¹ Yesus nyansana, "Iko'ta puutn anggur da diu'a' ge' Sama'-Ko'ta da ngusaha a'. ² Satiap daatn wa' -Iko' da kati' babuah, gatn-Ni' matat ge' satiap daatn da babuah , gatn-Ni' marasih, supaya daatn dakoh babuah labut. ³ Imu' memang nga gatn marasih sabab firman da laka Ko'-muji' wa' imu'. ⁴ Madi'ta ka sadatn Iko' ge' Iko' ka sadatn imu'. Samu' ulah daatn kati' aba' babuah umpatn adup a', kacuali ini' madi' wa' puutn anggur, ladakoh uga' imu' kati' kaatn babuah, kacuali imu' madi' ka sadatn Iko'. ⁵ Iko'ta puutn anggur ge' imu'ta daatn-daatn a'. Satiap sok da madi' ka sadatn Iko', ge' Iko' ka sadatn ini', ini' ao' babuah karah karna sak bapisah umpatn Iko', imu' kati' kaatn umas jai-jai. ⁶ Sak sook kati madi' ka sadatn Iko', ini' ao' gatnmatatn ulah daatn ge' jadi karikng; ge' sok ao' gatnngubu' ge' gatnnyangkahatn ka sadatn api, ge' tabakar. ⁷ Sak imu' tatap madi' ka sadatn Iko' ge' saratn-Ko' madi' ka sadatn imu', mahimih jai saja da imu' ngatte, ge' dakoh ao' gatnngabul wa'imu'. ⁸ Sama'-Ko' ao' gatnngamulia nige' hal diah, dakohta sak imu' babuah karah ge' nige' ladakoh, imu' anilah murid-murid-Ko'." Parintah Yesus ya' Saling Mangasihi ⁹ "Ulah Sama' laka sayang ka Iko, ladakohta Iko' laka mangasihimu'; tatapta madi' sadatn kasih-Ko'. ¹⁰ Sak imu' taat wa' smaan parintah-Ko', imu' ao' madi' sadatn kasih-Ko', samu ulah Iko' laka taat wa' parintah Sama' ge' madi' sadatn kasih-A. ¹¹ Hal-hal diah Iko' muji' wa'imu' supaya sukacita-Ko' ani ka sadatnmu', singge sukacitamu' jadi panhu'. ¹² Diahta parintah-Ko': Imu' arus saling mangasihi. samu ulah Iko' laka mangasihi imu'. ¹³ Kati' ani kasih da labih ayho dari pada kasih sook da mangkatn nyawaa' ya' kawan-kawan a'. ¹⁴ Imu' anilah kawan-kawan-Ko' sak imu' umas jai da Komerintah wa'imu'. ¹⁵ Iko' kati' agi' magaatn imu' panyangu karna panyangu ti' pane jai da gatn tuana' umas. Ao' ta, Iko' magaatn imu' kawan karna smaan da Iko' dangah umpatn Sama', laka Iko' muji' wa'imu'. ¹⁶ Inya imu' da milih Iko', malahan Iko'ta da milih ge' laka natap imu' supaya imu' anu ge' ngasil buah, ge' buahmu tatap singge jai pun da imu' mahi' umpatn Sama' sadatn gaatn-Ko, Ini' ao' mangkatn a' wa' imu'. ¹⁷ Diahta parintah-Ko: Imu' arus saling mangasihi!" Yesus Ngingat Ayo Murid-A ¹⁸ "Sak dunia ngarusi'mu', imu' pane bahwa dunia laka ngarusi' Iko' katinga ngarusi'mu. ¹⁹ Sak imu' umpatn dunia, pastilah dunia ao; mangasihi jai dagatn na umpu'; tapi karna imu' inya umpatn dunia, tapi Iko' laka milihmu' umpatn dunia, karna hal dakohlah dunia ngarusi' imu'. ²⁰ Ingatta saratn da laka Komuji' wa'imu': 'Nyungan panyangu kati' labih ahyo daripada tuan a'. Sak ayoa' laka nganyaya Iko', ayoa' uga' ao' nganyaya imu'. Sak ayoa' taat wa' firman-Ko', ayoa' uga' ao' taat wa' saratnmu'. ²¹ Ao'a, smaan dakoh ao' ayoa' umas tarhadap imu', karna gaatn-Ko'. Sabab, ayoa' kati' nganal Ini' da ngutus Iko'. ²² Sak Iko' kati' utukng ge' muji' smaan dakoh wa' ayoa', ayoa' kati' ao' umpu' dusa. Tapi mati', ayoa' kati' umpu' alasan ya' duse ayoa'. ²³ Satiap sok da ngarusi' Iko', ini' uga' ngarusi' Sama-Ko'. ²⁴ Saandaia Iko' kati' umas ka antara ayoa' pakaraje-pakaraje da kati' suah gatn sok laitn umas, ayoa' kati' ao' umpu' duse. Ao'a mati, ayoa' laka mile' namun tatap ngarusi Iko' ge' Sama-Ko'. ²⁵ Namun, firman da tatulis sadatn kitab Taurat ayoa' arus gatngenap: 'Ayoa' ngarusi' Iko' tampa alasan.' ²⁶ Jangkah Danulokng dakoh utukng, da ao' Iko' utus wa' imu' umpatn Sama', kohta Roh Dataman da baasal umpatn Sama', Ini' ao' basaksi manganai Iko'. ²⁷ Ge' imu' uga' ao' basaksi karna imu' laka samahu-Ko agi' mule a'.