¹ Akan tetapi, akupm, ngajarlah hal-hal da sasuai nige pengajaran da sehat. ² Are-are da lebih ama harus kaatn nahan adup'a , nige sehat sadatn iman, sadatn kasih, ge sadatn katekunan. ³ Uga, mahu-mahu da lebih ama harus angkatn tingkah laku da saleh,inya da suka fitnah ato hamba anggur, tapi harus ngajar jai da bait. ⁴ Sak lakoh, ayo'a kaatn nasehat mahu-mahu da angot untuk nyayang banun'a, nyayang anak-anak'a, ⁵ menguasai adup, saleh, ngurus ruakng ramin'a , ramah, ge tunduk ka banun'a , supaya firman Allah kati di maliceh. ⁶ Lakoh uga, nasehatlah ayo sok angod supaya ni kaatn menguasa adup'a. ⁷ Sadatn segala hal, jadilah adupmu teladan sadatn perbuatan-perbuatan da bait. Sadatn pengajaran, nampillah da jujur, da hormat, ⁸ nyansana da taman da kati ngutor sehingga para lawan aok jadi mangun karna kati kaatn ngumong hal da jahe tentang ite. ⁹ Hamba-hamba harus tunduk ka tuan-tuan'a sadatn hal jai pun, barusahalah supaya ayo'a auhatn, ge kati melawan. ¹⁰ Usah nangko, tapi nampillah bahwa akupm kaat da mecaya supaya sadatn jai pun ayoa'k memulia ajaran Allah, Juru Selamat ite. ¹¹ Sbab, anugrah Allah da minsak keselamatan nga nyata bagi samaan sok, ya'k mampukan ite nolak hal-hal da kati saleh ato pun hawa nafsu dunia sehingga ite kaat idup da manguasai adup, adil, ge saleh ka zaman da mati'k diah, ¹³ sementara ite nganti pengharapan da panhu barakat, koh lah pajutukng da panhu kemuliaan umpatn Allah Da Maha Besar, ge Juru Selamat ite, Kristus Yesus. ¹⁴ Ini nga laka mangkatn Adup'a bagi ite yak menebus ite umpatn samaan perbuatan da jahe ge yak menyucikan bagi Adup'a, suatu umat pilihan'a da bagiat melaku perbuatan da bait. ¹⁵ Ngajarlah samaan diah. Nasehat ge nagorlah nige sgala kewibawaan. Usah ani sok da ngarendah kupm.