¹ Inum ano katinga Ano Raya Paskah, Yesus anu ka Betania, tampat Lazarus madi', da laka Ini' ngangkidup umpatn pangkabis. ² Ka teetn, nga gatnnyiap paruman ngarum ya' Yesus; ge' Marta agi' ngalayan, tapi Lazarus anilah salah satu umpatn ayoa' da unyung ka meja samahu Yesus. ³ Lakadakoh, Maria naap satangah kati binyak narwastu da murni da batol mahal, lalu ngangkabinyak kaja' Yesus ge' ngalap a' nige' abok a'. Maka, ramin dakoh panhu nige bau marauh binyak wangi dakoh. ⁴ Namun, Yudas Iskariot, nyungan umpatn murid-A, da ao' ngianat Ini', nyansana, ⁵ "Jai binyak wangi dakoh kati' gatnnyual ja' harga a' taru ratus dinar ge' gatnmangkatn wa' ayo sok papa?" ⁶ Ini' muji' ladakoh inya karna ini' paduli wa' sok papa, tapi karna ini' anilah nyungan parangko, ge' karna ini' minsakng kotak uang, ini' biasa naap uang da gatnnyese' ka sadatn kotak dakoh. ⁷ Lalu, Yesus naham, "Ya' ngaco mahung dakoh, ini' umasa' sebage persiapan ya' pangkabis-Ko'. ⁸ Sabab, sok papa salalu ani samahu kupm, tapi Iko' kati selalu ani samahu kupm." Ayo Imam Kapala Ngate Ngamis Lazarus ⁹ Jangkah nga karah sok Yahudi dangah bahwa Yesus ani ka Betania, ayoa' anu ka teetn, inya hanya karna Yesus, tapi uga' karna ngate mile' Lazarus da nga Ini' ngangkidup umpatn pangkabis. ¹⁰ Lalu, ayo imam kapala bapakat ya' ngamis Lazarus uga'. ¹¹ Karna Lazarus, karah sok Yahudi ngagatn ayoa' ge' pacaya wa' Yesus. Yesus Maruh ka KOta Yerusalem Ulah Raja ¹² Jakkap ano a', sok karah da utukng ka gawe dakoh, jangkah dangah bahwa Yesus ao' utukng ka Yerusalem ¹³ ayoa' naapm dautn-dautn palem ge' anu ka sato ya' nyamut Ini' ge' mule ngampak-ngampak, "Hosana! Gatnmemberkatta Ini' da utukg sadatn gaatn Tuhan, Raja Israel!" ¹⁴ Ngalaka kaatn nyungan keledai angot, Yesus unyung ka tumukng a', ulah da tatulis: ¹⁵ "Iya' buut, he mahung Sion! Mile'ta! Rajamu' utukng, unyung ka tumukng nyungan keledai angot." ¹⁶ Awala, murid-murid-A kati' ngarati smaan hal dakoh, tapi jangkah Yesus gatnngamulia, ayoa' baru ngarati bahwa smaan dakoh nga tatulis manganai Ini', ge' bahwa ayoa' nga umas smaan dakoh ya' Ini'. Sok Karah Nyansana manganai Yesus ¹⁷ Jadi, ayo sok da samahu Yesus ano Ini' maba' Lazarus mungkas umpatn sibur ge' ngangkidup a' umpatn pangkabis terus basaksi. ¹⁸ Karna dakoh ta, karah sok nyamut Yesus karna ayoa' dangah bahwa Ini'ta da nga umas mukjizat dakoh. ¹⁹ Maka, ayo sok Farisi nyansana nyungan ge' da laitn, "Imu' mile', jai da ite' rencana kati' bahasil. Mile'ta, smaan dunia nga nganang Ini'!" Yesus Nyansana manganai Kahidupan ge' Pangkabis ²⁰ Waktu dakoh, ani uga' ayo sok Yunani ka antara ayoa' da anu ya' sambayang wa' parayaan dakoh. ²¹ Ayoa' amput Filipus, da baasal umpatn Betsaida ka Galilea, ge' nyansana waini', "Tuan, kai ngate badaput nige' Yesus." ²² Filipus anu ge' mangkatn pane Andreas; lalu Andreas ge' Filipus anu ge' mangkatn pane Yesus. ²³ Yesus naham ayoa', "Ano a' nga utukng bagi Anak Talino ya' gatn ngamulia. ²⁴ Nige' sabatola, Iko' muji' wa'imu', kacuali igi' gandum jantu ka tana' ge' kabis, igi' dakoh tatap nyiteng ja'; tapi sak ii' dakoh kabis, ini' ngasel karah buah. ²⁵ Sok da sayang wa' nyawa a', nyawa a' ao' ilakng, tapi sok da kati' sayang wa' nyawa a' ka dunia diah, ao' ngajaga a' ya' idup kekal. ²⁶ Sak sook malayan Iko', ini' arus nganang Iko'; ka dume Iko' madi', ka dakoh uga' palayan-Ko' madi'; sak sook malayan Iko', Sama' ao' manghormat ini'." Yesus Nyansana manganai Pangkabis-A ²⁷ "Mati', jiwa-Ko' ti' tanang. Jai da ao' Ko' muji'? 'Sama', nyalamattalah Iko' umpatn ano diah?' Tapi, ya' tujuan diahta Iko' utukng ano diah. ²⁸ Sama', gatnngamuliata gaatn-Mu!" Lalu, gatndangahta saratn umpatn surga, "Iko' nga ngamulia gaatn-Ko' ge' Iko' ao' ngamulia a' agi'." ²⁹ Sok karah agutn ka dakoh ge' ngadangah a' muji' bahwa dakoh saratn guntur, tapi da laitn nyansana, "Nyungan malaikat nga nyansana wa'-Ini'!" ³⁰ Yesus naham ge' nyansana, "Saratn dakoh gatndangah inya ya' kapentingan-Ko', tapi ya' kapentinganmu'. ³¹ Mati'talah panghakiman bagi dunia diah , mati'ta panguasa dunia ao' gatnnguser. ³² Ge', sak Iko' ngagatnninggi umpatn dunia diah, Iko' ao' narik smaan sok wa'-Iko'." ³³ Yesus muji' hal diah ya' nujo' nige' pangkabis ulah jai Ini' ao' kabis. ³⁴ Sok karah dakoh naham Ini', "Kai nga dangah umpatn hukum Taurat bahwa Kristus ao' tatap madi' salama-lama a'; langkina mungkin Akupm nyansana, 'Anak Talino dakoh arus gatnninggi?' Asilah Anak Talino dakoh?" ³⁵ Yesus naham ayoa', "Tinggal sabantar agi' Tarakng dakoh ani samahumu'. Bajalatnta mumpung Tarakng dakoh maseh ani supaya kagalapan kati' nguasamu'; sabab sok da bajalatn ka sadatn kagalapan kati' pane ka dume ini' anu. ³⁶ Waktu imu' umpu' Tarakng dakoh, pacayata wa' Tarakng dakoh supaya imu' jadi anak-anak Tarakng." Ngalaka muji' ladakoh, Yesus anu ge' nyukatn adup-A umpatn ayoa'. Nyamani Sok Yahudi Kati' Pacaya wa Yesus ³⁷ Waloupun Yesus nga umas karah tande ajaib ka tura' ayoa', ayoa' tatap kati' pacaya wa'-Ini', ³⁸ supaya ganapta saratn da gatn nyampe oleh Nabi Yesaya, "Tuhan, asilah da pacaya wa' kbar berita kai? Ge', wa' asilah barekng Tuhan nga gatnyata?" ³⁹ Dakohta sabab a', ayoa' kati' tuh pacaya karna Yesaya uga' muji'. ⁴⁰ "Ini' nga ngadu buta matu' ayoa' ge' ngadu karas ate ayoa' supaya ayoa' iya' mile' nige' matu' ayoa' ge' paham nige' ate ayoa', lalu malik singge Iko' ngangkauhatn ayoa'." ⁴¹ Yesaya muji' smaan diah karna ini' nga mile' kamuliaan Yesus ge' ini' bacarita manganai Ini'. ⁴² Walou ladakoh, karah uga' ayo pamimpin da pacaya wa' Yesus, namun karna buut wa' ayo sok Farisi, ayoa' kati' muji'a' terus terang karna buut ao' gatn ngasing umpatn sinagoge. ⁴³ Sabab, ayoa' labih suka nyamut kauliaan umpatn talino daripada kamuliaan umpatn Jabata. Ajaran Yesus Ao' Manghakim Talino ⁴⁴ Lakadakoh, Yesus ngampak, waat-Na', "Satiap sok da pacaya wa'Iko', kati' pacaya wa'-Iko', tapi wa' Ini' da ngutus Iko'. ⁴⁵ Ge', satiap sok da nga mile' Iko', nga mile' Ini' da ngutus Iko'. ⁴⁶ Iko' nga utukng sebage Tarakng ka dunia diah, supaya satiap sok da pacaya wa'-Iko' kati' madi' sadatn kagalapan. ⁴⁷ Sak sook ngadangah saratn-Ko', tapi ini' kati' nurut a', Iko' kati' manghakim ini'; sabab Iko' utukng inya manghakim dunia, tapi ya' nyalamat dunia. ⁴⁸ Asi da nulak Iko' ge' kati' nyamut saratn-Ko', maka firman da Iko' muji' ao' manghakim ini' wa' pangkabas zaman. ⁴⁹ Karna Iko' kati' nyansana atas kahandak-Ko', tapi Sama' da ngutus Iko' mangkatn-Ko' parintah atas jai da arus Iko' muji' ge' Iko' nyarita. ⁵⁰ Ge', Iko pane bahwa parintah-A anilah idup kekal. Sabab dakoh, hal da Iko' nyampe, Iko' nyampe ulah da gatn Sama' muji' wa'-Iko'."