¹ Jangkah Tuhan panane kalo ayo sok Farisi nga dangah bahwa Ini' ngasel ge' mambaptis labih karah murid daripada Yohanes, ² sakalipun Yesus sadi' kati' mambaptis, tapi ayo murid-A, ³ Ini' ngagatn Yudea ge' malik agi ka Galilea. ⁴ Tapi, Ini' arus nabo' rapo Samaria. ⁵ Utukngta Yesus ka Samaria, ka nyabuah kota da ba gaatn Sikhar, da ani ka jiket tana da idu' gatn Yakub mangkatn wa' anak a', Yusuf. ⁶ Sumur Yakub ani ka teetn. Lakadakoh, Yesus da lalah karna bajalatn, unyung ka tabikng sumur dakoh. Ano dakoh, kira-kira jam kainum. ⁷ Utukng ta nyungan mahu Samaria ya' nimba paitn. Yesus nyansana wa'ini', "Mangkatnlah Iko' nyucur." ⁸ Sabab, ayo murid-A nga anu ka kota ya' mari pangkuman. ⁹ Mahu Samaria dakoh nyansana wa' Yesus, "Langkina mungkin Akupm, sok Yahudi, mahi paitn ya' nyucur wa'iko' da anilah mahu Samaria?" (Sabab, sok Yahudi kati' bolah mansikatn sok Samaria). ¹⁰ Yesus naham ge' nyansana wa' ini', "Sak imu' pane manganai karunia Jabata ge' pane asi da nyansana waimu', 'Mangkatnlah Iko' nyucur,' imu' pasti ao' mahi wa'-Ini', ge' Ini' ao' mangkatnmu' paitn idup." ¹¹ Mahu dakoh nyansana wa'-Ini', "Tuan, Akupm kati' ani timba ge' sumur diah darupm tao', umpatn umelah Akupm ao' kaatn paitn idup dakoh? ¹² Anita Akupm labih ahyo daripada nenek moyang kai, Yakub, da mangkatn sumur diah wa' kai ge' adup a' nga nyucur umpatn sumur diah samahu nige' smaan anak ge' ayaman a'?" ¹³ Yesus naham ge' nyansana wa'ini', "Satiap sok da nyucur umpatn sumur diah ao' aus agi', ¹⁴ tapi sok da nyucur umpatn paitn da Ko'mangkatn wa'ini' kati' ao' aus agi'; tapi paitn da Ko'mangkatn wa'ini' dakoh ao' jadi matu paitn ka sadatn adup a' da ao'tarus tapancar sampe idup da kekal.' ¹⁵ Mahu dakoh nyansana wa' Yesus, "Tuan, mangkatlah iko' paitn dakoh supaya iko' kati' ao' aus agi' ge' iko' ti' palalu utukng agi' ka diah ya' nimba paitn." ¹⁶ Yesus nyansana wa'ini', "Anulah, maba' a' ka diah." ¹⁷ Mahu dakoh naham, "Iko' kati' ani banun." Waat Yesus wa'ini', "Imu' taman waktu muji', 'Iko' kati' ani banun'. ¹⁸ Karna imu' nga suah umpu' rima banun, ge' are da madi' samahumu' mati' inyalah banunmu'. Sadatn hal diah, imu' nyansana taman." ¹⁹ Waat mahu dakoh wa'-Ini', "Tuan, mati' iko' pane bahwa Akupm anilah nyungan Nabi. ²⁰ Nenek moyang kai nyambah ka gunung diah, tapi bangsa-Mu' muji' bahwa Yerusalemta tampat sok ya' nyambah." ²¹ Yesus nyansana wa'ini', "Pacayalah wa'-Iko', he mahu! Ao' utukng anoa' jangkah inya ka gunung diah atopun ka Yerusalem sok nyambah Sama'. ²² Imu' nyambah da kati' imu' kanal, tapi kai nyambah da kai kanal karna keselamatan utukng umpatn bangsa Yahudi. ²³ Tapi, ao' utukng anoa', mati' diah, panyambah-panyambah taman ao' nyambah Sama' sadatn roh ge' kebenaran; sabab Sama' mahi da ulah dakoh ya' nyambah -A sadatn rohge' kebenaran." ²⁵ Mahu dakoh nyansana wa'-Ini', "Iko' pane bahwa Mesias ao' utukng (Ini' da gatn muji' Kristus). Jangkah Ini' utukng, Ini' ao' muji' smaan tarutn wa' kai." ²⁶ Yesus naham ini', "Iko', da agi' nyansana wa'imu' anilah Ini'." ²⁷ Waktu dakoh, utukngta murid-murid-A ge' ayoa' heran mile' Yesus agi' serita nige' nyungan mahu. Tapi, kati' nyungan pun da mansikatn wa'-Ini', "Jai da Akupm najo?" ato "Jailah Akupm sarita nige' ini'?" ²⁸ Lakadakoh, mahu dakoh ngagatn kandi paitn a' ge' anu ka kota gae' nyansana wa' ayo sok ka teetn, ²⁹ "Kaeh, mile'lah ani Sook da muji' wa'iko' jaipun tarutn da ngalaka mu'umas. Mungkin a' Ini' Mesias dakoh?" ³⁰ Ayoa' pun anu ka luar kota ge' amput Yesus. ³¹ Samantara dakoh, murid-murid-A ngalabak Yesus nige' nyansana, "Rabi, umanlah." ³² Tapi, Yesus nyansana wa' ayoa', "Iko' ani pangkuman da kati' imu' kanal." ³³ Lalu, murid-murid mansikatn nyungan wa' da laitn, "Kati' ania' sok da minsakng tarutn wa'-Ini' ya' gatnuman?" ³⁴ Yesus nyansana, "Pangkuman-Ko' anilah umas kahendak Ini' da ngutus Iko' ge' nyelesai pakaraje-A. ³⁵ Inyata imu' nyansana', 'Ampat buratn agi' musim panen utukng? Mile'lah, Iko' muji' kaimu', muka'lah matu'mu' ge' mile'ta uma-uma' nga ansak ya' gatnnguttupm. ³⁶ Mati' uga, ini' da manen nga nyamut upah a' ge' ngubu' buah ya' idup kekal singge da nguttupm ge' da mura' kaatn basuka cita samahu-mahu. ³⁷ Sadatn hal diah saratn diah taman, 'Da nyungan mura' ge' da laitn manen. ³⁸ Iko' ngutus imu' ya' manen tarutn da kati' imu' ngaraje ge' imu' nga maruh ka sadatn pakaraje ayoa'. ³⁹ Karah sok Samaria umpatn kota dakoh jadi pacaya wa' Yesus karna saratn mahu dakoh, da mangkatn kesaksian, "Ini' mangkatn pane iko' smaan hal da nga koumas." ⁴⁰ Jadi, jangkah ayo Samaria dakoh sampe wa' Yesus, ayoa' mahi ka-Ini' ya' madi' samahu ayoa' ge' Yesus madi' ka teetn salama dua ano. ⁴¹ Ge', ani agi' karah sok da pacaya karna saratn Yesus sadi'. ⁴² Ayoa' nyansana wa' mahu dakoh, "Inya agi' karna saratnmu' kai jadi pacaya, tapi uga' karna adup kai nga dangah, ge' kai pane bahwa Ini' diah batol-batol Juru Selamat dunia." Anak Pagawai Istana Gatnngangkauhatn ⁴³ Ngalaka 2 ano, Yesus ngagatn tampat dakoh ge' nuju Galilea. ⁴⁴ Katinga dakoh, Yesus sadik laka mangkatn kesaksian bahwa nyungan nabi kati' gatn hormat ka negeri adup a'. ⁴⁵ Jangkah Yesus utukng ka Galilea, ayo sok Galilea nyamut-A karna ayoa' laka mile' jaipun tarutn da gatn Yesus ngaraje sadatn perayaan Paskah ka Yerusalem karna ayoa' uga' anu ka perayaan dakoh. ⁴⁶ Karna dakoh, Yesus utukng agi' ka Kana, Galilea, tampat Ini' suah umas paitn jadi paitn anggur. Ka Kapernaum ani nyungan pegawai istana da anak area' agi' anapm. ⁴⁷ Jangkah pegawai istana dakoh dangah bahwa Yesus nga utukng umpat Yudea ka Galilea, ini anu amput ge' mahi wa' Yesus supaya utukng ge' ngangkauhatn anak a' karna anak a' nga hampir kabis. ⁴⁸ Lalu, Yesus nyansana wa'ini', "Kalo imu' kati' mile' tande-tande ge' hal-hal ajaib, imu' kati' tuh pacaya." ⁴⁹ Pagawai istana nyansana, "Tuan, utuknglah katinga anakko' kabis." ⁵⁰ Yesus nyansana wa'ini', "Ure'mih, anakmu' idup!" Sok dakoh pacaya wa saratn da Yesus muji' wa'ini' ge' anuta sok dakoh. ⁵¹ Waktu pagawai istana sadatn pajalatn a', budak-budak a' amput a' ge' muji' bahwa anak are a' idup. ⁵² Pagawai istana dakoh mansikatn wa' ayoa' manganai jam mani kondisi anak a' mule bait. Ge', ayoa' naham, "Rami kira-kira jam ijo' sanguh a' tigi'." ⁵³ Sama' anak dakoh pane, wa' waktu dakohta Yesus nyansana wa'ini', "Anakmu' idup." Jadi, pagawai istana dakoh ge' smaan keluarga a' jadi pacaya wa' Yesus. ⁵⁴ Kohta tande ajaib kadua da gatn Yesus umas ngalaka ure umpatn Yudea ka Galilea.