¹ Yesus nyansana, "Nige' sabatola, Iko' muji' wa' imu', sok da maruh ka kandang domba nige' kati' nabo' pintu, tapi nige' makka' nabo' pagala' laitn, sok dakoh anilah parangko ge' parampok. ² Tapi, sok da maruh nabo'pintu, ini' anilah gembala domba. ³ Bagi a', panjaga pintu muka' pintu, ge' domba-domba dangah saratn a', ge' ini' maba' domba-domba adup a' nige' gaatn ayoa', ge' uga' ngirikng ayoa' ka sato. ⁴ Ngalaka ngaluar smaan domba a', ini' bajalatn ka tura' ayoa' ge' domba-domba a' ao' nganang ini' karna ayoa' kanal wa' saratn a'. ⁵ Sok asing kati' ao' ayoa' nganang, tapi ayoa' ao' boho umpatn ini' karna ayoa' kati' kanal saratn ayo sok asing. ⁶ Parumpamaan dakohtalah da gatn Yesus muji' wa' ayoa', tapi ayoa' kati' ngarati jai da ijah bahu Yesus muji' wa' ayoa'. ⁷ Oleh sabab dakoh, Yesus muji' agi' wa' ayoa', "Sabatola, Iko' muji' wa' imu', Iko'ta pintu wa' domba-domba dakoh. ⁸ Smaan sok da utukng katinga Iko' anilah parangko ge' parampok, tapi domba-domba kati' dangah ayoa'. ⁹ Iko' ta pintu. Sak ani sok maruh nabo' Iko', ini' ao' gatnnyalamat, ge' ao' mungkas maruh, ge' uga' amput taya' udu'. ¹⁰ Parangko utukng hanya ya' nangko, ngamis, ge' mambinasa; Iko' utukng supaya ayoa' ani umpu' idup gei umpu a' nige cara balimpah. ¹¹ Iko'talah gembala da bait; gembala da bait mangkatn nyawa-A wa' domba-domba. ¹² Sook upahan, inya nyungan gembala, da inya umpu' domba-domba dakoh, mile' serigala utukng, ini' ngagatn domba-domba dakoh ge' boho; serigala dakoh ao' narakam ge' ngancare-bare domba-domba dakoh. ¹³ Ini' boho karna ni' sook upahan ge' kati' paduli wa' domba-domba dakoh. ¹⁴ Iko'ta gembala da bait. Iko' kanal doba-domba-Ko' ge' domba-domba-Ko' kanal wa' Iko' ¹⁵ samu ulah Sama' kanal Iko' ge' Iko' kanal Sama'; ge' Iko' mangkatn nyawa-Ko' ya' domba-domba dakoh. ¹⁶ Iko' uga ani umpu' domba-domba laitn da inya umpatn kandang diah; Iko' arus minsakng ayoa' uga', ge' ayoa' ao' dangah saratn-Ko'; ge' ayoa' ao' jadi nyiteng kubu' nige' nyiteng gambala. ¹⁷ Karna diahta Sama' mangasihi Iko', sabab Iko' mangkatn nyawa-Ko' supaya Iko' kaatn naap a' agi. ¹⁸ Kati' nyungan pun da laka naap a' umpatn-Ko', malah Iko'ta da mangkatn a' sasuai nige' kahandak adup-Ko. Iko' ani umpu' hak ya' mangkatn nyawa-Ko', ge' Iko' uga ani umpu' hak ya' naap a' agi'. Diahta parintah da Iko' nyamut umpatn Sama'-Ko'." ¹⁹ Nyasidah agi', ani parpecahan ka antara ayo sok Yahudi karna saratn Yesus dakoh. ²⁰ Karah umpatn ayoa' da nyansana, " Ini' karasukan roh jahat ge' jadi gila. Jai ayo kupm ngadangah Ini'?" ²¹ Da laitn nyansana, "Dakoh inya karasukan roh jahat. Aba a' roh jahat muka matu' sok buta'?" Yesus ge' Bapa anilah nyungan. ²² Ano dakoh ari raya Penahbisan balansung ka Yerusalem. Waktu koh musim panuut, ²³ ge' Yesus agi' bajalatn wa' Bait Jabata, kohta ka Sarambi Salomo. ²⁴ Lalu, ayo sok Yahudi bakumpur ngangkalilikng Ini' ge' nyansana wa'- Ini', "Nyamani tuhi' agi' Akupm mambiar jiwa kai bimbang? Sak Akupm Kristus muji'talah tarus tarang wa' kai'." ²⁵ Yesus naham ayoa', "Iko' nga muji'a' wa' imu', tapi imu' kati' pacaya. Pakaraje-pakaraje da Iko' umas sadatn gaatn Sama'-Ko', dakohta da mangkatn kesaksian manganai Iko'. ²⁶ Tapi, imu' kati' pacaya karna imu' kati' tarmasok domba-domba-Ko'. ²⁷ Domba-domba-Ko' dangah saratn-Ko', Iko' kanal ayoa' ge' ayoa' nganang Iko'. ²⁸ Iko' mangkatn idup kekal wa' ayoa', ge' ayoa' kati' ao' suah binasa; ge' ti' nyungan pun kaatn nyiong ayoa' umpatn barekng-Ko'. ²⁹ Sama'-Ko', da laka mangkatn ayoa' wa'-Iko', labih ahyo daripada smaan, ge' kati' ani nyungan pun kaatn nyiong ayoa umpatn barekng Sama'. ³⁰ Iko' ge' Sama' anilah nyiteng." ³¹ Nyasidah agi', ayo sok Yahudi naap batu ya' munu' Yesus. ³² Tapi, Yesus nyansana wa' ayoa', "Iko' laka nampil wa' imu' karah pabulah da bait umpatn Sama', pabulah dadumelah umpatn antara a' da umasmu' ngate munu' Iko' nige' batu?" ³³ Ayo sok Yahudi dakoh naham Ini', "Inya karna nyabuah pabulah bait kai ngate munu' Akupm nige' batu, tapi karna hujat; ge' karna Akupm, da hanya nyungan talino, umas adup-Mu Jabata." ³⁴ Yesus naham ayoa', "Inyata tatulis sadatn Kitab Tauratmu', 'Iko' laka bafirman, Iku' anilah jabata? ³⁵ Sak Jabata magaatn ayoa' da nyamut firman dakoh 'jabata' padahal Kitab Suci kati' bisa gatnngabatal, ³⁶ anita imu' muji' manganai Ini' da laka Sama' ngudus ge' ngutus ka sadatn dunia, 'Akupm menghujat', karna Iko' nyansana wa' imu', 'Iko' anilah Anak Jabata? ³⁷ Sak Iko' kati' umas pakaraje-pakaraje Sama'-Ko', iyak ta pacaya wa'-Iko'. ³⁸ Tapi, sak Iko' umas pakaraje-pakaraje dakoh, biarpun imu' ti' pacaya wa'-Iko', pacayalah wa' pakaraje-pakaraje dakoh supaya imu' pane ge' ngarati bahwa Sama' ka sadatn Iko', ge' Iko' ka sadatn Sama'." ³⁹ Nyasidah agi', ayoa' coba naap Yesus, tapi Ini' lulos umpatn ayoa'. ⁴⁰ Lalu, Yesus anu agi' nyambarang sungi Yordan nuju' ka tampat Yohanes partama kali mambaptis idu' ge' Yesus madi' ka teetn. ⁴¹ Karah sok utukng wa' -Ini' ge' nyansana, "Walopun Yohanes kati' umas nyiteng pun tande ajaib, tapi smaan da gatn Yohanes muji' manganai Sok diah taman." ⁴² Ge', karah sok jadi pacaya wa'-Ini' ka teetn.