¹ Bang teung, poi Yesus ke jakenalung ing teba nawo Ai Paake pa pifeng hoho ropo/ injil, imam-imam rube pa teba-teba ropo Taurat fojang tepa teba huhu tete-Ke. ² Tewe tenite-Ke, ''Mekapengte newe Me ma nepa Me ja lelepa weing mepe-mepe. Baing ba Me ma keweleng.'' ³ Yesus lengte tewe, ''Nira ewe piung niheng-hengle pina elele Ni. ⁴ Wanete pengri Yohanis teba pakeleng tehe. Wa surga tena na wa eba.'' ⁵ Tewe tewowo pitewa kokapa tenite, ''Ana pina nete, 'Wa surga,' Ke leng-lengle, 'Tunaneko, ewe Yohanis ke elaka? ⁶ Anaing-angra, ana neteng teng, 'Wa neba ,'teba nawowe newe tejiko newung leng-lengte teweri Yohanis keba nabi.'' ⁷ Pea,tewera rika patehe ete pewe pengri netu. ⁸ Kaimpa, Yesus kera lengte tewe, ''Noimpa,Nira ewera ni leng-leng kale ma hapa Ni lelepawe jano nile ele.'' Aha kela Tebafa Lehe Anggur jata te ete ⁹ Pea, hohoung kele teba nawo ahakela, ''Kebaung lehe kele anggur kewa keleleng teba lehe jano reete jata tete, pa keti kapa lei bame hambang kele jotafa. ¹⁰ Poing jana tewue peteha, kelengko teba jano reete kebaung keti teba lehe-teba lehe jano reetekewako kangkeke terenini walehe janape. Kaimpa, teba lehe jano reete tepute ke teketupaja pa teniko no ongbe ¹¹ Pa kera keba hing-ung kera keti, teba-teba lehe teete tera ke teke tupaja pa maki bake tefue, kera mela no ongbe. ¹² Keba lehe ba kebaungra keba lahengtong kekeleng keka keti teba-teba lehe teete, kera tejako piupa pa ke teketuju kemena pengti. ¹³ Keba lehe ba keleng, 'Jaha nilele-le? Niwe konine kewe nipung lewo kea nikefu ketiti, pewe tewe keka keng tepapate.' ¹⁴ Kaimpa tebafa lehe jano reete tepitewa tewowo kealing ung tena keung, Kewe hetu kea wewele kehe anggur, ea kewe nekako kewawa ung lehewe epanene.' ¹⁵ Kaimpa, tewe ke terona lehe pengti wa lehe anggur pa tejako kewa. peapa jaleha keba lehe ba jaleha kele tebaing? ¹⁶ Ke kekakoti pa teba-teba lehe jano reete kejifata-ta,pa leheing keleleng-leng teba hing.'' Poing teba nawo teri hoho ahakelai wepe, tewe teninite, ''Jaing pelewang-wang katu.'' ¹⁷ Anaing-angra, Yesus kekengte tewe keleng, Noingpa, janaha na ayat wea: 'Wung keba paa jano keleile keloti keti lelang Wung ileto Mazmur 118;22 ¹⁸ Nebawe ba meko meeme fe wungra petaku kang-kang pa meba ing wungwe me ing fake.'' ¹⁹ Poing teba-teba Taurat fojang pa imam rube hutewetepa ja ahakelai ing pikelei tepa tewe, tewe tepungtu Yesus tekeke poing. Anaing-angra, tewefemo teba nawo. Peana kekengna wa Janefunete teba Taimbe reete ²⁰ Kaimpa, tebafa Taurat fojang Yesus teketupa fie pa teba narang-rang ung teing luto tete teteri teing pung efeng ung Yesus tekepeko tejeng-jengte ung Ke tekekete jalelepa keleng i Kelei kewo pa Kewe kehetimu ma keke pa janoba gubernur. ²¹ Teba-teba teniko tete tera jengte Yesus, ''Koru, newe ru Me pipemepe pa jamenapung mepe peing bamuang fata. Me nebara mekopepe kape, peana Ai lengke bamuang. ²² Anara newe neka taimbe nane fufu Kaisar na nefufuka.'' ²³ Anaing-angra, Yesus kelu tewe tewehi puete pa tewowo pitee, ²⁴ ''Eweka enalung Niwe. Baleng pa japo bake motu taimbe ing. Teni pate, ''Baleng pa japo Kaisar.'' ²⁵ Pea, Yesus lengte tewe, ''Noingpa anaing, ewe leng-leng Kaisar jaing Kaisarke, pa ewe leng-leng Ai le jaing pe Aike.'' ²⁶ Anate ing-ang, teba-teba tete Yesus piti kekepa tekepepe te-Ke tetetape tebapaho; teeng tape pi-Ke lei pa tepinaka. Teba Saduki Tejeng e ²⁷ Peteheing, teba narang-rang Saduki, teba kang ing teba lefupate teni keing ong, pa tewe jengte-Ke, ²⁸ ''Koru, Musa pokelena wea kotene, ana kebaleng-kebaleng kewa, ke eke pa koka, joke baleng-baleng ung pe kewewe kebaleng ing-ang pa ko tena tete kebaleng ing keke. ²⁹ Nowea, teba napang hengtong tetulengtu, jote kebahu upong kele, peapa kewa koka. ³⁰ Anateing-ang, jote keba hingtung peume ing kewe pa kewa pera koka ³¹ Pea, jote keba ke hengtong peume ing kewe pa jawe pelewang wakote jote keba napahengtong, tebing fata koka. ³² Wakote pepape ing, peume ing pera pepang. ³³ Peanya wakote bang pi teririte, baing ba ke peume pe pampe teba napahengtong peume ing pe teweko ete.'' ³⁴ Yesus lengte tewe, ''Teba-teba powe upong mepepe pa ra upong mepepe, ³⁵ Anara teba-teba noingte kangtete pera tewewete fitong petetetu, pa wa neba nelefu pate perawa neba wung nete, upongra netetekate fang-fangra upong netetekate. ³⁶ Tewe tebing-bing kate tewera ana teba fangpa. Tewe Ai teangku-teangku keke tewe telefute wa neba wung nete. ³⁷ Musa kewenalung teba-teba telefu pate teja tebing kangpe kepole wa atangpa rae. Wakang ing, Tata keleng ana 'Ai Abraham, Ai Ishak, pa Ai Yakub.' ³⁸ Keing Ai teba bingka keweing Ai neba mete, peing neba nalungpa mete Keho. ³⁹ Wakote, teba narang-rang teba ropo Taurat fojang yenite, ''Koru pina Meme bamuang.'' ⁴⁰ Pa, tebaung pi kekaki-Ke tejengka Kristus keing Tata ⁴¹ Anaing-ang, Yesus lengte tewe, ''Tunaneko teba teniete Kristus keing Daud Oke? ⁴² Tunawe ropo Mazmur Daud kewoleng 'Tata Ai keleng te Meba rube nine, Metamu meme no nalo-Nine, ⁴³ Wakote Niwe teba-teba feng-feng-Meme nilehe tete tang e-Meme. '''Mazmur 110;1 ⁴⁴ Ana keleng Kristus keing 'Keba rube,' tunane Kristus Daud Oke.'' Ne engmomo Teba-teba ropo Taurat fojang ⁴⁵ Poing teba nawo teri, Yesus leng pate teangku-teangku-Keke, ⁴⁶ E eng momo teba-teba ropo fojang leng tejaete ro kakafa tehe ete, tepungtu te tabengja ele e jata jeng tejapa mete jeng epate motu sinagoge-sinagoge, pa jeng ana jeng teba tafa jengja ungtete ete pestana. ⁴⁷ Tewe teba paa-paa lolo tete ete teume ro-ro pa lengma tu-tu lupompong kakafa tete ete ung teba te tefefe. Teba-teba noing teing ari reng-reng tewe-tewe te.''