¹ Wa' ano partama minggu dakoh, Maria Magdalena anu ka sibur Yesus ano baru buka asat, jangkah ano maseh galap, ge' mile' batu da nutup sibur nga gatnnginsit umpatn sibur dakoh. ² Maka, ini' talama' ge' amput Simon Petrus ge' murid laitn da gatn Yesus nyayang, ge' nyansana wa' ayoa', "Ayoa' nga naap Tuhan umpatn sibur, ge' kai kati' pane ka dume ayoa' mana-A." ³ Maka, Petrus ge' murid da laitn dakoh anu ka sibur. ⁴ Kadua a' talama' samahu-mahu, tapi murid da laitn dakoh talama' labih capat daripada Petrus singge ini' uru' nyampe ka sibur. ⁵ Ini' nampe ge' mile' ka sadatn, ge' mile' saput linen damungkus bangke Yesus ngagatnmana' ka teetn, namun ini' kati' maruh ka sadatn. ⁶ Lakadakoh, Simon Petrus utukng, nyusul ini', ge' maruh ka sibur ge' ini' mile' saput linen da ya' mungkus gatnmana' ka teetn. ⁷ Ge', saput ya' nutup muka da malut aba' Yesus kati' gatnmana' samahu saput linen da ya' mungkus ijah, tapi gatnngulokng ka tampat da laitn. ⁸ Lakadakoh, murid da laitn ijah, da paling uru utukng ka sibur, uga' maruh. Ini' mile' ge' pacaya. ⁹ Sabab, katinga kajadian dakoh, ayoa' tinga ngarati Kitab Suci, bahwa Yesus arus ure bangkit umpat pangkabis. Yesus Nampil Adup-A wa' Maria Magdalena ¹⁰ Jadi, kadua murid dakoh ure ka ramin. ¹¹ Ao'ta, Maria agutn ka sato sibur ge' munse'. Gae munse', ini' nampe ka sadatn sibur dakoh, ¹² ge' ini' mile' dua malaikat bapangiak ranakng agi' unyung ka tampat bangke Yesus gatnmana' katinga a'. Da nyungan unyung ka bagian abak ge' da nyungan ka bagian kaja'. ¹³ Kadua malaikat dakoh mansikatn wa' Maria, "Mahung, jai imu' munse'?" Maria naham malaikat dakoh, "Ayoa' nga naap bangke Tuhanko' ge' iko' ti' pane ka dume ayoa' mana' Ini'." ¹⁴ Ngalaka muji' ladakoh, Maria ngaringah ka buntot ge' mile' yesus agutn ka dakoh, tapi kati' pane kalo dakoh anilah Yesus. ¹⁵ Yesus mansikatn wa'ini', "Mahung, jailah imu' munse' Asilah da mu' najo?" Karna ngira Ini' anilah panjaga taman, Maria nyansana wa'Ini', "Tuan, sak Tuan damindah-A, muji'lah kaiko' ka dume Tuan mana'-A, ge' iko' ao' naap-A." ¹⁶ Yesus nyansana waini', "Maria." Maria pun ngaringah ge' nyansana wa'-Ini' sadatn saratn Ibrani, :Rabuni", da ratia "Guru". ¹⁷ Yesus nyansana wa'ini', "Iya' imu' minte Iko' karna Iko' tinga anu wa' Sama'. Tapi, anulah wa' age-age-Ko' ge' muji' wa' ayoa', 'Iko' ao' anu wa Sama'-Ko ge' Samamu', wa' Jabata-Ko' ge' Jabatamu'." ¹⁸ Maria Magdalena anu ge' mangkatn pane mutid-murid, "Iko' nga mile' Tuhan," ge' bahwa Yesusta da nga muji' hal-hal diah waini'. Yesus Nujo' adup-A wa' Murid-murid-A