¹ Ani nyungan sok Farisi bagaatn Nikodemus. Ini' anilah nyungan pamimpin bangsa Yahudi. ² Jangkah ano ngarum, ini' utukng wa' Yesus ge' nyansana, "Rabi, kai pane bahwa Akupm anilah Guru da utukng umpatn Jabata karna kati' ani nyungan pun da kaatn umas tande-tande ajaib da Akupmbulah, kacuali Jabata ani samahua'." ³ Jawab Yesus waini', "Sabatol-batola Iko muji' kaimu', sak sook kati' gatnberanak agi', ini' kati' kaatn mile' Karajaan Jabata." ⁴ Nikodemus mansikatn, "Langkina mungkinlah sook kaatn gatnberanak agi' kalo ini' nga ama? Kaat a' ini' maruh agi' ka sadatn buhul sinioa' ge' gatnberanak agi'?" ⁵ Yesus naham a', "Sabatola, Iko' muji' kaimu', sak sook kati' gatnberanak umpatn paitn ge' Roh, ini' kati' kaatn maruh ka sadatn Karajaan Jabata. ⁶ Jai da gatnberanak umpatn dagin anilah dagin, ge' jai da gatnberanak umpatn Roh anilah roh. ⁷ Iya' heran karna Iko' muji' kaimu', 'Imu' arus gatnberanak agi''. ⁸ Nyaru ngampoh ka dume pun ini' ngate ge' imu' dangah mihua', tapi imu' kati' pane umpatn dume asala' ge' ka dume ini' ao' anu. Ladakoh uga nige' satiap sok da gatnberanak umpatn Roh." ⁹ Nikodemus mansikatn, "Langkinalah mungkin smaan hal dakoh tajadi?" ¹⁰ Yesus naham, "Inyata imu' guru sok Israel, tapi imu' kati' ngarati smaan hal diah? ¹¹ Da sabatola', Iko' muji' kaimu' bahwa kai nyansana manganai jai da kai pane ge' mangkatn kesaksian manganai jai da kai ile', tapi imu' kati' nyamut kesaksian kai. ¹² Kalo Iko' mangkatn pane kaimu' manganai hal-hal duaniawi sadi' imu' kati' pacaya, langkina mungkin imu' ao' pacaya kalo Iko' mangkatn pane kaimu' manganai hal-hal surgawi? ¹³ Kati' nyungan pun suah makka ka surga, kacuali Ini' da laka disah umpatn surga, dakohta Anak Talino. ¹⁴ Samu' ulah Musa majakka nipa' tembaga ka padang belantara, ladakoh uga' Anak Talino arus gatn ngangkanyamo, ¹⁵ supaya asi pun sok da pacaya ka-Ini' ao' kaatn idup da kekal. ¹⁶ Karna Jabata aru tao' nyayang dunia diah, Ini' mangkatn Anak-A da tunggal supaya satiap sok da pacaya ka-Ini' kati' binasa, tapi umpu' idup da kekal. ¹⁷ Karna Jabata ngutus Anak-A ka sadatn dunia inya ya' manghakim dunia, tapi supaya dunia gatnnyelamat nabo' Anak-A. ¹⁸ Sok da pacaya wa-Ini' kati' ao' gatn ngukum, tapi sok da kati' pacaya nga madi' ka saroh hukuman karna ini' kati' pacaya wa' gaatn Anak Tunggal Jabata. ¹⁹ Diahta hukuman dakoh: Tarakng nga utukng ka sadatn dunia, tapi talino labih suka wa' dagalap daripada tarakng karna jai da ayoa umas anilah jahe'. ²⁰ Karna satiap sok da umas jahe' rusi' Tarakng ge' kati' utukng uga' wa' Tarakng dakoh supaya parbuatan-parbuatan a' kati' gatn ngungkit-ungkit. ²¹ Tapi ao'a, sok da umas da taman utukng wa' Tarakng dakoh supaya gatn nganyata parbuatan-parbuatan a' dakoh dagatna' umas ka sadatn Jabata." Yohanes Basaksi Manganai Yesus ²² Ngalaka dakoh, Yesus ge' ayo murid-A anu ka tana' Yudea. Ka teetn, Ini' ngangkabas ano samahu ayoa' ge' mambaptis. ²³ Yohanes uga' mambaptis ka Ainon jiket Salim karna ani paitn karah ka teetn. Ayo sok bajutukng ge' gatn baptis. ²⁴ Waktu dakoh, Yohanes tinga gatnnyise' ka sadatn panjara.