¹ Akueyabi (3) pa wei pe itorobanu kae kujinae Oseas , Ela pejjünato, Israel piaja reinü, Ezequías pejjunato Acaz, tajjujjuaba pe itorobi jawa reinü kuenia. ² Pe jjeinanüta veinticinco (25) pa wei beje pakujinae tajjujjuaba pe itorobi jawa, bajara ponü itoroba veintinueve (29) pa wei beje Jerusalén jawata. Pena pewünü Abi, pejjünato Zacarías. ³ Bajara ponü itsi pejjania kuene Diosonü itajjutua, na kuene kataejetsia dajjita jjuanü David piaja kuene, piaja monae nümi, itsi. ⁴ Bajara ponü bijiana petsuto jumata penubenae jawa tojjobaba ibo naenü, penetsia Asera naenü. Bajara ponü bronce jomo tojjobaba jjua Moisés nakueneba, tsipaji bajara pa matakabi jawalia Israel pia jiwi to tajuita pe tujjujjuwi naenü; wünüruba "Nhustán". ⁵ Ezequias najamatabü ruta DIOSONÜ ta, Israel piaja Dioso, bajara jjua yabara, bajara ponü kujinae ajibi kaenü ata dajjita Judá piaja reyewi jota be ponü kuenia, pe wajünaya pa reyewi ata itorobanuba. ⁶ Wajatujjanenü jawabelia najamatabu buata arponü apocotsi pepuna ponaejawa, itsiata biji tsane jjanebaita peitorobijawatsi nejjata wajatujjanenu jumeitsi Moisés jawabelia. ⁷ Nejjata wajatujjanenü jitsipa Ezequias, belia jitsipa peponaenu, jjeina pejitsipaejawa arponü itoya Asiria nacua ebetsinu arujjua arponu to abejetsi. ⁸ Arponü bia filisteo monae Gaza jawabelia matatoyorotsia imojjoyo jawabelia wajabitsau peebetsitsuto jawata tomara peebetsi jawata. ⁹ Cuatro (4) paweibeje jawata nacua ewetsinu Ezequías itsiata bitsijane séptimo (7) paweibe jawata Oseas, Ela pejjunato, Israel nawa ewetsinu, Salmanasar, Asiria nacua ewetsinu tsia Samaria jawabetsia tane. ¹⁰ Tres (3) paweibeje cuijinae Arpomonae pita sexto paweibeje jawata Ezequías itsiata picani noveno (9) paweibeje jawata Oseas, Israel nawa ewetsunu; paweniaje Samaria monae notatsi. ¹¹ Nejjata Asiria piaja reinü kapona Israel pia jiwi Asiria jawabelia Hala jawata kapatatsi, Habor mene jota Gozán medo monae piaja tomarata. ¹² Bajara ponü itsi jjuaje tsipaji pamonaeje apo jume kowünütsi DIOSONÜ piaja Dioso, itsiata pamonaeje apo jume kowünütsi penajume taejawa, dajjita jjua Moisés, DIOSONÜ piaja pieninü, itoroba. Pamonaeje apo jumetajitsipae o apo jumekowüütijitsipae. ¹³ Nejjata, catorce (14) pa wei beje pe itorobanukae kujinae reinü kuenia Ezequías, Senaquerib, Asiria piaja reinü, tsimajjü patajopa dajjita peyana itajjatsi Judá piaja tomaranü y wekua pitatsi. ¹⁴ Nejjata Ezequías, Judá piaja reinü, Najume liwaisi itoroba Asiria piaja reinü jawabelia, pe nukaenü Laquis jawata, jumeitsi: "JJanü kanaepanae ejjanatsi. Ne wekua natijire. Itsakuene jawa ata ne itsi ejjanare, jjanü itsinü tsane." Asiria piaja reinü tó ruta Ezequías, Judá piaja reinü, pe matamotsi nejja trescientos (300) jjuabeje palata jawa (30) jjua beje oro. ¹⁵ Nejjata Ezequías rajuta bajaraponü tajjita palata pe boenae jawa DIOSONÜ piaja boo jawata yajawa pe jjanewaetetsi jawa reinü pe ponaponae boo jjanetota. ¹⁶ Nejjata, Ezequías jona oro jawa DIOSONÜ piaja boo baupá jawata yajawa ponaenü bajaraponü noba; bajaraponü rajuta oro Asiria piaja reinü jawabelia. ¹⁷ Itsiata Asiria piaja reinü wajabitsaü jawabelia itoroba, pe ponae nejja Tartán yajawa Rabsaris pe matakaitorobinü Laquis piajiwi rei Ezequias Jerusalen jawabelia. Pamonaeje namutua ponaena Jerusalen mujjuneneta patajjuaba. Pamonaeje imojjoyota tsajjuayo mera kaponabiaba pinija mera jawerena, pa namutua pe kiatsiwi nubena biaba, nubena otjopa pe mujjuneneta. ¹⁸ Pa kujinae junatatsi reinü Ezequías, Elakim, pejjünato Hilcías, pe matakanukaenü boo, Sebna pe yakinaenü, Joa, pejjünato Asaf, pe yakinaenü jjuanü naitsi dajjita matakabi, kopiapita. ¹⁹ Nejjata, pe itorobinü wajabitsaü jumeitsi pamonae jawabelia pe jumeitsi nejja Ezequías pepo pe itorobi reinü , Asiria piaja reinü, jumeitsi: "¿De jjua jawabelia jjamü najamatabü buatame? ²⁰ JJamü kuikuijamü saya jema liweisianü, jumeitsimü jjeinajü tanejamatabü jüpaiwi piasaüwi tabarü nabe nejja ata. ¿Patsata jamatabü rutame? ¿Ipatsa ka aitatsaka ejjana tane bara anaepanae nejjamü? ²¹ Taema, jjamü najama tabü buatame Egipto piaja fatsutsukae naeta, baitsi jane itsa pebi nakatsuta bajara ponaeta, tsikobe yasipitsata bijitsipatsi. Bajara jjua raja Faraón, Egipto piaja reinü, dajjita nejja pa jiwiyo najamatabü ruta bajara ponü jawabelia. ²² Itsa pájjamü pena jumeitsimü: "Pajjanu raja pana jama tabu buataju waja tujjanenu, wüaja Dioso, ¿Arpa arponu raja, ponu itsajota petsuto jawata Ezequías wueko pita jumeitsi Judá jawabelia Jerusalén monae: "Pajjamü be pajitsipame altar tsutota Jerusalén jawa talia?" ²³ Aykonojjae nejjata jitsipaju taka wijatsi nejja tane itorobijaba taja tujjanenü Asiria tujjanenü jjanu paka rajutsianatsi dos mil (2.000) caballos nubeje itsapajjamu pakawene ponajitsiatsi. ²⁴ ¿Depawenia pajjamu paka pane pajitsiapame itsa jumepajamu pemata kaponaenü tsikirinuyo taja tujjanenü peto nawenebinü? ¡Pajjamu pana jamatabu jupame bitso Egipto monae tsipaji arpamonae jjeina carronü! pebarunabewi. ²⁵ ¿Jjanü juneinaju betsinaje seicaya waja tujjanenü niba pana baru nabejitsiatsi jotaje paka wereba bejitsiatsi? waja tujjanenü nejumeitsi: "Bema werebabeyere arpamonae jotaje." ²⁶ Nejjata Eliaquim, Hilcías pejjunato isebnaijoá jumeitsi wajabitsauno tujjanenu jawabelia: "Jumeitsimure pekatona bimonae baru weiweijamure arameo jumeta, tsipajipajjanu pajumetanejü, penebaru weiwei jamu putsa Judá jumeta jiwi pemujjuyorotota pamonae nubena petsuto jawatatsia. ²⁷ Tsipaji petujjanenü wajabitsajunu jumeitsi arpamonae: "¿Neitoroba taja tujjanenu niaja tujjanenü jawabelia ipajjamu pene kueikuei jeinejja arpaliweisi? ¿Apo neitorobi pa pebijiwi peenaewi petsuto jawata arpamonae tsipaji kuene kajupatsi pejjaejawa penapuene naejawa ipereiranu pe apaenejja pajjamu ata?" ²⁸ Nejjata wajabitsau tujjanenu nukaya wawajei asauta judiowi pejumeta jumeitsi: "Pana mujjunaewere Asiria reynü peliweisi. ²⁹ Reynü jumeitsi: "Putsa Ezequías paka yamujjuitoroba, tsipaji arponu apo pata kapanepaetsane pajjamu tasau wekua. ³⁰ Pakopatame putsa Ezequías tsipaji pana jamatabu jupajitsipame petujjanenü, jumeitsi petujjanenü kaniajei rabaja pajjanu penekapanepaina pajjanu, ipatomaraje apo rajutsitsane pekobeta Asiria aeynü." ³¹ Putsa pana mujjunaewetame a Ezequías, jjua raja jumeitsije Asiria reynü: "Pene baja kobare jjanü i paponaremena jjanu jawaberena nejjata kaijiwi kanatuijitsia pájjamu pajjaena me penia vinpo ranü i penia higuera ipa apaename peniaja meranu seikaya pakato yanubenaena. ³² Pajjamu paitsimu tsane jjuaje jota jjanu paka pita ponainatsi paka kaponainatsi peniaja iranu jawabelia bepeniaja iranu no jabata, ira pejju i pejena vino ira pejjaejawa ipabianu jota ira wunuka olivos i banaranü pona pona ejitsianu netu paeyaniwa, pana mujju naewekame putsa Ezequías pakujinae paka baru pona pona pajjamu pakajumeitsi waja tujjanenü naka kapanepaena." ³³ ¿Itsa dioso nunü kupanepa jiwi reynü pekobewekua Asiria? ³⁴ Dejota nenubena piaja dioso nunu Hamat y Arfad? ¿Dejotane nubena piaja diosonü Serfavaim, Hena y Iva? ¿Arpamonae newekua kapurepa seikaya takobe wekua? ³⁵ Itsa tajjita diosonü pa irataje ¿abajjuitsa diosonü kapanepa piaja ira jjanu wekua? ¿Depakuenia petujjanenu kapane pajitsipa Jerusalén tomará tasauwekua? ³⁶ Tsipaji jiwi moya ena apo jumepitsi tsipaji reynu itoroba: "Putsa pajume nota me." ³⁷ Nejjato Eliaquim, Hilcias pejjunato, ponü pona pona boota, Sebna escribanü y Joá Asaf pejjunato nakua yaputaenü ponarena Ezequías piaja pena jjatatsi jawanu to joro jokatsi inekonitatsi arponu peliweisi wajabitsau petujjanenü.