¹ Doce (12) pa wai beje pe itorobi kujinae Acaz, Judá pija reinü, Oseas tajjujjuaba pe itorobi jawa, Ela pejjünato. Bajaraponü itoroba Samaria jota, nueve (9) pa wai beje Israel jota. ² Bajara ponü Diosonü itajjutua itsi pebisiakuene, itsiata apo be Israel pija reyewi pe wajünaya pe itorobiwi. Tsimajjü tsinatsi ³ Salmanasar, Asiria pija reinü, Oseas pija pieninü naejjana to katsina tsabiabi pe rajutsi nejja. ⁴ Baitsi, Asiria pija reinü yapütaejunua Oseas pe yamajjü itorobi nejja, Oseas baitsi, to najume itorobalia So, Egipto pija reinü jawabelia, pijinia, apo matamotsi pe torutsi jawatsi Asiria pija reinü, pakuenia matamotabiaba dajjita wai kanakujitsia. Nejjata Asiria pija reinü waetaba yabaupa jjatata penanekonitsiwi pija bo jota. ⁵ Bajara jjua kujinae, Asiria pija reinü, dajjita ira jawa tsimajjü pona, Samaria tomara yaenebatsi akueyabi pa wai beje. ⁶ nueve (9) pa wai beje pe itorobanukae kujinae reinü Oseas, Asiria pija reinü junua Samaria jawalia, juka Israel pija jiwi Asiria jawabelia. Halah jota noba, Gozán Habor mene jota, medos monae pija tomaranü jota ⁷ Baitsi kaponarekatsi, Israel tomara apo pe jume kowunütsijjae pija Diosonü jawabelia, pe jutsinütsi Egipto ira jawetsina, pepo pekobe jawetsina kujinae Faraónnü, Egipto pija reinü. Pa tomaraje itsa diosowi jume kowünüta ⁸ ejjana yajawa jjuanü ejjanabiaba pa nakua pijiwi Diosonü wekua juta Israel tomara pitabü nejewa, jjuanü Israel pija reyewi ejjanabiaba. ⁹ Israel tomara ejjana, muetsia - apo pejjania kuene jawanü, natsi itsi Diosonü jawabelia. Bajara pamonae nejja ejjana petsuto jumata dajjita tomaranü jawa, pe taenukaenü jawetsika kujinae ibo bürü jawabetsika. ¹⁰ Bajara pamonae pijinia ibo jawata nubaya naesituruto kuenia yajawa ibonaeta jumepe kataenuba Asera kae juma tsuto kanakujitsia yajawa kae naejawa büjjüpanae kanakujitsia. ¹¹ Bajara jota tajuita biaba petujju dere ekae naenü atjubüyo pe tajjunaenüjawa, pakuenia itsanakua pijiwi itsi, pamonae Diosonü juka bajarapamonae pitabü nejewa. Israelita pe bisiakuene ejjana Diosonü pe anaepanae ejjanae nejja; ¹² pamonae jemanü jawabelia pematabata barüyataenubena, jjuanü yabara Diosonü jumaitsitsi: "Pütsa pa itsimü bajara jjuanü." ¹³ Diosonü baja tsipaeba Israel yajawa Judá kae Dioso pe jume liwaisi pe paebinüta kanakujitsia pewajunae jawabelia petaenüta, jumaitsije: "Panawiabare pe biasia namuto jawerena pa ne jume jjania taema pa taka itorobijawa pa ta katsipae bijawa jjania waetsia pa jume kowünüre jjua itoro bajü pa ne ajja jiwi jawabelia, jjanü pa ka itorobatsi taja pianiwi Dioso pejume liwaisi pe paebiwita." ¹⁴ Bajara pamonae apo jumetae; aura jibia itsi, be pajja jiwi kuenia, pakuenia apo jume jjania jai tae pija Diosonü jawabelia. ¹⁵ Pamonaeje apo jumekowünütsi jjuanü jumaitsi pakuenia pe jinawanapae nejja, pijinia jjuanü najumetanebeje pija monaewimi, bajara ponü rajuta jjuanü najumetane. Pamonaje itsi jjuanü tsita itsitsi itsamonae nejjata itsakuene jawa nejja ata apo jjanepanae. Pamonaeje kuene katane itsa nakua pija jiwi imojjoyo pe enaewi, pamonae Diosonü jimaitsitsi pe kuene jupae yenewa. ¹⁶ Pamonaje apo jume jjania tae jjuanü pija Diosonü itorobatsi. Pamonaeje nato itsi anija becerobeje jieru jawata diosonü kuene yaiyataejetsia. Pamonaeje itsi Asera nae, pijinia diosonü kuene tane dajjita tuluputonü atjübü itabojjo pe rubenaejawa yajawa Baal jawabelia. ¹⁷ Pamonaeje nuba pejjünütonü, pejjünütoyonü yajawa pe itajurujawi jota, najoroba tayaejjananua bajara jota, najamatabü kuene ruta pebisia kuene pe itsi nejja jjuanü Diosonü itajjütua pebisia kuene, anaepanaeya ejjana. ¹⁸ Bajara jjuitsia, Dioso apo naitajjuto kaewetsia Israel tomara jawabelia pe bara anaepanaejjae. Kae monae ata apo nakopabi. Kaemonae Judá pija wiriawi. ¹⁹ Pijinia Judá apo jjania waetsi jjuanü pe itsi nejja itorobatsi pija Diosonü, na itsi dajjita jjuanü tsita ejjanatsi Israel pija jiwi ejjanabiaba. ²⁰ Nejjata Diosonü dajjita jjuaba Israel pejji jiwi tsaponae; bajara ponü nanekonitsia ejjana, tokana wiata pekobeta itsamonae peto nakobe tojjotsi nejjatsi, dajjita penamotamatsi jawanü, pe ajibi tsekae jawabelia pe itabarata. ²¹ Bajaraponü Israel wekua ajibia ejjana reyewi kuenia David pija monaewi, reinü ejjana Jeroboam, Nabat pejjünato. Jeroboam kapona Israel tomara pija jiwi dajü pejume kowünütsijawa Diosonü jawabelia pe bisiakuene bitso ejjanaeya ejjana. ²² Israel tomara ejjana dajjita pebisiakuene jawanü itsi Jeroboam apo kopatsi pe bisiakuene jawanü pe itsi jawa pamonaeje, ²³ Ajara jjua yabara Diosonü kopata pe ewetsijawa Israelewi, bajara ponü pe jumaitsi kuenia pija pianiwita, Dioso jume liwaisi pe pabiwi, pe itsi jawa nejja. Nejjata Israelewi tajü pija ira wekua jukatsi, Asiria jawabelia, bajara pakueniaje ajenata pa matakabi jawabeliaje. ²⁴ Asiria pija reinü karena jiwi Babilonia, Cuta pijinia Ava, Hamat yajawa Sefarvaim jawerena, Samaria tomarata nuba, Israel tomara pija jiwi pe kowüta. Pamonaeje najjai nayaba Samaria pija tomara jawa jinawanapa. ²⁵ Pakujinae ajenata na jinawanapa, pamonaeje pina Diosonü jawabelia apo yaiyatae. Nejjata Diosonü tsi itoroba petsobia newütjüanü, yajawünü beyejebatsi. ²⁶ Bajara jjuitsi barü kuikuijai Asiria pija reinü jawabelia, jumaitsije: "Pa monaeje ne kaponaewije ne nobiwi Samaria tomarataje apo yapütae jjuanü jitsipa pa ira pija diosonüje. Bajara jjuitsia, petsobia newütjüanü tsi toroba pe beyebi nejjatsi, petsobia newütjüanü jiwi beyeba, baitsi pamonaje apo yapütae jjuanü pa ira pija diosonü jitsipaje". ²⁷ Bajara jjua kujinae, Asiria pija reinü itoroba, pakueniaje: "Itapere Dioso jume pe kujarubinü ajara jotalia, Ajara werena ne karenanü, lia ejjanare ne ponaponaya ejjanae nejja ajara jotalia, kujarubia ejjanare ajara jotalia jjuanü namata wenena pa ira pija diosonüje." ²⁸ Nejjata kaenü Dioso jume pe kujarubinü, pe kaponaenü Samaria jawerena, rena Betel jawata ponapona; bajara ponü kujaruba pa kuenia Diosonü pejume kowünütsi nejja. ²⁹ Kae wiriawi kanakujitsia pe jamatabü kueneta ejjana pija diosowi, nuba atjubüyo tajjunaetanüta Samaritanowi pe itsi jawanü - kae wiriawi kanakujitsia pa tomaranü jota jinawanapa. ³⁰ Babilonia tomara ejjana Sucot Benot; Cuta pija jiwi ejjana Nergal; Hamat pija jiwi ejjana Asima; ³¹ aveowi ejjana Nibhaz yajawa Tartac. Sefarditawi pejji tajuita isotota Adramelec yajawa Anamelec nejja, Sefarvaím pija diosowi. ³² Pamonaeje pijinia Diosonü jawabelia na wajükabiaba, itapeta Dioso pija jiwitonü nejjja atjubüyotsia patajünaeta to tajuitijitsia petujüdere ekaenaenü, pe rajutsinejja Dioso jawabelia jiwi pewünüta. ³³ Pamonaeje pijinia Diosonü jawabelia na wajükabiaba pijinia nawajükabiaba pija diosowi jawabelia, pakuenia tsita itsi tsabiabitsi pa nakua jawerena jukarenatsi. ³⁴ Ajena pa matakabi jawabelia pamonaeje peruju jawanü apo na kuene kopatsi. Pamonaeje apo yaiyatae ata Diosonü, apo jume kowünütsi pejumaitsi jawatsi pakuenia jinawanapajetsia, Diosonü pe perajutsi jawa Jacob pija tomara jawabelia. ³⁵ pewünü junatsinü Israel- pamonaeta Diosonü itsi penajumetae nejjabaje jjua itorobaje: "Apo payaiyataemü tsane itsa diosowi, apo pa na matabofaetsimü tsane pitabüta, Apo pa jume kowünütsimü tsane pamonaje, apo pa tsita itsimü tsane pane rajutsi nejja pamonaje." ³⁶ Baitsi jane Diosonü, pa peka jutsinü pepo ayai saüta kae majjüta Egipto ira jawetsina, bajara ponü raja pane jume kowünütsi nejja; bajara ponü jane pane matabakata pa wajü kanubenare, bajaraponü kaenü nejja pa tsitajübare pa rajutijitsiamü. ³⁷ JJuanü pakuenia pa jinawanapae jitsiamü; pa itsimüjitsia, pa jumekowünü tijitsiamü pa peka itorobijawanü bajara ponü pa peka to yakinaejawa, pajjamü dajjita matakabi jawabelia pajjania waetsianame. Bajara jjuitsia itsa diosowi pa kujunawijitsipame, ³⁸ jjuanü najume tanetsi, pütsa pa nakofunütame; putsa pa yaiyatame itsa diosowi. ³⁹ Baitsi, pa nija Diosonü ponü paneyaiyataenü nejja. Bajara ponü pa nekuayawi pe kobe jawerena paka jutsiana. ⁴⁰ Bajara pamonae apo jumetae, ejjana tsiteka pe itsi tsabiabi jawanami. ⁴¹ Nejjata pa nakua pija jiwije kujunawa Diosonü, pijinia pamonaeje pekobeta pe itsinüanü pematabakata barüya taenubena, pejji bajara pakuenia itsi, pemomojji. Pija monaemü pakuenia itsi, bajara pakuenia itsi pamonaeje, aneja pamatakabi jawabelia.