¹ Katinga Ari Raya Paskah, Yesus pane bahwa ano-A nga utukng bahwa Ini' ao' ngagatn dunia diah wa' Sama', ngalaka mangasihi da gatn Adup-A umpu' ka dunia, Ini' mangasihi ayoa' sampe pangkabas. ² Salama uman ngarum balansong, sitan nga maruh sadatn ate Yudas Iskariot. anak Simon, ya' manghianati Yesus. ³ Yesus, jangkah panane bahwa Sama' nga nyarah jaipun tarutn ka sadatn barekng-A, ge' bahwa Ini' utukng umpatn Jabata, ge' ao' ure' wa' Jabata, ⁴ Ini' agutn umpatn Paruman ngarum ge' muka' jubah-A, ge' uga' naap saput linen ge' ningo'a' ka apakng-A. ⁵ Lakadakoh, Ini' nuntokng paitn ka nyabuah beskom ge' mule meetn kaja' ayo murid-A ge' uga' ngalap kaja' ayoa' nige' saput da gatn ningo' ka apakng-A. ⁶ Lalu, Ini' sampe wa' Simon Petrus ge' nyansana wa' Yesus, "Tuhan, Akupm meetn kaja'ko'?" ⁷ Yesus naham ge' nyansana wa'ini', "Jai da Iko' umas, imu' katinga' paham mati', tapi jana' imu' ao' ngarati." ⁸ Petrus nyansana, "Akupm ti' ao' suah meet kaja'ko'!" Yesus naham, "Sak Iko' kati' meetnmu', imu' ao' kati' kaatn bagian ka sadatn Iko'." ⁹ Simon Petrus nyansana wa'-Ini', "Kalo ladakoh Tuhan, iya' hanya kaja'ko' , tapi uga' barekng ge' aba'ko!" ¹⁰ Yesus nyansana wa' ayoa', "Sok da nga mamu' hanya palalu meetn kaja' a', tapi nga barasih smaan a'. Imu' nga barasih, tapi kati' smaan umpatn ayo kupm barasih." ¹¹ Karna Yesus pane asi da manghianat Ini', kohta sabab a' Ini' nyansana, "Kati' smaan umpatn ayo kupm barasih," ¹² Jadi, ngalaka Yesus abas meetn kaja' ayo murid-A, ngiak agi' jubah-A, ge' malik ka tampat-A, Ini' nyansana wa' ayoa', "Ania kupm ngarati jai da Iko' umas wa' ayo kupm? ¹³ Ayo kupm maba'-Ko' Guru ge' uga' Tuhan. Dakoh tapat karna Iko' memang Guru ge' Tuhan. ¹⁴ Sak Iko', da anilah Tuhan ge' Gurumu', nga meetn kaja'mu', imu' pun arus saling meetn kaja'mu'. ¹⁵ Sabab, Iko' nga mangkatn cuntoh wa'imu' supaya imu' uga' umas ulah da Iko' umas wa' imu'. ¹⁶ Nige' sasungguh a', Iko' muji' wa'imu', nyungan hamba kati' labih ahyo daripada tuan a',atopun nyungan utusan kati' labih ahyo daripada sok da ngutus a'. ¹⁷ Sak imu' nga panane smaan diah, imu' gatnmamberkat sak imu' malakua'. ¹⁸ Iko' kati' nyansana-sana manganai ayo kupm smaan, Iko' pane asi saja da nga laka Ko'milih, tapi nas diah arus gatn manggenap, 'Sok da uman roti-Ko nga ngantatn tido' a' tarhadap Iko'. ¹⁹ Iko' muji' ka imu' mati', katinga hal dakoh tajadi supaya sak hal dakoh tajadi, imu' ao' pacaya bahwa Iko'talah Ini'. ²⁰ Nige' sasungguh a', Iko' muji' wa' imu', satiap sok da narima sok da Ko'ngutus, narima Iko; ge' sok da nyamut Iko', nyamut Ini' da ngutus Iko'." Yeus Muji' Asi da Ao' Manghianat Ini ²¹ Ngalaka Yesus nyansana ladakoh, Ini' gatn ngaco sadatn Roh ge' basaksi, "Sasungguh-sungguh a' Iko' muji' wa' imu', nyungan umpatn ayo kupm ao' nghianat Iko'. ²² Ayo murid saling nyantunung nyungan wa' laitn a' ge' bingung manganai asi da Ini' nyarita, ²³ Nyungan umpatn murid-A uyung nyineh wa sado' Yesus. Ini'talah murid da aru tao gatn Yesus kasihi. ²⁴ Lakadakoh, Simon Petrus mangkatn kode wa' ini' ya' mansikatn wa' Yesus manganai asi da gatn-A maksud. ²⁵ Jadi ayo murid da nyineh wa' sado' Yesus dakoh mansikatn wa'- Ini',"Tuhan, asilah sok dakoh?" ²⁶ Yesus naham, "Sok dakoh anilah ini' da wa'ini' Iko' mangkatn putongan roti diah ngalaka Iko' nyihup a'." Lalu, ngalaka nyihup putongan roti dakoh, Yesus mangkatn a' wa' Yudas, anak Simon Iskariot. ²⁷ Ge', ngalaka Yudas nyamut putongan roti dakoh, Balis ngarasuk a'. Karna dakoh, Yesus nyansana wa' ini', "Jai da ao' ko'umas, capat ta umas a'!" ²⁸ Kati' nyungan pun umpatn ayoa' da agi' uman dakoh ngarati jai Yesus nyansana hodakoh wa' Yudas. ²⁹ Ani bamani umpat ayoa' nyangka karna Yudasta da minte kotak uang singge Yesus nyansana kaini', "Marilah hal-hal da ite' palalu ya' parayaan," ato supaya ini' mangkatn tarutn wa' sok papa. ³⁰ Jadi, ngalaka nyamut putongan roti, Yudas anu ka sato no dakoh uga'; ge' ano dakoh nga ngarum. Yesus Nyansana manganai Pangkabis-A ³¹ Ngalaka Yudas anu, Yesus nyansana, "Mati' ta ano a' Anak Talino gatnngamulia ge' Jabata gatnngamulia nabo' ini'. ³² Sak Jabata gatnngamulia ka sadatn Ini', Jabata uga' ao' gatnngamulia Ini' ka sadatn adup-A, ge' ao' ngamulia nige' sacapat a'. ³³ Anak-anak-Ko', Iko' ani samahu imu' hanya tinggal sabantar agi. Imu' ao' najo Iko', ge' ulah da nga Ko'muji' wa ayo sok Yahudi, mati' Iko' muji' uga' wa'imu', 'Ka dume Iko' anu, imu' kati' bisa utukng.' ³⁴ Nyiteng perintah bahu Iko' mangkatn wa'imu', kohta supaya imu' saling mangasihi, samu ulah Iko' nga mangasihi ayo kupm, ladakohta imu' uga saling mangasihi. ³⁵ Nige' ladakoh, smaan sok ao' pane bahwa imu' anilah murid-murid-Ko', kohta sak imu' saling mangasihi." Paringatan Yesus wa' Petrus ³⁶ Simon Petrus mansikatn wa' Yesus, "Tuhan , kadumelah Akupm ao' anu?" Yesus naham ini', "Ka dume Iko' anu, imu' ti' kaatn nganang Iko' mati', tapi jakkap ari imu' ao' nganang Iko'." ³⁷ Petrus mansikatn wa'-Ini', "Tuhan, jailah iko' ti' aba' nganang Akupm mati'? Iko' ao' nyarah nyawako' demi Akupm!" ³⁸ Yesus naham, "Imu' ao' nyarah nyawamu' bagi-Iko'? Nige' sasungguha' Iko' muji' wa'imu', siap kati' ao' ngangkuak katinga imu' nyangkal Iko' 3 kali."