¹ Diecisiete (17) pa wai beje pe itorobi kujinae Peka, Remalías pejjünato, Acaz, reinü Jotam pejjünato tajjujjuaba pe itorobanukaejawa. ² Acaz veinte (20) pa wai beje pe jjainae nüta tajjujjuaba pe itorobijawa, itoroba Jerusalén jota diéciseis (16) pa wai beje. Pe jjania kuene apo itsi Diosonü itajjutua, pakuenia David pija monaenümi tsu itsitsi. ³ Juya, ponüje itsije jjuanü Israel pija reyewi ejjanabiaba; pijinia, pejjünato isotualia be perajutsi kuenia tajuitabualia, kuene katane itsa nakuanü pija jiwi pe bisiakuene pe itsijawanü, jjuanü yabara Diosonü wekua jukalia Israel tomara pitabü nejewa. ⁴ Acaz pe rajutsi nejja yajawa tajuita pe tujjujjuwi naebojji tsajota itsanakua pijiwi to ejjanabiaba pija diosowi, atjübüyo jumatatsia, dajjita peasaü naejawanü bujjüpana. ⁵ Bajara jjua kujinae, Rezín, Aram pija reinü, Peka, Remalías pejjunato Israel pija reinü, tsimajjü ponaya Jerusalén tomara. Matatoyoronatsi Acaz, itsiata apo wekua pitsi kapanepaetsi. ⁶ Ajara pa matakabi jawalia, Rezín, Aram pija reinü, kae wüalia pita Elat Aram nejja Judá pija jiwitonüanü Elat jawelia juka. Nejjata arameowi ponarena Elat jawaberena, tsajota pamonaeje jinawanapa ajena pa matakabi jawabelia. ⁷ Nejjata, Acaz to na jume itorobalia Tiglat Pileser, Asiria pija reinü jawabelia, jumaitsije: "Kajume kowünü tsianatsi be nija pianinü o be nejjünato kuenia. Tsinamüre, neyawenonare Aram pija reinü yajawa Israel pija reinü pekobejawerena pija wajabitsaüwi raja nebara anaepana. ⁸ Nejjata, Acaz pita Orojawanü, yajawa palata Diosonü pija bojota pe pitsijawa yajawa pita bitso penamatamatsi jawanü reinü pija bojota, rajulia Asiria pija reinü nejja. ⁹ Asiria pija reinü jumetane, Damasco jawetsia junaya, wekua pita pajjita jiwi kapona Kir jawabelia penanekonitsi kuenia. Pijinia bajaraponü peyajjuaba Rezín, Aram pija reinü. ¹⁰ Rey Acaz lia Damasco jawabelia pe kajjitajarabi nejja Asiria pija reinü Tiglat Pileser. Damasco jota, tane pakuenia itsi tsanutsi Diosonü nejja, to itoroba Urías jawabelia, sacerdotenü, pakuenia pe nakuenebi namatawenona pe ejjanae nejja. ¹¹ Sacerdotenü, Urías, nakueneba pija diosowi peto tajuitsi jota nejja, to itorobarenatsi Damasco jawerena pe itsi tsanutsi nejja. Nakueneba wereta, reinü Acaz nawiatsi nejewa Damosco jawerena. ¹² Pakujinae Damasco jawerena patajopa, tane penakuenebanutsi jawa pija diosowi nejja; imojjoyolia reinü ajarajjua jota pija diosowi nejja to tajuita. ¹³ Bajaraponü itsi pija dioso pe rajutsi nejja petajuitsijawa yajawa trigojawa, epana pe apeara jjua rajutijitsia pija diosonü, tsikaba pejanata jjua pija dioso pe rajutsinejja pe jamata ejemajawata altar jota. ¹⁴ Altar Bronce jawa, pe ekaejawami Diosonü pe itabarata, karena Dioso pija bo mujjuneniaya berena pe notsi nejja imojjoyo pija altar jota. ¹⁵ Ajarajjua kujinae, reinü Acaz itoroba sacerdotenü Urías jawabelia juamitsi: "Pinija altar jota to tajuire bajayakunua piajawa, kaniwiyo tsane pejju jawanü, reinü pe to jebi jawa yajawa pejju, najua rajutsiana pa nakua piajiwi piajawa yajawa, perajutsi jawa nejja pejju y pia pae jawa. Pa tsikabare waja rajutsiwaja nejja pejanata, dajjita janata. Bronce altar jawa raja Diosonü jawabelia tawajükae nejja neyawenonajetsia." ¹⁶ Urias; sacerdotenü, itsi pakuenia reinü Acaz itoroba. ¹⁷ Nejjata rey Acaz tijjita po naenü waetabaru bena karo pe kajinawana biabi jawa; pijinia tijjita pa mera baka pebitonü broncenüanü pe büjjüpanata pe ekae jawa büatsika ibo jawabestika. ¹⁸ Bajara ponü tijjita pa namutua sábadota pe joné nejja pe nakuenebi jawa Dioso piaja bo jawata, reinü piaja namuto yajawa Diosonü piaja bo yenepa nábelia, pe jamatabü kuenia Asiria piaja reinü. ¹⁹ Itsi kuene jawanü yabara pe itsi jawanü Acaz, ¿Apo yakinarubi tsaja pa bajjutota pe itsi tsanaje tarubenae jawanü Judá pija reyewi? ²⁰ Acaz majita, mutjutatsi pija monaetami jota David pija tomarata. Pejjünato, Ezequias, juya naejjana reinü.