¹ Ngalaka dakoh, Yesus nyambarang timu' Galilea, kohta timu' Tiberias. ² Karah sok da nganang Ini' karna ayoa' mile' tande-tande ajaib da Ini' umas tarhadap ayo sok da anapm. ³ Lakadakoh, Yesus makka ka samo bukit ge' unyung ka teetn samahu ayo murid-A. ⁴ Ano dakoh, parayaan Paskah sok Yahudi nga jiket. ⁵ Gae nyantunung ka nyangkalilikng-A ge' mile' sok karah utukng wa' Ini', Yesus nyansana ka Filipus, "Kadumelah ite' kaatn mari roti supaya ayo sok dakoh kaatn uman?" ⁶ Yesus muji' hal dakoh ya' nguji Filipus karna sabanara Adup-A pane jai da ao' Ini' umas. ⁷ Filipus naham, "Roti dabararga 200 dinar kati' ao' cukup ya' ayoa', sakalipun masing-masing hanya kaatn nyaputong inek ja'. ⁸ Nyungan umpatn murid-A , kohta Andreas age Simon Petrus, nyansana wa' Yesus, ⁹ "Ka diah ani nyungan kangot da ani umpu' rima roti jelai ge' dua ikatn, tapi jai ratia dakoh ya' sok da samu' diah karaha'?" ¹⁰ Yesus nyansana, "Ngadulah smaan sok ya' unyung." Ka tampat dakoh karah udu', jadi ayo sok dakoh unyung kira-kira rima ribu are jumlah a'. ¹¹ Lakadakoh, Yesus naap roti-roti dakoh ge' ngalaka ngucap syukur, Ini' magi-magi roti dakoh ka ayoa' da unyung; ladakoh uga' gatn-Na' umas tarhadap ikatn-ikatn dakoh nyamani karah da ayoa' ngatte. ¹² Jangkah smaan sok nga basoh, Yesus nyansana wa' murid-murid-A, "Ngubu'talah santak-santak da ngakaba supaya kati' ani da gatnmatatn." ¹³ Karna dakoh, ayo murid ngubu'a ge' nyisi' dua balas geranjang nige' santak-santak umpatn rima roti jelai da gatn ayoa' ngagatn ngalaka uman. ¹⁴ Jangkah ayo sok dakoh mile' tande ajaib da gatn Yesus umas, ayoa' nyansana, "Ini' diah pasti Nabi da gatnngajanji ao' utukng ka dunia." ¹⁵ Karna panane bahwa sok karah dakoh bapakat utukng ge' makse Ini' jadi Raja atas ayoa', Yesus nyingah agi' ka bukit adup-adup-A. Yesus Bajalatn ka Tumukng Paitn ¹⁶ Jangkah ano nga mule ngarum, ayo murid disah nuju' ka timu' ¹⁷ ge' ngalaka makka parahu, ayoa' mule nyambarang danau nuju' Kapernaum. Ano nga mule patakng, tapi Yesus tinga uga utukng amput ayoa'. ¹⁸ Timu' mule baransakng karna nyaru batol aru ngampoh. ¹⁹ Lakadakoh, jangkah ayoa' laka' ngayuh parahua' nyakitar 25 ato 30 stadia, ayoa' mile' Yesus bajalatn ka tumukng timu' ge' ngajiket parahu singge ayoa' buut. ²⁰ Namun, Yesus nyansana wa' ayoa', "Diah Iko', iya' buut!" ²¹ Ngalaka dakoh, Ayoa' ngate majakka Ini' ka sadatn parahu ge' tiba-tiba parahu dakoh nga utukng ka tampat da ayoa' nuju'. Sok Karah Najo Yesus ²² Jakkap aria, sok karah da masih agutn ka sambarang timu' mile' bahwa kati' ani parahu laitn ka dakoh, kacuali nyiteng parahu ja' da ayo murid laka maruh ka sadatn a'. Namun, Tesus kati' nganang maruh ka sadatn parahu dakoh samahu nige' ayo murid-A da nga barangkat adup a'. ²³ Utukngtalah parahu-parahu da lain umpatn Tiberias ka jiket tampat ayo sok dakoh uman roti, ngalaka ngucap syukur. ²⁴ Jangkah ayo sok karah mile' bahwa Yesus ge' ayo murid-A kati' ani agi ka dakoh, ayoa' makka ka parahu-parahu dakoh ge' barangkat ka Kapernaum ya' najo Yesus. Yesus anilah Roti Hidup ²⁵ Jangkaha' sok karah dakoh amput Yesus ka sambarang timu', ayoa' mansikatn wa' Ini', " Rabi, ngina Imu' utukng ka diah?" ²⁶ Yesus naham ayoa' ge' nyansana, " Sabatola', Iko' muji' wa' imu', imu' najo Iko' inya karna imu' nga mile' tande-tande ajaib, tapi karna imu' laka uman roti sampe basoh. ²⁷ Iya' karaje ya' najo pangkuman da kaatn binasa, tapi ya' pangkuman da tahan sampe ka idup da kekal, da Anak Talino ao' mangkatn wa'imu' karna wa' Anak Talino dakoh, Sama', kohta Jabata, laka mangkatn tande sah-A." ²⁸ Lalu, sok karah dakoh mansikatn wa' Yesus, "Jai da arus kai umas supaya kai ngaraje pakaraje da gatn Jabata kahendaki?' ²⁹ Yesus naham ayoa' ge' nyansana wa' ayoa', "Diahta pakaraje da gatn Jabata ngatte: pacaya mih wa' Jabata da gatn Jabata ngutus." ³⁰ Ayoa' mansikatn wa'-Ini', "Kalo lakoh, tande ajaib jailah da ao' Imu' umas supaya kai mile' ge' pacaya wa Imu'? Pakaraje jai da Imu' umas? ³¹ Nenek moyang kai' uman manna ka padang balantara, ulah da gatnnulis, 'Ini' mangkatn ayoa' roti umpatn surga ya' gatn uman." ³² Yesus nyansana wa' ayoa', " Sabatola, Iko' muji' wa' imu', inya Musa da mangkatnmu' roti da sejati umpatn surga, tapi Sama'-Ko' ta da mangkatnmu' roti da sejati umpatn surga. ³³ Sabab, Roti umpatn Jabata anilah Ini' da disah umpatn surga ge' mangkatn idup wa dunia." ³⁴ Ayoa' nyansana wa-Ini', "Tuhan, mangkatlah kai roti dakoh tiap kano." ³⁵ Waatn Yesus wa ayoa', "Ikota roti idup; sok da utukng wa'-Iko' kati' ao' saburuk agi', ge' sok da pacaya wa' Iko' kati' ao' aus agi'. ³⁶ Ao' ta, Iko' laka muji wa' imu' bahwa nyakalipun imu' nga mile' Iko', imu' kati' pacaya. ³⁷ Smaan da gatn Sama-Ko' mangkatn wa'-Iko' ao' utukng wa'-Iko', ge' da utukng wa'-Iko' kati ao' suah Ko' ngusir. ³⁸ Sabab, Iko' disah umpatn surga inya ya' umas kahendak Adup-Ko, tapi kahendak Ini' da ngutus Iko'. ³⁹ Ge', diahta kahendak Ini' da ngutus Iko': supaya smaan da laka gatnmangkatn wa-Iko dakoh kati' ani da ilakng, tapi Iko' ngabangkit a' wa pangkabas zaman. ⁴⁰ Sabab, diahta kahendak Sama'-Ko', bahwa satiap sok da mile' Anak ge' pacaya wa-Ini' ao' kaatn idup kekal, ge' Iko' ao' ngadu a' bangkit wa pangkabas zaman." ⁴¹ Karna dakoh, nyamani sok Yahudi mule koot-koot manganai Ini' karna Ini' nyansana , "Ikota roti da nga disah umpatn surga dakoh." ⁴² Ayoa' nyansana, "Inyata Ini' diah Yesus, Anak Yusuf, da sama' ge' sino' a' ite' kanal? Langkina mungkin Ini' kaatn nyansana, 'Iko' laka disah umpatn surga?" ⁴³ Yesus naham ayoa' ge' nyansana, "Iya' koot-koot ka antara kupm sadi'. ⁴⁴ Ti' nyungan pun kaatn utukng wa'-Iko', kacuali Sama' da ngutus Iko' narik a', ge' Iko' ao' ngadua bangkit wa' pangkabas zaman. ⁴⁵ Ani gatn nulis sadatn kitab ayo nabi: 'Ge', ayo smaan ao' gatn Jabata ajar. Satiap sok da nga dangah ge' balajar umpatn Sama' ao' utukng wa'-Iko'. ⁴⁶ Hal dakoh inya ratia' ani sok da nga suah mile' Sama', kacuali Ini' da utukng umpatn Jabata; Ini'talah da laka mile' Bapa. ⁴⁷ Iko muji' wa'imu', 'Sabatola, satiap sok da pacaya ani umpu' idup kekal.' ⁴⁸ Iko'ta roti idup. ⁴⁹ Nenek moyangmu' nga uman manna ka padang belantara, tapi ayoa' kabis. ⁵⁰ Diahta roti da disah umpatn surga, supaya satiap sok umana ge' kati' kabis. ⁵¹ Iko'ta roti idup dakoh da nga disah umpatn surga. Sak sok uman roti diah, ini' ao' idup salama a'; ge' roti da ao' Ko'mangkatn ya' kahidupan dunia diah anilah ungan-Ko." ⁵² Ayo sok Yahudi mule bataham baba' nyungan wa' da lain, ayoa' nyansana, "Langkina aba' Sok diah mangkatn ungan-A ya' gatn uman?" ⁵³ Yesus nyansana wa' ayoa', "Iko muji' wa' imu', sabatola sak imu' kati' uman ungan Anak Talino ge' nyucur daya'-A, imu' kati' ani umpu' idup ka sadatn adupmu'.