá kaetua tejéba júwisi. ¹⁵ Josías ata tójjo bába altar penúbe naejawa Betel jawátalia, penúbi jawanü pijinenia Jeroboam, pejünato Nabat (pemata kaponaenü penawajükáe nejja dowati jawábelia) pé máta kobi jawa, piaja altar tó tajuita dé jota nüwajüka biaba ata ü ipumana nakopata pejumapenü Asera tajuita buata pona. ¹⁶ Josías naita weneta, tane jiwi mütuanü unütalia jiwi itórrobalia mutjü wetsia juka jiwisi tajuita altar jumawerreka tó bijianá jitisia, pakunia Dioso piaja profetanü tsipaeba pewajü naya má jjüa tane. ¹⁷ Baja rá jjüa kuijináe jumaitsi: ¿Dé pitsi monumento má nejjata ma taniji? júme kanawiatatsi tomara pijiwi: Dioso rá piajiwitónü pemütü Judá werrena peponaenü, pekatsi paebinü pewajü naya Diosowa piaja jiwitonü abajjü tajuitsi nejewamü altar júma werreka Betel jawata. ¹⁸ Josías jumaitsi: "Jimá taema kaenü" ata ápo tijjibi tsane pejuma werreka pebobé náe si, profetanü pesi bobena Samaria werrena peponaenü. ¹⁹ Dajjita bonü petsuto jumá tomara pijiwi penube naewi Samariata, pé werreba bejáwa reyes monae Israelwi anaya ejjanaejitsia, tijjiba pijinenia Josías pakuenia itsi Betel jawáta. ²⁰ Beyejeba dajjita sacerdote niyóbeje petsúto jumá penube náewimi kaetuata tejewa pematsünü werreka pasi tajuitijitsia baja rá pamonae baja rá jjüa kuijinae naita wenta Jerusalén jawabelia. ^{23 21} Nejjata itorroba rey dajjita jiwi, jumaitsi: Fiesta jawata pa barruyá murre pane tó kapane paejjae a Dioso wajja Dioso, pakuenia najume yakina ruta Ley bájjüta pane júme kowütsinejja. ²² Ka ata ápo tó ejjanae fiesta pé nakanabi jjae Dioso pewünüta jueces matakabi jebi kuijinae itorroba wanapa Israel, reyes monae ata apo itsi Israel Judánü. 23 Dieciocho (18) pá waibeje jjaina rey Josías pakuijinaé tó ejjana fiesta Dioso Jerusalén jawata. ²⁴ Baja rá pakuenia werrebiaba Josías pejorrobiwi pékana üjübiwi atjübü pijiwi, dajjita waja ita jünawi jawanü waja taejawa Judá piaja irrata, Jerusalén waja jume kowünü tsinejja ley bájjüto pajumé yakina ruta, pá bajjüto pitabuata sacerdote Hilcías Dioso piajabóta. ²⁵ Ajjibi itsa rey pewajü naya, pejume kowünütsinü a Dioso pejamatabü ütüto werrena dajjita jumálita, dajjita saüta pakuenia itórroba Moisés ley bajjuto jawata, baja rá Moisés kuijinae itsanü ata abajjü apo naitajütsi pakuenia Moisés. ²⁶ Baja rá pakuenia áta Dioso apo jamatabü anáe werrewerrékae pakuijinae bitso anaepana pakuijinae anaya ejjanatsi barrá anaepana Judá pena wajükáejjae dowati jumapaewi jawabelia Manasés kujarruba nejjata baja rá ponü anaya ejjana. ²⁷ Baja rá pakuenia Dioso jumaitsije: "Judá rabaja ápo netáe tsane awünüjibia ejjanae najü taita barrá wekua, pakuenia tijjita jjüabajü Israel, jjuabianajü ma pa tomara taita petsiwi a Jerusalén, pabó pikani jjanü jumaitsinü: Má jota jjanü Nawünürutsia najü." ²⁸ Itsa penakuenebi jawanü Josías, pesaüta, ¿ápo tóna yakina ponaetsi itsa jota reye winawünü yakina pona biaba, apo ná wünü rúbenae baja rá palibrota rey Judá jawata? ²⁹ Baja rá pamatabi jawá Faraón Necao rey Egipto pijinü barrü pona piajiwi tseko naejitsia rey Asirianü Eufrates mene jawabelia. Josías copiá pilia Necao pena tseko naejawata, Necao beyajjuaba Meguido jawata. ³⁰ Josías piájiwi kaponatsi petüpaenü Meguido jawa werrena Jerusalén jawa berrena mütütatsi piaja irrá berrena baja rá jjüa kuijinae pá tomara pijiwi itapetsi Joacaz pejjunato Josías unjibatsi rey tsanukáe pekowüta pajja. ³¹ Veintitres (23) pawai beje jjaina pakujjinae tajjüjüaba pitó róbi jawa Jerusalén itorróba akueyabi pá waibeje penami pewünü Hamutal; pejjunatoyo Jeremías Libna pijinümi. ³² Baja rá ponü pebijia kuene tó tanetso Dioso pakuenia piaja monaemi kuijirru tane. ³³ Nejjata tó nanekonita Faraón Necao Ribla nakuata Hamat, piaja irrata pená itorobi yéniba Jerusalén. Baja pá irra Necao multá biá ejjana pewekua pitsi nejja cien (100) talentos palata kae oro pijinenia. ³⁴ Nejjata Faraón Necao nuta rey Eiaquim, pejjünato Josías, Josías pajjami, wünü kambiaba baja ra jjüajitsia ajena konojjae pewü Joasim; wáetaba a Joacaz kápona Egipto jawabelia baja ra jótalia tüpa. ³⁵ Joacim matamota palata, orota a Faraón baja ponü matamo juta dé pakuenia namatámota baja pá írra pematanejja pakuenia Faraón jumaitsi jukáya ejjana palata, oro baja ra pa nakua irra jawata itoroba baja rá patomarra jiwi kaenü kana kuijitsia pakuenia jujtapona pe rajutsi nejja a Faraón Necao. ³⁶ Joacim pakuijinae jjaina veinticinco (25) paw ai beje tajü jjuaba pitó róbijawa, once (11) pawaiyobeje ná itoroba Jerusalén. Penami pewünü Zeduba Pedaías pejjünatoyo Ruma jawata pé pónaponaenü baja ra poyó ná akuiji rúbeje pakuijináe Diosoyajáwatsi. ³⁷ Baja poyó ápo kuene jjüába póna ponae pakunia piiaja monaemi jina wanapa.