¹ Ani nyungan are da agi' anapm, gaatn a' Lazarus umpatn Betania, kampong Maria ge' age a' da mahung, Marta. ² Maria diahta mahung da suah ngangkabinyak kaja' Yesus nige' binyak wangi ge' ngalap kaja'-A nige' abok a', da age are a', Lazarus, ano dakoh anapm. ³ Sabab dakoh, kadua dadik mahung diah ngirim agah wa'-Ini', da muji', "Tuhan, sok da Akupm kasihi agi' anapm." ⁴ Tapi, jangkah Yesus dangah agah dakoh, Ini' nyansana, "Pangkanapm dakoh kati' ao' ngamis a', tapi ao' nganyata kamuliaan Jabata supaya Anak Jabata gatnmuliakan nabo a'." ⁵ Yesus memang sayang ge' Marta, ge' age a' da mahung, ge' Lazarus. ⁶ Jadi, jangkah Yesus dangah bahwa Lazarus anapm, Ini' sengaja madi' 2 ano agi' ka tampat Ini' madi'. ⁷ Ngalaka dakoh, Yesus nyansana wa' murid-murid-A, "Kai ite' anu agi' ka Yudea." ⁸ Ayo murid muji' wa'-Ini', "Guru, ayo sok Yahudi tinga tuhi diah barusaha munu' Akupm nige' batu, anita Kupm tatap ao' anu ka teetn agi'?" ⁹ Yesus naham, "Inyata ani 12 jam sadatn nyano? Sak sook bajalatn wa' ano tano, ini' kati' tasingkak karna ini' mile' tarakng dunia diah. ¹⁰ Tapi, sak sook bajalatn wa' ano ngarum, ini' tasingkak karna tarakng dakoh kati' ani wa'ini'." ¹¹ Ngalaka Yesus nyansana ladakoh, Ini' nyansana wa' ayoa', "Kawan te', Lazarus, nga buus, tapi Iko' ao' anu ya' ngadua' umpat." ¹² Murid-murid nyansana wa' -Ini', Tuhan, sak ini' nga buus, ini' ao' auhatn." ¹³ Yesus sabanara nyansana manganai pangkabis Lazarus, tapi murid-murid ngira Ini' nyansana manganai buus sadatn rati kabis. ¹⁴ Karna dakoh, Yesus lakadakoh nyansana nige' terus terang wa' ayoa', "Lazarus nga kabis, ¹⁵ ge' Iko' sanang demi kapantinganmu', Iko' kati' ani ka teetn supaya imu' bisa pacaya. Jadi, kai ite' anu wa'ini'." ¹⁶ Lakadakoh, Tomas, da gatn muji' Didimus, nyansana wa' murid-murid da laitn, "Kai ite' uga' anu supaya ite' kabis uga samahu-A." ¹⁷ Jangkah Yesus utukng, Ini' amput Lazarus nga ani ka sadatn sibur salama 4 ano. ¹⁸ Anipun Betania latak a' rima balas stadia jauh a' umpatn Yerusalem. ¹⁹ Karah sok Yahudi nga utukng amput Maria ge' Marta, ya' ngibur ayoa' manyangkut age a' dakoh. ²⁰ Jangkah dangah bahwa Yesus nga utukng, Marta anu ge' nyamut-A, tapi Maria tatap madi' ka ramin. ²¹ Marta nyansana wa' Yesus, "Tuhan, saandaia waktu dakoh Akupm ani ka diah, ageko' pasti ti' kabis. ²² Tapi, mati' diah iko pane bahwa jai pun da Akupm mahi umpatn Jabata, Jabata ao' mangkatna' wa'-Imu'." ²³ Yesus nyansana wa'ini', "Agemu' ao' bangkit." ²⁴ Marta naham Ini', "Iko' pane ini' ao' bangkit wa' ano kabangkitan wa' pangkabas zaman." ²⁵ Yesus nyansana wa'ini', "Iko'ta kabangkitan ge' kahidupan; asipun da pacaya wa'-Iko', ini' ao' idup walopun ini' nga kabis, ²⁶ ge' satiap sok da idup ge' pacaya wa'-Iko kati' ao' suah kabis. Anita imu' pacaya ao' hal diah?" ²⁷ Marta nyansana wa'-Ini', "Ae' Tuhan, iko' pacaya bahwa Akupmtalah Kristus, Anak Jabata, da utukng ka dunia." Yesus Munse' ²⁸ Ngalaka muji' hal dakoh , Marta anu ge' maba' Maria, age a', ge' nyansana nige' cara barukkupm, "Guru ani ka diah ge' Ini' maba'mu'." Ngadangah hal dakoh, Maria capat-capat agutn ge' amput Yesus. ³⁰ Ano dakoh, Yesus tinga utukng wa' kampong dakoh, tapi masih ka tampat Marta amput a'. ³¹ Ayo sok Yahudi da samahu Maria ka ramin dakoh, da agi' ngibur ini', mile' Maria talama' umpat ge' anu kasato; ayoa' nganang ini' karna ngira ini' ao' anu ka sibur ya' munse' ka teetn. ³² Jangkah Maria sampe ka tampat Yesus madi', ini' mile' Yesus ge' tasungkap ka kaja'-A, gae nyansana wa'-Ini', "Tuhan, saandaia Akupm ani ka diah waktu dakoh, ageko' kati' ao' kabis." ³³ Jangkah Yesus mile' Maria munse', ge' ayo sok Yahudi da samahu a' uga' samu-samu munse', rahu-rahuta Yesus sadatn Roh ge' aru susah a'. ³⁴ Yesus mansikatn, "Ka dume Lazarus mu'ngibur? ayoa' naha Ini', "Tuhan, kae nganang ge' mile'mih." ³⁵ Yesus pun munse'. ³⁶ Maka, ayo sok Yahudi nyansana, "Mile'mih! Batol aru ta Ini' sayang wa' Lazarus!" ³⁷ Tapi, nyamani sok ka antara ayoa' nyansana, "Kati' aba' a' Ini' da nga muka matu' sok buta diah uga' umas Lazarus kati' kabis?" Lazarus Gatnngabangkit umpatn Pangkabis ³⁸ Yesus, da nyasidah agi' sikal sadatn adup-A, anu ka sibur. Sibur dakoh anilah nyabuah gua, ge' nyabuah batu gatnmana' ya' nutup a'. ³⁹ Yesus nyansana, "Danginsitta batu dakoh!" Marta, age sok da kabis dakoh, nyansana wa'-Ini', "Tuhan, mati' pasti ao' ani bau madam karna ini' nga kabis salama 4 ano." ⁴⁰ Yesus naham ini', "Inyata Iko' nga muji' wa'imu' bahwa sak imu' pacaya, imu' ao' mile' kamuliaan Jabata?" ⁴¹ Jadi, ayoa' ngantatn batu dakoh. Lakadakoh, Yesus mile' kasamo ge' nyansana, "Sama', IKo' basukur wa'-Imu' karna Akupm nga dangah Iko'. ⁴² Iko' pane bahwa Akupm mar dangah Iko, tapi karna ayo sok da agutn ka kalilikng-Ko', Iko' muji' hal dakoh supaya ayoa' pacaya bahwa Akupmtalah da laka ngutus Iko'." ⁴³ Ngalaka muji' dakoh, Yesus ngampak nige' saratn da karas, "Lazarus, mungkasmih!" V 44 Sok da nga kabis dakoh mungkas, barekng ge' kaja' a' maseh tatutup saput kafan, ge' muka a' maseh tatutup saput kafan. Yesus nyansana wa'ayoa', "Muka' saput-saput dakoh umpatn ii' ge' tealah ini' anu." Pakat ya' Ngamis Yesus ⁴⁵ Ayo sok Yahudi da utukng nganto wa' Maria, ge' mile' jai da laka Yesus umas, jadi pacaya wa'-Ini'. ⁴⁶ Ao' ta, nyamani umpatn ayoa' utukng wa' sok Farisi ge' muji' wa' ayoa' jai da nga laka Yesus umas. ⁴⁷ Maka, ayo imam kapala ge' ayo sok Farisi umas rapat Sanhedrin ge' nyansana, "Jai da ao' ite' umas? Sabab, Sok diah umas karah tande ajaib. ⁴⁸ Sak ite' mambiar Ini' terus ulah diah, smaan sok ao' pacaya wa'-Ini' ge' ayo sok Roma ao' utukng ya' nyarantakan tampat diah ge' bangsa ite'." ⁴⁹ Tapi, nyungan umpatn ayoa' da bagaatn Kayafas, da jadi Imam ahyo wa' taun dakoh, nyansana wa' ayoa', "Ayo kupm ti' pane jai-jai, ⁵⁰ atopun nimbang a', bahwa labih bait nyungan kabis ya' smaan bangsa, daripada smaan bangsa binasa." ⁵¹ Ini' kati' muji' umpatn adup a' , tapi sebage Imam Ahyo taun dakoh, ini' nyampe nubuat bahwa Yesus ao' kabis ya' bangsa dakoh. ⁵² Ge', inya hanya ya' bangsa Yahudi ja', tapi uga' ya' ngubu' a' jadi nyiteng anak-anak Jabata da tararak. ⁵³ Maka, mule no dakoh, ayoa' sapakat ya' ngamis Yesus. ⁵⁴ Karna dakoh, Yesus kati' agi' bajalatn nige cara tarang-tarangan ka antara sok Yahudi, tapi Ini' anu umpatn teetn ka rapo jiket padang balantara ka nyabuah kota da bagaatn Efraim; ge' Ini' madi' ka teetn samahu ayo murid-A. ⁵⁵ Ano dakoh, Paskah sok Yahudi nga jiket, ge' karah sok umpatn rapo dakoh anu ka Yerusalem katinga Paskah ya' nyuci adup ayoa'. ⁵⁶ Lalu, ayoa' najo Yesus ge' nyansana nyungan ge' da laitn samantara ayoa' agutn sadatn bait Jabata, ayoa saling mansikatn, "Langkina manurutmu? Anita Ini' sama sekali kati' ao' utukng ka gawe diah?" ⁵⁷ Anipun ayo imam kapala ge' ayo sok Farisi laka ngaluar parintah bahwa sak sook pane ka dume Ini' madi', sok dakoh arus ngalapor a' supaya ayoa' kaatn naap-A.